29 C
Phnom Penh

ព្រះ​រាជ​អាជ្ញា​ស្នើឲ្យ​​ផ្តន្ទា​ទោស​មេដឹកនំា​ខ្មែរ​ក្រហម​មួយ​ជីវិត

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ​ ព្រះ​រាជ​អាជ្ញា​បាន​ស្នើ​ឲ្យ​ចៅ​ក្រម​នៅ​សាលាក្តី​ខ្មែរ​ក្រហម​ដាក់​ពន្ធ​នាគារ​​អតីត​មេដឹក​នាំ​របប​នេះ​គឺ នួន ជា និង ខៀវ​ សំផន​ អស់​មួយ​ជីវិត ពីបទ​ប្រព្រឹត្ត​​ឧក្រិដ្ឋ​កម្ម​​ប្រឆាំង​មនុស្ស​ជាតិ​ ដែល​រួម​បញ្ចូល​​​​ទាំង​ការ​ជម្លៀស​ប្រជាជន​ទាំង​បង្ខំ​ចេញ​ពី​ក្រុង​ភ្នំពេញ ការ​បញ្ជូន​មនុស្ស​ទាំង​បង្ខំ​ទៅ​កន្លែង​ធ្វើ​ការ​ និង​ការ​សម្លាប់​ទាហាន​​​របប​សាធារណរដ្ឋ​ខ្មែរ និង​មន្ត្រី​​នានា​នៅ​តំបន់​​មួយ​ក្នុង​ខេត្ត​ពោធិ៍​សាត់។

ពេល​បញ្ចប់​សវនាការ​ធ្វើ​សេចក្តី​សន្និដ្ឋាន​បិទ​បញ្ចប់​ការ​ពិភាក្សា​ដេញ​ដោល​ដ៏លម្អិត​រយៈ​ពេល​បី​ថ្ងៃ​ សហ​ព្រះ​រាជ​អាជ្ញា​រង​លោក​វីលលៀម ស្មីត បាន​លើក​ឡើង​ថា នួន ជា អាយុ៨៧​ឆ្នាំ និង ខៀវ សំផន អាយុ៨២​ឆ្នាំ បាន​ជាប់​ពាក់​ព័ន្ធ​នៅ​ក្នុង​អ្វី​ដែល​លោក​ហៅថា ​ជា​សហ​ឧក្រិដ្ឋ​កម្ម​រួម​ មាន​គោល​បំណងទៅលើ​មន្ត្រមកពី​របប​សាធារណ​រដ្ឋ​ខ្មែរ​របស់​ លន់ នល់ និងការ​​រើស​អើង ព្រម​ទាំង​​ការ​យក​ប្រជា​ពល​រដ្ឋ​​ក្នុង​ក្រុង​ធ្វើ​ជា​ទាសករ​។

លោក និល ណុន ប្រធាន​អង្គបុរេ​ជំនុំជម្រះ​នៅ​ពេល​នោះ​បាន​បង្គាប់​ឲ្យ​គេ​នាំ​ នួន​ ជា​ ដែល​បាន​ចំណាយ​ពេល​ជា​ច្រើន​ស្តាប់​សវនាការ​នៅ​ក្នុង​បន្ទប់​ឃុំឃាំង​របស់​គាត់​​ចូល​មក​​ក្នុង​បន្ទប់​សវនាការ​ រួម​ជាមួយ​នឹង​ ខៀវ សំផន ដើម្បី​ស្តាប់​នូវ​ទោស​ដែល​លោក​​​​ស្រី ជា​ លាង សហ​ព្រះ​រាជ​អាជ្ញា​ជាតិ​​បាន​ស្នើ​ឡើង​។
លោកស្រី​បាន​ប្រាប់​ចៅ​ក្រម​បន្ទាប់​ពី​ នួន ជា ដែល​មាន​ទឹក​មុខ​មិន​សប្បាយ​រីក​រាយ និង​ពាក់​វ៉ែន​តា​ខ្មៅ​របស់​គាត់​ចូល​មក​អង្គុយ​ក្នុង​កៅអី​របស់​គាត់​ថា “ ឥទ្ធិពល​នៃ​របប​នេះ​នៅ​​តែ​មាន​រហូត​មក​ដល់​ថ្ងៃ​នេះ​”។

លោកស្រី ជា លាង បាន​មាន​ប្រសាសន៍​ថា “ផ្អែកតាម​ច្បាប់​ស្តីពី​​អង្គ​ជំនំុ​ជម្រះ​វិសា​មញ្ញ​ក្នុង​តុលាការ​កម្ពុជា​ ដើម្បី​ផ្តន្ទា​ទោស​លើ​បទ​ឧក្រិដ្ឋ​ដែល​បាន​ប្រព្រឹត្ត​អំឡុង​របប​កម្ពុជា​ប្រជាធិប​តេយ្យ​នោះ​ ព្រះ​រាជ​អាជ្ញា​សូម​ស្នើ​ឲ្យ​​អង្គ​បុរេ​ជំនំុ​ជម្រះ និង​ចៅ​ក្រម​​ផ្តន្ទា​​ទោស​ នួន ជា និង ខៀវ​ សំផន អស​់​មួយ​ជីវិត​ ជា​ទោស​​​​ដែល​ពួក​គេ​សម​នឹង​ទទួល​ ហើយ​នេះ​ក៏​​គឺ​ជា​ស្តង់​ដារអន្តរ​ជាតិ​ចំពោះ​បទ​ឧក្រិដ្ឋ​ទាំង​នេះ​ផង​ដែរ។

ចាប់​តាំង​ពី​សវនាការ​ធ្វើ​សេចក្តី​សន្និដ្ឋាន​បិទ​បញ្ចប់​ការពិភាក្សា​ដេញ​ដោល​បាន​ចាប់​ផ្តើម​កាល​ពី​សប្តាហ៍​មុន​មក ព្រះ​រាជ​អាជ្ញា​បាន​លើក​ឡើង​ខ្លាំង​ៗ​ថា មាន​ភ័ស្តុតាង​គ្រប់​គ្រាន់​ដែល​បង្ហាញ​ថា នួន ជា និង ខៀវ សំផន មាន​ពិរុទ្ធ​ភាព​ចំពោះ​បទ​ឧក្រិដ្ឋ​​ដែល​ត្រូវ​បាន​ចោទ​​ប្រកាន់​មក​លើ​ពួក​គាត់ ​នៅ​ក្នុង​​ដំណាក់​​កាល​​នៃ​​រឿង​ក្តី​ប្រឆាំង​ពួក​គាត់​។

លោក ស្មីត បាន​ប្រាប់​តុលាការ​កាល​ពី​ម្សិល​មិញ​ថា មេដឹក​នាំ​បក្ស​កុម្មុយនីស្ត​កម្ពុជា​ញៀន​​លើ​ការ​បោស​សម្អាត​និង​​ការ​កម្ទេច​សត្រូវ​ ដែល​បាន​ធ្វើ​ឲ្យ​មនុស្ស​ជា​ច្រើន​នាក់​ស្លាប់​។ លោក​បាន​មាន​ប្រសាសន៍​ថា ទោះ​បីជា​ក្រុម​មេធាវី​នេះព្យា​យាម​បញ្ចុះ​បញ្ចូល​តុលា​ការ​ថា ការ​សម្លាប់​មនុស្ស​ត្រូវ​បាន​អនុវត្ត​ដោយ​មន្ត្រី​ឯក​រាជ្យ​ថ្នាក់​ក្រោម​ក៏​ដោយ ក៏​កំណត់​ហេតុ​នៃ​កិច្ច​ប្រជំុ​ ឯកសារ​ផ្សេងៗទៀត និង​បទសម្ភាស​​ផ្ទាល់​ជាមួយ​មន្ត្រី​ទាំង​នោះ​​​បង្ហាញ​ថា នេះ​មិនមែន​ជា​ការ​ពិត​ទេ។

លោក ស្មីត បាន​សួរ​ថា “ តើ​ នួន ជា ជា​នរណា​ តើ​គាត់​បាន​ធ្វើ​អ្វី​ខ្លះ​ និង​តើ​គាត់​តំណាង​ឲ្យ​អ្វី​ពេល​នេះ​?”។ លោក​បាន​បន្ថែម​ថា សំណួរ​ដែល​លោក​ សុន អារុណ​ មេធាវី​ជាតិ​របស់​ នួន ជា សួរ​ទៅ​សាក្សី​អំពី​​ចរិត​របស់​គាត់​ គឺ​គ្មាន​ន័យ​ទាល់​តែ​សោះ​ចំពោះ​ក្រុម​មេធាវី​របស់​គាត់​។ លោក​បាន​បន្ត​ថា “យើង​មាន​មន្ត្រី​ច្រើន​ថ្នាក់ ហើយ​ពិបាកជួប​​មុខ​ឃាតករ​ណាស់។ អ្នក​ដែល​ទទួល​ខុស​ត្រូវ​ចំពោះ​ការ​ស្លាប់​មនុស្ស​ដ៏ច្រើន​បែប​នេះ​កម្រ​បង្ហាញភាព​ខ្មៅ​ងងឹត​របស់​ខ្លួន​ជា​សាធារណៈ​ណាស់។ ប្រវត្តិ​សាស្ត្រ​ពិត​ជា​បាន​បង្រៀន​យើង​ថា មេដឹក​នាំ​នយោបាយ​ធ្វើ​ពុត​ជា​ស្រឡាញ់​ប្រទេស​របស់​ខ្លួន​ខ្លាំង​ណាស់​ ប៉ុន្តែ ​បែរ​ជា​ប្រ​ព្រឹត្ត​បទ​ឧក្រិដ្ឋ​​​​ដ៏​គួរ​ឲ្យ​ភ័យ​ខ្លាច​ទៅ​វិញ​”។

លោក ស្មីត បាន​លើក​ឡើង​ថា នួន ជា គឺ​ជា​មនុស្ស​ជ្រុល​និយម​ម្នាក់​នៅពេល​នោះ​ និង​នៅ​តែ​ជាមនុស្ស​ជ្រុល​និយម​នាពេល​នេះ​ នេះ​បើ​ផ្អែក​តាម​សម្តី​ដែល​គាត់​បាន​និយាយ​នៅ​ក្នុង​តុលាការ។ លោក​បាន​មាន​ប្រសាសន៍​ថា “គាត់​គឺជា​មនុស្ស​ជូរចត់ម្នាក់​ ដែល​ធ្វើ​ជា​ចារកម្ម ធ្វើ​ជា​ ស៊ីអាយអេ និង​កាហ្សេបេ ដែល​មាន​នៅ​គ្រប់​ទីកន្លែង​។ យោបល់​របស់​ នួន ជា អំពី​សិទ្ធិ​មនុស្ស​ គឺ​សិទ្ធិ​កាន់អាវុធ​ប្រឆាំង​នឹង​សត្រូវ​”។ “នេះ​គឺ​ជា​មនុស្ស​ដែល​ចូល​ចិត្ត​សម្លាប់​សាច់​ញាតិ​ និង​បងប្អូន​បដិវត្តន៍​របស់​ខ្លួន​ដែល​គាត់​បាន​តស៊ូ​ជាមួយ​អស់​រយៈពេល​ជាច្រើន​ឆ្នាំ​ ប្រសិន​បើ​គាត់​សង្ស័យ​ថា ពួក​គេ​មិន​ស្មោះ ត្រង់​ចំពោះបក្ស​។ មនុស្ស​ណា​ដែល​ស្ថិត​នៅ​ក្រោម​អំណាច​​របស់​ ប៉ុល ពត​ គឺ​ជា​អ្នក​​ប្រកាន់​តឹង​ជ្រុល​​”។

លោក​បាន​បន្ថែម​ថា “មាន​ការ​គំរាម​កំហែង​មួយ​ចំនួន​ចំពោះ​មនុស្ស​ជាតិ​ ដែល​ធ្ងន់​ធ្ងរ​ជាង​ការគំរាម​កំហែង​ពី​មនុស្ស​ដែល​ងប់​ងល់​នឹង​មនោ​គមវិជ្ជា ជំនឿ ឬ​សាសនា​ ព្រោះ​ពួកគេ​សុខចិត្ត​ធ្វើ​អ្វីៗ​ទាំង​អស់​ទោះ​តាម​មធ្យោ​បាយ​ណា​ក៏​ដោយ មិនថា​ មាន​ការ​បំផ្លិច​បំផ្លាញ​ ឬ​ខុស​ច្បាប់​ប៉ុណ្ណា​នោះ​ទេ ដើម្បី​សម្រេច​គោល​ដៅ​របស់​ខ្លួន”។

លោក​បាន​បន្ត​ពន្យល់​ប្រាប់​ថា នួន​ ជា គឺ​ជា​មនុស្ស​ដ៏​សំខាន់​ម្នាក់​របស់​បក្ស​កម្ពុជា​ប្រជា​ធិបតេយ្យ ចាប់​​ពី​បដិវត្តន៍​ឆ្វេង​និយម​ “រហូត​ដល់​ឧក្រិដ្ឋ​ជន​សង្គ្រាម​ដែល​ត្រូវ​ទទួល​ខុស​ត្រូវ​ចំពោះ​ការ​ស្លាប់​ប្រជា​ពល​រដ្ឋ​ខ្មែរ​រាប់​សែន​នាក់”។ លោក​បាន​មាន​ប្រសាសន៍​ថា ហើយ​ថ្វី​បើ​​គាត់​ធ្លាប់​បាន​និយាយ​ដោយ​ចំហអំពី​អតីត​កាល​របស់​គាត់​នៅ​ក្នុង​បទ​សម្ភាស​ថត​វីដេអូ​ក៏​ដោយ ក៏​ នួន ជា គ្មាន​បំណង​និយាយ​ដោយ​ចំហប្រាប់​តុលាការ​ដែរ​។

លោក ស្មីត បាន​មាន​ប្រសាសន៍​ថា ការ​​ទាញ​ហេតុ​ផល​ផ្ទាល់​មាត់​​របស់​មេធាវី​គាត់​ដែល​គ្រោង​ធ្វើ​នៅ​សប្តាហ៍​នេះ និង​ដែល​​បង្ហាញ​ពី​​សមត្ថភាព​មាន​​កម្រិត​​ថា ​​ នួន ជា ខុស​ពី​មេ​មនោ​​គមវិជ្ជា​នោះ​ គឺ​ប្រហែល​ជា​ការ​គួរ​ឲ្យ​​ក្រៀម​ក្រំ​បំផុត និង​ការ​ភូត​កុហក​​ដែល​មិន​គួរ​ឲ្យ​ជឿ​ទាល់​តែ​សោះ។ លោក​បាន​លើក​ឡើង​ថា នួន​ ជា ដែល​បាន​រៀន​សូត្រ​បញ្ចប់​​​សាកល​វិទ្យា​ល័យ និង​ចេះនិយាយ​ភាសា​បី​បាន​ល្អ​ គឺ​អាច​​និយាយ​ការ​ពារ​ខ្លួន​​បាន​ជោគ​ជ័យ​​នៅ​​ក្នុង​កិច្ច​ប្រជំុ​ការទូត​ និង​​​អំពី​ការ​បង្កើត​គោល​នយោ​បាយ​ប្រកាន់​តឹង​របស់​បក្ស​នេះ​។

លោក​ ស្មីត ក៏​បាន​រិះ​គន់​មេធាវី​របស់​ ខៀវ សំផន ដែល​បាន​ចាត់​ទុក​ខ្លួន​គាត់​ថា ជា​​មនុស្ស​ម្នាក់​ដែល​បាន​ធ្លាក់​ចូល​ទៅ​ក្នុង​បក្ស​កម្ពុជា​ប្រជាធិបតេយ្យ​ដោយ​ចៃ​ដន្យ។ លោក ស្មីត បាន​និយាយចំអក​យ៉ាង​ច្បាស់​ថា “គាត់​មាន​ឋានៈ​ខ្ពស់​បំផុត​ ​ប៉ុន្តែ គាត់​មិន​បាន​​ដឹង​ទាល់​តែ​សោះ​អំពី​ផែនការ​ដែល​សហ​​ការី​របស់​គាត់​បាន​អនុវត្ត។ គាត់​គឺជា​មនុស្ស​តែ​ម្នាក់​គត់​នៅ​ក្នុង​ប្រទេស​កម្ពុជា​ ដែល​មិន​ដឹង​អ្វី​សោះ​ មិន​ឃើញ​អ្វីសោះ និង​មិន​ឮ​អ្វី​​ទាល់​តែ​សោះ”។

ផ្ទុយ​ទៅ​វិញ​លោក ស្មីត បាន​មាន​ប្រសា​សន៍​ថា “ភ័ស្តុ​តាង​បង្ហាញពី​មនុស្ស​ម្នាក់​ដែល​តាម​ពិតគឺជា​សមាជិក​ស្ទាត់​ជំនាញ និង​ពោរ​ពេញ​ដោយ​កលល្បិច​នៅ​ក្នុង​ជួរ​​ថ្នាក់​ដឹក​នាំ​ជាន់​ខ្ពស់​ដែល​ស្រេក​ឃ្លាន​ចង់​បាន​អំណាច​ និង​ដែល​រួម​ជាមួយ ប៉ុល ពិត និង នួន​ ជា ដែរ​នោះ យល់​ស្រប​ចំពោះ​ការ​ប្រើ​អំពើ​ហិង្សា ដើម្បី​​អំណាច​របស់​ខ្លួន​​​ និង​ដែល​បាន​​ធ្វើ​​ឲ្យ​មាន​ការ​សម្លាប់​មនុស្ស​ស្លូត​ត្រង់​ និង​ជឿថា វា​ជា​ការ​ត្រឹម​ត្រូវ​ក្នុង​ការ​កម្ទេច​ជន​ណា​ដែល​​រារាំង​ផ្លូវ​របស់​បក្ស​កម្ពុជា​ប្រជា​ធិប​តេយ្យ​”។

លោក​បាន​មាន​ប្រសាសន៍​ថា គ្មាន​ប្រយោជន៍​ ​​ទេ​ក្នុងការ​លើក​ឡើង​ក្រៅ​ពី​នេះ​​​​ដែល​អាច​ធ្វើ​ឲ្យ​ព្រះ​រាជ​អាជ្ញា​ជឿ​ថា ខៀវ​ សំផន មិន​ជាប់​ពាក់​ព័ន្ធ​​អ្វី​ក្រៅ​ពី​​គាត់​ជា​មនុស្ស​ដ៏​សំខាន់​​ម្នាក់​នៅ​ក្នុង​របប​នេះ​ដែល​បាន​ឃើញ​គេ​​ជម្លៀស​ប្រជា​ជន​ចេញ​​​ពី​​​ទីក្រុង​ និង​ឃើញ​ការ​​ស្លាប់​របស់​មនុស្ស​យ៉ាង​ច្រើន​នោះទេ​​។ ធាតុ​ពិត​របស់​ ខៀវ សំផន នៅ​ក្នុង​បក្ស​កម្ពុជា​ប្រជាធិបតេយ្យ​មិន​មែន​ជា​​​​​ការ​ចង់​​​ឡើង​កាន់​អំណាច​ទេ​ ប៉ុន្តែ ​គ្រាន់​តែ​ចង់​​ជួប​ជុំ​គ្នា​ឡើង​វិញ​​​ដោយ​សប្បាយ​​រីក​រាយ​ជាមួយ​កម្មា​ភិ​បាល​​របស់​ខ្លួន​ ដែល​ចេះ​តែ​ពី​សើច​​និង​និយាយ​សប្បាយ​ខណៈ​ដែល​ជន​រួម​ជាតិ​របស់​ខ្លួន​ខំប្រឹង​ធ្វើ​ការ និង​អត់​បាយ​ស្លាប់​។

លោក ស្មីត បាន​មាន​ប្រសាសន៍​ថា “ខៀវ សំផន​ ជា​មនុស្ស​ពិបាក​បោក​។ គាត់​ជាប់​ពាក់​ព័ន្ធ​ច្រើន​នឹង​បទ​ឧក្រិដ្ឋ​ទាំង​នេះ និ​ង​មាន​ទស្សន​វិស័យដូច​គ្នា​ជាមួយ​ទស្សនវិស័យ​របស់​ ប៉ុល ពត និង​ នួន​ ជា​”។ លោក​បាន​មាន​ប្រសាសន៍​ថា ក្នុង​ចំណោម​កំណត់​ហេតុ​កិច្ច​ប្រជំុ​ដែល​នៅ​សេស​សល់​មួយ​ចំនួន​តូច​សម្រាប់​កិច្ច​ប្រជំុ​របស់​ខ្មែរ​ក្រហម​ចំនួន​១៩លើក​នោះ ខៀវ សំផន មាន​វត្ត​មាន​​ចូល​រួម​ចំនួន​១៦ភាគ​រយ​ក្នុង​ចំណោម​កិច្ច​ប្រជុំ​៨៤​ភាគ​រយ​។

លោក ស្មីត បាន​មាន​ប្រសាសន៍​ថា មាន​ភ័ស្តុតាង​​​​ក្រៅ​ពី​ការ​​​សង្ស័យ​ដ៏​សម​ហេតុ​ផល​​ថា សហ​ចុង​ចោទ​រូប​នេះមាន​ការ​ជាប់​ពាក់​ព័ន្ធ​ជិត​ស្និទ្ធ​ជាមួយ​សហ​ឧក្រិដ្ឋ​កម្ម​រួម ដែល​មាន​តែ​របប​ខ្មែរ​ក្រហម​ និង​ទង្វើ​​របស់​​​​​បុគ្គល​ខ្លួន​ប៉ុណ្ណោះ​​បាន​រួម​ចំណែក​ដល់​ឧក្រិដ្ឋ​កម្ម​​​ដែល​មាន​ទំនាក់​ទំនង​ខាង​ក្នុង​ច្រើន​។
លោកស្រី ហីុតឌ័រ រីយ៉ែន អ្នក​ឃ្លាំ​មើល​សាលា​ក្តីនៅ​អង្គការ​គំនិត​ផ្តួច​ផ្តើម​យុត្តិ​ធម៌​សង្គម​សាធារណៈ​បាន​មាន​ប្រសាសន៍​ថា ការ​ដែល​ព្រះ​រាជ​អាជ្ញា​ស្វះ​ស្វែង​ឲ្យ​មាន​ការ​ដាក់​ពន្ធនាគារ​អស់​មួយ​ជីវិត​នេះ គ្មា​​នអ្វី​ប្លែក​​ទាល់​តែ​សោះ​នៅ​ក្រោម​កាលៈ​ទេសៈ​នេះ។

លោកស្រី រីយ៉ែន បាន​មាន​ប្រសាសន៍ថា​ “ដោយ​សារ​ថា អង្គជំនុំ​ជម្រះ​តុលាការ​កំពូល​បាន​បង្កើន​ទោស​ជាប់​ពន្ធនាគារ​របស់​ ឌុច នៅ​ពេល​ដែល​ការ​ផ្តន្ទា​ទោស​ដំបូង​មិន​ដល់​មួយ​ជីវិត​នោះ មាន​ការ​លើក​ឡើង​ជា​ច្រើន​ឲ្យ​មាន​ការ​ផ្តន្ទា​ទោស​កាន់​តែ​យូរ​ចំពោះ​មេ​ដឹកនាំ​ជាន់​ខ្ពស់​”។ “វា​ជា​និមិត្ត​រូប​ក្នុង​ការ​និយាយ​ថា ការ​ផ្តន្ទា​ទោស​មួយ​ជីវិត​ជាការ​សម​ស្រប​ នៅ ពេល​ដែល​យើង​មាន​មនុស្ស​ដែល​មិន​សង្ឃឹម​​រស់​បាន​យូរ​នោះ​។ វា​ជា​ស្តង់​ដា រនិង​ការ​អនុវត្ត​មួយ​ប្រភេទ​ដែល​ត្រូវ​បាន​បង្កើត​ឡើង​នៅ​ក្នុង​ច្បាប់ឧក្រិដ្ឋ​កម្ម​អន្តរ​ជាតិ​”។

ហេតុ​ផល​មួយ​ទៀត​ដែល​គេ​ស្នើ​ឲ្យ​មាន​ការ​ផ្តន្ទា​ទោស​មួយ​ជីវិត​នេះ គឺ​ដោយ​សារ​ជន​ជាប់​ចោទ​រូប​នេះ​មិន​បាន​បង្ហាញ​វិប្បដិ​សារី ឬ​សហការ​ជាមួយ​ព្រះ​រាជ​អាជ្ញា​ឡើយ។ មេធាវី​របស់​ នួន ជា គ្រោង​នឹង​ចូល​រួម​សវនាការ​ធ្វើ​សេចក្តី​សន្និដ្ឋាន​បិទ​បញ្ចប់​ការ​ពិភាក្សា​ដេញ​ដោល​នៅ​ថ្ងៃ​នេះ​ទៀត​៕

ប្រែ​សម្រួល​ដោយ មូល គឹម​ហឿន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស