29 C
Phnom Penh

ប្រជាជន​ក្នុង​រាជធានីភ្នំពេញ​គាំទ្រ​ការ​ដើរ​ក្បួន​របស់​គណបក្ស​ប្រឆាំង​

ដោយ ឌឹ ខេមបូឌា ដេលី

បទវិភាគ

កាល​ពីម្សិលមិញ ប្រជា​​​ពល​​​រដ្ឋ​​​នៅ​​​ក្នុ​ង​រាជធានី​ភ្នំ​ពេញ​ បាន​បង្ហាញ​អារម្មណ៍​ភ័យ​ខ្លាច​ ក៏​ប៉ុន្តែ​មានការគាំទ្រ​ផែនការ​របស់​គណបក្ស​សង្គ្រោះ​ជាតិ​​ ដែល​នឹង​ធ្វើ​មហាបាតុកម្ម​រយៈ​ពេ​ល​បីថ្ងៃ​ជា​លើក​ទី២​ នៅ​ទីលាន​ប្រជា​​​ធិប​​​តេយ្យ​ និង​រៀប​​ចំ​សកម្ម​ភាព​ដើ​រក្បួន​ទៅ​កាន់​ស្ថាន​ទូត​បរទេស​នៅ​ទូទាំង​រាជធានី​ ​ហើយ​​ផែន​ការ​ធ្វើ​​​បាតុកម្ម​​​ និង​​​ដង្ហែ​​​ក្បួន​​​នេះ​នឹង​ចាប់​ផ្តើម​​ពី​ថ្ងៃ​ពុធនេះ​​។

ប្រជាជន​ប្រហែល​២០.០០០នាក់​​បាន​​ចេញ​ទៅជួប​ជុំ​គ្នា​​ជារៀង​រាល់​ថ្ងៃក្នុង​កម្ម​វិធី​តវ៉ា​របស់​គណបក្ស​ប្រឆាំង​កាល​ពីខែ​មុន​ ហើយ​គណបក្ស​នេះ​បាន​លើកឡើង​ថា ខ្លួន​នឹង​នាំ​អ្នក​គាំទ្រ​របស់​ខ្លួន​ដើរ​កាត់​វិថីនានា​ក្នុង​រាជធានីភ្នំពេញ​ ដើម្បី​យក​ញាត្តិ​ទៅ​ប្រគល់​ឲ្យ​អង្គការ​សហ​ប្រជាជាតិ​ (UN) និង​យ៉ាង​ហោ​ច​​​ខ​ស្ថាន​ទូត​ចំនួន​ប្រាំពី​រ ដើម្បី​អំពាវ​នាវ​ឲ្យ​មាន​​អន្តរាគមន៍​​ក្នុង​ការ​បញ្ចប់​ភាព​ជាប់​គាំង​ផ្នែក​នយោបាយ​ ដោយ​សារ​តែ​លទ្ធផល​​ដ៏​ប្រទាញ​ប្រទង់​នៃការ​បោះឆ្នោត​ជាតិ​កាល​ពីថ្ងៃទី​២៨ ខែ​​កក្កដា ។

នៅ​ពេល​ក្រុមនគរបាល​ប្រឆាំង​កុបកម្ម​ កាល​ពីម្សិលមិញ បាន​ហ្វឹក​ហាត់​សកម្មភាព​គ្រប់​គ្រង​ក្រុមមនុស្ស​ ក្នុង​ខណ្ឌ​ប្ញស្សីកែវ​ ដើម្បី​ត្រៀម​ខ្លួន​អនុវត្ត បម្រាម របស់​សាលា​រាជ​ធានីភ្នំពេញ​ ដែល​ហា​ម​មិន​ឲ្យ​មាន​ការ​ដើរ​ក្បួន​តាម​ផែនការ​របស់​គណ​បក្ស​សង្គ្រោះ​​ជាតិ​​ ប្រជាជន​នៅ​ទូទាំ​ងរាជធានី​ភ្នំពេញ​ បាន​លើកឡើ​ងថា ទោះបីជា​ពួកគាត់​ខ្លាច​ការ​វាយ​​បក​ខ្លាំងក្លា​ពីសំណាក់​អាជ្ញាធរ​ក៏​ដោយ​ ក៏​​​មហា​បាតុកម្ម​​លើក​ទី ២​របស់​គណ​បក្សប្រឆាំង​គឺ​ជា​រឿង​ចាំបាច់​ដែល​ត្រូវ​ធ្វើ​។

លោក រាម ខន អាយុ​៤៣​ឆ្នាំ ដែល​កំពុង​តែ​ពិសា​កាហ្វេ​នៅ​ក្នុង​ហាង​កាហ្វេ​មួយ​ក្នុ​ង​ខណ្ឌ​ចំការ​មន​ បាន​និយាយ​ថា “ខ្ញុំគិត​ថា សេចក្តីសម្រេច​របស់​គណបក្ស​ប្រឆាំង​​ពិត​ជា​ត្រឹម​ត្រូវ​ ក៏​ប៉ុន្តែ ខ្ញុំ​គិត​ថា អាច​នឹង​មាន​បញ្ហា​ម្តង​ទៀត​”។ លោក​បាន​លើក​ឡើង​បែ​បនេះ​ដើម្បី​សំដៅ​ទៅ​លើ​ហេតុ​ការណ៍​ប៉ះទង្គិច​គ្នា​​ដែល​បាន​កើត​ឡើង​រវាង​អាជ្ញាធរ​ និង​បាតុ​ករ​តវា៉ា​អំឡុង​ការ​តវ៉ា​ជុំ​ទី១​របស់​គណបក្ស​ប្រឆាំង​ដែល​ត្រូវ​បាន​ធ្វើ​ឡើ​ងកាល​ពីខែ​មុន​។

លោក​ រាម ខន បាន​មាន​ប្រសាសន៍​បន្ត​ទៀត​ថា “ខ្ញុំ​បាន​ឃើញ​អាជ្ញាធរ​ហាត់​សម​​នៅ​ក្បែរ​វត្ត​ភ្នំកាល​ពីម្សិលមិញ​ ហើយ​ខ្ញុំ​បាន​​ឃើញ​រថយន្ត​ពន្លត់​អគ្គិភ័យ​​ជាច្រើន​ចូល​មក​ក្នុង​ទីក្រុង​កាល​ពីព្រឹក​មិញ​ ហើយ​ខ្ញុំ​ដឹង​ថា រថ​យន្ត​ទាំង​នោះ​ជារបស់​ក្រុម​នគរបាល​”។​លោក​ បាន​បន្តថា “ប្រជាជន​យើង​នឹង​មិន​ខ្លាច​ទេ​ ក៏​ប៉ុន្តែ ពួក​គេ​ [រដ្ឋាភិបាល​គណបក្ស​ប្រជាជន​] មាន​កម្លាំ​ង​សន្តិសុខ​យ៉ាង​ច្រើន​សម្រាប់​ការ​ពារ​ខ្លួន​ ហើយ​ខ្ញុំ​ក៏​ដឹង​ដែរថា ពួក​គេ​នឹង​ប្រើ​ប្រាស់​កម្លាំង​ទាំ​ងនោះ​​ដើម្បីការ​ពារ​ផល​ប្រយោជន៍​ និង​អំណាច​របស់​ពួក​គេ​”។

លោក​ ម៉ៃ ចូច អាយុ​៣៤​ឆ្នាំ ជាអ្នក​បើក​បរ​រ៉ូម៉ក​បាន​លើ​កឡើង​ផង​ដែរ​ថា លោក​ក៏​ភ័យ​ខ្លាច​ផង​ដែរ​ថា នគរបាល​ ឬក៏​កង​រាជ​អាវុធ​ហត្ថ​អាច​បាញ់​បាតុករ​តវ៉ា​ ប្រសិន​បើ​ស្ថានភាព​តាន​តឹង​កើតឡើង​ ហើយ​​ស្ថាន​ភាព​ឈាន​ដល់​កម្រិត​ផុត​សមត្ថភាព​គ្រប់​គ្រង​​។​លោក​បាន​មាន​ប្រសាសន៍ថា “វា​អាច​ដូច​កាល​​ពីឆ្នាំ​១៩៩៨​ ម្តង​ទៀត​ ពីព្រោះ​គណ​បក្ស​ ប្រឆាំង​​កំពុង​ស្នើ​សុំ​រឿង​ដដែល​ៗ​ ហើយ​ប្រសិន​បើ​បាតុករ​តវ៉ា​ធ្វើ​អ្វី​ម្យ៉ាង​ដាក់​ក្រុម​នគរបាល​ ពួកគេនឹង​​ធ្វើ​សកម្មភាព​តប​វិញ​ភ្លាម​​ៗ​”។​

ក្នុង​ស្ថាន​ភាព​ក្រោយ​ការ​បោះឆ្នោត​ជាតិ​ឆ្នាំ​១៩៩៨​ ប្រទេស​កម្ពុជា​មាន​ការ​បង្ក្រាប​ពី​សំណាក់​រដ្ឋាភិបាល​ទៅ​លើ​សកម្មភាព​បាតុ​កម្ម​ប្រឆាំង​នឹង​លទ្ធផល​បោះឆ្នោត​​ដែល​មាន​​ការ​បដិសេធ​។បេសកជន​សិទ្ធិមនុស្ស​របស់​​អង្គការ​សហ​ប្រជាជាតិ​បាន​ឲ្យ​ដឹង​កាល​ពី​ពេល​នោះថា ​សាក​សព​របស់​បាតុករ​ជាង​១៨​នាក់​ត្រូវ​បាន​ប្រទេះ​ឃើញ​កំពុង​អណ្តែត​ទឹក​ទន្លេ​​ និង​នៅ​ក្នុង​ប្រឡាយ​​ ក្នុ​ងសប្តាហ៍​ក្រោយពី​​មាន​ការ​បង្ក្រាប​យ៉ាង​ខ្លាំង​ក្លា​​នៅថ្ងៃ​ទី៧​ ខែ​កញ្ញា ឆ្នាំ​១៩៩៨​។

ទោះ​បីជាយ៉ា​ងណា​ លោក ម៉ៃ ចូច បាន​លើ​កឡើង​ទៀត​ថា ទោះបីជាលោក​ព្យាករ​​ ឃើញ​ថា ហេតុការណ៍​​អាច​​ប្រហាក់​ប្រហែល​គ្នា​​នឹង​ឆ្នាំ​១៩៩៨​ក៏ដោយ​ ក៏​លោក​នៅ​តែ​គាំ​ទ្រ​ សេចក្តីសម្រេច​របស់​គណបក្ស​ប្រឆាំង​ថា នឹង​បន្តធ្វើ​បាតុកម្ម​ដែរ​។ លោក​បាន​មាន​ប្រសាសន៍ថា “ ខ្ញុំគិត​ថា វា​ជារឿង​ល្អ​ដែល​​គួរ​តែ​បន្ត​ការ​តវ៉ា​។ ប្រទេស​នីមួយ​ៗ ត្រូវ​តែ​មាន​គណបក្ស​ប្រឆាំ​ង។​ នៅពេល​គេ​លើក​របាំង​ការ​ពារ​ ហើយ​ធ្វើ​សកម្មភាព​ទាំង​អស់​នេះ​ ពួកគេ​គ្រាន់​តែ​ព្យាយាម​​ទប់​ស្កាត់​​ការ​ប្រឆាំង​នឹង​រដ្ឋាភិបាល​ប៉ុណ្ណោះ​”។

ក៏​ប៉ុន្តែ លោក​ រាម​ ខន ដែល​កំពុង​ពិសា​អាហារ​នៅ​ក្នុង​ហាង​កាហ្វេ​មួយ​នៅ​ខណ្ឌ​ចំការ​មន​នោះ​បាន​លើកឡើ​ងថា ហេតុ​ការណ៍​ ឆ្នាំ​១៩៩៨​​ប្រហែល​ជាមិន​អាច​កើត​ឡើង​ទេ​។លោក​បាន​មាន​ប្រសាសន៍ថា “ នៅ​ពេល​នោះ​​មាន​អ្នក​អង្កេត​ការណ៍​អន្តរ​ជាតិ​តិច​តួច​ប៉ុណ្ណោះ​។ ឥឡូវ​នេះ​ ពួក​គេ​អាច​នឹង​មិន​ហា៊ាន​​ធ្វើ​អ្វី​ដែល​ពួក​គេ​បាន​ធ្វើ​​កាល​ពីពេល​នោះ​ទេ​។ ឥឡូវ​នេះ​ផង​ដែរ​ មាន​ប្រជា​ជន​ច្រើន​ជាង​កាល​ពីពេល​នោះ​។ ពួក​គេ​​ ប្រហែល​​ជា​មិន​ហ៊ាន​ធ្វើ​អ្វី ដែល​ពួក​គេ​បាន​ធ្វើ​កាល​ពី​ពេល​នោះ​ទេ​”។

អ្នក​លក់​កាហ្វេ​កញ្ចប់​មួយ​រូប​នៅផ្សារ​អូរ​ប្ញស្សី​ ដែល​បាន​បដិសេធមិន​ប្រាប់​ឈ្មោះ​របស់​ខ្លួន​ បាន​លើក​ឡើង​ថា អ្នកស្រីមិន​សូវ​ច្បាស់​ថា វត្ត​មាន​របស់​អន្តរជាតិ​អាចធានា​សុវត្ថិភាព​សម្រាប់​អ្នក​ដែល​សម្រេច​ចិត្ត​ចូល​រួម​​ក្នុងការ​ធ្វើ​បាតុកម្ម​របស់​គណបក្ស​ប្រឆាំង​​។​ អ្នក​ស្រី​បាន​សួរ​ថា “ប្រសិន​បើ​អាជ្ញាធរ​បាញ់​ពួក​គេ​ តើ​អ្នក​កាសែត​ និងអង្គកា​រ​ផ្សេ​ងៗ​នឹង​ធ្វើ​អ្វី​?​ តើ​អង្គការ​នឹង​ចាប់​ពួក​គេ​ទេ​ប្រសិន  ​បើ​ពួក​គេ​បាញ់​គណបក្ស​សង្គ្រោះ​ជាតិ​នោះ​? ប្រសិន​បើ​មាន​ការ​បង្ក្រាប​ថាតើ​អាមេរិក​ និង​ប្រទេស​ជប៉ុន នឹង​ជួ​យ​គណបក្សប្រឆាំង​ទេ​?​ បើ​មិន​ទេ​នោះ​ គណ​បក្ស​សង្គ្រោះ​ជាតិ​​​អាច​នឹង​ស្លាប់​នៅ​ទីនេះ​”។

ស្ត្រីរូប​នេះ​បានលើ​កឡើង​បន្ត​ទៀ​ត​ថា អ្នក​ស្រី​បាន​ចូល​រួម​ធ្វើ​បាតុកម្ម​លើក​ដំបូ​ង​កាល​ពីខែ​មុន​ ដោយ​អារម្មណ៍​ភ័យ​ខ្លាច​​មាន​​ការ​តប​ត​ពីសំណាក់​អាជ្ញាធរ​ ដែល​ស្គាល់​អ្នក​ស្រី​ ក៏​ប៉ុន្តែ​ លើក​នេះ​អ្នក​ស្រី​មិនចង់​​ចូល​រួម​ធ្វើ​បាតុកម្ម​ និង​ដើរ​ក្បួន​ទាំ​ង​នេះ​ទេ​។ អ្នកស្រី​បានមាន​ប្រសាសន៍បន្ត​ថា “ក្មួយ​ប្រុស​របស់​ខ្ញុំដែល​ជា​ទាហាន​មួយ​រូប​បាន​ប្រាប់​ខ្ញុំថា៖ ‘ មីងសូមកុំទៅ​ លើក​នេះ​គេ​នឹង​អនុញ្ញាតពួកគេ​​ធ្វើ​ការ​តវ៉ា​ នៅពេល​ពួក​គេ​ទៅ​យក​ញាត្តិ​ចេញ​ទៅ​។ ប្រសិន​បើ​ពួក​គេ​ធ្វើ​អ្វីផ្តេស​ផ្តាស​ គេនឹង​វាយ​ប្រហារ​។ នេះ​ជា​អ្វី​ដែល​មេៗ​របស់​គេ​ប្រាប់​គេ​។ រឿង​នេះ​ធ្វើ​ឲ្យ​ខ្ញុំ​ស្ទាក់​ស្ទើ​រ [ក្នុង​ការ​ចូល​រួម​] ’ ”។

លោក​ ឡុន នី អាយុ​៦០​ឆ្នាំ បាន​លើក​ឡើង​ផងដែរថា លោក​ឯកភាព​ថា អំពើ​ហិង្សា ​ទំនង​ជា​នឹង​កើត​ឡើង​។ ​លោក​បាន​បន្ត​ថា លោក​បាន​រស់​នៅ​ក្នុង​រាជធានី​ភ្នំពេញ​អស់​រយៈ​ពេល​បីទសវត្សរ៍​មក​ហើយ​​ ហើយ​លោក​មិន​ដែល​ឃើញរដ្ឋាភិបាល​បណ្តោយ​ឲ្យ​​សកម្ម​ភាព​តវ៉ា​ ដែល​ត្រូវបាន​ធ្វើ​ឡើង​នៅ​តាម​ដង​ផ្លូវ​នានា​ក្នុង​រាជធានីភ្នំពេញ​ដោយ​ងាយ​ៗ​ទេ​។ លោក​បាន​មាន​ប្រសាសន៍ថា “ខ្ញុំមិនដែល​ឃើញ​បាតុកម្ម​ទ្រង់​ទ្រាយ​បែប​នេះ​ទេ​ ហើយ​ខ្ញុំ​ជឿ​ជាក់​យ៉ាង​មុត​មាំ​ថា គេ​នឹង​ប្រើ​កាំភ្លើង​​ទៅ​លើ​​ក្រុម​បាតុករតវ៉ា​នៅ​ពេល​នេះ​។ រដ្ឋាភិបាល​នឹង​មិន​ចុះញ៉ម​ទេ​ ហើយ​ពួក​គេ​មាន​ការ​គាំទ្រ​ពី​ចិន​ បន្ទាប់ពី​ហេតុការណ៍​តវ៉ា​កន្លង​ផុត​”។

អំឡុង​មហាបាតុកម្ម​លើក​មុន​របស់​​គណ​បក្ស​ស​ង្គ្រោះ​ជាតិ  ​​ដែល​ត្រូវ​បាន​ធ្វើ​ឡើង​ចាប់​ពី​ថ្ងៃទី​១៥​ ដល់​ ថ្ងៃទី​១៧ កាល​ពីខែ​កញ្ញា ផ្លូវ​តូចៗ​​ និង​ផ្លូវ​ធំៗ​នៅ​ក្នុង​ទីក្រុង​​ត្រូវ​បាន​បិទ​ដោយ​ប្រើ​របាំ​ងលួស​បន្លា​ និង​មាន​ការ​ការ​ពារ​ ពីសំណាក់​កង​រាជអាវុធ​ហត្ថ​។​ អាជ្ញាធរ​ក៏​បាន​​​ទប់​ស្កាត់​រថយន្ត​ដែល​ដឹក​មនុស្ស​ក្នុ​ង​ចំនួន​ច្រើន​មិន​ឲ្យ​ចូល​ក្នុង​ទីក្រុង​ផង​ដែរ​។

ប្រជាជន​​ក៏​បាន​បង្ហាញ​អារម្មណ៍​ខឹង​សម្បា​រ​ចំពោះ​ទង្វើ​របស់​ក្រុមនគរបាល​ដែល​បាន​ប្រើ​កម្លាំង​ក្នុង​ការ​ឆ្លើយ​តប​ទៅ​នឹង​សកម្ម​ភាព​តវ៉ា​ដោយស​ន្តិវិធី ហើយ​​បុរស​អាយុ​២៩​ឆ្នាំ​ម្នាក់​ត្រូវ​បាន​បាញ់សម្លាប់​ អំឡុង​ការ​ប៉ះ​ទង្គិច​គ្នា​រវាង​អាជ្ញាធរ​ និង​បាតុករតវ៉ា​ដែល​ចោល​ដុំ​ថ្ម​ នៅពេល​មាន​អារម្មណ៍​ខឹង​ខ្លាំង​ដោយសារ​តែ​មាន​ការ​បិទ​ផ្លូវ​នៅ​ជុំ​វិញ​ស្ពាន​ព្រះ​មុនីវង្ស​​។​

លោក​ សុខ​ ផាន់​ណា​  អាយុ​៣៦​ឆ្នាំ​ជា​ជាង​ជួស​ជុល​ទូរស័ព្ទ​ដៃ​ បានលើកឡើង​ថា ខណៈ​ដែល​លោក​ព្រួយ​បារម្ភ​អំពី​អំពើ​ហិង្ស​ដែល​បាន​កើត​ឡើង​ លោក​ក៏​គិត​ផង​ដែរ​ថា អាជ្ញា​ធរ​​ ប្រហែល​ជា​បាន​រៀន​សូត្រ​ពីបទ​ពិសោធ​អំឡុង​បាតុកម្ម​កាល​ពីលើក​មុន​។ លោក​​មាន​ប្រសាសន៍ថា “ខ្ញុំ​គិត​ថា ពួក​គេ​​ប្រហែល​ជាមិន​បិទ​ផ្លូវ​ទេ​នៅ​លើក​នេះ​ ពី​ព្រោះ​ពួក​គេ​មាន​បញ្ហា​នៅ​ជុំ​វិញ​ស្ពាន​ព្រះមុនី​​ វង្ស​ និង​សូម្បី​តែ​នៅ​ទីនេះ​នៅពេល​ប្រជាជន​​មិន​អាច​ទៅ​ផ្ទះ​របស់​ខ្លួ​នបាន​។ ពួក​​គេ​ប្រហែល​​ជាខ្លាច​មិន​ហ៊ាន​បិទ​ផ្លូវ​ទេ​លើក​នេះ​”។

មន្ត្រី​នគរបាល​មួយ​រូប​ ដែល​សុំ​និយាយ​ដោយ​មិន​បញ្ចេញ​ឈ្មោះ​ពីព្រោះ​លោក​មិន​ត្រូវ​បាន​អនុញ្ញាត​ឲ្យ​និយាយ​ជាមួយ​ប្រព័ន្ធ​ផ្សាព្វផ្សាយ​នោះ​ បាន​លើក​ឡើង​ផង​ដែរ​ថា លោក​មិន​ច្បាស់​ថា ភាព​ចលាចល​អាច​នឹង​កើត​ឡើង​ទេ​។ លោក​បាន​មាន​ប្រសាសន៍​ថា “អំពើ​ហិង្សា​ប្រហែល​ជាមិន​កើត​ឡើង​ទេ​​ ពីព្រោះ​មាន​តែ​ភាគីម្ខាង​ប៉ុណ្ណោះ​មាន​​ការ​គំរាម​កំហែង​នៅ​ពីក្រោ​យ​ខ្លួន​​”។

លោក​បាន​បន្ត​ថា “ខ្ញុំ​ពិត​ជា​ធុញ​ទ្រាន់​នឹង​បញ្ហា​នេះ​ណាស់​។ នគរបាល​តែ​ងតែ​ត្រៀម​ខ្លួន​ជានិច្ច​ ជាពិសេស​ឥឡូវ​នេះ​ ប្រសិន​បើ​មាន​រឿង​កើ​តឡើង​នៅពេល​ប្រជាជន​ជា​ច្រើ​ន​ចេញ​ទៅ​ដើរ​ក្បួន​”។ អង្គុយ​នៅក្បែរ​មន្ត្រី​នគរ​បាល​រូប​នោះ​ គឺ​អាជីវករ​លក់​ឧបករណ៍តន្ត្រី​មួយ​រូប​ឈ្មោះ​ បៀង រ៉ែម អាយុ​២៨​ឆ្នាំ​បាន​លើកឡើង​ថា ខណៈ​ដែ​ល​អំពើ​ហិង្សា​ទំនង​ជានឹង​កើត​ឡើង​ គណ​បក្ស​ស​ង្គ្រោះ​ជាតិ​​នឹង​ត្រូវ​បន្ត​រំឭក​រដ្ឋាភិបាល​អំពី​កំហឹង​របស់​ប្រជាជន​​ចំពោះការ​បោះឆ្នោត។​ លោក​មាន​ប្រសាសន៍ ថា “ យើង​បារម្ភអំពីចំណាត់​ការ​តប​របស់​អាជ្ញាធរ​ ក៏​ប៉ុន្តែ យើង​គ្មាន​ជម្រើស​ទេ​ ពី​ព្រោះ​ យើង​ស្ថិត​ក្នុង​ដៃ​របស់​គេ​”។លោក​បន្ថែម​ថា លោក​ព្រួយ​បារម្ភ​ថា មេដឹកនាំ​គណបក្ស​ប្រឆាំង​ប្រហែល​ជាកំពុង​ប្រើ​ប្រាស់​បាតុកម្ម​ដើម្បី ​ជួយ​ពង្រឹង​ជំហររបស់ខ្លួន​​ ក្នុង​ការ​ចរចា​ជា​មួយ​គណបក្ស​ប្រជាជនកម្ពុជា​។

លោក​ បៀង​ រ៉ែម បន្ត​ថា “នេះ​ជា​រឿង​នយោបាយ​។ ខ្ញុំបាន​ឃើញឯកឧត្តម​មួយ​រូប​និយាយ​លើ​កញ្ចក់​ទូរទស្សន៍​​ថា នៅ​ពេល​…​ព្រះ​មហាក្សត្រ​ នរោត្តម​ សីហមុនី​ បើក​រដ្ឋ​សភា ​លោក​ សម​ រង្ស៊ី [មេដឹកនាំគណ​បក្ស​ប្រឆាំង​] បាន​​និយាយរួ​ច​ហើយ​ថា ពួក​គេ​នឹង​ទទួល​យក​​អាសនៈ​ទាំង​៥៥​នោះ​”។ លោក​បាន​បន្ត​ថា “ មេធំៗ​វាយ​ប្រហារ​គ្នា​ ជាសាធារណៈ​នៅ​ក្នុង​សង្គម​នេះ​​​ប៉ុន្តែ​ ក្រោយ​មក​ ពួក​គេ​ក៏​ជល់​កែវ​គ្នា​ ខណៈ​ដែល​ប្រជា​ជន​​ធម្មតា​មិន​ដឹង​ថា អ្វី​កំពុង​កើត​ឡើង​ទេ​។ នេះ​គឺជា​ស្ថាន​ភាព​ ក៏​​ប៉ុន្តែ យើង​គ្មាន​ជម្រើស​​ណា​ [​ក្រៅ​ពី​ទទួល​យក​ស្ថាន​ភាព​នេះទេ​​]​ ។ នេះ​គឺ​ជាសង្គ​ម​ដែល​យើង​​រស់​នៅ​​”៕

ប្រែ​​​សម្រួល​​​ដោយ កង សុធា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស