31 C
Phnom Penh

ដក​ហូត​​កាំ​ភ្លើង​ខ្លី​​​​​ពី​បុរស​ម្នាក់​នៅ​កន្លែង​ជួប​ជុំរបស់​សមា​គម​គ្រូ​បង្រៀន

ដោយ ឌឹ ខេមបូឌា ដេលី

បទវិភាគ

ពិធី​​ជួប​ជុំ​គ្នាដ៏​តូច​មួយ​ដើម្បី​ប្រារព្ធ​ទិវា​គ្រូ​បង្រៀន​ពិភពលោក​នៅ​ទីលាន​ប្រជា​ធិប​តេយ្យ​ក្នុង​រាជ​ធានី​ភ្នំពេញ​ បាន​ធ្លាក់​ចូល​ភាព​ចលាចល​មួយ​សន្ទុះ​ កាល​ពី​ម្សិល​មិញ​នៅ​ពេល​ដែល​ក្រុម​អ្នក​​ចូល​រួម​បាន​ចាប់​យក​កាំភ្លើង​ខ្លី​​ពី​បុរស​ម្នាក់​ដែលធ្វើ​ការ​ឲ្យ​ក្រសួង​ព័ត៌​មាន បន្ទាប់​ពី​ជន​នេះ​បាន​សម្រុក​ចូល​ទៅ​មុខ​ក្រុម​មនុស្ស​ទាំង​នោះ​។

ភឿង​​ ​ឈឿន​ ត្រូវ​​​​បាន​នាំ​ខ្លួន​​​ដោយ​មន្រ្តី​កង​រាជ​​អាវុធ​ហត្ថ​ម្នាក់​បន្ទាប់​ពី​បាន​​រក​ឃើញ​​​​​​អាវុធ​​​​​​ពេល​​​កំពុង​​​ថត​​​រូប​​​ព្រះ​​​សង្ឃ​​​នៅ​​​ក្នុង​ពិ​ធី​ប្រារព្ធ​ទិវា​គ្រូ​បង្រៀន​ពិភព​លោក​​​​ដែល​ជួប​​​ជំុ​​​គ្នា​នៅ​​​ទីលាន​​​ប្រជា​​​ធិប​​​តេ​យ្យ​​​កាល​ពី​ម្សិល​​​មិញ។ (Kevin Doyle/The Cambodia Daily)
ភឿង​​ ​ឈឿន​ ត្រូវ​​​​បាន​នាំ​ខ្លួន​​​ដោយ​មន្រ្តី​កង​រាជ​​អាវុធ​ហត្ថ​ម្នាក់​បន្ទាប់​ពី​បាន​​រក​ឃើញ​​​​​​អាវុធ​​​​​​ពេល​​​កំពុង​​​ថត​​​រូប​​​ព្រះ​​​សង្ឃ​​​នៅ​​​ក្នុង​ពិ​ធី​ប្រារព្ធ​ទិវា​គ្រូ​បង្រៀន​ពិភព​លោក​​​​ដែល​ជួប​​​ជំុ​​​គ្នា​នៅ​​​ទីលាន​​​ប្រជា​​​ធិប​​​តេ​យ្យ​​​កាល​ពី​ម្សិល​​​មិញ។ (Kevin Doyle/The Cambodia Daily)

វាជា​ការ​​​ប្រឆាំង​​នឹង​បទ​បញ្ជា​របស់​សាលា​រាជ​ធានី​កាល​ពីសប្តាហ៍​មុន​ ដែល​​​បានហាម​ឃាត់​មិន​ឲ្យ​មាន​ការ​ជួប​ជុំ​គ្នា​នេះ ព្រឹត្តិការណ៍​​​​នេះ​បាន​បើក​​នៅម៉ោង​ប្រហែល​៨ និង​៣០​នាទី​ព្រឹក ដោយ​មាន​តំណាង​មក​ពី​សមាគម​គ្រូ​បង្រៀន​ឯក​រាជ្យ​កម្ពុជា​ ដែល​មាន​ទំនាក់​ទំនង​ជាមួយ​គណ​បក្ស​ប្រឆាំង​ចូល​ទៅ​​ឈរ​​នៅ​លើ​កៅអី​ឈើ​តូច​មួយ​​នៅ​កណ្តាល​សួន​​​​​​​នេះ ដើម្បី​អំពាវ​នាវ​ឲ្យ​មាន​ការ​​ដំឡើង​ប្រាក់​ខែ​ឲ្យ​​​គ្រូ​បង្រៀន​ឲ្យ​បាន​​មួយ​លាន​រៀល​ក្នុង​មួយ​ខែ​។

តំណាង​សមាគម​គ្រូ​បង្រៀន​កម្ពុជាឯក​រាជ្យបាន​ប្រាប់​អ្នក​ចូល​រួម​ប្រហែល​១៥០​នាក់ មុន​ពេល​​ប្រកាស​​​ជំទាស់​នឹង​​​សេចក្តី​សម្រេច​ហាម​ឃាត់​មិន​ឲ្យ​មាន​ការ​ជួប​ជុំ​គ្នា​នេះ​​​​ថា “យើង​​សូម​សើ្ន​ឲ្យ​រដ្ឋា​ភិបាល​ថ្មី​​ដំឡើង​​​​​​​ប្រាក់​ខែ​របស់​យើង​យ៉ាង​ហោច​ណាស់​សម្រាប់គ្រូប​ឋម​សិក្សា និង​សូម​​កុំរើស​អ៊ើង​ចំពោះ​សមាជិក​សហ​ជីព​របស់​យើង​”។ លោក​បាន​មាន​ប្រសាសន៍​ថា “សាលា​រាជ​​​​ធានី​មិន​អនុញ្ញាត​ឲ្យ​យើង​ជួប​ជុំ​គ្នា​ទេ​ ប៉ុន្តែយើង​បាន​ជំទាស់​​យ៉ាង​ដាច់​ខាត​ចំពោះ​រឿង​នេះ។ វា​ជាសិទ្ធិ​របស់​សិស្ស​ គ្រូ​បង្រៀន និង​ប្រជា​ពល​រដ្ឋ ក្នុង​ការ​​សំដែង​មតិ​នៅ​ក្នុង​ទី​​​លាន​ប្រជា​ធិប​តេយ្យ”។

នៅ​ផ្នែក​ខាងក្រោយ​ គេ​ឃើញ​មាន​រថ​យន្ត​ធំៗ​ដឹក​មន្ត្រី​កង​រាជ​អាវុធ​ហត្ថ​​ដែល​កាន់ ខែល ដំបង​ឆក់​ និង​​​ពាក់​​ប្រដាប់​ការពារ​​ដើរ​តាម​ផ្លូវ​លេខ​១១០​នៅ​ក្បែរ​នោះ​​អស់​រយៈ​ពេល​ប្រហែល​កន្លះ​ម៉ោង​ និង​បាន​ដាក់​កង​កម្លាំង​​ឲ្យ​ឈរ​ជា​ជួរ​នៅ​ចុង​ខាង​កើត​នៃ​ទីលាន​ប្រជា​ធិប​តេយ្យ​។

នៅ​ម៉ោង​ប្រហែល​៩ និង​២៥​នាទី​ព្រឹក​ នៅពេល​ដែល​តំណាង​សមាគម​គ្រូ​បង្រៀន​ឯករាជ្យ​កម្ពុជាប្រចាំ​ខេត្ត​កំពង់​ស្ពឺ​​ ចាប់​ផ្តើម​ឡើង​និយាយ​ ជម្លោះ​មួយ​បាន​កើត​ឡើង​នៅ​ខាង​មុខ​ក្រុម​មនុស្ស​ទាំង​នោះ​ ដោយ​អ្នក​​​ចូល​រួម​បាន​ចាប់​បុរស​ម្នាក់​​ដែល​មាន​ពាក់​ប័ណ្ណ​សារព័ត៌មាន​ដែល​បាន​ថត​រូប​ព្រះ​សង្ឃ​ប្រហែល​២០​អង្គ​ គង់​នៅ​ពី​ក្រោយ​អ្នក​រៀប​ចំ​​​​ពិធី​ជួប​ជុំ​ ហើយ​​បាន​ដក​ហូត​យក​កាំភ្លើង​ខ្លី​មួយ​ដើម​ពី​ជន​នេះ។

លោកស្រី មូរ សុខហួរ តំណាង​រាស្ត្រ​ជាប់​ឆ្នោត​របស់​គណ​បក្ស​សង្គ្រោះ​ជាតិ​ដែល​កំពុង​ឈរ​នៅ​ជួរ​មុខ​​នៅ​កន្លែង​ជួប​ជុំ​​គ្នា​ដ៏​តូច​នេះ​ដែរ​នោះ​បាន​មាន​ប្រសាសន៍​ថា លោក​ស្រី​បាន​ជួប​នឹង​បុរស​នេះ​ដែល​មាន​ពាក់​មួក​កាតឹប វ៉ែន​តា​​ខ្មៅ និង​កាស​ពាក់​ត្រចៀក​ បន្ទាប់​ពី​បុគ្គលិក​របស់​លោក​ស្រីមួយ​​ចំនួន​បាន​ប្រកាស​ប្រាប់​លោក​ស្រី​ថា ជន​នេះ​មាន​កាំភ្លើង​ខ្លី​លាក់​ទុក​​នៅ​ក្នុង​ចង្កេះ​ខោ​។

លោក​ស្រី​ មូរ សុខ​ហួរ បាន​មាន​ប្រសាស​ន៍​ថា “ក្រុម​របស់​យើង​បាន​ចាប់​ផ្តើម​​ពិនិត្យ​មើល​គាត់​ គាត់​ចេញ​មក​ពី​កន្លែង​ណា​មួយ ហើយ​យើង​​ស្តាប់​ឮ​​ការ​សន្ទនា​មួយ​ចំនួន​ថា គាត់​មក​ជាមួយ​មនុស្ស​ផ្សេង​ទៀត​ ហើយ​គាត់​សំដៅ​មក​រក​ព្រះសង្ឃ​តែ​ម្តង​”។ លោក​ស្រី​បាន​បន្ថែម​ថា បុរស​នេះ​បាន​មក​ជាមួយ​មនុស្ស​ប្រាំ​នាក់​ទៀត។ លោក​ស្រី​បាន​ពន្យល់​ប្រាប់​ថា “ខ្ញុំ​បាន​ទៅ​ជិត​គាត់​ និង​បាន​ដឹង​យ៉ាង​ច្បាស់​ថា គាត់​មាន​កាំភ្លើង​ខ្លី​មួយ​ដើម​។ គាត់​បាន​ប្រាប់​ខ្ញុំ​ថា ‘ខ្ញុំ​មិន​មាន​កាំភ្លើង​ទេ’ ហើយ​ខ្ញុំបាន​និយាយ​ថា តើ​អ្វី​នៅ​ក្នុង​អាវ​របស់​លោក? ហើយ​គាត់​បាន​ចាប់​ផ្តើម​ដើរ​ចេញ​តែ​ម្តង”។

ដោយ​មាន​ភាព​ចលាចល​ស្រប​ពេល​នឹង​មាន​សម្រែក​ស្រែក​ថា មាន​ជន​ប្រដាប់​អាវុធ​ម្នាក់​ស្ថិត​នៅក្នុង​ចំណោម​អ្នក​ចូល​រួម​នៅ​ជិត​លោក​ស្រី​ មូរ សុខហួរ​ នោះ​ អ្នក​​ស្រី យ៉ាង សុភ័ណ អាយុ៣៣​ឆ្នាំ ជា​អ្នក​ចូល​រួម​នៅ​ក្នុង​ការ​ជួប​ជុំ​គ្នា​នេះ បាន​ចាប់​ទាញ​​យក​កាំភ្លើង​​ពី​បុរស​នេះ​។

អ្នក​​ស្រី សុភ័ណ បាន​និយាយ​ថា “ពួក​គេ​បាន​រុញ​គាត់​ទៅ​ខាង​មុខ ហើយ​យើង​បាន​ឃើញ​ប័ណ្ណ​សារព័ត៌​មាន​របស់​គាត់​ ​និង​ឃើញ​កាំភ្លើង​ខ្លី​នៅដៃ​របស់​គាត់។ យើង​បាន​ចាប់​យក​ប័ណ្ណ​​នោះ​ ហើយ​បន្ទាប់​មក​យើង​បាន​ចាប់​យក​​កាំភ្លើង​នោះ​តែ​ម្តង​”។​អ្នក​​ស្រីបាន​បន្ថែម​ថា ក្រុម​អ្នក​ចូល​រួម​ជឿ​ថា បុរស​នេះ​មាន​ផែន​ការ​សម្លាប់​លោក​ រ៉ុង ឈុន ប្រធាន​សមាគម​គ្រូ​បង្រៀន​​កម្ពុជា​ឯក​រាជ្យ​។ អ្នក​ស្រីបាន​ពន្យល់​ប្រាប់​អំពី​ប្រធាន​សមាគម​គ្រូ​បង្រៀន​ដែល​និយាយ​ឥតសំចៃ​មាត់​ និង​ជា​អ្នក​គាំ​ទ្រ​គណបក្ស​ប្រឆាំង​ដោយ​ចំហ​នេះ​ថា “​ពួ​ក​គេ​រៀប​ចំ​ផែន​ការ​សម្លាប់​​ លោក រ៉ុង ឈុន”។ អ្នក​​ស្រី សុភ័ណ បាន​និយាយ​ថា ក្រោយ​មក​​​​អ្នកស្រីបាន​ប្រគល់​កាំភ្លើង K54 ផលិត​នៅ​ប្រទេស​ចិន​​ ដែល​មាន​ស្តង់​ដារ​​សម្រាប់​មន្ត្រីនគរ​បាល​ប្រើ​ប្រាស់​ ព្រម​ទាំង​ប័ណ្ណ​សារ​​​ព័ត៌​មាន​ និង​កាតមួយ​ទៀត​របស់​បុរស​នេះ ទៅ​ឲ្យ​លោក​ស្រី មូរ សុខហួរ និង​លោក សុន ឆ័យ​​​ តំណាង​រាស្ត្រ​ជាប់​ឆ្នោត​គណ​បក្ស​សង្គ្រោះ​ជាតិ។

បន្ទាប់​ពី​ក្រុម​អ្នក​ចូល​រួម​បាន​​ចាប់​ទាញ​បុរស​នេះ​ទៅ​ខាង​កើត​ទីលាន​ប្រជា​ធិប​តេយ្យ​ ដោយ​អ្នក​ខ្លះ​ហៅ​ជន​នេះ​ថា ជា​ជន​ក្បត់​នោះ​ អ្នក​ផ្សេង​ទៀត​ស្រែក​ថា “ចាប់​ខ្លួន​វា សម្លាប់​វា​​ចោល​ទៅ​” ហើយ​បុរស​ម្នាក់​បាន​រត់​ទៅ​វាយ​គាត់​នឹង​កណ្តាប់​ដៃ​ចំ​ក្បាល ហើយ​កង​រាជ​អាវុធ​ហត្ថ​បាន​ចាប់​គាត់​ ហើយ​​​អូស​គាត់​ទៅ​ពី​ក្រោយ​ជួរ​នគរ​បាល ហើយ​មិន​អនុញ្ញាត​ឲ្យ​អ្នក​ផ្សេង​ឆ្លង​កាត់​ឡើយ។

អ្នក​ចូល​រួម​មួយ​ចំនួន​បាន​និយាយ​ថា ពួក​គេ​បាន​ឃើញ​គេ​ដឹក​បុរស​នេះ​ចេញ​តាម​ម៉ូតូ​ ដោយ​មិនដាក់​ខ្នោះ​ដៃ​ជាមួយ​បុរស​ពីរ​នាក់​ទៀត​ ហើយ​លោក អំ សំអាត អ្នក​គ្រប់​គ្រង​ផ្នែកបច្ចេក​ទេស​នៅអង្គការ​លីកាដូ បាន​មាន​ប្រសាសន៍​នៅ​ពេល​ក្រោយ​មក​ថា បុរស​នេះ​ត្រូវ​បាន​បញ្ជូន​ទៅមន្ទីរ​ពេទ្យ​ជាមួយ​នឹង​ស្នាម​របួស​បន្តិច​បន្តួច។

បន្ទាប់​ពី​នោះមក មានការពិភាក្សា​គ្នា​ដ៏​តាន​តឹង​ រវាង​លោក សុន ឆ័យ លោក​ស្រី​ មូរ សុខហួរ និង​លោក មាស​ ច័ន្ទ​ពិសិដ្ឋ​ ព្រះ​រាជ​អាជ្ញា​រង​សាលា​ដំបូងរាជ​ធានី​ភ្នំពេញ​​ ហើយ​នៅ​ពេល​នោះ​តំណាង​រាស្ត្រ​ជាប់​ឆ្នោត​គណ​បក្ស​សង្គ្រោះជាតិ​បាន​ប្រគល់​កាំភ្លើង​ខ្លី​ និង​កាត​របស់​បុរស​នេះ​ទៅ​ឲ្យ​ព្រះ​រាជ​អាជ្ញា​រូប​នេះ ប៉ុន្តែ មិនបាន​​​ប្រាប់​ឈ្មោះ​អ្នក​​ស្រី សុភ័ណ ​​​​ដែលជា​អ្នក​​ចាប់​ទាញ​កាំភ្លើង​ពី​បុរស​នេះ​ទេ​ ដោយ​សារ​មាន​កង្វល់​អំពី​សុវត្ថិ​ភាព​របស់​​អ្នក​​ស្រី​។

មុនពេលលើក​ដៃ​ចង្អុល​ទៅ លោក សុន ឆ័យ និងចោទ​គាត់​ថា មិន​គោរព​ស្ថាប័ន​រដ្ឋ​ចំពោះ​ការ​មិន​ប្រគល់​​អ្នក​ស្រី សុភ័ណ​ ​នោះ លោក ច័ន្ទពិសិដ្ឋ បាន​មាន​ប្រសាសន៍​ថា “យើង​ត្រូវ​​ការ​មនុស្ស​ដែល​បាន​យក​កាំភ្លើង​ពី​ជន​នេះ​ ពីព្រោះ​យើង​ត្រូវ​ការ​ស៊ើប​អង្កេត​”។

បន្ទាប់​មក​ លោក​ស្រី មូរ សុខហួរ បាន​ប្រគល់​ប័ណ្ណ​សារព័ត៌​មាន​ថត​ចម្លង​របស់​ជន​ប្រដាប់​អាវុធ​នេះ​ដែល​មា​ន​ឈ្មោះថា ​​ភឿង​ ឈឿន អ្នក​យ​ក​ព័ត៌មាន​​របស់​គេហ​ទំព័រ​ព័ត៌​មាន​ “ Mid.P.P” របស់​​មន្ទីរ​​ព័ត៌​មាន​រាជ​ធានី​ភ្នំពេញ​​​។

កាល​ពីម្សិល​មិញ​គេហទំព័រ​របស់​មន្ទីរ​ព័ត៌​មាន​រាជ​ធានី​បង្ហាញ​សារ​មួយ​ថា “កំពុង​ដំណើរ​ការ​បង្កើត​ឡើង” ប៉ុន្តែ ឯក​សារ​ចុះ​ឈ្មោះ​របស់​គេ​ហទំព័រ​ព័ត៌​មាន​នេះ​បង្ហាញ​ថា គេ​ហទំព័រ​នេះ​ជា​កម្ម​សិទិ្ធ​របស់​លោក ឃុត សំខាន់ ប្រធាន​មន្ទីរ​ព័ត៌​មាន​​រាជ​ធានី​។

លោក សំខាន់ បាន​បញ្ជាក់​តាម​ទូរ​ស័ព្ទ​ថា លោក ឈឿន គឺ​ជា​បុគ្គលិក​របស់​មន្ទីរ​ព័ត៌​មានរាជ​ធានី​ ដែល​ជា​សាខា​នៅ​រាជ​ធានី​ភ្នំពេញ​របស់​ក្រសួង​ព័ត៌​មាន​ ហើយ​បាន​មាន​ប្រសាសន៍​ថា លោក​កំពុង​ធ្វើ​ដំណើរ​មក​ពី​ខេត្ត​ចូល​រាជ​ធានី​ដើម្បី​ដោះ​ស្រាយ​បញ្ហា​របស់​លោក ភឿង ឈឿន។

លោក សំខាន់ បាន​មាន​ប្រសាសន៍​ថា “ភឿង ឈឿន បាន​ធ្វើ​ការ​ឲ្យ​មន្ទីរ​របស់​យើង​តាំង​ពី​ឆ្នាំ​២០១២ ហើយ​គាត់​ទទួល​បន្ទុក​ផ្នែក​គេហ​ទំព័រ​។ ខ្ញុំ​មិន​ដឹង​ថា គាត់​បាន​កាំភ្លើង​ពី ណា​ទេ​”។ លោក​បាន​មាន​ប្រសាសន៍​ថា “គាត់​ជា​មនុស្ស​ស្លូត​បូត ហើយ​គាត់​យក​ព័ត៌​​មាន​ឲ្យ​យើង​ដូច​ជា ព័ត៌​មាន​សង្គម ​និង​វិស័យ​ផ្សេងៗ​ទៀត។ គាត់​ជាអ្នក​ជំនាញ​ផ្នែកព័ត៌​មាន​វិទ្យា​ ដូច្នេះ​ខ្ញុំ​បាន​ចាត់​តាំង​ឲ្យ​គាត់​ធ្វើ​ការ​ផ្នែកគេ​ហ​ទំព័រ​របស់​មន្ទីរ​នេះ​” ។

ប៉ុន្តែ​លោក​​មិន​និយាយ​លម្អិត​អំពី​ប្រភេទ​ព័ត៌​មាន​ដែល​មន្ទីរ​ព័ត៌​មាន​រាជ​ធានី​ផលិត​សម្រាប់​គេហ​ទំព័រ​ដែល​មិន​​ទាន់​មាន​​របស់​ខ្លួន​នោះទេ​។ ទំព័រ​ហ្វេស​ប៊ុក​ដែល​​​ប្រហែល​ជា​មិន​​ទាន់​មាន​​របស់​មន្ទីរ​ព័ត៌​មាន​រាជធានី ដែល​មាន​រូប​សញ្ញា​របស់​ក្រសួង​ព័ត៌​មាន​ ជា​រូប​​ធំ​ៗ​ពីរ​របស់​ខ្លួន​ បង្ហាញ​ពី​ព័ត៌​មាន​មួយ​ចំនួន​តាំង​ពី​ខែ​កក្កដា​ និង​ខែ​មករា​ ឆ្នាំ​២០១២ ដូច​ជា​អត្ថបទ​និយាយ​អំពី​​ក្រសួង​ព័ត៌​មាន​​ហាម​ឃាត់​សារ​ព័ត៌​មាន​មិន​ឲ្យ​ចុះ​ផ្សាយ​រូប​ភាព​​ហិង្សា​សា​។

លោក ខៀវ កាញារីទ្ធ រដ្ឋ​មន្ត្រី​ក្រសួង​ព័ត៌​មាន​បាន​បដិសេធ​ថា ក្រសួង​ព័ត៌​មាន​មិន​បាន​បំពាក់​អាវុធឲ្យ​បុគ្គលិក​របស់​ខ្លួន ឬ​បញ្ជូន​មនុស្ស​ឲ្យ​ទៅ​យក​ការណ៍​អំពី​ការ​ជួប​ជុំ​ពាក់​ព័ន្ធ​នឹង​គណ​បក្ស​ប្រឆាំង​ទេ​។ លោក​បាន​មាន​ប្រសាសន៍​ថា “យើង​មិន​មាន​នរណា​ម្នាក់​មាន​កាំភ្លើង​ ឬធ្វើ​ជា​ចារកម្ម​ទេ​។ យើង​បញ្ជូន​តែ​អ្នក​ថត​វីដេអូ​​ឲ្យ​ទៅ​ថត​តែ​​វីដេអូ​ប៉ុណ្ណោះ​ ​ដូច្នេះ​ប៉ុណ្ណឹង​វា​ហួស​ពី​គ្រប់​​​​គ្រាន់​ទៅ​ហើយ​”។

