កាលពីម្សិលមិញ អភិបាលរាជធានីភ្នំពេញបានបដិសេធមិនបញ្ជាក់ថា តើអគារពីរដែលនៅក្បែរព្រះបរមរាជវាំងនឹងត្រូវបានកម្ទេច ឬយ៉ាងណាទេ បន្ទាប់ពីក្រុមមន្ត្រីខណ្ឌ និងសង្កាត់បានលើកឡើងកាលពីថ្ងៃពុធថា អគារ ទាំងពីរនេះនឹងត្រូវបានកម្ទេចនៅពេលឆាប់ៗនេះ ដោយសារតែមានការរំលោភបំពានផ្នែកកម្ពស់អគារ។
លោក ប៉ា សុជាតិវង្ស អភិបាលរាជធានីភ្នំពេញបានបដិសេធមិនធ្វើសេចក្តីអត្ថាធិប្បាយទាក់ទងនឹងសេចក្តីរាយការណ៍អំពីការកម្ទេចអគារទាំងនេះ ហើយបានលើកឡើងថា កិច្ចពិភាក្សាជាច្រើនកំពុងដំណើរការ។ លោក ប៉ា សុជាតិវង្ស បានមានប្រសាសន៍ថា “ខ្ញុំមិនអាចនិយាយថា តើអគារណានឹងត្រូវបានកម្ទេចបានទេ ពីព្រោះមានការងារបចេ្ចកទេសដែលត្រូវលើកយកទៅពិភាក្សាជាមួយមន្ទីរសាធារណការក្រុងជុំវិញការកម្ទេចអគារខុសច្បាប់ទាំងនេះ។ ដូច្នេះសូមផ្តល់ពេលវេលាដល់ខ្ញុំបន្ថែមទៀត”។
លក្ខខណ្ឌរឹតបន្តឹងបណ្តោះអាសន្នផ្នែកកម្ពស់អគារត្រូវបានប្រើប្រាស់ជាយូរមកហើយ សម្រាប់កំណត់កម្ពស់អគារដែលនៅក្បែរព្រះបរមរាជវាំង ក៏ប៉ុន្តែ កាលពីឆ្នាំមុនលោកនាយករដ្ឋមន្ត្រី ហ៊ុន សែន បានលើកឡើងនៅក្នុងសុន្ទរកថាមួយថា លក្ខខណ្ឌរឹតបន្តឹងទាំងនោះលែងមានទៀតហើយ ហើយវិនិយោគិនអាចសង់អគារនៅជុំវិញព្រះបរមរាជវាំងបាន ប្រសិនបើពួកគេចង់។
កាលពីម្សិលមិញ លោក បេងហុង សុជាតិ ខេមរ៉ូ អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់បានអះអាងថា អគារទាំងពីរដែលត្រូវបានទុកសម្រាប់កម្ទេច បានបណ្តាលឲ្យមានការចាប់អារម្មណ៍ពីសំណាក់អាជ្ញាធរ មិនមែនដោយសារតែអគារទាំងនោះមានកម្ពស់ខ្ពស់ បើប្រៀបធៀបនឹងព្រះបរមរាជវាំង ក៏ប៉ុន្តែ អគារទាំងនោះល្មើសនឹងលក្ខខណ្ឌនៃសេចក្តីអនុញ្ញាតលើផែនការសាងសង់អគារទាំងនោះ។
លោក បេងហុង សុជាតិ ខេមរ៉ូ បានមានប្រសាសន៍ថា “បច្ចុប្បន្នបញ្ហាសម្រាប់អគារទាំងពីរនេះ គឺមិនែមនដោយសារតែវាខ្ពស់ពេកទេ ក៏ប៉ុន្តែ ដោយសារតែ នៅពេលពួកគេស្នើសុំសេចក្តីអនុញ្ញាតសាងសង់ ពួកគេបានព្រមព្រៀងសាងសង់ក្នុងកម្រិតកម្ពស់មួយជាក់លាក់ ក៏ប៉ុន្តែ ពួកគេសាងសង់រហូតធ្វើឲ្យអគារនោះមានកម្ពស់ខ្ពស់ជាងកម្ពស់អនុញ្ញាត”។
ប្រសិនបើអគារទាំងពីរត្រូវបានកម្ទេចដូចអ្វីដែលក្រុមមន្ត្រីសង្កាត់ និងខណ្ឌបានលើកឡើងកាលពីថ្ងៃពុធ លោក សុជាតិខេមរ៉ូ បានលើកឡើងថា ច្បាស់ណាស់ថា រដ្ឋាភិបាលនឹងមិនផ្តល់សំណងដល់ម្ចាស់អគារទេ។ លោក បានមានប្រសាសន៍ថា “ ហេតុអ្វីបានជារដ្ឋាភិបាលគួរតែត្រូវផ្តល់សំណង? រដ្ឋាភិបាលបានផ្តល់សេចក្តីអនុញ្ញាតដល់ពួកគេសម្រាប់សាងសង់អគាររបស់ពួកគេ ក្នុងកម្ពស់ដែលបានព្រមព្រៀងគ្នា ហើយដោយសារតែកម្ពស់អគារបានឡើងខ្ពស់ហួស ហើយល្មើសនឹងច្បាប់ និងនៅពេលអ្នកល្មើសច្បាប់ អ្នកត្រូវប្រឈមនឹងការផាកពិន័យ ហើយផ្នែកមួយនៃការផាកពិន័យនេះនឹងជាការកម្ទេចអគាររបស់ពួកគេ”។
សកម្មភាពសាងសង់អគារមួយនៅក្នុងចំណោមអគារទាំងនេះត្រូវបានផ្អាកតាំងពីមុនថ្ងៃឈប់សម្រាកបុណ្យភ្ជុំបិណ្ឌ នេះបើយោងតាមបុគ្គលិកសន្តិសុខនៅក្នុងច្រកចូលជាន់ក្រោមដែលត្រូវបានចាក់សោ បន្ទាប់ពីមានបញ្ជាកាលពីថ្ងៃទី១ ខែតុលា ចេញពីលោក ប៉ា សុជាតិវង្ស ដែលបានចេញបញ្ជាឲ្យបញ្ឈប់ សកម្មភាពសាងសង់នេះ។ អគារមួយនេះគឺជាកម្មសិទ្ធិរបស់ក្រុមហ៊ុនវឌ្ឍនៈ ប្រ៊ូភើធី (Vattanac Properties)។
នៅឯអគារទី២ដែលរងការរិះគន់ និងស្ថិតនៅកាច់ជ្រុងរវាងផ្លូវតូចមួយ និងផ្លូវលេខ៩ នៅខាងក្រោយសាកលវិទ្យាល័យភូមិន្ទវិចិត្រសិល្បៈ កាលពីម្សិលមិញ ក្រុមកម្មករនៅតែមិនរវីរវល់នឹងសេចក្តីរាយការណ៍ដែលថា អគារលំនៅដ្ឋានកម្ពស់១២ជាន់ប្រឈមនឹងការកម្ទេច ខណៈដែលអ្នកជំនួញដែលជាម្ចាស់គម្រោងអគារនេះបានលើកឡើងថា លោកនៅតែគ្រាន់តែបានឮអំពីការគំរាមតាមរយៈប្រព័ន្ធផ្សព្វផ្សាយក្នុងស្រុកប៉ុណ្ណោះ។
លោក សិុន គឹមហេង ដែលកាលពីពេលថ្មីៗនេះ លោកបានសាងសង់អគារហួសកម្ពស់២៤,៥មែ៉ត្រ គុណនឹង១០ម៉ែត្រ ដែលត្រូវបានអនុញ្ញាតឲ្យសាងសង់ ពីព្រោះកាលពីឆ្នាំមុន លោកនាយករដ្ឋមន្ត្រី ហ៊ុន សែន បានអំពាវនាវឲ្យក្រុមហ៊ុនអភិវឌ្ឍន៍សាងសង់អគារខ្ពស់ៗ។ ក្រុមហ៊ុនសូគីម៉ិច គ្រុប (Sokimex Group) ដែលជាក្រុមហ៊ុនពហុជំនួញក្នុងស្រុក បានដាក់ផែនការឲ្យសាលារាជធានីភ្នំពេញពិនិត្យដើម្បីសាងសង់សណ្ឋាគារដ៏ធំមួយដែលមានកម្ពស់១៥ជាន់ នៅផ្លូវលេខ១៣ កែងផ្លូវ១៧៨ ហើយអគារសណ្ឋាគារនោះស្ថិតនៅចម្ងាយពីរបីរយម៉ែត្រពីព្រះបរមរាជវាំង។
ក៏ប៉ុន្តែ លោក បេងហុង សុជាតិខេមរ៉ូ បានលើកឡើងថា លោក រំពឹងថា អគារនោះនឹងបន្តដំណើរការ។ លោក បានមានប្រសាសន៍បន្ថែមថា “ខ្ញុំគិតទុកជាមុនថា សកម្មភាពសាងសង់អគារនោះនឹងបន្តដំណើរការ ប្រសិនបើសំណើសាងសង់អគារ១៥ជាន់នោះត្រូវបានអនុម័ត និងព្រមព្រៀង”៕
ប្រែសម្រួលដោយ កង សុធា