40.2 C
Phnom Penh

ខ្មែរ​កម្ពុជា​ក្រោមគ្រោងធ្វើ​ការ​​តវ៉ា​នៅមុខ​​ស្ថានទូត​​វៀតណាម​

ដោយ ឌឹ ខេមបូឌា ដេលី

បទវិភាគ

សហគមន៍​ខ្មែរ​កម្ពុជា​ក្រោយ​​ជា​អង្គការ​ក្រៅ​រដ្ឋាភិបាល​មួយ​ ដែល​តំណាង​ឲ្យ​​ជន​ជាតិ​ភាគ​តិច​​មួយ​នេះ​​នៅ​ក្នុង​ប្រទេស​កម្ពុជា​​បាន​ជូន​ដំណឹង​​ទៅ​សាលា​រាជធានី​​ភ្នំពេញ​​កាល​ពី​ម្សិលមិញ​ថា ខ្លួន​​មាន​បំណង​​ធ្វើ​ការ​​តវ៉ា​មួយ​ ដែល​មាន​​អ្នក​ចូល​រួម​​ប្រមាណ​២០០​នាក់​នៅ​ខាង​មុខ​ស្ថានទូត​វៀតណាម​នៅ​ថ្ងៃ​អាទិត្យ​។

លោក​ ថាច់ សេដ្ឋា ប្រធាន​សហគមន៍​ខ្មែរ​​កម្ពុជា​ក្រោម​​បាន​​មាន​ប្រសាសន៍​ថា អ្នក​តវ៉ា​​នឹង​​អំពាវនាវ​​ឲ្យ​ដោះលែង​អ្នក​ប្រឆាំង​​ជា​ខ្មែរ​កម្ពុជា​ក្រោម​​ចំនួន​ប្រាំបួន​នាក់​ រួម​ទាំង​ព្រះសង្ឃ​ពីរ​អង្គ​ផង​ ដែល​ត្រូ​វ​បាន​ចាប់​ខ្លួន​នៅ​ក្នុង​ប្រទេស​វៀត​ណាម​ និង​​ដែល​ត្រូវ​​រក​ឃើញ​​ជាប់​ពិរុទ្ធ​ភាព​ពី​បទ​ផ្សព្វផ្សាយ​ព័ត៌​មាន​មិន​ពិត​​ និង​​បង្ក​បញ្ហា​​ក្នុង​សង្គម​​នៅ​ឯ​សវនា​ការ​ជំនុំ​ជម្នះ​ពួក​គេ​​កាល​ពី​ថ្ងៃ​ទី​២៧ ខែ​កញ្ញា។

លោក​បាន​មាន​ប្រសាសន៍​ថា “យើង​​នឹង​​ដាក់​ញត្តិ​ទៅ​​ស្ថានទូត​វៀតណាម​ ហើយ​ស្នើ​សុំ​​ឲ្យ​ដោះ​លែង​ព្រះសង្ឃ​ទាំង​ពីរ​អង្គ​ និង​មនុស្ស​ប្រាំពីរ​នាក់​ផ្សេង​ទៀត​”។ លោក​បាន​មានប្រសាសន៍​ទៀត​ថា ក្រសួង​ការ​បរទេស​កន្លង​មក​​មិន​បាន​ឆ្លើយ​តប​​នឹង​សំណើរ​​សុំ​ឲ្យ​​បញ្ចុះ​បញ្ចូល​​ប្រទេស​វៀតណាម​​​ឲ្យ​ដោះ​លែង​អ្នក​ទោស​ទាំង​នេះ​ទេ​។

លោក​ ប៉ា សុជាតិវង្ស អភិបាល​​រាជធានី​ភ្នំពេញ​​បាន​បញ្ជាក់​​អះអាង​ថា ទទួល​បាន​លិខិត​​​នេះ​ហើយ​ ប៉ុន្តែ​​បាន​មានប្រសាសន៍​ថា លោក​ចាំ​បាច់​ត្រូវ​ជួប​ជាមួយ​មេដឹកនាំ​​ការ​តវ៉ា​​ជា​មុន​សិន​​ មុន​ពេល​​សម្រេច​​រឿង​នេះ​។ ខ្មែរ​ក្រោម​​សំដៅ​ដល់​សហគមន៍​ខ្មែរ​​ជន​ជាតិ​ភាគ​តិច​​នៅ​ក្នុង​ប្រទេស​វៀតណាម​​ភាគ​ខាង​ត្បូង​។ ជាញឹក​ញាប់​​សមាជិក​​នៃ​​សហ​គមន៍​ខ្មែរ​ក្រោម​ចោទ​​ប្រកាន់​រដ្ឋាភិបាល​វៀតណាម​​ថា រំលោភ​សិទ្ធិមនុស្ស​។ ក្នុង​រយៈ​ពេល​មួយ​ទសវត្សរ៍​កន្លង​មក​នេះ​​ខ្មែរ​​ក្រោម​​រាប់​មឺុន​នាក់​បាន​​ភៀស​ខ្លួន​ពី​ប្រទេស​វៀតណាម​​មក​ប្រទេស​កម្ពុជា​ និង​ប្រទេស​ថៃ៕

ប្រែសម្រួលដោយ តែម សុខុម​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស