អ្នកទោសរាប់រយនាក់ត្រូវបានជម្លៀសចេញពីពន្ធនាគារខេត្តបន្ទាយមានជ័យកាលពីរសៀលម្សិលមិញ បន្ទាប់ពីទឹកជំនន់បានបុកបំបាក់ជញ្ជាំងពន្ធនាគារមួយកង់ប្រវែង២០ម៉ែត្រ ហើយបានហូរចូលយ៉ាងខ្លាំងទៅក្នុងបរិវេណពន្ធនាគារ ដោយធ្វើឲ្យបន្ទប់ពន្ធនាគារជាច្រើនត្រូវជន់លិច។
យោងតាមលោក ស៊ុម ចាន់គា អ្នកសម្របសម្រួលប្រចាំខេត្តបន្ទាយមានជ័យនៅអង្គការសិទ្ធិមនុស្សអាដហុក បានឲ្យដឹងថា សន្ដិសុខពន្ធនាគារបានយកឈើទល់ជញ្ជាំងថ្ម ដែលទ្រុឌទ្រោមកាលពីយប់ថ្ងៃពុធ ដើម្បីទប់ទល់ទឹកជំនន់ ដែលចេះតែកើនឡើង។ ទឹកជំនន់បានបណ្ដាលឲ្យមនុស្សយ៉ាងតិច១០៤នាក់បាត់បង់ជីវិត និងបានធ្វើឲ្យខេត្តចំនួន១៩និងតំបន់ខ្លះនៅក្នុងរាជធានីភ្នំពេញត្រូវជន់លិច កាលពីប៉ុន្មានសប្ដាហ៍មុន។ ហើយជញ្ជាំងពន្ធនាគារបានបាក់ក្រោយម៉ោង១រសៀលបន្តិច។
លោក ចាន់គា បានលើកឡើងថា “អ្នកទោសប្រហែល៥០០នាក់កំពុងតែត្រូវបានជម្លៀសទៅកាន់ពន្ធនាគារខេត្តសៀមរាប ហើយអ្នកទោស៣៤៤នាក់ផ្សេងទៀត ត្រូវបានដឹកទៅកាន់ពន្ធនាគារខេត្តបាត់ដំបង”។ លោកបានបន្ថែមថា យោធា និងនគរបាលខេត្តបានចាប់ផ្ដើមបញ្ជូនអ្នកទោសឡើងលើរថយន្តនៅម៉ោងប្រហែល៣រសៀល។
លោកស្រី ជា សុធា អ្នកស្រាវជ្រាវពីពន្ធនាគារនៅខេត្តបន្ទាយមានជ័យ ដែលមកពីអង្គការសិទ្ធិមនុស្សលីកាដូបានលើកឡើងថា សន្ដិសុខពន្ធនាគារបានយាមអ្នកទោសជាប់ជានិច្ច ខណៈមន្ត្រីពន្ធនាគារជម្លៀសអ្នកទោសដែលមានអាយុច្រើន និងអ្នកទោសជាស្ត្រី ដែលមានកូនជាប់ជាមួយ។ លោកស្រីបានថ្លែងថា នៅពេលរថយន្តទី១មកដល់ មន្ត្រីពន្ធនាគារត្រូវតែយាមនៅកន្លែងជញ្ជាំងដែលបាក់ ខណៈនគរបាលបញ្ជូនអ្នកទោសជាស្ត្រី និងកូនៗរបស់ពួកគេឡើងលើរថយន្ត”។ លោកស្រីបានបន្ថែមថា គ្មានអ្នកទោសណាម្នាក់ប៉ុនប៉ងគេចខ្លួននោះឡើយ។ លោកស្រីបានថ្លែងបន្តទៀតថា “ជញ្ជាំងមួយកង់ប្រវែងប្រហែល២០ម៉ែត្របានបាក់ ហេតុដូច្នេះហើយវាមានប្រឡោះប្រហោងធំណាស់”។ លោកស្រីបានបន្តទៀតថា ទឹកជំនន់កាលពីឆ្នាំ២០០៩ ក៏បានធ្វើឲ្យជញ្ជាំងពន្ធគាររងការខូចខាតដែរ។
របាយការណ៍ថ្មីៗនេះរបស់អង្គការសិទ្ធិមនុស្សអាដហុក បានបង្ហាញថា កាលពីខែឧសភា ឆ្នាំមុន ពន្ធនាគារខេត្តបាត់ដំបង ដែលអាចផ្ទុកអ្នកទោសបានត្រឹមតែ៦៥០នាក់នោះ បានដាក់អ្នកទោសរហូតដល់ទៅ១.២០៧នាក់ រីឯពន្ធនាគារខេត្តសៀមរាបវិញ ដែលផ្ទុកអ្នកទោសបានត្រឹមតែ១.០០០នាក់នោះ ក៏បានដាក់អ្នកទោសលើសទៅដល់១.២៣៦នាក់ដែរ។
កាលពីរសៀលម្សិលមិញ លោក រ៉ន វ៉ាន់ឆន អ្នកស្រាវជ្រាវពីពន្ធនាគារនៅខេត្តបាត់ដំបងដែលមកពីអង្គការសិទ្ធិមនុស្សលីកាដូបានបញ្ជាក់ថា អ្នកទោស៣០០នាក់រួមទាំងអ្នកទោសជាស្ត្រី១២៥នាក់ផង ត្រូវបានដឹកទៅកាន់ពន្ធនាគារខេត្តបាត់ដំបង។ លោកបានលើកឡើងថា “យើងមានអ្នកទោសច្រើនពេករួចទៅហើយនៅទីនេះ ប្រសិនបើយើងដាក់អ្នកទោសបន្ថែមទៀត វាអាចនឹងមានគ្រោះថ្នាក់ដល់សុខភាពរបស់ពួកគេ។ ខេត្តផ្សេងៗគួរតែសហការហើយជួយយកអ្នកទោសខ្លះ”។
លោក ញឹម វណ្ណដា អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍ថា ទឹកជំនន់បានធ្វើឲ្យប៉ះពាល់ដល់ប្រជាពលរដ្ឋ១,៥លាននាក់ ដោយធ្វើឲ្យផ្ទះសំបែង១២០.០០០ខ្នងត្រូវជន់លិច ប្រជាពលរដ្ឋ២៥.០០០គ្រួសារត្រូវជម្លៀស និងដំណាំស្រូវប្រមាណ២៥០.០០០ហិកតានៅទូទាំងប្រទេសក៏ត្រូវជន់លិចដែរ។
ក្នុងរាជធានីភ្នំពេញទឹកជំនន់ ដែលបានកើនឡើងដោយសារភ្លៀងធ្លាក់ខ្លាំងកាលពីដើមសប្ដាហ៍ ឥឡូវនេះបានស្រកចុះទៅវិញហើយ ប៉ុន្តែប្រជាពលរដ្ឋរាប់រយគ្រួសារនៅក្នុងខណ្ឌសែនសុខ ខណ្ឌមានជ័យ និងខណ្ឌពោធិ៍សែនជ័យ កំពុងទន្ទឹងរង់ចាំទឹកស្រកចុះទៅវិញកាលពីម្សិលមិញ។
លោក ដួង ចាន់សារ័ត្ន ប្រធានអង្គភាពលូទឹកនៅក្រសួងសាធារណការនិងដឹកជញ្ជូន បានទទួលស្គាល់ថា ប្រព័ន្ធលូនៅក្នុងរាជធានីគឺត្រូវការការយកចិត្តទុកដាក់ជាចាំបាច់។ លោកបានមានប្រសាសន៍ថា “ជាការពិតណាស់យើងត្រូវការលូបន្ថែម ហើយចំាបាច់ត្រូវតែស្ដារលូដែលមានស្រាប់។ សាលារាជធានីមានផែនការធ្វើដូច្នោះរួចហើយ”។
ជាការឆ្លើយតបនឹងទឹកជំនន់ទូទាំងប្រទេស រដ្ឋសភាបានចេញសេចក្ដីថ្លែងការណ៍មួយអំពាវនាវឲ្យសប្បុរសជនទាំងក្នុងស្រុក និងក្រៅស្រុកជួយប្រជាពលរដ្ឋខ្មែររងគ្រោះដោយទឹកជំនន់ជាង៨០.០០០នាក់ ពីព្រោះពួកគេកំពុងជួបការលំបាក ហើយបានបាត់បង់ទ្រព្យសម្បត្តិ និងផលដំណាំស្ទើរគ្មានសល់៕
(រាយការណ៍បន្ថែមដោយ Matt Blomberg )
ប្រែសម្រួលដោយ ស៊ា ស៊ុយឈាង