នៅ​ពេល​សួរ​ចំៗ​អំពី​ករណី​លោក ភឿង ឈឿន លោក​ ខៀវ កាញារីទ្ធ​ បានមាន ​ប្រសា​​​សន៍​ថា “យើង​​អាច​ធានា​អះ​អាង​ចំពោះ​លោក​ថា យើង​គ្មាន​បុគ្គលិក​​ណា​ម្នាក់​ដែល​មាន​កាំភ្លើង​នោះទេ​”។ កាត​មួយ​ទៀត​របស់ ភឿង ឈឿន ដែល​​​​ស្ថិត​នៅ​ក្នុង​កាបូប​ជាមួយ​ប័ណ្ណសារព័ត៌​មាន​របស់​គាត់​នោះ​មាន​ឈ្មោះថា ភឿង ឈឿន ជាតំណាង​ផ្នែក​លក់​របស់​ក្រុម​ហ៊ុន​មង្គល​រិទ្ធ​ អាហរណ​នីហរណ។

ទោះជា​យ៉ាង​ណា​ មនុស្ស​ម្នាក់​ដែល​ត្រូវ​បាន​ទាក់​ទង​តាម​លេខ​ទូរស័ព្ទ​របស់​ក្រុម​ហ៊ុន​នេះ​បាន​បដិសេធ​ថា មិន​បាន​ជួល​ ឬ​ធ្លាប់​ស្គាល់​ ភឿង ឈឿន​ ទេ។ ការរក​ឃើញ​ជន​ប្រដាប់​អាវុធ​នៅ​កន្លែង​ជួប​ជុំ​​ ដែល​មាន​ទំនាក់​ទំនង​ជាមួយ​គណ​បក្ស​ប្រឆាំង​នេះ កើត​មាន​ឡើង​ប៉ុន្មាន​ថ្ងៃ​បន្ទាប់​ពី​លោក ជាម យៀប តំណាង​រាស្ត្រ​គណ​បក្ស​ប្រជា​ជន​កម្ពុជា និង​ជា​អ្នក​នាំ​ពាក្យ​គណប​ក្ស​បានលើក​ឡើង​ពី​ការ​ស្លាប់​របស់​លោក សម រង្ស៊ី ប្រធាន​គណ​បក្ស​សង្គ្រោះ​ជាតិ​ដោយ​សារ​ធ្លាក់​យន្ត​ហោះ។ លោក​ ជាម ​យៀប បាន​មាន​ប្រសាសន៍​ថា ការ​លើក​ឡើង​​របស់​លោក​មិន​មែន​ជា​ការ​គំរាម​កំហែង​ទេ​ គ្រាន់​តែ​ជា​ការ​សង្កេត​ប៉ុណ្ណោះ។

នៅពេល​បញ្ចប់​ការ​ជួប​ជុំ​គ្នា​កាលពី​ម្សិល​មិញ​នេះ លោក រ៉ុង ឈុន ប្រធាន​សមាគម​គ្រូប​ង្រៀន​​កម្ពុជាឯក​រាជ្យ បាន​ថ្កោល​ទោស​ចំពោះ​វត្ត​មាន​របស់​ជន​ប្រដាប់​អាវុធ​រូប​នេះ​នៅ​​កន្លែង​ជួប​ជុំ​គ្នា​ ដោយ​លោក​ប្រាប់​ថា គម្រោង​ហែរ​ក្បួន​របស់​គ្រូ​បង្រៀន សិស្ស និង​ព្រះសង្ឃ​ ដើម្បី​យក​សំណើ​របស់​ខ្លួន​ទៅ​ជូន​ក្រសួង​អប់រំ​ នឹង​ត្រូវ​ពន្យារ​ពេល​ដោយ​សារ​ស្ថាន​ភាព​មិនល្អ​នៅ​ព្រឹក​នោះ​។

លោក រ៉ុង ឈុន បាន​ប្រាប់​អ្នក​ចូល​រួម​​ដោយ​ចង្អុល​ទៅ​មន្ត្រី​កង​រាជ​អាវុធ​ហត្ថ​ជា​ច្រើន​ ដែល​នៅ​តែ​មាន​វត្ត​មាន​នៅ​ភាគ​ខាង​កើត​នៃ​ទីលាន​ប្រជាធិបតេយ្យ​ថា “ យើង​ជា​គ្រូ​បង្រៀន​ទាំង​អស់​គ្នា​មាន​អារម្មណ៍​មិន​ល្អ​ទេ”។​លោក​​មាន​ប្រសាសន៍​ថា “មើល​​​​ទៅ​កង​រាជ​អាវុធ​ហត្ថ​នៅ​ទីនោះ​។ យើង​គ្រាន់​តែ​​​​គ្រូ​បង្រៀន​ប៉ុណ្ណោះ​ ហើយ​ពួក​គេ​បាន​ដាក់​ពង្រាយ​កង​រាជអាវុធ​ហត្ថ​ទូ​ទាំង​រាជ​ធានី”។

លោក​បាន​​សួរ​នៅ​ពេល​បិទ​ការ​ជួបជុំ​នៅ​មុន​ម៉ោង​១០ និង​៣០​នាទី​ព្រឹក​បន្តិច​ថា “មើល​​​ទៅ​កង​រាជ​អាវុធ​ទាំង​អស់នោះ ហើយ​សួរ​ថា មូលហេតុអី? មូល​ហេតុអី? ពីព្រោះ​ពួក​គេ​ខ្លាច​គ្រូ​បង្រៀន!”។ លោក ណៃ វ៉ាន់ដា អនុ​ប្រធាន​ផ្នែក​អង្កេត​របស់​អង្គការ​សិទ្ធិមនុស្ស​​អាដ​ហុក បាន​មាន​ប្រសាសន៍​ថា ភ័ស្តុតាង​ដែល​ព្រះ​រាជ​អាជ្ញា​បាន​ទទួល​ពី​លោកស្រី​ មូរ សុខហួរ និងលោក សុន ឆ័យ ត្រូវ​បាន​ប្រគល់​ទៅ​ឲ្យ​នគរ​បាលសង្កាត់​វត្ត​ភ្នំ​ ដែល​នៅ​ជិត​ទី​លាន​ប្រជាធិបតេយ្យ​ដើម្បី​​ចាត់​ការ​។

លោក វ៉ាន់ដា ​មាន​ប្រសាសន៍​ថា “យើង​​​​សូម​ឲ្យ​អាជ្ញា​ធរ​ពាក់​ព័ន្ធ​ ព្រមទាំ​ង​ព្រះ​រាជ​អាជ្ញា​ចោទ​ប្រកាន់​ជន​សង្ស័យ​រូប​នេះ។ មនុស្ស​​​​គ្រប់​គ្នា​នៅ​ទីនេះ​មើល​ឃើញ​ថា ​​​​​​បុរស​នេះ​ស្លៀក​ពាក់​ស៊ីវិល​ ប៉ុន្តែ មាន​កាំភ្លើង​ ហើយ​រឿង​នេះ​ត្រូវ​តែ​ស៊ើប​អង្កេត​”។

លោកឧត្តម​សេនីយ៍​ឯក ខេង ទីតូ អ្នក​នាំ​ពាក្យ​កង​រាជ​អាវុធ​ហត្ថ​​មិន​អាច​ទាក់​ទង​សុំ​ការ​អត្ថា​ធិប្បាយ​អំពី​ជោគ​វាសនា​របស់​ ភឿង ឈឿន បាន​ទេ៕

ប្រែ​សម្រួល​ដោយ មូល គឹមហឿន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស