33 C
Phnom Penh

ក្រុមអ្នក​ត​វ៉ានឹង​ការ​បណ្តេញ​ចេញ​ ​បិទ​មហាវិថី​ព្រះ​មុនីវង្ស​​ ទាមទារ​ឲ្យ​ក្រុមហ៊ុន​សាងសង់​ផ្ទះ​ថ្មី​​

ដោយ ឌឹ ខេមបូឌា ដេលី

បទវិភាគ

អ្នកភូមិ​ដែល​ត្រូវ​បាន​បណ្តេញ​ចេញ​ពី​ដីធ្លី​និង​សកម្មជន​ប្រឆាំង​ការ​បណ្តេញ​ចេញ​ពី​ដីធ្លី​បាន​ប៉ះ​ទង្គិច​​ជាមួយ​នគរ​បាល​​មួយ​ប្រាវ​​បន្ទាប់ពី​មាន​ការ​បិទ​ផ្លូវ​ធំ​នៅ​មុខ​សាលា​រាជ​ធានី​ភ្នំពេ​ញ​កាល​ពី​ម្សិល​មិញ​ដើម្បី​ទាម​ទារ​ឲ្យ​​ក្រុម​ហ៊ុន​ឯក​ជនមួយ ​ដែល​បាន​បណ្តេញ​ពួក​គា​ត់​ចេញ​ដោយ​ហិង្សា​កាល​ពី​ឆ្នាំ​មុន​ធ្វើ​តាម​ការ​​សន្យា​ដើម្បី​​សាង​សង់​ផ្ទះ​ថ្មី​​ឲ្យ​​ពួក​គាត់។

ប់ូលិស​​​បង្រាប​បាតុកម្មបានប៉ះទង្គិច​​​ជាមួយ​​​សកម្ម​​​ជន​​​​​​ប្រឆាំង​​​នឹង​​​ការ​​​បណ្ដេញ​​​ចេញពី​​​ដីធ្លី​​​ ដែល​​​បានធ្វើការ​​​តវ៉ា​​​បិទ​​​​​​មហាវិថី​​​ព្រះ​​​មុនីវង្ស កាល​​​ពី​​​ម្សិលមិញ​​​ ដើម្បី​​​ទាម​​​ទារ​​​ឲ្យ​​​ក្រុម​​​ហ៊ុន​​​ឯកជន​​​មួយ​​​សាង​​​សង់​​​ផ្ទះ​​​ល្វែង​​​ថ្មី​​​ជូន​​​ពួកគាត់​​​។ (ស៊ីវ ចាន់ណា)
ប៉ូលីស​​​បង្រាប​បាតុកម្មបានប៉ះទង្គិច​​​ជាមួយ​​​សកម្ម​​​ជន​​​​​​ប្រឆាំង​​​នឹង​​​ការ​​​បណ្ដេញ​​​ចេញពី​​​ដីធ្លី​​​ ដែល​​​បានធ្វើការ​​​តវ៉ា​​​បិទ​​​​​​មហាវិថី​​​ព្រះ​​​មុនីវង្ស កាល​​​ពី​​​ម្សិលមិញ​​​ ដើម្បី​​​ទាម​​​ទារ​​​ឲ្យ​​​ក្រុម​​​ហ៊ុន​​​ឯកជន​​​មួយ​​​សាង​​​សង់​​​ផ្ទះ​​​ល្វែង​​​ថ្មី​​​ជូន​​​ពួកគាត់​​​។ (ស៊ីវ ចាន់ណា)

ស្ត្រី​ចំនួន​៤០នាក់ ​ដែល​ផ្ទះ​សំបែង​របស់​ពួកគាត់​ស្ថិត​នៅក្បែរ​បុរី​កីឡា នៅ​ក្នុង​​រាជ​ធានី​​ភ្នំពេញ​ត្រូវ​បាន​វាយ​កម្ទេច​អំឡុង​​ការ​ប៉ះ​ទង្គិច​​គ្នា​ដ៏​ហិង្សា​ជាមួយ​នគរ​បាល​កាល​ពី​ខែ​មក​រា ឆ្នាំ​២០១២នោះ ចង់​ឲ្យ​ក្រុម​ហ៊ុន​ផានអ៊ិម៉ិច​ដែលមាន​ខ្នង​ក្រាស់​សាង​សង់​អគា​រ​ផ្ទះ​ល្វែង​​ពីរ​ចុង​ក្រោយ​ក្នុង​ចំណោម​អគារ​ផ្ទះ​ល្វែចំនួន​១០ដែល​ក្រុម​ហ៊ុន​បា​ន​សន្យា​សាង​សង់​នៅ​ពេល​ដែល​ក្រុមហ៊ុននេះ​បាន​ទិញ​ដី​របស់​ពួក​គាត់​។

ស្ត្រី​ទាំង​អស់​នេះ​បាន​ដើរ​ក្បួន​ពី​តំបន់​​​បុរី​កីឡា​ឆ្ពោះ​ទៅកាន់​សាលា​រាជ​ធានី​ភ្នំពេញ​កាលពី​ព្រឹក​ម្សិល​មិញ​ ដើម្បី​ស្នើ​សុំ​ឲ្យ​មន្ត្រី​សាលា​រាជ​ធានី​ភ្នំពេញ​ដាក់​សម្ពាធ​ឲ្យ​ក្រុម​ហ៊ុន​នេះ​បំពេញ​កាតព្វកិច្ច​របស់​ខ្លួន។​ ចូល​រួម​ដោយ​សកម្ម​ជន​ប្រឆាំង​ការ​បណ្តេញ​​ចេញ​ពី​ដី​ធ្លី​ពីរបី​នាក់​ទៀត​មកពី​សហគមន៍​បឹង​កក់​​នៅ​ក្បែរ​ខាង​នោះ ពួក​គាត់​បាន​ស្រាក់​ដៃ​គ្នា​កាត់​ទទឹង​មហា​វិថី​ព្រះ​មុនី​វង្ស​រយៈ​ពេល​ប្រហែល​២០​នាទី មុន​ពេល​នគរ​បាល​ជាង​១៥០​នាក់​បាន​មក​ដល់​ ហើយ​បាន​រុញ​ច្រានឲ្យ​ពួក​គាត់​ចេញ​ពី​ផ្លូវ​ដោយ​ប្រើ​ខែល និង​ដំបង​ ​ធ្វើ​ឲ្យ​ស្ត្រី​ពីរបី​នាក់​ដួល​។

អ្នក​តវ៉ា​ម្នាក់​ឈ្មោះ ញឹម សុភា ដែល​រស់​នៅ​ក្នុង​ខ្ទម​ទ្រុឌ​ទ្រោម​សង់​ពី​បន្ទះ​ក្តារ​​ស្តើងៗ​ ហើយ​ប្រក់​កៅស៊ូ​តង់​​ក្បែរ​គំនរ​សំរាម​​ដែល​មាន​ក្លិន​ស្អុយ​ នៅ​ជិត​កន្លែង​ដែល​រង​ការ​បណ្តេញ​ចេញ​នៅ​សហ​គមន៍​បុរីកីឡា ចាប់​​តាំង​ពី​ផ្ទះ​ដ៏​ចាស់​របស់​អ្នក​ស្រី​ត្រូវ​បាន​ក្រុម​ហ៊ុន ផានអីុមិុច​ វាយ​កម្ទេច​ចោល​នោះ​ បាន​និយាយ​ថា “នគរ​បាល​បាន​ចាប់​មួល​ដៃ​របស់​ខ្ញុំ​ ហើយ​វាយ​ខ្ញុំ​មួយ​ដំបង​ចំ​កដៃ​”។ អ្នក​ស្រី​បាន​និយាយ​ថា “ខ្ញុំ​មាន​ការ​ឈឺ​ចាប់​​ ​ពី​ព្រោះ​នគរ​បាល​បាន​ប្រើ​អំពើ​ហិង្សា​មក​លើ​​អ្នក​តវ៉ា​ដែលមាន​តែ​ដៃទទេ ហើយ​ខ្ញុំ​ខឹង​យ៉ាង​ខ្លាំង​ចំពោះ​ទង្វើ​នេះ ពី​ព្រោះ​យើង​សុទ្ធ​តែ​ខ្មែរ​ដូច​គ្នា”។

លោក លឹម ហុង អធិការ​រង​នគរ​បាល​ខណ្ឌ​ដូន​ពេញ​បាន​មាន​ប្រសាសន៍​ថា មន្ត្រី​របស់​លោក​ប្រើ​តែ​កម្លាំង​ប៉ុណ្ណោះ​។ លោក​បាន​មាន​ប្រសាសន៍​ថា “យើង​មិន​បាន​វាយ​ពួក​គាត់​ទេ ប៉ុន្តែ យើង​គ្រាន់​តែ​រុញ​ច្រាន​ពួក​គាត់​ឲ្យ​ទៅ​ចិញ្ចើម​ផ្លូវ​តែប៉ុណ្ណោះ ហើយ​​ពួក​គាត់​រង​របួស​​នៅពេល​ដែល​ដួល។ ខ្ញុំ​បាន​សុំ​ឲ្យ​ពួក​គាត់​ឡើង​ទៅ​ចិញ្ចើម​ផ្លូវ ប៉ុន្តែ ពួក​គាត់​មិន​ស្តាប់​ខ្ញុំទេ ដូច្នេះ​ខ្ញុំ​ត្រូវ​តែ​ប្រើ​កម្លាំង​ដើម្បី​សម្រួល​ដល់​ការ​ធ្វើ​ចរាចរណ៍​”។

ទី​បំផុត​មុន​ពេល​ចេញ​​ដំណើរ​បាន​បន្តិច​មុន​ពេល​ថ្ងៃ​ត្រង់ ពួក​គាត់​ដែល​សុទ្ធ​តែ​ជា​ស្ត្រី​នោះ​បាន​ជួប​ជាមួយ​លោក ឃួង ស្រេង អភិបាល​រង​រាជ​ធានី​ភ្នំ​ពេញ​រយៈ​ពេល​ខ្លី ដែល​​បាន​ចេញ​មក​ទទួល​យក​ញត្តិ​របស់​​ពួក​គាត់ ដើម្បី​​ស្នើ​ឲ្យ​ក្រុម​ហ៊ុន​ផាន​អ៊ីម៉ិច​ សាង​សង់​បញ្ចប់​អគារ​ចុង​ក្រោយ​ចំនួន​ពីរ ហើយ​ផ្តល់​សំណង​ដល់​គ្រួសារ​ដែល​ត្រូវ​បាន​បណ្តេញ​ចេញ​ពី​ផ្ទះ​សំបែង​ និង​ដី​ធ្លី ដែល​ត្រូវ​បាន​វាយ​កម្ទេច​ចោល​កាល​ពី​ឆ្នាំ​មុននោះ។

នៅពេល​ទាក់​ទង​ក្រោយ​មក លោក ឃួង​ ស្រេង បាន​មាន​ប្រសាសន៍​ថា លោក​បាន​ប្រគល់​​ញត្តិ​នេះ​ទៅ​ឲ្យ​លោក ឡុង ឌីម៉ង់ អ្នក​នាំ​ពាក្យ​សាលា​រាជ​ធានី​ភ្នំ​ពេញ ដែល​បាន​បដិសេធ​មិន​ធ្វើ​អត្ថា​ធិប្បាយ។

អ្នក​ស្រី ស៊ុយ សុផាន ម្ចាស់​ក្រុម​ហ៊ុន​ផាន​អ៊ីម៉ិច បាន​អះ​អាង​ថា ក្រុម​ហ៊ុន​របស់​អ្នក​ស្រី​មិន​បាន​ជំពាក់​ផ្ទះ​ល្វែង​អ្នក​តវ៉ា​ទាំង​នេះ​ទេ ពី​ព្រោះ​ពួក​គាត់​មិន​មែន​ជា​អ្នក​ភូមិ​ស្រប​ច្បាប់​ដែល​រស់​នៅ​លើ​ដីនេះ​តាំង​ពី​ដំបូង​​។

សាលា​ដំបូង​រាជ​ធានី​ភ្នំពេញ​ក៏​បាន​ច្រាន​ចោល​រឿង​ក្តី​ដែលអ្នក​ភូមិ​រងការ​​បណ្តេញ​ចេញ​ទាំងនេះប្តឹង​ក្រុម​ហ៊ុន​របស់​អ្នក​ស្រី​ផង​ដែរ។ កន្លែង​ដែលនឹង​ត្រូវ​សាង​សង់​ផ្ទះ​ល្វែង​បន្ថែម​នោះ ឥឡូវ​នេះគឺ​ជា​ឃ្លាំង​លក់​​រថយន្ត​ស្ព័រ​ទំនើប​ទៅ​វិញ។ កន្លែង​ដែល​ផ្ទះ​របស់​ពួក​គាត់​ត្រូវ​បាន​វាយ​កម្ទេច​ចោល​​​នោះ គឺ​ជា​វាល​ស្មៅ​នៅ​ទំនេរ​ស្អាត។

លោក ពេជ្រ លឹមឃួន អ្នក​ភូមិ​ដែល​ត្រូវ​បាន​បណ្តេញ​ចេញ​ ជា​អ្នក​រៀប​ចំ​ការ​តវ៉ា​ម្នាក់​ក្នុង​ចំណោម​អ្នក​រៀប​ចំ​ការ​តវ៉ា​ជា​ច្រើន​កាល​ពី​ម្សិល​មិញ​នោះ​បាន​និយាយ​ថា​ ពួក​គាត់​ទុក​ពេល​មួយ​សប្តាហ៍​ឲ្យ​សាលា​រាជ​​ធានី​ឆ្លើយ​តប​ចំពោះ​សំណើ​ថ្មី​បំផុត​របស់​ពួក​គាត់​ក្នុង​ការ​សុំ​ជំនួយ​នេះ។ ប្រសិន​បើ​ពួក​គាត់​មិនបាន​ទទួល​ព័ត៌​មាន​វិញនៅ​ពេល​នោះ​ទេ​នោះ ពួក​គាត់​នឹងទៅ​កាន់​កាប់​កន្លែង​ដែល​​ត្រូវ​សាង​សង់​ប្លុក​ផ្ទះ​ល្វែង​ទាំង​ពីរ​នោះ​។

លោក​បាន​និយាយថា “យើង​នឹង​មក​ស្នាក់​នៅ​លើ​ដី​នោះ​តែ​ម្តង​ ប្រសិន​បើ​សាលា​​រាជ​ធានី​មិន​រក​ដំណោះស្រាយ​ឲ្យ​ពួក​យើង​ក្នុង​រយៈ​ពេល​មួយ​សប្តាហ៍​ទេ​នោះ ពី​ព្រោះ​ដី​នេះ​ជា​កម្ម​សិទ្ធិ​ស្រប​ច្បាប់​របស់​អ្នក​ភូមិ​ដែល​រង​ការ​បណ្តេញ​ចេញ​ទាំង​នេះ”៕

ប្រែ​សម្រួល​ដោយ សោម សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស