30 C
Phnom Penh

រដ្ឋាភិបាល​ដោះ​ដូរ​ទីតាំង​វិទ្យុ​ជាតិ​ជាមួយ​ក្រុម​ហ៊ុនឯក​ជន

ដោយ ឌឹ ខេមបូឌា ដេលី

បទវិភាគ

ក្រសួង​ព័ត៌​មាន​បាន​ដោះ​ដូរ​ដី​ទំហំ​១១​ហិក​តា​នៅ​ក្នុង​ខណ្ឌមាន​ជ័យ​ដែល​ជា​អតីត​ទី​តាំង​វិទ្យុ​ជាតិ AM 918 ជាមួយ​ក្រុម​ហ៊ុន​អភិវឌ្ឍន៍​​អចលន​ទ្រព្យ​មួយ​ ជាថ្នូរ​នឹង​ការសាង​សង់​ស្ថានីយ និង​អង់តែន​វិទ្យុ​ថ្មី​នៅ​លើ​ដីទំហំ​២០​ហិកតា​​ស្ថិត​​នៅ​ចម្ងាយ​ប្រហែល​២៥​គីឡូ​ម៉ែត្រ​ពី​រាជ​ធានី។

លោក ខៀវ កាញារីទ្ធ រដ្ឋ​មន្ត្រី​ក្រសួង​ព័ត៌​មាន​បាន​មាន​ប្រសាសន៍​កាល​ពី​ម្សិល​មិញ​ថា មិន​មាន​ការ​ដេញ​ថ្លៃ​ជា​សាធារណៈ​សម្រាប់​​ការ​ដោះ​ដូរ​ដី​រដ្ឋ​នេះ​ទេ​ ប៉ុន្តែ ផ្ទុយ​ទៅ​វិញ​ខ្លួន​លោក​ផ្ទាល់​បាន​ហៅ​ក្រុម​ហ៊ុន​អភិវឌ្ឍន៍​ទាំង​អស់​ឲ្យ​មក​មើល​ដីនេះ​ ហើយ​​បាន​សម្រេច​ប្រគល់​ដី​នេះ​ទៅ​ឲ្យ​ក្រុម​ហ៊ុន ​ឃុន​ ស៊ា​ អភិវឌ្ឍន៍​ ហើយ​ក្រុម​ហ៊ុន​នេះ​ជា​អ្នក​​​ទទួល​សាងសង់​ស្ថានីយ​វិទ្យុ​ថ្មី​នៅ​ក្នុង​ស្រុក​​កណ្តាល​ស្ទឹង​ ខេត្ត​កណ្តាល។

នៅពេល​សួរ​ថា ហេតុ​អ្វី​បាន​ជា​ក្រសួង​របស់​លោក​មិន​ផ្សព្វ​ផ្សាយ​ជា​សា​ធារណៈ​ សម្រាប់​ការដេញ​ថ្លៃ​យក​ដី​រដ្ឋ​នេះ​ លោក ខៀវ កាញារីទ្ធ​ បាន​មាន​ប្រសាសន៍​ថា “នេះ​ជា​ករណី​លើក​លែង​ ពី​ព្រោះ​គ្មាន​នរណា​ម្នាក់​ចង់​បាន​ដី​នេះទេ​”។ អតី​ត​ទីតាំងវិទ្យុ​ជាតិ​ទំហំ​១១​ហិកតា​នៅ​​​ក្នុង​រាជ​ធានី​ភ្នំពេញ​ ដែល​ស្ថិត​នៅ​ចម្ងាយ​ប្រហែល​ពីរ​បី​គីឡូម៉ែត្រ​ពី​ស្ពាន​ស្ទឹង​មានជ័យ​នៅ​តាម​ផ្លូវ​លេខ​២១៧​នេះ ឥឡូវ​នេះ​គឺ​ជា​ការដ្ឋាន​សាង​សង់​វីឡា និង​ខុនដូរ​ទំនើបៗ​របស់​​​​បុរី ប៉េង ហួត ជាក្រុម​ហ៊ុន​សំណង់​ និង​អភិ​​​វឌ្ឍន៍​​​​អចលនទ្រព្យ​ដែល​លោក ខៀវ កាញារីទ្ធ​ បាន​មាន​ប្រសាសន៍​ថា ​ជា​ដៃ​គូ​​របស់​ក្រុម​ហ៊ុន​​​ ឃុនស៊ា គ្រុប​ ចាប់​តាំង​ពី​មាន​ការ​ព្រ​មព្រៀង​ដោះ​ដូរ​ដី​រដ្ឋ​នេះ​ កាល​ពីឆ្នាំ​២០១០​។

ទន្ទឹម​នឹង​នេះដែរ​ ស្ថានីយ​វិទ្យុ​ AM ៩១៨ រលក​​​​​ធាតុ​អាកាស​ខ្លី របស់​រដ្ឋា​ភិបាល​ត្រូវ​បាន​បិទ​ទ្វា​រ​​​ចាប់តាំង​ពី​​ស្ថានីយ​នៅ​ក្នុង​រាជ​ធានី​ភ្នំ​ពេញ​​​​ត្រូវ​​​​បាន​រុះ​រើ​ កាលពី​ខែ​កញ្ញា ឆ្នាំ​២០១២​មក។ បុគ្គលិក​នៅ​បុរី ប៉េង ហួត បានបញ្ជាក់​ថា ក្រុម​ហ៊ុន​ទទួល​បន្ទុក​សាង​សង់​ស្ថានីយ​​វិទ្យុ​នេះ ប៉ុន្តែ មិន​បាន​ដឹង​ព័ត៌​មាន​លម្អិត​អំពី​កិច្ច​ព្រម​ព្រៀង​ជាមួយ​ក្រុម​ ឃុនស៊ា គ្រុប ​ទេ​។​ការ​ហៅ​ទូរស័ព្ទ​ទៅ​លេខ​​ទូរស័ព្ទ​របស់​ក្រុម​ហ៊ុន ឃុនស៊ា គ្រុប មិន​មាន​អ្នក​ទទួល​ទេ​កាល​ពី​ម្សិល​មិញ​។
បុរី ប៉េង ហួត គឺ​ជា​កម្ម​សិទ្ធិ​របស់​​លោក​ ហៀក ប៊ុនប៉េង និង​លោក​ ថាយ ជា ហួត ដែល​ត្រូវ​ជាបង​ប្អូន​បង្កើត​នឹង​គ្នា​។ នៅ​​លើ​គេហទំព័រ​របស់​ក្រុម​ហ៊ុន​នេះ​ ក្រុម​ហ៊ុន​នេះ​បាន​អួត​ថា បាន​សាង​សង់​បុរីចំនួន​១០នៅក្នុង​រាជ​ធានី​ភ្នំពេញ​ តាំង​ពី​ឆ្នាំ​២០០៥​មក​។

ក្រុម​ហ៊ុន ឃុន ស៊ា គ្រុប របស់​ពាណិជ្ជករ​ក្នុង​ស្រុក​ឈ្មោះ ឃុន ស៊ា បាន​ឲ្យ​តម្លៃ​ខ្ពស់​ជាង​ក្រុម​ហ៊ុន​ផ្សេង​ទៀត ដែល​ប្រកួត​ប្រជែង​​ចង់​បាន​ដី​របស់​ក្រសួង​នេះ ហើយ​បាន​​សន្យា​ចេញ​ថ្លៃ​ចំណាយ​ទាំង​អស់​សម្រាប់​ការ​សាង​សង់​ស្ថានីយ​វិទ្យុ​ថ្មី​នេះ ព្រមទាំង​ចេញ​សំណង​សម្រាប់​បុគ្គលិក​ចំនួន​៤០​នាក់​របស់​វិទ្យុ​នេះ ហើយ​លោក ខៀវ កាញារីទ្ធ​ បាន​មាន​ប្រសា​សន៍​ថា ការ​ចំណាយ​ទាំង​អស់​​នេះ​មាន​ចំនួន​ប្រហែល​ជាង​៩លាន​ដុល្លារ​ គឺ​ខ្ពស់​ជាង​ក្រុម​ហ៊ុន​ផ្សេង​ទៀត​ដែល​ហ៊ាន​​ឲ្យ​តែ​៨​លាន​​ដុល្លារ​​ប៉ុណ្ណោះ​ សម្រាប់​ដី​នេះ​។

លោក​បាន​មាន​ប្រសាសន៍​ថា “នៅ​ពេល​នោះ​គ្មាន​នរណា​ម្នាក់​ហ៊ាន​ឲ្យ​ថ្លៃ​ខ្ពស់​ជាង​លោក ឃុន ស៊ា ទេ​។ គ្មាន​នរណា​ម្នាក់​ចង់​បាន​ដី​នេះទេ​នៅ​ពេល​នោះ” ។ លោក​បាន​បញ្ជាក់​ថា គ្មាន​នរណា​ម្នាក់​បាន​ទទួល​លុយ​នៅ​ក្នុង​កិច្ច​ព្រម​ព្រៀង​ដែល​ត្រូវ​បាន​ចុះ​ហត្ថ​លេខា​ដោយ​ទីស្តីការ​គណៈ​រដ្ឋ​មន្ត្រី​កាលពី​ខែ​ធ្នូ ឆ្នាំ​២០១០​នេះ​ទេ។

យោង​តាម​ច្បាប់​ចម្លង​នៃ​កិច្ច​ព្រម​ព្រៀង​​រវាង​ក្រុម​ហ៊ុន ឃុន ស៊ា គ្រុប និង​ទីស្តីការ​គណៈ​រដ្ឋ​មន្ត្រី​ ដែល​ធ្វើ​ឡើង​តាម​សំណើ​របស់​ក្រសួងព័ត៌​មាន​នេះ​បង្ហាញ​ថា ក្រុម​ហ៊ុន​របស់​លោក ឃុន ស៊ា ទទួល​ខុស​ត្រូវ​ចំពោះ​ការ​សាង​​សង់​ស្ថានីយ​វិទ្យុ AM កម្លាំង​៦០០​គីឡូ​វ៉ាត់ អង់​តែន​វិទ្យុ​កម្ពស់​១៨០​ម៉ែត្រ អគារ​សម្រាប់​បុគ្គលិក​ធ្វើការ​កម្ពស់​ពីរ​ជាន់​មួយ​ខ្នង ម៉ាស៊ីន​ភ្លើង​១.០០០​គីឡូវ៉ាត់​មួយ​គ្រឿង​ និង​ខ្សែ​កាប​ដែល​ត​ភ្ជាប់​ទីតាំង​នេះ​ទៅ​ស្ថានីយ​វិទ្យុ​ជាតិ FM ១០៥.៧៥ នៅជិត​វត្ត​ភ្នំ​។

នៅ​ពេល​ការ​សាង​សង់​នៅ​ទីតាំង​ថ្មី​នេះ​ចប់​សព្វ​គ្រប់​ហើយ បុគ្គលិក​វិទ្យុ​ជាតិនឹង​ទទួល​​បាន​សំណង​ជា​​ម៉ូតូ​១២៥សេសេ មួយ​គ្រឿង ហើយ​លោក ខៀវ កាញារីទ្ធ ​បាន​សន្យា​ជំរុញ​ឲ្យ​ក្រុម​ហ៊ុន​ ឃុន ស៊ា គ្រុប ​ផ្តល់​សំណង​ជា​ប្រាក់​ដល់​បុគ្គ​លិក​ថែម​ទៀត ដើម្បី​ចំណាយ​ទៅ​លើ​ការ​ធ្វើ​ដំណើរ​ប្រចាំ​ថ្ងៃ​ឆ្ងាយ​ទៅ​កាន់​ស្ថានីយ​វិទ្យុ​ថ្មី​នៅ​ក្នុង​ខេត្ត​កណ្តាល​។

លោក ខៀវ កាញារីទ្ធ មិនបាន​ប៉ាន់​ស្មាន​ថា តើ​វិទ្យុ​ថ្មី​ AM ៩១៨ នេះ​នឹង​ចាប់​ផ្តើម​ដំណើរ​ការ​នៅ​ពេល​ណា​ទេ​ ប៉ុន្តែ​ លោក​បាន​​មាន​ប្រសាសន៍​ថា ស្ថានីយ​វិទ្យុ​ជាតិនៅ​តែ​មាន​​សារៈ​សំខាន់​សម្រាប់​ផ្សព្វ​ផ្សាយ​ព័ត៌​មាន​ទៅ​ដល់​តំបន់​ជន​បទ​​ទូ​ទាំង​​ប្រទេស​ ដែល​​មិន​អាច​ស្តាប់​វិទ្យុ​ FM និង​មើល​ទូរទស្សន​៍​ឃើញ​។
លោក ខៀវ កាញារីទ្ធ ​មាន​ប្រសា​សន៍​ថា ការ​ដោះដូរ​​ដី​នេះ​ ក៏​ចាំ​បាច់​ផង​ដែរ ពី​ព្រោះ​​​បើ​គ្មាន​ទុន​ពី​​ក្រុម​ហ៊ុន ឃុន ស៊ា គ្រុប​ទេ រដ្ឋា​ភិបាល​មិន​អាច​កែ​​​លម្អ​ស្ថានីយ​វិទ្យុ​រលក​ធាតុ​អាកាស​ខ្លីរបស់​ខ្លួន​​ ដែល​មាន​អាយុ​កាល​២០​ឆ្នាំ​​ និង​ផ្សាយ​តែ​ក្នុង​កម្លាំង​៨០​គីឡូវ៉ាត់​នេះ ​នៅ​ក្រោម​សមត្ថ​ភាព​ផ្សាយ​របស់​ខ្លួន​ ដែល​មាន​កម្លាំង​២០០​គីឡូវ៉ាត់​​​​នេះ​បាន​ទេ​។

លោក ខៀវ កាញា​រីទ្ធ បាន​មាន​ប្រសា​សន៍​​​ថា ពេល​មាន​ឧបករណ៍​ថ្មី​ ដែល​ក្រុម​ហ៊ុន ឃុន ស៊ា គ្រុប ​ទិញ​ឲ្យ​នោះ វិទ្យុជាតិ​នឹង​ផ្សាយ​​ក្នុង​កម្លាំង​៦០០​គីឡូវ៉ាត់ទៅទូទាំង​ប្រទេស ព្រម​ទាំង​​ផ្សាយ​ឲ្យ​​ដល់ប្រជា​ពល​រដ្ឋ​កម្ពុជា​ដែល​រស់​នៅ​ភាគ​ខាង​ត្បូង​ប្រទេស​​វៀត​ណាម និង​ភាគ​ខាង​កើត​ប្រទេស​ថៃ​ផង​ដែរ​។
ក្រសួង​ព័ត៌​មាន​នៅ​កាន់​កាប់​ដី​​ប្រហែល​បី​ហិកតា​នៅ​ទីតាំង​ក្នុង​ខណ្ឌ​មានជ័យ​នេះ​ ហើយ​វិទ្យុជាតិ​កម្ពុជា​ FM ៩៦ ​នៅ​តែ​បន្ត​ផ្សាយ​​ពី​ទីនោះ​ដដែល​​។ លោក​បាន​មាន​ប្រសាសន៍​ថា ទីតាំង​វិទ្យុ​ជាតិ​ FM ១០៥.៧៥ ​នៅវត្តភ្នំ​មិន​អាច​ដោះ​ដូរ​បាន​ទេ ពី​ព្រោះ​វា​សំខាន់​សម្រាប់​បុគ្គលិក​ដែល​កន្លែង​ធ្វើ​ការ​របស់​ខ្លួន​នៅជិត​​ក្រុង​។

ការ​ដោះ​ដូរ​ដី​មិន​មាន​តម្លា​ភាព​គឺ​ជា​រឿង​ធម្ម​តា​នៅ​ក្រោម​រដ្ឋា​ភិបាល​របស់​នាយក​រដ្ឋ​មន្ត្រី​ ហ៊ុន សែន ហើយ​ជា​រឿយៗ​វា​ល្អណាស់​​សម្រាប់​ក្រុម​ហ៊ុន​ឯក​ជន​ដែល​ទទួល​បាន​ដី​មាន​តម្លៃ​​ ជា​​ថ្នូរ​​នឹង​ការ​សាង​សង់​អគារ​ថ្មី​នៅ​លើ​ដី​​មិន​សូវ​មាន​តម្លៃ​នៅ​តាម​​តំបន់​ដាច់​ស្រយាល។ ការ​ដោះ​ដូរ​ដី​ដែល​គួរ​ឲ្យ​ភ្ញាក់​ផ្អើល​បំផុត​
នោះ​ គឺ​ការ​ដោះ​ដូរ​សាលា​ខេត្ត​សៀម​រាប​ទាំង​មូ​ល​ កាលពី​ឆ្នាំ​២០១០ ដែល​នៅ​ពេល​នោះ​បុគ្គលិក​ត្រូវ​ផ្លាស់​​កន្លែង​​ធ្វើ​ការ​ពី​អគារ​ការិយាល័យ​នៅ​ក្នុង​ក្រុង​សៀម​រាបទៅ​កាន់​ទី​តាំង​ដាច់​ស្រយាល​ទំហំ​៤២​ហិកតា​ នៅ​ក្នុង​សង្កាត់​អំពិល ​ស្ថិត​នៅ​ចម្ងាយ​ប្រហែល​១៦​គីឡូ​ម៉ែត្រ​​​ពី​ក្រុង​នេះ។

ក្រុម​ហ៊ុន​ J&R អាហរ័ណនីហរ័ណ និង​សំណង់​ ដែល​គេ​មិន​សូវ​ស្គាល់​បានទទួល​កិច្ច​សន្យា​សាង​សង់​អគារ​ការិយាល័យ​ថ្មី​ចំនួន​៦០​សម្រាប់​សាលា​ខេត្ត​សៀម​រាបនៅក្នុង​សង្កាត់​អំពិល ហើយ​ក្រុម​ហ៊ុន J&R បានគ្រប់​គ្រង​ដី​​របស់​សាលា​ខេត្ត​ដែល​ស្ថិតនៅ​កណ្តាល​​ក្រុង​ រួម​ទាំង​សាលា​ក្រុង​ និង​មន្ទីរ​ចំនួ​ន​២៦ នៅ​លើ​ដី​មាន​តម្លៃ​ចំកណ្តាលក្រុង​។

លោក ហ៊ុន សែន ធ្លាប់​បាន​ថ្កោល​ទោស​ជា​សាធារណៈ​ចំនួន​ពីរ​លើក​ចំពោះ​ការ​ដោះ​ដូរ​ដី​រដ្ឋ​ ហើយ​កាលពីខែ​កុម្ភៈ ឆ្នាំ​២០១២ បាន​ព្រមាន​ក្រសួង​នានា រួម​ទាំង​ក្រសួង​ព័ត៌​មាន​មិនឲ្យលក់​ដី​រដ្ឋ​។

កាលពី​ខែ​មករា ឆ្នាំ​២០១០ ក្រសួង​ពាណិជ្ជ​កម្ម​ ដែល​នៅ​ពលេ​នោះ​ស្ថិតនៅ​លើ​ទីតាំង​ដ៏​ល្អ​មួយ​នៅ​តាម​មហា​វិថី​ព្រះ​នរោត្តម ត្រូវ​បាន​ដោះ​ដូរ​​ជា​មួយ​​អគារចំនួន​ពីរ​នៅ​ជិត​មហា​វិថី​សហព័ន្ធ​រុស្ស៊ី ​នៅ​ពាក់​កណ្តាល​ផ្លូវ​ទៅ​កាន់​អាកាស​យាន​ដ្ឋាន​អន្តរ​ជាតិ​ភ្នំពេញ​ ហើយ​អគារ​នោះ​ត្រូវ​បាន​សាង​សង់​ដោយ​ក្រុម​ហ៊ុន អ៊ែតវូត អាហរ័ណ​នីហរ័ណ​។

សមាជិក​សភា​គណបក្ស​ប្រឆាំង​បាន​រិះគន់​រដ្ឋា​ភិបាលជា​ច្រើន​ដង​ ចំពោះ​ការ​ដោះដូរ​ដី​រដ្ឋ​ ដោយ​អះ​អាង​ថា ពួក​គេ​មិន​បាន​ធ្វើ​តាម​ច្បាប់​ឲ្យ​មាន​តម្លា​ភាព​នៅក្នុង​ការ​ផ្តល់​កិច្ច​សន្យា​របស់​រដ្ឋា​ភិបាល​ទេ ហើយ​​គ្មាន​ការ​ដេញ​ថ្លៃ​ប្រកួត​ប្រជែង និង​​ធ្វើ​ឲ្យ​រដ្ឋ​បាត់​បង់​​ប្រាក់​ចំណូល​របស់​រដ្ឋ​រាប់​លាន​ដុល្លារ​៕

ប្រែ​សម្រួល​ដោយ មូល គឹម ហឿន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស