កាលពីម្សិលមិញលោក កឹម សុខា អនុប្រធានគណបក្សសង្គ្រោះជាតិបានច្រានចោលការអះអាងដោយប្រធានខុទ្ទកាល័យរបស់លោក ស ខេង រដ្ឋមន្ត្រីក្រសួងមហាផ្ទៃ ដែលថាគណបក្សសង្គ្រោះជាតិកំពុងខ្វែងគំនិតគ្នានៅក្នុងការទាមទារលក្ខខណ្ឌពីគណបក្សប្រជាជនកម្ពុជា។
គណបក្សទាំងពីរនេះ បានជាប់គាំងផ្នែកនយោបាយចាប់តាំងពីការបោះឆ្នោតជាតិកាលពីខែកក្កដាមក ដោយគណបក្សសង្គ្រោះជាតិចោទប្រកាន់ថា មានការលួចបន្លំក្នុងការបោះឆ្នោត និងមិនព្រមទទួលយកអាសនៈសភារបស់ខ្លួន បន្ទាប់ពីការចរចាបរាជ័យ។
នៅក្នុងសេចក្ដីថ្លែងការណ៍មួយចេញកាលពីថ្ងៃសៅរ៍ ឧត្តមសេនីយ៍ឯក ខៀវ សុភ័គ ប្រធានខុទ្ទកាល័យរបស់លោក ស ខេង បានមានប្រសាសន៍ថា លោក សម រង្ស៊ី ប្រធានគណបក្សសង្គ្រោះជាតិបានទូរស័ព្ទប្រាប់លោក ស ខេង ថា លោកលែងចង់បានតំណែងប្រធានរដ្ឋសភាទៀតហើយ ប៉ុន្តែលើកឡើងថា លោក កឹម សុខា ដែលជាអនុប្រធាននិង លោក យឹម សុវណ្ណ អ្នកនាំពាក្យគណបក្សសង្គ្រោះជាតិ នៅតែចង់បានមុខតំណែងនេះ។
ក្រោយពីពិធីតាមប្រពៃណីព្រះពុទ្ធសាសនាមួយនៅទីស្នាក់ការខណ្ឌទួលគោករបស់គណបក្សសង្គ្រោះជាតិ ដើម្បីគោរពព្រះវិញ្ញាណក្ខន្ធសម្ដេចឪ នរោត្តម សីហនុ ដែលបានយាងចូលទិវង្គតកាលពីមួយឆ្នាំមុន លោក កឹម សុខា បានប្រាប់ក្រុមអ្នកយកព័ត៌មានថា “យើងមិនដែលនិយាយថាយើងចង់បានមុខតំណែងអ្វី [នៅក្នុងរដ្ឋសភា] នោះទេ យើងតែងតែនិយាយថា យើងគ្រាន់តែចង់បានយុត្តិធម៌ប៉ុណ្ណោះពាក់ព័ន្ធនឹងភាពមិនប្រក្រតីនៅក្នុងការបោះឆ្នោតជាតិ”។
អំឡុងព្រឹត្តិការណ៍មួយកាលពីសប្ដាហ៍មុន ដើម្បីអបអរសាទរកងកម្លាំងសន្ដិសុខចំពោះការខំប្រឹងប្រែងបំពេញការងារក្នុងពេលបោះឆ្នោត និងបាតុកម្មក្រោយៗទៀតដោយគណបក្សសង្គ្រោះជាតិនោះ លោក ស ខេង បានមានប្រសាសន៍ថា គណបក្សប្រជាជនកម្ពុជាបានយល់ព្រមប្រគល់តំណែងប្រធានគណៈកម្មាធិការចំនួនបួន និងតំណែងអនុប្រធានរដ្ឋសភាដល់គណបក្សសង្គ្រោះជាតិ ជាសំណើមួយដែលគណបក្សប្រឆាំងបានច្រានចោលម្ដងហើយម្ដងទៀត។
គណបក្សសង្គ្រោះជាតិត្រូវការតំណែងប្រធានគណៈកម្មការចំនួនប្រាំមួយ ដើម្បីឲ្យមានតុល្យភាពអំណាចជាមួយនឹងគណបក្សប្រជាជនកម្ពុជានៅក្នុងគណៈកម្មាធិការអចិន្ត្រៃយ៍នៃរដ្ឋសភា ដែលជាអ្នកកំណត់របៀបវារៈសភា និងដែលមានសមាសភាពប្រធានរដ្ឋសភា អនុប្រធានពីររូប និងសមាជិកគណៈកម្មាធិការប្រាំបួនរូប។
លោក កឹម សុខា បានមានប្រសាសន៍ថា “ខ្ញុំមិនដែលទទួលបានភ័ស្ដុតាងបញ្ជាក់ [ពីការអះអាងរបស់ឧត្តមសេនីយ៍ឯក ខៀវ សុភ័គ ] ទេ ហើយយើងក៏មិនដែលបានជួបចរចាគ្នាជាផ្លូវការ [ជាមួយគណបក្សប្រជាជនកម្ពុជាអំពីមុខតំណែងគណៈកម្មាធិការអចិន្ត្រៃយ៍] ដែរ”។
លោក កឹម សុខា បានមានប្រសាសន៍ទៀតថា លោក ស ខេង និងឧត្តមសេនីយ៍ឯក ខៀវ សុភ័គ គ្រាន់តែប៉ុនប៉ងធ្វើឲ្យគណបក្សសង្គ្រោះជាតិមើលទៅហាក់ដូចជាបែកបាក់សាមគ្គីផ្ទៃក្នុងប៉ុណ្ណោះ។ “ក្នុងពេលកន្លងមកពួកគេ [គណបក្សប្រជាជនកម្ពុជា] មានសមត្ថភាពប្រើប្រាស់គោលនយោបាយ [ប្រឆាំងគ្នា] របស់យើង ដើម្បីបំបែកបំបាក់ពួកយើង ប៉ុន្តែពួកគេបានបរាជ័យ ហើយពេលនេះ ពួកគេមិនអាចបំបែកបំបាក់គណបក្សសង្គ្រោះជាតិបានឡើយ”។
បច្ចុប្បន្នលោក សម រង្ស៊ី កំពុងនៅបរទេសព្យាយាមបញ្ចុះបញ្ចូលសហគមន៍អន្តរជាតិឲ្យដកការគាំទ្រពីរដ្ឋាភិបាលរបស់លោកនាយករដ្ឋមន្ត្រី ហ៊ុន សែន។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានមានប្រសាសន៍កាលពីម្សិលមិញថា គណបក្សសង្គ្រោះជាតិគ្រាន់តែចង់បាន “តុល្យភាពអំណាច” នៅក្នុងរដ្ឋសភាប៉ុណ្ណោះ។
លោកបានមានប្រសាសន៍ថា “យើងមិនចង់ចរចារឿងមុខតំណែង [គណៈកម្មាធិការអចិន្ត្រៃយ៍] ទេ ប៉ុន្តែយើងចង់ចរចាអំពីតុល្យភាពអំណាច ដើម្បីធ្វើកំណែទម្រង់ស៊ីជម្រៅលើស្ថាប័នជាតិមួយចំនួន”។ លោកបានលើកឡើងទៀតថា អំឡុងថ្ងៃទី២នៃការចរចារវាងគណបក្សសង្គ្រោះជាតិ និងគណបក្សប្រជាជនកម្ពុជា កាលពីថ្ងៃទី១៧ ខែកញ្ញា គណបក្សកាន់អំណាចមិនព្រមឲ្យគណបក្សប្រឆាំងមានអាសនៈនៅក្នុងគណៈកម្មាធិការអចិន្ត្រៃយ៍ឡើយ គឺផ្ទុយពីសេចក្ដីថ្លែងការណ៍របស់លោក ស ខេង កាលពីសប្ដាហ៍មុន៕
ប្រែសម្រួលដោយ តែម សុខុម