29 C
Phnom Penh

គណ​បក្ស​ប្រជា​ជន​៖ ការ​ចរចា​​​​ជាប់​​​គាំង​​​ដោយ​សារ​ការ​ខ្វែង​គំនិត​គ្នា​នៅ​​​ក្នុង​​​បក្ស​ប្រឆាំង

ដោយ ឌឹ ខេមបូឌា ដេលី

បទវិភាគ

នាយក​ខុទ្ទកាល័យ​របស់​លោកឧបនា​យក​រដ្ឋមន្ត្រី​ ស ខេង ជា​រដ្ឋមន្ត្រី​ក្រសួ​ង​ម​ហាផ្ទៃ​មក​ពី​គណបក្ស​ប្រជា​ជន​កម្ពុជា​​ បាន​បន្ទោស​​​គណ​​​បក្ស​​​សង្គ្រោះជាតិ​​​​​ចំពោះ​ការជាប់​​​គាំង​​​នៅ​​​ក្នុង​​​ការ​​ចរចា​ ដែលអាចទម្លាយ​ភាព​ទាល់​​​ច្រក​ផ្នែកនយោ​បាយនាពេលបច្ចុប្បន្ន ដែល​បណ្តាល​​​ឲ្យ​​​សមាជិក​​​សភា​​​ជាប់​​​ឆ្នោត​​​ទាំង​​​៥៥​​​រូប​​​របស់​​​គណ​​​បក្ស​​​សង្គ្រោះ​​​ជាតិ​​​ធ្វើ​​​ពហិការ​​​មិន​​​ចូល​​​ប្រជុំសភានោះ។

គណ​​​បក្ស​​​សង្គ្រោះ​​​ជាតិ និង​​​គណ​​​បក្ស​​​ប្រជាជន​​​កម្ពុជា​​​បាន​​​ផ្អាក​​​ការ​​​ចរ​​​ចា​​​កម្រិត​​​កំពូល ​​​តែ​​​ប៉ុន្មាន​​​ថ្ងៃ​​​មុន​​​ពេល​​​​​គណ​​​បក្ស​​​ប្រជា​​​ជន​​​កម្ពុជា​​​បើក​​​សម័យ​​​ប្រជុំសភា​​​ដំបូង​​​ដោយ​​​គ្មាន​​​វត្ត​​​មាន​​​របស់​​​សមាជិក​​​សភា​​​មក​​​គណ​​​បក្ស​​​ប្រឆាំង​​​ កាល​​​ពី​​​ថ្ងៃទី​​​២៣ ខែ​​​កញ្ញា ហើយ​​​មិន​​​បាន​​​បន្ត​​​ការ​​​ចរ​​​ចា​​​ផ្លូវ​​​ការណាមួយ​​​តាំង​​​ពី​​​ពេល​​​នោះ​​​មក។

នៅ​​​ក្នុង​​​សេចក្តី​​​ប្រកាស​​​ព័ត៌​​​មាន​​​ដែល​​​ចេញ​​​ផ្សាយ​​​កាល​​​ពី​​​ថ្ងៃ​​​សៅរ៍ លោក ខៀវ សុភ័គ នាយក​​​ខុទ្ទកាល័យ​​​របស់​​​លោក ស ខេង​​​  ​ហើយ​​​​​​​​​​​​ក៏​​​ជា​​​អ្នក​​​នាំ​​​ពាក្យ​​​ក្រសួង​​​មហាផ្ទៃ​​​ផង​ដែរ​​​នោះ​​​​​​​​​បាន​​​បន្ទោស​​​គណ​​​បក្ស​​​ប្រឆាំង​​​​​​ចំពោះ​​​ការ​​​ជាប់​​​គាំង​​​នៅ​​​ក្នុងការ​​​ចរ​​​ចា​​​ ពី​​​ព្រោះ​​​មេ​​​ដឹក​​​​នាំ​​​គណ​​​បក្ស​​​ប្រឆាំង​​​ធ្វើ​​​ការ​​​ទាម​​​ទារ​​​ខុស​​​គ្នា​​​។

លោក​​​ឧត្តម​​​សេនីយ៍ឯក​​​ ខៀវ សុភ័គ បាន​​​លើក​​​ឡើង​​​នៅ​​​ក្នុង​​​សេចក្តី​​​ប្រកាស​​​ព័ត៌​​​មាន​​​ដដែល​​​នេះថា “ឯក​​​ឧត្តម​​​ សម រង្ស៊ី ប្រធាន​​គណ​​​បក្ស​​​សង្គ្រោះ​​​ជាតិ​​​បាន​​​ទូរស័ព្ទ​​​ទាក់​​​ទង​​​ជាមួយ​​​ឯក​​​ឧត្តម​​​ ស ខេង និង​​​បាន​​​បញ្ជាក់​​​ថា គណ​​​បក្ស​​​សង្គ្រោះជាតិ​​​ឈប់​​​ទាម​​​ទារ​​​តំណែង​​​ប្រធាន​​​សភា​​​ ប៉ុន្តែ ចង់​​​ឲ្យ​​​មាន​​​ការ​​​បែង​​​ចែក​​​តំណែង​​​សមាជិក​​​​​​​​​គណៈ​​​កម្មា​​​ធិការ​​​អចិន្ត្រៃ​​​យ៍​ទាំង​​​១២​​​នៅ​​​ក្នុង​​​រដ្ឋ​​​សភា​​​ស្មើ​​​គ្នា”។​ គណៈ​​​កម្មា​​​ធិការ​​​អចិន្ត្រៃ​​​យ៍មានសមាស​សភាព​​​​ប្រធានមក​ពី​​​​គណៈ​​​កម្មា​​​ធិការ​​​អចិន្ត្រៃ​​​យ៍​ទាំង​​​ប្រាំបួន​​​របស់​​​រដ្ឋ​​​សភា ប្រធាន​​​រដ្ឋ​​​សភា​​​ និង​​​​អនុ​​​ប្រធាន​​​រដ្ឋ​​​សភា​​​ពីរ​​​រូប​​​។

សេចក្តី​ប្រកាស​ព័ត៌​មាន​របស់​លោក​​​ឧត្តម​​​សេនីយ៍ឯក ខៀវ សុភ័គ បាន​​​បន្ថែមថា “ផ្ទុយ​​​ទៅ​​​វិញ​​​ ឯក​​​ឧត្តម កឹម សុខា អនុ​​​ប្រធាន​​​គណ​​​បក្ស​​​សង្គ្រោះ​​​ជាតិ និង​​​ឯក​​​ឧត្តម​​​ យឹម សុវណ្ណ អ្នក​​​នាំ​​​ពាក្យ​​​គណ​​​បក្ស​​​សង្គ្រោះ​​​ជាតិ​​​បាន​​​បញ្ជាក់​​​​ថា គណ​​​បក្ស​​​សង្គ្រោះ​​​ជាតិ​​​នៅ​​​តែ​​​រក្សា​​​ជំហរ​​​​ទាម​​​ទារ​​​តំណែង​​​ប្រធាន​​​រដ្ឋសភា​​​ដដែល​​​”។

សេចក្តី​​​ប្រកាស​​​ព័ត៌​​​មាន​​​នេះ​​​មិន​​​បាន​​​បញ្ជាក់​ពី​ពេល​វេលា​ដែល​​​មន្ត្រី​​​គណ​​​បក្ស​​​ប្រឆាំងទាំង​​​នេះធ្វើ​​​ការ​​​ទាម​​​ទារ​​​ខុស​​​គ្នា​​​នោះ​​​ទេ។ លោក​​​ឧត្តម​​​សេនីយ៍ឯក ខៀវ សុភ័គ បាន​​​ទទូច​​​ឲ្យ​​​មេ​​​ដឹក​​​នាំ​​​គណ​​​បក្ស​​​សង្គ្រោះ​​​ជាតិ​​​ធ្វើ​​​ការ​​​ពិភាក្សា​​​ឯក​​​ភាព​​​គ្នា​​​ក្នុង​​​ផ្ទៃ​​​ក្នុង​​​របស់​​​ខ្លួន​​​ជាមុន​​​សិន​​​ មុន​​​នឹង​​​អាច​​​បន្ត​​​ការ​​​ចរ​​​ចាដែល​​​សម្រេច​​​បានលទ្ធ​ផល​ជា “ផ្លែ​​​ផ្កា​​​​​​” ជាមួយ​​​គណ​​​បក្ស​​​ប្រជា​​​ជន​​​កម្ពុជា​​​។

នៅ​​​ពេល​​​ទាក់​​​ទង​​​កាល​​​ពី​​​ម្សិល​​​មិញ​​​លោក​​​ឧត្តម​​​សេនីយ៍ឯក​​​ ខៀវ សុភ័គ បាន​​​មាន​​​ប្រសា​​​សន៍​​​ថា ប្រធាន​​​និង​​​អនុ​​​ប្រធាន​​​គណ​​​បក្ស​​​សង្គ្រោះជាតិ​​​ ក៏​​​មិន​​​បាន​​​ឯក​​​​​ភាព​​​គ្នា​​​ជុំវិញ​​​ការ​​​បែង​​​ចែក​​​តំណែងស្មើ​​​គ្នា​​​​​​នៅ​​​ក្នុង​​​គណៈ​​​កម្មា​​​ធិការ​​​អចិន្ត្រៃ​​​យ៍នេះ​​​ដែរ​​​ ប៉ុន្តែបាន​​​បន្ថែម​​​ថា ទោះ​​​ជា​​​យ៉ាង​​​ណា ​​​ ​​​គណ​​​បក្ស​​​ប្រជា​​​ជន​​​កម្ពុជា​​​នៅ​តែ​មិន​យល់​ព្រម​ចំពោះ​សំណើនេះ ​​​ពី​​​ព្រោះ​​​វា​​​នឹង​​​ធ្វើ​​​ឲ្យ​​​មាន​​​ការ​​​ជាប់​​​គាំង​​​។

លោក​​​បាន​​​មាន​​​ប្រសាសន៍​​​ថា “ឧទាហរណ៍ ប្រសិន​​​បើ​​​​​​រដ្ឋ​សភា​គ្រោង​បើក​​​សម័យ​​​ប្រជុំ​​​មួយ​​​ ហើយ​​​សមាជិក​​​គណៈ​​​កម្មា​​​ធិការ​​​មក​​​ពី​​​គណ​​​បក្ស​​​សង្គ្រោះ​​​ជាតិ​​​មិន​​​យល់​​​ព្រម​​​នោះ សម័យប្រជុំនេះ​​​នឹង​​​ជាប់​​​គាំង​​​”  ដោយ​​​លោក​​​បាន​​​ពន្យល់​​​ថា គណៈ​​​កម្មាធិការ​​​ដែល​​​មាន​​​សមាជិក​​​១២​​​រូប​​​ត្រូវ​​​តែមានសមាជិក​​​ប្រាំពីរ​​​រូប​​​មកពីគណ​​​បក្ស​​​ប្រជា​​​ជន​​​កម្ពុជា និង​​​ប្រាំ​​​រូប​​​មកគណ​​​បក្ស​​​សង្គ្រោះ​​​ជាតិ​​​ ពី​​​ព្រោះ​​​ការ​​​បែង​​​ចែក​​​តំណែង​​​សមាជិក​​​ប្រាំមួយ​​​រូបស្មើ​​​គ្នា​​​អាច​​​បណ្តាល​​​ឲ្យ​​​មាន​​​ភាព​​​ជាប់​​​គាំង​​​ ដោយ​សារ​គ្មាន​​​គណ​​​បក្ស​​​ណា​​​មួយ​​​ នឹង​​​មាន​​​សំឡេងភាគ​ច្រើន​​​នោះ​​​ទេ​​​។

លោក សម រង្ស៊ី ដែលកំពុង​​​ស្ថិត​​​នៅ​​​ក្រៅ​​​ប្រទេស​​​ ហើយ​​​ភ្លាមៗ​​​នេះ​​​មិន​​​អាច​​​ទាក់​​​ទង​​​សុំ​​​ការ​​​អត្ថា​​​ធិប្បាយ​​​បាន​​​ទេ​​​ ចំណែក​​​លោក កឹម សុខា ក៏បាន​​​បដិសេធ​​​មិន​​​ធ្វើ​​​អត្ថា​​​ធិប្បាយ​ដែរ​។ ទោះ​​​ជាយ៉ាង​​​ណា លោក​​​ សុន ឆ័យ សមា​ជិក​​​​​សភា​​​គណ​​​​​​បក្ស​​​សង្គ្រោះជាតិ​​​បាន​​​បដិ​សេធ​​​​ការ​​​អះ​​​អាង​​​នេះ​​​។ លោក​​​បាន​​​មាន​​​ប្រសាសន៍​​​អំពី​​​សេចក្តី​​​​​​ប្រកាស​​​ព័ត៌​​​មាន​​​របស់​​​លោក​​​ឧត្តម​​​សេនីយ៍​​​ឯក​​ ខៀវ សុភ័គ ថា “រឿង​​​នេះ​​​មិន​​​ពិត​​​ទេ។ ពួក​​​គេ​​​កំពុង​​​ព្យាយាម​​​និ​​​យាយ​​​អ្វី​​​ដែល​​​មិន​​​ពិត​​​”។

នៅ​​​ពេល​​​សួរ​​​ថា តើ​​​​បច្ចុ​ប្បន្ន​គណ​បក្ស​ប្រឆាំង​នៅ​តែ​ទាម​ទារ​តំណែង​​​ប្រធាន​​​សភា​​​ឬ​​​យ៉ាង​​​ណា​​​នោះ​​​ លោក សុន ឆ័យ បាន​​​ឆ្លើយ​​​ថា “ចំណុច​​​នេះ​​​អាច​​​នឹង​​​ត្រូវ​​​​​​ពិភាក្សា” ។ លោក​​​​បាន​​​មាន​​​ប្រសាសន៍ថា អ្វី​​​ដែល​​​គណ​​​បក្ស​​​សង្គ្រោះជាតិ​​​ចង់​​​បាន​​​បំផុតនោះ​ គឺ​​​ការ​​​បែង​​​ចែក​​​តំណែង​​​​​​ក្នុង​​​គណៈ​​​កម្មាធិការ​​​អចិ​ន្ត្រៃ​យ៍​​​​​ “ដើម្បី​​​ធានា​​​ថា គណ​​​បក្ស​​​ប្រឆាំង​​​មាន​​​តួនាទី​​​ពិត​​​ប្រាកដដែល​ត្រូវ​បំពេញ”។

លោក សុន ឆ័យ បាន​​​ចោទ​​​ប្រកាន់​​​តប​ទៅ​វិញ​ថា គណ​​​បក្ស​​​ប្រជាជន​​​កម្ពុជា​​​ព្យា​​​យាម​​​​បំបែក​​​គណ​​​បក្ស​​​ប្រឆាំង​​​ដោយ​អះ​អាង​ថា​ មាន​ការ​ខ្វែង​គំនិត​គ្នា។ លោក​​​បាន​​​មាន​​​ប្រសា​​​​​សន៍​​​ថា “វា​​​ជា​​​ល្បិច​​​កល​​​ចាស់​​​គំរឹល​ដើម្បី​​​ធ្វើ​​​ឲ្យសាធារណជន​​​គិត​​​ថា យើង​​​មាន​​​បញ្ហា​​​នៅ​​​ក្នុង​​​គណ​​​បក្ស​​​”។ លោក​​​បាន​​​បន្ថែម​​​ថា ដោយ​​​សារ​​​តែ​​​​​​កល​​​ល្បិច​​​ស្រដៀង​​​គ្នា​​​នេះ​​​មិន​​​អាច​​​ទាក់​​​ទាញ​​​សមា​​​ជិក​​​សភា​​​ឲ្យ​​​ចាក​​​ចេញ​​​ពីគណ​​​បក្ស​​​សង្គ្រោះ​​​ជាតិ​​​បាននោះ​​​ “ឥឡូវ​​​នេះ​​​ ពួក​​​គេ​​​ព្យា​​​យាម​​​បំបែក​​​មេ​​​ដឹក​​​នាំ​​​របស់​​​យើង​​វិញ​ម្តង”៕

(រាយការណ៍​​​បន្ថែម​​​ដោយ Zsombor Peter)
ប្រែ​​​សម្រួល​​​ដោយ អ៊ូច សូនី

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស