ប្រទេសបារាំង និងប្រទេសអូស្ត្រាលីបានអបអរសាទរលោកនាយករដ្ឋមន្ត្រី ហ៊ុន សែន ដែលត្រូវបានជ្រើសតាំងជាផ្លូវការឲ្យធ្វើជានាយករដ្ឋមន្ត្រីបន្តទៀត បន្ទាប់ពីការបោះឆ្នោតដ៏ប្រទាញប្រទង់គ្នាកាលពីខែកក្កដា ហើយប្រទេសទាំងនេះក៏បានបង្ហាញការគាំទ្ររបស់ខ្លួនផងដែរ ខណៈដែលលោក សម រង្ស៊ី មេដឹកនាំគណបក្សប្រឆាំង កំពុងបំពេញទស្សនកិច្ចនៅតំបន់អឺរ៉ុប ដោយជំរុញឲ្យម្ចាស់ជំនួយនានាផ្អាកទំនាក់ទំនងជាមួយរដ្ឋាភិបាលថ្មីបច្ចុប្បន្ន។
ខណៈដែលប្រទេសផ្សេងៗជាច្រើនទៀត ជាពិសេសប្រទេសនៅក្នុងតំបន់អាស៊ីអបអរសាទរលោក ហ៊ុន សែន និងគណបក្សប្រជាជនកម្ពុជារបស់លោកយ៉ាងឆាប់រហ័សនោះ ប្រទេសអូស្ត្រាលី និងសហគមន៍អឺរ៉ុប (EU) ស្ថិតក្នុងចំណោមប្រទេស និងតំបន់មួយចំនួនដែលបានបង្ហាញក្ដីបារម្ភអំពីលទ្ធផលផ្លូវការហើយដូចគ្នានឹងសហរដ្ឋអាមេរិកដែរ ប្រទេសក្នុងតំបន់ទាំងនោះ បានលើកឡើងស្របគ្នានឹងសេចក្ដីអំពាវនាវរបស់គណបក្សសង្គ្រោះជាតិ ដែលសុំឲ្យមានការស៊ើបអង្កេតឯករាជ្យចំពោះភាពមិនប្រក្រតីក្នុងការបោះឆ្នោត។ បច្ចុប្បន្ន ទាំងប្រទេសបារំាង និងប្រទេសអូស្ត្រាលី បានបង្ហាញការអបអរសាទរដ៏យឺតយ៉ាវដូចគ្នា។
លោក ហ្សង់ ម៉ាក អេរ៉ូល (Jean-Marc Ayrault) នាយករដ្ឋមន្ត្រីនៃប្រទេសបារំាង បានប្រាប់លោក ហ៊ុន សែន តាមរយៈលិខិតមួយច្បាប់ចុះថ្ងៃទី៤ ខែតុលា និងចេញផ្សាយដោយទីស្ដីការគណៈរដ្ឋមន្ត្រីកាលពីថ្ងៃសៅរ៍ថា “ក្នុងឱកាសដែលលោកត្រូវបានជ្រើសតាំងឲ្យធ្វើជាប្រមុខរាជរដ្ឋាភិបាលកម្ពុជា ខ្ញុំសូមសម្ដែងនូវការអបអរសាទរចំពោះលោក”។
គណបក្សសង្គ្រោះជាតិ របស់លោក សម រង្ស៊ី កំពុងតែបដិសេធមិនទទួលយកអាសនៈ៥៥របស់ខ្លួននៅក្នុងរដ្ឋសភា ដើម្បីតវ៉ាចំពោះអ្វីដែលខ្លួនជឿថា ជាការបោះឆ្នោតត្រូវបានលួចបន្លំ និងកំពុងតែហៅសភាថ្មីដែលត្រូវបានបង្កើតឡើងដោយមានវត្តមានតំណាងរាស្ត្រ៦៨រូបរបស់លោក ហ៊ុន សែន នេះថា ជាសភាមិនស្របនឹងរដ្ឋធម្មនុញ្ញ និងខុសច្បាប់។លោកកំពុងតែជំរុញឲ្យម្ចាស់ជំនួយសំខាន់ៗមួយចំនួនរបស់ប្រទេសកម្ពុជា ដូចជាសហភាពអឺរ៉ុបជាដើម ព្យួរកិច្ចព្រមព្រៀងបច្ចុប្បន្នទំាងអស់ដែលធ្វើឡើងជាមួយប្រទេសកម្ពុជា និងផ្អាកការចុះហត្ថលេខាលើកិច្ចសន្យាថ្មីៗ រហូតទាល់តែភាពទាល់ច្រកត្រូវបានដោះស្រាយ។
ដោយនិយាយសំដៅលើការធ្វើពហិការសភាពីសំណាក់គណបក្សប្រឆាំង លោក អេរ៉ូល លើកឡើងបន្ថែមទៀតថា “ការដែលតួអង្គនយោបាយទាំងអស់របស់ប្រទេសកម្ពុជាចាប់ផ្ដើមធ្វើការជាមួយគ្នាដើម្បីជាប្រយោជន៍ស្ថាប័នប្រជាធិបតេយ្យដ៏ចាំបាច់ និងដើម្បីការអភិវឌ្ឍប្រទេស គឺជារឿងសំខាន់”។
លោក ថូនី អ៊ែបបុត (Tony Abbott) នាយករដ្ឋមន្ត្រីទើបជ្រើសតាំងថ្មីនៃប្រទេសអូស្ត្រាលី បានថ្លែងអំណរគុណលោក ហ៊ុន សែន ដែលបានសរសេរលិខិតផ្ទាល់ខ្លួនរបស់លោក ដើម្បីអបអរសាទរជ័យជម្នះរបស់នាយករដ្ឋមន្ត្រីថ្មីនៃប្រទេសអូស្ត្រាលី ហើយលោកក៏បានអបអរសាទរលោក ហ៊ុន សែន វិញដែរ។ លោកនាយករដ្ឋមន្ត្រីអូស្ត្រាលីបានថ្លែងអំណរគុណលោក ហ៊ុន សែន ដូចនេះនៅក្នុងលិខិតរបស់លោកចុះថ្ងៃទី៦ខែតុលា និងត្រូវបានចេញផ្សាយកាលពីថ្ងៃសុក្រ។
បន្ទាប់ពីថ្លែងអំណរគុណលោក ហ៊ុន សែន ដែលបានអបអរសាទរលោក លោក អ៊ែបបុត បានលើកឡើងបន្ថែមទៀតថា “ខ្ញុំក៏សូមយកឱកាសនេះដើម្បីអបអរសាទរលោកដែលទទួលបានការតែងតាំងជានាយករដ្ឋមន្ត្រីនៃព្រះរាជាណាចក្រកម្ពុជាផងដែរ”។ លោកបន្តថា “ខ្ញុំរង់ចាំដំណើរការសម្របសម្រួលរវាងគណបក្សទាំងអស់ដើម្បីរក្សាសន្តិភាព និងសន្តិសុខ ដែលជាមូលដ្ឋាននៃអនាគតរបស់ប្រទេសកម្ពុជា”។
កាលពីដំណាច់ខែសីហា ស្ថានទូតអូស្ត្រាលីប្រចាំរាជធានីភ្នំពេញបានអំពាវនាវឲ្យមានការស៊ើបអង្កេតប្រកបដោយតម្លាភាពលើភាពមិនប្រក្រតីដែលតាមសេចក្ដីរាយការណ៍ថា បានកើតឡើងយ៉ាងទូលំទូលាយក្នុងថ្ងៃបោះឆ្នោត ក៏ប៉ុន្តែគណបក្សប្រជាជនកម្ពុជាបានច្រានចោលដដែលៗ និងទប់ស្កាត់យ៉ាងមានប្រសិទ្ធភាពមិនឲ្យជម្រើសនេះកើតឡើង។
ក្នុងថ្ងៃតំណាងរាស្ត្រ៦៨រូប ដែលគណបក្សប្រជាជនកម្ពុជាបានជ្រើសតាំងជាផ្លូវការបើកសម័យប្រជុំសភាដោយមិនមានតំណាងរាស្ត្រ៥៥រូបរបស់គណបក្សប្រឆាំងគឺនៅថ្ងៃទី២៣ ខែកញ្ញា សហភាពអឺរ៉ុបបានចេញសេចក្ដីថ្លែងការណ៍របស់ខ្លួនដែលលើកឡើងថា សភា “ មិនអាចបម្រើគោលបំណងរបស់ខ្លួន” ដោយមិនមានគណបក្សសង្គ្រោះជាតិទេ”។
លោក សុន ឆ័យ ប្រធានក្រុមតំណាងរាស្ត្រគណបក្សសង្គ្រោះជាតិ បានលើកឡើងថា លិខិតរបស់នាយករដ្ឋមន្ត្រីបារាំង និងអូស្ត្រាលីនាំឲ្យ “មានភាពខកចិត្តបន្តិច” ។ លោកបានមានប្រសាសន៍ថា “យើងគាំទ្រឲ្យរដ្ឋាភិបាលអូស្ត្រាលីពិចារណាលើការសម្រេចចិត្តនេះឲ្យបានស៊ីជម្រៅជាងនេះ ពីព្រោះប្រទេសអូស្ត្រាលី មានតួនាទីសំខាន់ក្នុងការគាំទ្រដំណើរការសន្តិភាពកាលពីចុងទសវត្សរ៍ឆ្នាំ១៩៨០”។
ក៏ប៉ុន្តែលោក សុន ឆ័យ បានលើកឡើងបន្ថែមទៀតថា លោកនៅតែមានក្ដីសង្ឃឹមថា ម្ចាស់ជំនួយមួយចំនួនរបស់ប្រទេសកម្ពុជានឹងទទួលយកសេចក្ដីអំពាវនាវរបស់គណបក្សប្រឆាំងដែលសុំឲ្យព្យួរកិច្ចព្រមព្រៀងផ្ដល់ជំនួយ និងកិច្ចព្រមព្រៀងពាណិជ្ជកម្មនានា។ លោកបានមានប្រសាសន៍ថា “យើងបានព្យាយាមក្នុងពេលកន្លងមក ក៏ប៉ុន្តែនៅពេលនេះមានភាពខុសប្លែកគ្នាបន្តិច ពីព្រោះការលួចបន្លំក្នុងការបោះឆ្នោតកើតឡើងយ៉ាងជាក់ស្ដែងខ្លាំងណាស់ ហើយច្បាស់ណាស់គណបក្សប្រឆាំងទទួលជ័យជម្នះនៅក្នុងការបោះឆ្នោត”។
កាលពីម្សិលមិញ អ្នកនាំពាក្យស្ថានទូតអូស្ត្រាលី មិនបាននិយាយថា តើលិខិតរបស់លោក អ៊ែបបុត មានន័យសមមូលទៅនឹងការគាំទ្រលទ្ធផលបោះឆ្នោតដ៏ចម្រូងចម្រាសដែរ ឬយ៉ាងណាទេ ក៏ប៉ុន្តែអ្នកនាំពាក្យរូបនេះបានលើកឡើងបន្ថែមទៀតថា ប្រទេសអូស្ត្រាលី មានគោលនយោបាយទទួលស្គាល់រដ្ឋ មិនមែនរដ្ឋាភិបាលទេ។
អ្នកនាំពាក្យរូបនេះបាននិយាយថា “ស្ថានទូតអូស្ត្រាលីសង្ឃឹមថា កិច្ចចរចានឹងនៅតែបន្តរវាងគណបក្សទាំងពីរ រួមទាំងកិច្ចពិភាក្សាអំពីការស៊ើបអង្កេតប្រកបដោយតម្លាភាពលើភាពមិនប្រក្រតីក្នុងការបោះឆ្នោតផងដែរ ហើយសង្ឃឹមថា វានឹងទុកឲ្យបើកសម្រាប់គណបក្សសង្គ្រោះជាតិទទួលយកអាសនៈនៅក្នុងរដ្ឋសភា”។
ស្ថានទូតបារាំងមិនបានឆ្លើយតបទៅនឹងសំណើសុំធ្វើសេចក្ដីអត្ថាធិប្បាយទេ៕
ប្រែសម្រួលដោយ កង សុធា