30 C
Phnom Penh

រដ្ឋាភិបាល​​​បញ្ជា​​​ឲ្យ​​​បំផ្លាញ​​​អគា​​​រ​​​ពីរ​​​នៅ​​​ជុំវិញ​​​ព្រះបរម​​​រាជ​​​វាំង​​​

ដោយ ឌឹ ខេមបូឌា ដេលី

បទវិភាគ

មន្ត្រី​​​​​​រដ្ឋាភិបាល​​​ម្នាក់បាននិយាយ​​​កាលពីម្សិលមិញ​​​ថា រដ្ឋាភិបាល​​​បាន​​​បញ្ជា​​​ឲ្យ​​​វាយ​​​បំផ្លាញ​​​ជា​​​បន្ទាន់​​​នូវ​​​អគារ​​​ចំនួន​​​ពីរ​​​ដែល​​​មាន​​​ទីតាំង​​​ស្ថិត​​​នៅ​​​ប្លុក​​​ព្រះ​​​បរមរាជវាំង​​​ ពីព្រោះ​​​សំណង់ទាំង​​​នោះ​​​ខ្ពស់​​​ជាង​​​កម្ពស់​​​អនុញ្ញាត​​​​​​​​​សម្រាប់​​​អគារ​​​នៅ​​​ជុំ​​​វិញ​​​ព្រះ​​​បរម​​​រាជវាំង​​​។

​សាលារាជធានី​បាន​បញ្ជា​ឲ្យ​​វាយកម្ទេច​​អគារ​ខ្ពស់​របស់​ក្រុម​ហ៊ុន​អចលន​ទ្រព្យ​វឌ្ឍនៈ​នៅតាម​បណ្តោយ​តីរវិថី​ស៊ីសុ​វត្ថិ​ ​​និង​អគារលំនៅដ្ឋានដ៏​ខ្ពស់​​មួយ​ទៀត​ដែល​ស្ថិតនៅក្រោ​យ​សាកល​វិទ្យាល័យ​ភូមិន្ទវិចិត្រ​សិល្បៈ។ (ស៊ីវ ចាន់ណា)
​សាលារាជធានី​បាន​បញ្ជា​ឲ្យ​​វាយកម្ទេច​​អគារ​ខ្ពស់​របស់​ក្រុម​ហ៊ុន​អចលន​ទ្រព្យ​វឌ្ឍនៈ​នៅតាម​បណ្តោយ​តីរវិថី​ស៊ីសុ​វត្ថិ​ ​​និង​អគារលំនៅដ្ឋានដ៏​ខ្ពស់​​មួយ​ទៀត​ដែល​ស្ថិតនៅក្រោ​យ​សាកល​វិទ្យាល័យ​ភូមិន្ទវិចិត្រ​សិល្បៈ។ (ស៊ីវ ចាន់ណា)

អគារ​​​មួយ​​​ដែល​​​ជា​​​របស់​​​ក្រុម​​​ហ៊ុន​​​អចល​​​ន​​​ទ្រព្យ​​​វឌ្ឍនៈ​​​​​​មាន​​​ទីតាំង​​​ស្ថិត​​​នៅ​​​ចម្ងាយ​​​មួយ​​​ប្លុក​​​ពី​​​ព្រះ​​​បរម​​​រាជវាំង​​​ តាម​​​បណ្ដោយ​​​តីរវិថី​​​ស៊ីសុវត្ថិ​​​ ជិត​​​ផ្លូវ​​​លេខ​​​១៨៤​​​។ អគារ​​​​​​មួយ​​​ទៀត​​​ដែល​​​ជា​​​​​​កម្ម​​​សិទ្ធិ​​​របស់​​​បុរស​​​អ្នក​​​ជំនួញ​​​ម្នាក់​​​ មាន​​​ទីតាំង​​​ស្ថិត​​​នៅ​​​ចម្ងាយ​​​ពីរ​​​ប្លុក​​​ពី​​​ព្រះ​​​បរម​​​រាជ​​​វាំង​​​នៅ​​​ផ្លូវ​​​លេខ​​​១៩​​​ក្រោយ​​​សាកល​​​វិទ្យាល័យ​​​ភូមិន្ទ​​​វិចិត្រសិល្បៈ។

លោក សុខ សម្បត្តិ អភិបាល​​​ខណ្ឌ​​​ដូន​​​ពេញ​​​បាន​​​មាន​​​ប្រសាសន៍​​​ថា “យើង​​​នឹង​​​វាយ​​​កម្ទេច​​​អគារ​​​ពីរ​​​ ប៉ុន្តែ​​​ខ្ញុំ​​​មិន​​​អាច​​​និយាយ​​​បាន​​​ទេ មុន​​​​​​ពេល​​​ [លោក ប៉ា សុជាតិវង្ស អភិបាល​​​រាជ​​​ធានី​​​ភ្នំពេញ] ចេញ​​​សេចក្ដី​​​ប្រកាស​​​​​​​​​វាយ​​​កម្ទេច​​​ចោល។ ខ្ញុំ​​​គិត​​​ថា ករណី​​​នេះ​​​នឹង​​​មិន​​​អូស​​​បន្លាយ​​​​​​​​​​​​​​​​​​ពេល​​​យូរ​​​ពេក​​​ទេ។ លោក​​​អភិបាល​​​ប្រហែល​​​​​​​​​ជា​​​ចេញ​​​សេចក្ដី​​​ប្រកាស​​​​​​ឆាប់ៗ​​​នេះ”។

លោកស្រី រឿង​ ​​ ផល្លីន ចៅ​​​សង្កាត់​​​ជ័យ​​​ជំនះបាន​​​បញ្ជាក់​​​ថា យ៉ាង​​​ហោច​​​ណាស់​​​​​​អគារ​​​មួយ​​​នឹង​​​ត្រូវ​​​វាយ​​​កម្ទេច​​​ចោល​​​។ លោកស្រី​​​​​​បាន​​​មាន​​​ប្រសាសន៍​​​ថា “ខ្ញុំ​​​ដឹង​​​ច្បាស់​​​​​​ថា អគារ​​​វឌ្ឍនៈ​​​នឹង​​​ត្រូវ​​​វាយ​​​កម្ទេច​​​ចោល ប៉ុន្តែ​​​​​​ពាក់​​​ព័ន្ធ​​​នឹង​​​អគា​​​រ​​​មួយ​​​ទៀត​​​ ខ្ញុំ​​​​​​មិនទាន់​​​ទទួល​​​បាន​​​ព័ត៌មាន​​​ពី​​​ថ្នាក់​​​លើ​​​របស់​​​ខ្ញុំ​​​នៅ​​​ឡើយ​​​ទេ ប៉ុន្តែ អគារ​​​នេះ​​​ក៏​​​កំពុង​​​ស្ថិត​​​ក្នុង​​​ការ​​​ពិចារណា​​​វាយ​​​កម្ទេច​​​ចោល​​​ដែរ”។

ឯក​​​សារ​​​មួយ​​ចុះ​​​ថ្ងៃ​​​ទី​​​០១​​​ខែ​​​តុលា​​​ ​​ដោយ​​​លោក ប៉ា សុជាតិវង្ស អភិបាល​​​រាជ​​​ធានី​​​ភ្នំ​​​ពេញ​​​ ​​​បាន​​​បញ្ជាឲ្យ​​​​​​ផ្អាក​​​ជា​​​បន្ទាន់​​​នូវ​​​ការ​​​សាងសង់​​​អគារ​​​វឌ្ឍនៈ។ ឯក​​​សារ​​​នោះ​​​​​មាន​​​ខ្លឹមសារដូច្នេះ​​​ថា “យើង​​​​​​​សូម​​​ស្នើ​​​ឲ្យ​​​ផ្អាក​​​ការ​​​សាង​​​សង់​​​ជា​​​បន្ទាន់ ​​​ព្រោះ​​​ទីតាំង​​​នេះ​​​នៅ​​​ជិត​​​ព្រះ​​​បរម​​​រាជវាំង​​​ពេក  ​​​ជា​​​តំបន់​​​អភិរក្ស​​​​​​ដែល​​​ត្រូវ​​​តែ​​​គោរព​​​”។
ទោះបីជា​​​សេចក្ដី​​​ថ្លែង​​​ការណ៍​នេះ​​​មិន​​​បាន​​​លើកឡើងពីកា​​​រ​​​វាយ​​​កម្ទេច​​​អគារ​​​ទាំង​​​ពីរ​​​ក៏ដោយ ក៏​​​លោក ប៉ា សុជាតិវង្ស ត្រូវ​​​បាន​​​​​​កាសែត​​​កម្ពុជា​​​ថ្មី ដក​​​ស្រង់​​​ប្រសាសន៍​​​​​​​​​នៅ​​​ក្នុង​​​​​​អត្ថ​​​បទ​​​ព័ត៌មាន​​​តាម​​​អុីន​​​ធើណិត​​​កាលពី​​​ម្សិលមិញ ដោយ​​​លើក​​​ឡើង​​​ថា ការ​​​វាយ​​​កម្ទេច​​​ចោល​​​នឹង​​​ធ្វើ​​​​​​ឡើង​​​ “ជាបន្ទាន់​​​”។

កាសែត​​​នេះ​​​បាន​​​ដក​​​ស្រង់​​​​​​​​​ប្រសា​​​សន៍​​​​​​របស់អភិ​​​បាល​​​រាជធានី​​​ភ្នំពេញ ដែល​​​​​​បាន​​​លើក​​​​​​ឡើង​​​ក្រោយ​​​ពី​​​ជួប​​​ប្រជុំ​​​ជាមួយ​​​អភិ​​​បាល​​​ខណ្ឌ​​​ទាំង​​​ប្រាំបួន​​​នៅ​​​សាលា​​​រាជ​​​ធានី​​​កាល​​​​​​ពី​​​ម្សិល​​​មិញ​​​​​​​​​ថា “ថ្នាក់​​​លើ​​​បាន​​​បញ្ជា​​​ឲ្យ​​​សាលារាជធានី​​​វាយ​​​កម្ទេច​​​អគារ​​​ពីរ​​​ជា​​​បន្ទាន់​​​ដើម្បី​​​ធ្វើ​​​​​​ជា​​​គំរូ​​​ដល់​​​អគារ​​​ផ្សេងៗ​​​ទៀត។ មន្ត្រី​​​បាន​​​អះអាង​​​ថា អគារ​​​ដែល​​​មាន​​​បញ្ហា​​​ទាំង​​​ពីរ​​​នេះ​​​​​​ត្រូវ​​​បាន​​​សាង​​​សង់​​​ខ្ពស់​​​ជាង​​​​​​កម្ពស់​​​អនុញ្ញាត​​​នៅ​​​ក្នុង​​​កិច្ច​​​សន្យា​​​របស់​​​ពួកគេ​​​។

អគារ​​​វឌ្ឍនៈ​​​ទទួល​​​បាន​​​ការ​​​អនុញ្ញាត​​​ឲ្យ​​​សាង​​​សង់​​​កម្ពស់​​​១៤​​​ម៉ែត្រ​​​ ប៉ុន្តែ​​​ផ្ទុយ​​​ទៅ​​​វិញ​​​​​​អគារ​​​នេះ​​​បាន​​​សង់​​​​​​​​កម្ពស់​​​ហួស​​ពី​​​២០​​​ម៉ែត្រ​​​​​​ រីឯ​​​​​​អគារ​​​នៅ​​​​​​​​​ផ្លូវ​លេខ​​​១៩​​​ត្រូវ​​​បាន​​​អនុញ្ញាតឲ្យ​​​​​​សាងសង់​​​​​​​​​​​​​​​កម្ពស់​​​២៤​​​,៥​​​ម៉ែត្រ  ប៉ុន្តែ​​​ពេល​​​នេះ​​​វា​​​ខ្ពស់​​​ជាង​​​​​​​​​៣៤​​​,៥​​​ម៉ែត្រ​​​ទៅ​​​ហើយ។

លោកស្រី​​​ រឿង ផល្លីន បាន​​​មាន​​​ប្រសាសន៍​​​ថា “អគារ​​​នៅ​​​ទីតាំង​ជុំ​​​វិញ​​​ព្រះ​​​បរម​​​រាជ​​​វាំង​​​​មិន​​​អាច​​​សាង​​​សង់​​​ខ្ពស់​​​បែប​​​​​​នេះ​​​បាន​​​ទេ។ អគារ​​​​​​វឌ្ឍនៈ​​​​​ទំនង​​​ជា​ផ្អាក​​​ការ​​​សាង​​​សង់ហើយ​​​”។ ​​​កម្ទេច​​​ថ្ម​​​ត្រូវ​​​បាន​​​ចាក់​​​គរ​​​នៅ​​​ខាង​​​ក្រៅ​​​​​​ច្រក​​​ទ្វារ​​​ចូល​​​អគារ​​​វឌ្ឍនៈ​​​កាលពីម្សិលមិញ និង​​​មានរបង​​​ស័ង្កសី​​​ពណ៌​​​ខៀ​​​វ​​​​​​ព័ទ្ធ​​​ជុំវិញ​​​ទីតាំង​​​​​ដែល​​​មានសំណាញ់​​​ពណ៌​​​បៃតង​គ្រប​​​ដណ្ដប់​​​នៅ​​​ផ្នែក​​​ខាង​​​មុខ​​​។ គេ​​​មិន​​​ឃើញ​​​មាន​​​កម្មករ​​​នៅ​​​ទីនោះ​​​ទេ ហើយ​​​ច្រកទ្វារ​​​​​​ចូល​​​​​​ត្រូវ​​​បាន​​​ចាក់​​​សោ។ បុគ្គលិក​​​ម្នាក់​​​បម្រើ​​​ការងារ​​​​នៅ​​​សណ្ឋាគារ​​​​​​មួយជាប់​​​អគារ​​​នេះ​​​បាន​​​និយាយ​​​ថា ខ្លួន​​​មិន​​​បាន​​​ឃើញ​​​កម្មករ​​​នៅ​​​ការដ្ឋាន​​​នេះ​​​យ៉ាង​​​ហោច​​​ណាស់​​​ក៏មួយ​​​សប្ដាហ៍​​​​​​ដែរ​​​។

អគារ​វឌ្ឍនៈ​​​បាន​​​បង្ក​​​ការ​​​ឈឺក្បាលដល់​​​ប្រជា​​ពល​​​រដ្ឋ​​​​​​រស់​​​នៅ​​​ក្បែរ​​​នោះ អាជីវកម្ម​​​នានា​​​​​​ និង​​​​​​អ្នក​​​អភិរក្ស​​​តំបន់​​​ក្រុង​​​រាប់​​​ឆ្នាំ​​​មក​​​ហើយ ដោយ​​​សារ​​​តែ​​​​​​ការ​​​សាង​​​សង់​​​បាន​​​បង្ក​​​ការ​​​ខូច​​​ខាត​​​ដល់​​​អគារ​​​សម័យ​​​អាណានិគមនិយម​​​បារាំង មួយ​​​ចំនួន​​​នៅ​​​តាម​​​បណ្ដោយ​​​តីរវិថី​​​ស៊ីសុវត្ថិ​​​ រួមទាំង​​​អគារ​​​ភោជនីយដ្ឋាន​​​​​ និង​​​បារ ​​​FCC ដ៏ពេញនិយម​​​ផង​​​ដែរ​​​។

កាលពី​​​រសៀល​​​ម្សិល​​​មិញនៅ​​​ឯការដ្ឋាន​​​សំណង់​​​ទី២ ដែល​​​គ្រោង​​​នឹង​​​វាយ​​​កម្ទេច​​​ចោល​​​ មាន​​​កម្មករ​​​រាប់​​​សិប​​​នាក់កំពុង​​​​​​បន្ត​​​ធ្វើការ​​​ងារ​​​ធម្មតា ដោយ​​​មាន​​​​​​លោក ស៊ិន គឹមហេង ម្ចាស់​​​អគារ​​​ចាំ​​​ពិនិត្យ​​​មើល​​​។

លោក គឹម ហេង បាន​​​លើក​​​ឡើង​​​ពី​​​អគារ​​​​​​សណ្ឋាគារ​​​​​​​​​​​​​​​​​​​​កម្ពស់​​​១២​​​ជាន់​​​​​​ពេល​​​សាង​​​សង់​​​រួច​​ថា “ខ្ញុំ​​​មិន​​​ទទួល​​​បាន​​​​​​បទ​​​បញ្ជា​​​នេះទេ”។ លោក គឹម ហេង បាន​​​ទទួល​​​ស្គាល់​​​ថា  កិច្ច​​​សន្យា​​​របស់​​​លោក​​​​​​ជាមួយ​​​មន្ទីរ​​​រៀប​​​ចំ​​​ដែន​​​ដី​​​នគរូបនីយកម្ម​​ និង​​​សំណង់​​​រាជធានី​​​ភ្នំពេញ​​​​​​បានលើក​​​ឡើង​​​ថា លោក​​​ទទួល​​​បាន​​​ការ​​​អនុញ្ញាត​​​​​​​​​​​ឲ្យ​​​សាង​​​សង់​​​តែ​​​កម្ពស់​​​២៤,៥​​​ម៉ែត្រ​​​ប៉ុណ្ណោះ​​​​​ ប៉ុន្តែ​​​លោក​​​បាន​​​សម្រេច​​​ចិត្ត​​​សាង​​​សង់​​​​​កម្ពស់​​​​១០​​​ម៉ែត្រ​​​បន្ថែម​​​ទៀត​​​បន្ទាប់​​​ពី​​​លោក​​​នាយក​​​រដ្ឋមន្ត្រី​​​បាន​​​ជំរុញ​​​​​​ជា​​​សាធា​​​រណៈឲ្យ​​​​​ប្រជា​​​ពល​​​​​​​​​រដ្ឋ​​​ធ្វើ​​​បែប​​​នេះ​​​។

​​​កាល​​​ពី​​​ឆ្នាំ​​​មុន​​​លោក ហ៊ុន សែន​​ ត្រូវ​​​បាន​​​គេ​​​​​​​​​ដក​​​ស្រង់​​​​​​​​ប្រ​​​សាសន៍​​​​​​កាល​​​​​​ពី​​​ឆ្នាំ​​​មុនអំឡុង​​​ពិធី​​​​​​សម្ពោធ​​​អគារ​​​ថ្មី​​​របស់​​​​​​ក្រសួង​​​រៀប​​​ចំ​​​ដែន​​​ដី​​​ នគរូប​​​នី​​​យកម្ម និង​​​សំណង់​​​ ដែល​ស្ថិត​នៅ​​​តាមហាវិថី​​​មុនីវង្សថា នឹង​​​លែង​​​មាន​​​ការ​​​រឹត​​​បន្ដឹង​​​ចំពោះ​​​អគារ​​​នៅ​​​ជុំវិញ​​​ព្រះ​​​បរម​​​រាជវាំង​​​ទៀត​​​​​​​​​​​​ហើយ​​​។ កាលពីដើម​​​ឆ្នាំនេះ លោក សឿង សុច្ចរ៉ា អនុ​​​​​​ប្រធាន​​​មន្ទីរ​​​​​​រៀប​​​ចំដែន​​​ដី នគរូបនីយ​​​កម្ម​​​ និង​​​សំណង់​​​រាជធានីភ្នំពេញ បាន​​​អះអាង​​​ថា ការ​​​រឹត​​​បន្តឹង​​​​​​លើ​​​ការ​​​សាង​​​សង់​​​​​អគារ​​​ជុំវិញ​​​ព្រះ​​​បរម​​​រាជវាំង​​​ត្រូវ​​​បាន​​​​​​លោក​​​ ហ៊ុន សែន ដក​​​ចេញ​​​វិញ​​​ហើយ។

លោក​​​បាន​​​មាន​​​ប្រ​​​សាសន៍​​​នៅ​​​ពេល​​​នោះ​​​​​​​​​ថា “យើង​​​មិន​​​ហាម​​​ឃាត់​​​ការ​​​សាង​​​សង់​​​អគារ​​​ខ្ពស់ៗ​​​នៅជុំវិញ​​​ព្រះ​​​បរម​​​រាជវាំង​​​ទេ បន្ទាប់ពី​​​​​​សម្ដេច​​​ នាយក​រដ្ឋមន្ត្រី​ហ៊ុន សែន បាន​​​ផ្តល់​ការ​អនុ​​​ញ្ញាត​​​​​​​​​​​​ឲ្យមាន​ការ​​​​​​​​​​​​សង់​​​អគារ​​​ខ្ពស់​​​ៗ។ កាល​ពីមុន​​​[គោល​​​នយោ​​​បាយ​​​មួយ​​​] បាន​​​ហាម​​​ប្រាម​​​ការ​​​សាង​​​សង់​​​ចម្ងាយ​​​៥០០​​​ម៉ែត្រ​​​ពី​​​បរិវេណ​​​ព្រះ​​​បរម​​​រាជ​​​វំាង​​​ ហើយ​​​​​​​​​បាន​​​កំណត់​​​ឲ្យ​​​សង់​​​អគារ​​​កម្ពស់​​​ត្រឹម​​​១៤​​​ម៉ែត្រ​​​​​​ប៉ុណ្ណោះ​​​រាប់​​​ពីដំបូល​​​ចុះ​​​មក​​​ក្រោម​​​”។ លោក​​​បាន​​​លើកឡើង​​​​​​ថា “ខ្ញុំ​​​មិន​​​ថា​​​​​អីទេ ចំពោះ​​​​​​អគា​​​រ​​​ខ្ពស់ៗ​​​នៅ​​​ជុំវិញ​​​ព្រះ​​​បរម​​​រាជ​​​វាំង​​​ ពីព្រោះ​​​វា​​​នឹង​​​ជំរុញ​​​លើក​​​ទឹក​​​ចិត្ត​​​​​​​​​វិនិយោគិន​​​ និង​​​ធ្វើ​​​​​​ឲ្យ​​​ដី​​​កាន់​​​តែ​​​មាន​​​តម្លៃ​​​”។

លោក​​​ គឹម ហេង បាន​​​មាន​​​ប្រសាសន៍​​​​​​ថា លោក​​​បាន​​​គោរព​​​តាម​​​បទ​​​បញ្ជារបស់​​​លោក ហ៊ុន សែន នៅ​​​ពេល​​​លោក​​​​​​រចនា​​​​​​ប្លង់់​​​សណ្ឋាគារ​​​​​​របស់​​​លោក​​​។ ​លោក កឹម ហេង បាន​លើក​ឡើង​ថា “ ខ្ញុំ​សាង​សង់​អគារ​ខ្ពស់ ​ពី​ព្រោះ​នាយក​រដ្ឋមន្ត្រី​បាន​មាន​ប្រសាសន៍​ថា វា​មិន​អ្វី​នោះ​ទេ​។ លោក​បាន​ថ្លែង​ថា អាជ្ញាធរ​នឹង​មិន​ហាម​អ្នក​ជំនួញ​ដែល​ចង់​សង់​អគារ​ខ្ពស់​ៗឡើយ​។ ប្រសិន​បើ​គេ​កម្ទេច​អគារ​របស់​ខ្ញុំ​ អញ្ចឹង​សេចក្តី​ប្រកាស​របស់​លោក​នាយក​រដ្ឋមន្ត្រី​គឺ​គ្មាន​ន័យ​អ្វី​ឡើយ”​។

អស់​ជាច្រើនឆ្នាំមកហើយ​ដែល​បញ្ហា​សាង​សង់​​អគារ​ខ្ពស់​ជុំវិញ​ព្រះ​បរម​រាជវាំង​បាន​ក្លាយ​​​ជា​ប្រធាន​បទ​នៃការ​ពិភាក្សា​ដេញ​ដោល​ចំពោះ​ការ​គោរព​​​រាជ​វង្សានុវង្ស​ និង​បង្កការ​យល់​ច្រឡំ​ព្រោះ​ពេល​ខ្លះ​ការ​សាង​សង់​អគារ​ខ្ពស់​នៅ​ជិ​ត​ព្រះ​បរម​រាជរាំង​ត្រូវ​បាន​រឹត​​បន្តឹង ប៉ុន្តែ ក្រោយ​មក​បែរ​ជា​មាន​​ការសាងសង់​ជា​ច្រើន​ទៅ​វិញ​។

ឧទាហរណ៍ សណ្ឋាគារ​ Frangipani Royal Palace Hotel ដែល​ស្ថិត​នៅ​តាម​បណ្តោយ​ផ្លូវ​លេខ​១៧៨ ចម្ងាយ​មួយ​ប្លុក​ពី​ព្រះ​បរម​រាជ​វាំង​ ត្រូវ​បាន​ចាប់​ផ្តើម​ និង​បញ្ចប់​ការ​សាង​សង់​កាលពី​ឆ្នាំ​មុន។ អគារនេះ​មាន​កម្ពស់​៨ជាន់​ ហើយមើល​ទៅ​វា​កៀក​នឹង​ព្រះ​បរម​រាជវាំង​ណាស់។ រីឯអគារ​ខ្ពស់​មួយ​ផ្សេង​ទៀត​កំពុង​ត្រូវ​បានសាង​សង់​តាម​បណ្តោយ​ផ្លូវ​លេខ​២៤០ ទល់​មុខ​​មន្ទីរ​ពេទ្យ ​គន្ធបុប្ផា។ ​ខណៈ​​គម្រោង​សាងសង់​នៅ​អតីតសណ្ឋាគារ​រណសិរ្ស​ដែល​មាន​របង​ហ៊ុម​ព័ន្ធ​ ហើយ​មាន​ទីតាំង​ក្បែរ​ព្រះ​បរម​រាជវាំង​ដែរ​នោះ​កំពុង​ស្ថិត​ក្នុង​ភាព​អាថ៌​កំបាំង​។

លោក​ស្រី អាន ឡឺម៉េស (Anne Lemaistre)​ជាតំណាង​ប្រចាំ​ប្រទេសនៃ​អង្គការ​យូណេ​ស្កូបាន​មាន​ប្រសាសន៍​ថា ការ​ទទួល​បាន​នូវ​ដំណឹង​ពី​ការ​កម្ទេច​អគារដ៏​ចម្រូង​ចម្រាស​នេះ បាន​ធ្វើឲ្យ​អង្គការ​របស់​លោក​ស្រី​ពេញ​ចិត្ត​យ៉ាង​ខ្លាំង​។ លោក​ស្រី​បាន​មាន​ប្រសាសន៍​បន្ថែម​ថា “ វា​បញ្ជាក់​ថា ​អ្វី​ដែល​យើង​បាន​លើក​ឡើង​អស់រយៈពេល​ជា​ច្រើន​ខែ​មក​​នេះ​ ​​គឺ​ពិត​ជា​មិន​ខុស​ទេ​។ យើង​យល់​ថា ​ការ​សាង​សង់​អគារ​ខ្ពស់​ៗ​បែប​នេះ​គឺ​ជា​ការ​បង្ហាញ​ពី​​ការ​ខ្វះ​ក្តី​គោរព​ចំពោះគ្រួសារ​​រាជវង្សា​នុវង្ស​​ហើយ​ឥឡូវ​នេះ​សាលារាជ​ធានី​ភ្នំពេញ​បាន​បង្ហាញ​ពីការ​យល់​ឃើញ​ដូច្នេះ​ដែរ​។ យើង​ពិត​ជាពេញ​ចិត្ត​ខ្លាំង​ណាស់”​៕​​

ប្រែស​​ម្រួល​​​ដោយ តែម សុខុម​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស