25 C
Phnom Penh

រដ្ឋសភា​អនុម័ត​ថវិកា​​២៥​លាន​ដុល្លារ​​ ទោះបី​ជាអវត្តមាន​សមាជិក​ជាប់​ឆ្នោត​ជិត​ពាក់​កណ្តាល​ក៏​ដោយ​

ដោយ ឌឹ ខេមបូឌា ដេលី

បទវិភាគ

គណៈកម្មាធិការ​អចិន្ត្រៃយ៍​ត្រួត​ត្រា​ដោយ​​គណបក្ស​ប្រជា​ជន​កម្ពុជា​នៅ​រដ្ឋ​សភា​ថ្មី​ បាន​អនុម័ត​ថវិកា​២៥លាន​ដុល្លារ​ សម្រាប់​រ៉ាប់​រង​​រាល់​ការ​ចំណាយ​របស់​​រដ្ឋ​សភា​នា​ឆ្នាំក្រោយ​​ទោះ​បីជា​សមាជិក​ជាប់​ឆ្នោត​របស់​ខ្លួន​ជិត​ពាក់​កណ្តាល​នៃ​ចំនួន​សមាជិក​សរុប​១២៣​រូប​នៅ​តែ​បន្ត​អវត្តមាន​ក៏ដោយ​។

សមាជិកស​ភា​ជាប់​ឆ្នោត​ទាំង​៥៥រូប​មក​ពី​គណបក្ស​សង្គ្រោះ​ជាតិ​បាន​និង​កំពុង​តែ​ធ្វើ​ពហិការ​សភា​ តាំង​ពី​សភា​បាន​បើក​សម័យ​ប្រជុំ​ដំបូ​ងរបស់​ខ្លួន​ក្នុង​ថ្ងៃទី​២៣​ ខែ​កញ្ញា​ ដើម្បី​បដិសេធ​ការ​បោះឆ្នោត​ជាតិ​កាល​ពី​ខែ​កក្កដា​។ គណបក្ស​ប្រឆាំង​បាន​អះអាងថា ​គណបក្ស​ប្រជា​ជន​កម្ពុជា​​បាន​លួច​បន្លំ​សន្លឹក​ឆ្នោត​។ គណបក្ស​សង្គ្រោះ​ជាតិ​ចាត់​ទុក​​សភា​បច្ចុប្បន្ន​ជាសភា​មិន​ស្រប​នឹង​រដ្ឋ​ធម្មនុញ្ញ​ និង​កំពុង​តែ​ជំរុញ​ឲ្យ​ម្ចាស់​ជំនួយ​របស់​ប្រទេស​កម្ពុជា​ផ្អាក​ទំនាក់​ទំនង​ជាមួយ​រដ្ឋាភិបាល​ថ្មី​រហូត​ទាល់​តែ​ជម្លោះ​ក្នុង​ការ​បោះឆ្នោត​​ត្រូវ​​បាន​ដោះស្រាយ​។

សមាជិក​សភាទាំង​៦៨​រូបរបស់​​គណបក្ស​ប្រជា​ជន​កម្ពុជា​​​បាន​បង្កើត​គណៈកម្មាធិការ​​អចិន្ត្រៃយ៍​ដែលមាន​សមាជិក​១២រូប​នៅ​រដ្ឋ​សភា​ រួ​មទាំង​ប្រធាន​សភា​ អនុ​ប្រធាន​ពីរ​រូប​ និង​ប្រធាន​គណៈកម្មាធិការ​អចិន្ត្រៃយ៍​ទាំង​ប្រាំ​បួន​នៃ​រដ្ឋសភា​។

លោក ជាម យៀប សមាជិក​សភា​ និង​ជា​សមាជិក​គណៈកម្មាធិការ​អចិន្ត្រៃយ៍​មក​ពី​គណបក្ស​ប្រជា​ជន​កម្ពុជា​​បាន​លើក​ឡើង​កាល​ពីថ្ងៃពុធ​ថា គណៈកម្មាធិ ការ​សភា​បាន​​អនុម័ត​ថវិកា​១០០.០០០លាន​រៀល​ ឬ​ក៏​ប្រហែល​២៥​លាន​ដុល្លារ​ ដើម្បី​ដោះ​ស្រាយ​រាល់​ការ​ចំណាយ​របស់​រដ្ឋ​សភា​នាឆ្នាំក្រោយ​​។ ចំនួន​ទឹក​ប្រាក់​នេះ​មាន​កំណើន​បន្តិច​ បើ​ធៀប​នឹង​ថវិកា​អនុម័ត​កាល​ពីឆ្នាំមុន​។

លោក​បាន​មាន​ប្រសាសន៍ថា “យើង​ធ្វើ​វា​ម្ត​ង​ក្នុង​មួយ​ឆ្នាំ​។ ​ថវិកានេះ​​កើន​ឡើង​១,៦​ភាគ​រយ​បើ​ធៀបនឹង​ថវិកា​ឆ្នាំ​២០១២​”។ លោក​បាន​ឲ្យ​ដឹង​បន្ថែម​ទៀត​ថា ថវិកា​ទាំង​នេះ​នឹង​ត្រូវ​បាន​យក​ទៅប្រើ​ប្រាស់​​​សម្រាប់​ចំណាយ​លើ​ប្រាក់​ខែ​ ការធ្វើ​ដំណើរ​ សម្លៀក​បំពាក់​ និ​ងម្ហូប​អាហារ​។ នៅ​ពេល​មាន​សំណួរ​លើក​ឡើង​ថា តើ​អវត្ត​មាន​របស់​សមាជិក​សភា​ជិត​ពាក់​កណ្តាល​អាច​មាន​ផល​ប៉ះពាល់​ចំពោះ​​ថវិកា​នេះ​ដែរ​ ឬ​យ៉ាង​ណា​ លោក​បាន​​ឆ្លើយ​តប​វិញថា “វា​មិនមាន​បញ្ហា​​ទេ​”។ ទោះបីជាយ៉ាង​ណា លោក​បាន​លើក​ឡើ​ង បន្ថែម​ទៀត​ថា  សមាជិក​សភា​ទាំង​៥៥​រូប​របស់​គណបក្ស​សង្គ្រោះ​ជាតិ​ប្រហែល​ជា​នឹង​ត្រូវ​ស្បថ​ មុន​ពេល​ក្លាយ​ជា​សមាជិក​សភា​​ បើ​មិន​ដូច្នោះ​ទេ​ពួក​គេ​មិន​មាន​សិទ្ធិ​ទទួល​បាន​ប្រាក់​ខែ​របស់​ពួក​គេ​ទេ​។

លោក ជាម​ យៀប បន្ត​ថា ថវិកា​រដ្ឋ​សភា​នឹង​ត្រូវ​បាន​ដាក់​បញ្ចូល​ទៅ​ក្នុង​ថវិកាជាតិ​ប្រចាំឆ្នាំ​របស់​រដ្ឋាភិបាល​។​លោក​បានឲ្យ​ដឹង​ផង​ដែរ​ថា  ថវិកា​ជាតិ​នេះ​កំពុង​ត្រូវ​បាន​រៀប​ចំ​ និង​កំណត់​ពេល​វេលា​សម្រាប់​ការ​បោះឆ្នោត​​ក្នុ​ងសម័យ​ប្រជុំ​​ពេញ​អង្គ​នៃ​រដ្ឋ​សភា ​​​នៅ​ថ្ងៃ​ទី​១​ ខែ​ធ្នូ​។ នៅ​​​ឆ្នាំមុន​ រដ្ឋ​សភា​​​​ បាន​​​​អនុម័ត​ថវិកា​​៣,១​ពាន់​លាន​ដុល្លារ​សម្រាប់​ឆ្នាំ​២០១៣​​ ពោល​គឺ​ច្រើន​ជាង​ថវិកា​សម្រាប់​ឆ្នាំ​២០១២​​ប្រហែល​៥០០លាន​ដុល្លារ​។

លោក​ ញ៉ែម ប៉ុញារិទ្ធ​ សមាជិក​សភា​ជាប់​ឆ្នោត​របស់​គណបក្សស​ង្គ្រោះ​ជាតិ​បាន​រិះ​គន់​ការ​បោះឆ្នោត​កាល​ពីថ្ងៃពុធ​ ដែល​ធ្វើ​ឡើ​ង​ដោយ​​​​គណៈកម្មាធិការ​អចិន្ត្រៃយ៍​ថា ខ្វះ​តម្លា​ភាព​ ហើយ​លោក​បា​នលើក​ឡើង​ថា គណៈ​កម្មាធិការ​នេះ​គួរ​តែ​បាន​ព្យាយាម​កាត់​បន្ថយ​ចំណាយ​របស់​សភា​ទៅ​លើ​ខ្លួន​ឯង​ ជា​ពិសេស​ទៅលើ​ខ្ទង់​ចំណាយ​ផ្សេងៗ​ដូចជា ​មធ្យោ​បាយ​ដឹក​ជញ្ជូន​​ និង​ការ​ស្នាក់​នៅ​អំឡុង​ការ​ធ្វើ​ដំណើរ​នានា​។ លោក​បាន​មាន​ប្រសាសន៍ថា “ខ្ទង់​ចំណាយ​សម្រាប់​កិច្ច​ការ​មិន​ចាំបាច់​ គួរតែ​ត្រូវ​បាន​កាត់​បន្ថយ​ ពីព្រោះ​ប្រទេស​របស់​យើង​ជំពាក់​បំណុល​គេ​យ៉ាង​ច្រើន​ និង​ស្ថិត​ក្នុង​​ភាព​ក្រីក្រ​នៅ​ឡើយ​”។

លោក ជាម​ យៀប និ​ងលោក ញ៉ែម​ ប៉ុញា​ រិទ្ធ​ សុទ្ធ​តែ​បាន​លើកឡើង​ថា គណបក្ស​ទាំ​ង​ពីរ​​មិន​បាន​​ធ្វើ​ឲ្យមាន​វឌ្ឍនភាព​ក្នុង​ការ​ដោះ​​​ស្រាយ​ការ​ខ្វែង​គំនិត​គ្នា​ជុំវិញ​ការ​បោះ​ឆ្នោត​ និង​មិន​​សហការ​គ្នា​​ក្នុ​ងការ​ត្រឡប់​ទៅ​រក​កិច្ច​ចរចា​ទេ​។ គណ​បក្ស​សង្គ្រោះ​ជាតិ​កំពុង​តែ​ត្រៀម​ខ្លួន​ធ្វើ​មហា​បាតុកម្ម​ក្នុ​ងរាជធានី​ភ្នំពេញ​ ដើម្បី​ប្រឆាំង​​​លទ្ធ​ផល​បោះឆ្នោត​​ដ៏​ប្រទាញ​ប្រទង់​ នៅ​ថ្ងៃ​ពុធ​សប្តាហ៍​ក្រោយ​៕

ប្រែ​​​សម្រួល​​​ដោយ កង សុធា

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស