មន្ត្រីគយស្រីលង្កាម្នាក់បាននិយាយកាលពីម្សិលមិញថា ជនជាតិខ្មែរចំនួនពីរនាក់ត្រូវបានឃាត់ខ្លួនកាលពីម្សិលមិញនៅក្នុងប្រទេសស្រីលង្កា ដោយសារតែពួកគេប៉ុនប៉ងចាកចេញពីប្រទេសនេះ ដោយនំាយកជាមួយខ្លួននូវដើមឈើក្នុងស្រុកមួយដើមទម្ងន់ប្រហែល៣៥គីឡូក្រាម ហើយដើមឈើប្រភេទនេះ គេអាចប្រើប្រាស់ជាប្រភពសម្រាប់ផលិតទឹកអប់។
បុរសជនជាតិខ្មែរទាំងពីរនាក់នេះ ម្នាក់អាយុ៥៦ឆ្នាំ និងម្នាក់ទៀត អាយុ៣០ឆ្នាំ ត្រូវបានឃាត់ខ្លួនមួយរយៈពេលខ្លី នៅវេលាម៉ោងប្រហែល១២និង៣០នាទីរំលងអធ្រាត្រ នៅអាកាសយានដ្ឋានអន្តរជាតិ កូឡុំបូ នេះបើយោងតាមលោក ឡេស៊្លី ហ្គាមីនី (Leslie Gamini) អ្នកនាំពាក្យគយស្រីលង្កា។
លោក ហ្គាមីនី បាននិយាយតាមទូរស័ព្ទពីរដ្ឋធានីកូឡុំបូ ប្រទេសស្រីលង្កា ថា “ មានដើម វ៉ាឡាប៉ាតា (Walla Patta) ពីកាបូប។ វាគឺជាដើមឈើស្រីលង្កាមួយប្រភេទ ហើយវាមានតម្លៃប្រហែល៣២៧.៥០០រូពី [ប្រហែល២.៥០០ដុល្លារ] ។ ពួកគេព្យាយាមនាំវាចេញដោយខុសច្បាប់ ទៅកាន់ទីក្រុងបាងកក តាម
ជើងយន្តហោះក្រុមហ៊ុនអាកាសចរណ៍ថៃអ៊ែរវ៉េ (Thai Airways)”។
លោកបានឲ្យដឹងបន្ថែមទៀតថា ជនជាតិខ្មែរទាំងពីរនាក់នេះត្រូវបានពិន័យជាប្រាក់១.៥២៤ដុល្លារ ហើយពួកគេបានបង់តាមការពិន័យនេះ និងត្រូវបានដោះលែងដោយមិនមានការសាកសួរ។ ដើម្បីនំាចេញដើមវ៉ាឡាប៉ាតា ត្រូវមានអាជ្ញាប័ណ្ណពីរដ្ឋាភិបាលស្រីលង្កា ដោយសារតែជ័រទឹក ដែលយកចេញពីដើមឈើនេះ ដែលត្រូវបានគេស្គាល់ថា ជាឈើអាហ្គា (Agarwood) អាចត្រូវបានប្រើប្រាស់ជាប្រភពសម្រាប់ផលិតទឹកអប់ ដែលមានតម្លៃខ្ពស់។
លើសពីនេះទៅទៀត ដើមនេះត្រូវបានអភិរក្សដោយអនុសញ្ញាស្តីពីពាណិជ្ជកម្មអន្តរជាតិលើពូជរុក្ខជាតិ និងសត្វព្រៃ ដែលជិតផុតពូជ និងត្រូវបានចុះបញ្ជីនៅក្នុងបញ្ជីពូជឈើក្នុងឧបសម្ពន្ធ២។ មានន័យថា ដើមនេះអាចត្រូវបានគំរាមកំហែង ដោយសកម្មភាពធ្វើឲ្យវិនាស ប្រសិនបើបទបញ្ញត្តិស្តីពីពាណិជ្ជកម្មលើរុក្ខជាតិនេះ មិនត្រូវបានអនុវត្តឲ្យបានតឹងរ៉ឹងទេនោះ៕
ប្រែសម្រួលដោយ ចេវ ប៊ុននី