កាលពីម្សិលមិញ សកម្មជនប្រឆំាងការបណ្តេញចេញរាប់សិបនាក់បានប្រមូលផ្តុំគ្នា និងបានដាក់ញត្តិមួយទៅក្រសួងមហាផ្ទៃ ក្នុងរាជធានីភ្នំពេញ ដើម្បីទាមទារឲ្យមានការចាប់ខ្លួនមន្ត្រីខណ្ឌដូនពេញ ដែលពួកគាត់បានអះអាងថា មន្ត្រីទាំងនោះបានសមគំនិតគ្នាវាយប្រហារលើពួកគាត់យ៉ាងកាចសាហាវ អំឡុងការតវ៉ាដោយសន្តិវិធីមួយនៅឯវត្តភ្នំកាលពីខែមុន។
កាលពីថ្ងៃសុក្រ ក្រុមសកម្មជននេះបានដាក់ពាក្យបណ្តឹងមួយទៅសាលាដំបូងរាជធានីភ្នំពេញ ដើម្បីប្តឹងមន្ត្រីខណ្ឌដូនពេញ ដែលពួកគាត់ចោទថា បានប្រើអំពើហិង្សាដោយចេតនា និងប៉ុនប៉ងមនុស្សឃាត បន្ទាប់ពីពិធីពេលយប់ដ៏ស្ងប់ស្ងាត់មួយកាលពីថ្ងៃទី២២ ខែកញ្ញា ត្រូវបានបំបែកដោយក្រុមបុរសស្លៀក ពាក់ស៊ីវិលប្រដាប់ដោយដំបងឆក់ ជន្លួញ និងចំពាមកៅស៊ូ ដែលពួកគេនិយាយថា បុរសទាំងនោះទទួលបញ្ជាពីអាជ្ញាធរខណ្ឌ។
នគរបាលដែលមានវត្តមាននៅពេលយប់ដែលមានការវាយប្រហារនោះទំនងជាសហការជាមួយពួកបុរសពាក់ម៉ាស់ ហើយបន្ទាប់មក គេបានឃើញរថយន្តមួយគ្រឿងទម្លាក់ពួកបុរសពាក់ម៉ាស់ដែលកាន់ដំបងឆក់ដដែលរបស់ខ្លួន ចេញពីរថយន្តនោះនៅឯសាលាខណ្ឌដូនពេញ។
នៅមុនពេលការវាយប្រហារនោះកើតឡើង ភ្លើងនៅតាមដងផ្លូវទាំងអស់ដែលនៅជុំវិញវត្តភ្នំត្រូវបានបិទ ជាហេតុបណ្តាលឲ្យបុរសពាក់ម៉ាស់ទាំងនោះគ្រប់គ្រងភាពងងឹត ដើម្បីធ្វើការវាយប្រហាររបស់ខ្លួនទៅលើបាតុករដែលភាគច្រើនជាស្ត្រី និងអ្នកយកព័ត៌មាន ព្រមទាំងអ្នកសង្កេតការណ៍សិទ្ធិមនុស្សនៅក្នុងតំបន់នោះ។
អ្នកស្រី ទេព វន្នី តំណាងសកម្មជនទាំងនោះ បានលើកឡើងនៅខាងក្រៅក្រសួងថា “យើងសង្ឃឹមថា ក្រសួងមហាផ្ទៃនឹងជួយចាប់ខ្លួនពួកគេ ហើយយើងកំពុងតែរង់ចាំលទ្ធផលល្អនេះ”។
ក្រុមសកម្មជនដដែលក៏បានដាក់ញាត្តិស្វែងរកយុត្តិធម៌ទៅស្ថានទូតជប៉ុន និងស្ថានទូតអូស្ត្រាលី ព្រមទាំងការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សផងដែរ។ កាលពីខែមុន ស្ថានទូតអាមេរិកបានហៅការវាយប្រហារនេះថា ជា “ការរំខាន” និងបានអំពាវនាវឲ្យមានការស៊ើបអង្កេតឲ្យបានហ្មត់ចត់។
សកម្មជនទាំងនេះបានដាក់ពាក្យបណ្តឹងរបស់ខ្លួនទៅតុលាការ ដើម្បីប្តឹងមន្ត្រីរដ្ឋាភិបាលថ្នាក់មូលដ្ឋានមួយចំនួន ដែលរួមមានលោក សុខ ពេញវុធ អភិបាលរងខណ្ឌដូនពេញ លោក គឹម វុត្ថា ប្រធានសន្តិសុខសាធារណៈខណ្ឌ លោក ញ៉ែម សៅណុល អធិការរងនគរបាលខណ្ឌ ក្រុមប្រឹក្សាខណ្ឌម្នាក់ និងនគរបាល ព្រមទាំងកងរាជអាវុធហត្ថមិនស្គាល់ឈ្មោះម្នាក់។
លោក ប្រាក់ សាវុធ ក្រឡាបញ្ជីរបស់ព្រះរាជអាជ្ញាតុលាការរាជធានីបានបដិសេធមិនធ្វើអត្ថាធិប្បាយអំពីវឌ្ឍនភាពនៃពាក្យបណ្តឹងនេះទេ នៅពេលលោកត្រូវបានទាក់ទងបានកាលពីម្សិលមិញ។ លោក សាវុធ បានបញ្ជាក់កាលពីសប្តាហ៍មុនថា លោកបានទទួលពាក្យបណ្តឹងនេះពីសកម្មជនទាំងនោះហើយ។
លោក អំ សំអាត ប្រធានផ្នែកបច្ចេកទេសរបស់អង្គការសិទ្ធិមនុស្ស លីកាដូ បានបង្ហាញអារម្មណ៍សង្ស័យថា គ្មានអ្នកត្រូវទទួលខុសត្រូវចំពោះការវាយប្រហារនេះទេ ដោយសារតែវប្បធម៌នៃនិទណ្ឌភាពនៅក្នុងប្រព័ន្ធតុលាការរបស់ប្រទេសកម្ពុជា។ លោកបានបន្ថែមថា “វប្បធម៌នៃអំពើហិង្សានៅតែកើតមានឡើង ដរាបណាមន្ត្រីនគរបាល និងក្រុមមន្ត្រីតុលាការមិនព្រមស៊ើបអង្កេត ឬចាប់ខ្លួនជនសង្ស័យទេនោះ”៕
ប្រែសម្រួលដោយ ចេវ ប៊ុននី
នៅឯវត្តភ្នំ