31 C
Phnom Penh

សាក​​​សពអាកាស​​​យានិក​​​កម្ពុជា​​​​​​បានមកដល់កម្ពុជាហើយ ក្រុមគ្រូសារនឹង​​​ទទួល​​​បាន​​​​​​សំណង​​​

ដោយ ឌឹ ខេមបូឌា ដេលី

បទវិភាគ

មន្ត្រី​​​មូលដ្ឋាន​​​បាន​​​ឲ្យ​​​ដឹង​​​ថា សាក​​​សព​​​របស់​​​លោក យុង សំ អាកាស​​​យានិក​​​កម្ពុជា​​​ដែលបំរើការឲ្យ​​​​​​​​​ក្រុម​​​ហ៊ុន​​​អាកាស​​​ចរណ៍​​​ឡាវ​​​ ដែល​​​យន្ត​​​ហោះ​​​របស់​​​ខ្លួន​​​បាន​​​ធ្លាក់​​​កាល​​​ពី​​​ថ្ងៃពុធ បណ្តាល​​​ឲ្យ​​​​​​អ្នក​​​ដំណើរ​​​៤៩នាក់​​​នៅ​​​លើ​​​យន្ត​​​ហោះ​​​នោះបានបាត់បង់ជីវិត ហើយសាកសពអាកាស​​​យានិកត្រូវ​​បាន​​​ដឹក​​​​​​តាម​​​យន្ត​ហោះ​​​​​​មក​​​រាជធានី​​​ភ្នំពេញ​​​ហើយ កាលពី​​​ល្ងាច​​​ថ្ងៃ​​​សៅរ៍​​ ហើយ​បានបូជា​នៅឯ​គេហដ្ឋាន​របស់​គាត់ក្នុង​ខេត្តកណ្តាល​កាល​ពីម្សិល​មិញ។​

មន្ត្រី​​​អាកាស​​​ចរណ៍​​​ឡាវ​​​ម្នាក់​​​បាន​​​ឲ្យ​​​ដឹង​​​ថា ក្រុម​​​ហ៊ុន​​​អាកាសចរណ៍​​​នេះ​​​ក៏​​​នឹង​​​ផ្តល់​​​សំណង​​​​​​ដល់​​​គ្រួសារ​​​របស់​​​អាកាស​​​យានិក​​​ក្នុង​​​វ័យ​​​៥៨ឆ្នាំ​​​រូប​​​នេះផង​​​ដែរ។
គួរ​​​រំឭក​​​ថា អ្នក​​​ដំណើរ​​​៤៤នាក់​​​និង​​​យានិក​​​ប្រាំ​​​នាក់​​​បាន​​​បាត់​​​បង់​​​ជីវិត​​​ពេល​​​យន្ត​​​ហោះ​​​QV301​​​របស់​​​ក្រុម​​​ហ៊ុន​​​អាកាស​​​ចរណ៍​​​ឡាវ​​​ ធ្លាក់​​​ចូល​​​ទន្លេមេគង្គ​​​នៅ​​​ប្រទេស​​​ឡាវ​​​ភាគ​​​ខាង​​​ត្បូង​​​ក្នុង​​​ដំណើរ​​​ពី​​​ទីក្រុង​​​វៀង​​​ចន្ទន៍ឆ្ពោះ​​​ទៅ​​​ទីក្រុង​​​ប៉ាកសេ នៅ​​​វេលាម៉ោង​​​ប្រហែល​​​៤​​​ល្ងាច​​​ថ្ងៃ​​​ពុធ ។ យោង​​​តាម​​​ទី​​​ភ្នាក់​​​ងារ​​​ព័ត៌មាន​​​រ៉យ​​​ទ័រ​​​ មន្ត្រី​​​ក្រុម​​​ហ៊ុន​​​អាកាសចរណ៍​​​ម្នាក់​​​បាន​​​អះ​​​អាង​​ថា អាកាស​​​ធាតុ​​​មិន​​​ល្អ​​​គឺ​​​ជា​​​មូល​​​ហេតុ​​​ដែល​​​បង្ក​​​ឲ្យ​​​មាន​​​ការ​​​ធ្លាក់​​​យន្ត​​​ហោះ​​​នៅ​​​ចម្ងាយ​​​ត្រឹម​​​តែ​​​ប្រាំ​​​បី​​​គីឡូម៉ែត្រ​​​ពី​​​អាកាស​​​យានដ្ឋាន​​​នៅ​​​ទីក្រុង​​​ប៉ាកសេនេះ​​​។

លោក យ៉ាវ ឡេង មេឃុំ​​​កំពង់​​​សំណាញ់​​​នៅ​​​ក្រុង​​​តាខ្មៅ​​​ បាន​​​ឲ្យ​​​ដឹង​​​ថា សព​​​របស់​​​លោក យុង សំ ត្រូវ​​​បាន​​​ដឹក​​​ពី​​​ប្រទេស​​​ឡាវ​​​មក​​​រាជ​​​ធានី​​​ភ្នំពេញ​​​ នៅ​​​រសៀល​​​ថ្ងៃ​​​សៅរ៍ គឺ​​​នៅ​​​ថ្ងៃ​​​តែ​​​មួយ​​​ដែល​​​យន្ត​​​ហោះ​​​នោះ​​​ត្រូវ​​​បាន​​​ស្រង់​​​ចេញ​​​ពី​​​ទន្លេមេគង្គ​​​ក្នុង​​​ប្រទេស​​​ឡាវ​​​ ហើយ​​​ត្រូវ​​​បាន​​​ដឹក​​​បន្ត​​​ទៅ​​​ផ្ទះរបស់​​​​​​គ្រួសារ​​​លោក។ លោក​​​​​​មាន​​​ប្រសាសន៍​​​ថា “ ក្រុម​​​គ្រួសារ​​​សព​​​បាន​​​រៀប​​​ចំ​​​ពិធី​​​បុណ្យ​​​សព​​​នៅ​​​រសៀល​​​ថ្ងៃ​​​សៅរ៍” ដោយ​​​បាន​​​បន្ថែម​​​ថា លោក យុង សំ ដែល​​​បាន​​​លាចាក​​​លោក​​​ដោយ​​​បន្សល់​​​ទុកកូន​​​បី​​​នាក​​់​​​ គឺ​​​ស្រី​​​ពីរនាក់​​​ និង​​​ប្រុស​​​ម្នាក់​​​ឲ្យ​​​នៅ​​​កំព្រានោះ​​​ បាន​​​ធ្វើ​​​ជា​​​អ្នក​​​បើក​​​យន្ត​​​ហោះ​​​រយៈ​​​ពេល​​​៣០ឆ្នាំ​​​មក​​​ហើយ​​​ ហើយ​​​ទើ​​​ប​​​នឹង បម្រើ​​​ការងារ​​​នៅ​​​​​​ក្រុម​​​ហ៊ុន​​​អាកាស​​​ចរណ៍​​​ឡាវ​មិន​​​ទាន់​​​បាន​​​មួយ​​​ឆ្នាំ​​​ផង​​​។

លោក​​​ ហង្ស សារឿន មេភូមិ​​​កំពង់​​​សំណាញ់​​​ បាន​​​ឲ្យ​​​ដឹង​​​ថា សព​​​​​​​​​លោក យុង សំ គ្រោង​​​​​​បូជា​​​នៅ​​​ម៉ោង​​​៧ល្ងាច​​​ម្សិល​​​មិញ​​​នេះ​​​។

លោកស្រី​​​ ង៉នប៉ាឆាន ស៊ូផាវ៉ាឌី (Ngon​​​-phachanh Souphavady)​​តំណាង​​​ក្រុម​​​ហ៊ុន​​​អាកាសចរណ៍​​​ឡាវ​​​ ដែល​​​ធ្វើការ​​​នៅ​​​អាកាស​​​យានដ្ឋាន​​​អន្តរជាតិ​​​​​​ភ្នំពេញ​​​  បាន​​​ឲ្យ​​​ដឹង​​​ថា មន្ត្រី​​​អាកាសចរណ៍​​​នេះ​​​គ្រោង​​​ចូល​​​រួម​​​ក្នុង​​​ពិធី​​​បូជា​​​សព​​​នៅ​​​ល្ងាច​​​ថ្ងៃ​​​ម្សិលមិញ​​​​​​ ហើយ​​​ថា ក្រុម​​​ហ៊ុន​​​នេះ​​​នឹង​​​ផ្តល់​​​សំណង​​​ដល់​​​គ្រួសារ​​​សព​​​។ លោក​​​​​​​​​ស្រី​​​​​​​​​មាន​​​ប្រសាសន៍​​​ថា “ ខ្ញុំ​​​មិន​​​ច្បាស់​​​ថា ពេលណា​​​ទេ​​​” ដោយលោកស្រី​​​​​​បាន​​​បដិសេធ​​​​​​មិន​​​ធ្វើ​​​អត្ថាធិប្បាយ​​​បន្ថែម​​​ឡើយ​​​។

លោក សាយ សុខាន អនុរដ្ឋលេខា​​​ធិការ​​​នៅ​​លេខា​ធិការ​​​​​ដ្ឋានអាកាស​​​ចរណ៍​​​ស៊ីវិល​​​ បាន​​​ឲ្យ​​​ដឹង​​​ថា យោង​​​តាម​​​អនុ​​​សញ្ញា​​​អាកាស​​​ចរណ៍​​​អន្តរជាតិ​​​ ក្រុម​​​ហ៊ុន​​​ធានា​​​រ៉ាប់​​​រង​​​ឲ្យ​​​ក្រុម​​​ហ៊ុន​​​អាកាសចរណ៍​​​​​​ណា​​​មួយ​​​ត្រូវ​​​ផ្តល់​​​សំណង​​​ដល់​​​ក្រុម​​​គ្រួសារ​​​អ្នក​​​ដែល​​​បាន​​​រង​​​របួស​​​ ឬ​​​ស្លាប់​​​ក្នុង​​​ការ​​​ធ្លាក់​​​យន្ត​​​ហោះ​​​។ លោក​​​បាន​​​មាន​​​ប្រសាសន៍​​​ថា “ ក្រុមហ៊ុន​​​ធានា​​​រ៉ាប់​​​រង​​​ឲ្យ​​​ក្រុម​​​ហ៊ុន​​​អាកាស​​​ចរណ៍​​​នោះ​​​នឹង​​​ផ្តល់​​​សំណង ​​​[ដល់​​​គ្រួសារ​​​របស់​​​លោក យុង សំ ]​”។

គួរ​​​រំឭក​​​ថា ក្រុម​​​គ្រួសារ​របស់​​​ពលរដ្ឋ​​​កម្ពុជា​​​ប្រាំ​​​នាក់​​​ដែល​​​បាន​​​ស្លាប់​​​នៅ​​​ឆ្នាំ​​​២០០៧​​​ពេល​​​យន្ត​​​ហោះ ​​​U4 241 របស់​​​ក្រុម​​​ហ៊ុន​​​អាកាស​​​​​​ចរណ៍​​​ ​​​PMT Air​ ​​​ធ្លាក់​​​លើ​​​ភ្នំមួយ​​​ក្នុង​​​ខេត្ត​​​កំពត​​​តាម​​​ផ្លូវ​​​ឆ្ពោះ​​​ទៅ​​​ក្រុ​​​ង​​​ព្រះ​​​សីហនុ ពី​​​ខេត្ត​​​សៀមរាប នៅ​​​មិន​​​ទាន់​​​បាន​​​ទទួល​​​សំណង​​​អ្វី​​​ទេ​​​រយៈ​​​ពេល​​​​​​ជាង​​​ប្រាំមួយ​​​ឆ្នាំ​​​ក្រោយ​​​ការ​​​បាត់​​​បង់​​​សាច់​​​ញាតិ​​​របស់​​​ខ្លួន​​​។

ក្រុម​​​ហ៊ុនអាកាស​​​ចរណ៍​​​​​​ PMT​ ដែល​​​បាន​​​ចាប់ផ្តើម​​​ប្រតិបត្តិការ​​​នៅ​​​ក្រៅ​​​រាជធានី​​​ភ្នំពេញ​​​ក្នុងឆ្នាំ​​​២០០៣​​​នោះ​​​ បាន​​​ផ្អាក​​​ការ​​​ហោះ​​​ហើរ​​​ក្នុង​​​ឆ្នាំ​​​២០០៨។ មន្ត្រី​​​ក្រុម​​​ហ៊ុន​​​អាកាស​​​ចរណ៍​​​នេះ បាន​​​បដិសេធ​​​មិន​​​បញ្ចេញ​​​ឈ្មោះ​​​ក្រុម​​​ហ៊ុន​​​ធានា​​​រ៉ាប់​​​រង​​​ឲ្យ​​​ខ្លួន​​​ទេ​​​ ហើយ​​​ពាក្យ​​​បណ្តឹង​​​របស់​​​ក្រុម​​​គ្រួសារ​​​ជន​​​រង​​​គ្រោះ​​​ក៏​​​មិនទាន់​​​​​​បាន​​​ទទួល​​​ការ​​​ឆ្លើយ​​​តប​​​ដែរ​​​​​​​​​។

លោក ឡុង ចេង ប្រធាន​​​ខុទ្ទកាល័យ​​​របស់​​​លោក ម៉ៅ ហាសវណ្ណាល់​​​​​ រដ្ឋ​​​លេខា​​​ធិការ​​​នៃ​​​រដ្ឋ​​​លេខា​​​ដ្ឋាន​​​អាកាសចរណ៍​​​ស៊ីវិល ​​​បាន​​​ឲ្យ​​​ដឹង​​​ថា ករណី​​​ធ្លាក់​​​យន្ត​​​ហោះ​​​របស់​​​ក្រុម​​​ហ៊ុន PMT​​​ កំពុង​​​ស្ថិត​​​ក្នុង​​​ដៃ​​​តុលាការ​នៅ​​​ប្រទេស​​​​​កូរ៉េ​​​​​​ដោយ​​​លោក​​​បាន​​​បដិសេធ​​​មិន​​​បរិយាយ​​​ទេ​​​។ លោក​​​បាន​​​មាន​​​ប្រសាសន៍​​​ថា “ ពេល​​​រឿង​​​​​​ក្តី​​​នេះ​​​បញ្ចប់​​​​​​រួច​​​រាល់​​​​​​ “ រដ្ឋាភិបាល​​​កម្ពុជា នឹង​​​ផ្តល់​​​សំណង​​​ដល់​​​គ្រួសារ​​​ [ជន​​​រង​​​គ្រោះ​​​] កម្ពុជា​​​៕

ប្រែ​​​សម្រួល​​​ដោយ ស៊ា ស៊ុយ​​​ឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស