27 C
Phnom Penh

រដ្ឋាភិបាល​កែប្រែ​បម្រាម​ អនុញ្ញាត​ឲ្យ​បក្ស​​សង្គ្រោះ​ជាតិ​​ហែក្បួន​

ដោយ ឌឹ ខេមបូឌា ដេលី

បទវិភាគ

ក្រសួង​មហាផ្ទៃ​បាន​ប្រកាស​កាល​ពី​ម្សិល​មិញ​​នៅ​ក្នុង​កិច្ច​ប្រជុំ​​នៅ​នាទី​ចុង​ក្រោយ​មួយ​ថា ខ្លួន​​អនុញ្ញាត​ឲ្យ​គណបក្ស​សង្គ្រោះ​ជាតិ​​​​​ដឹក​នាំ​មនុស្ស​១.០០០​នាក់​ហែក្បួន​​តាម​​ផ្លូវ​នានា​ក្នុង​រាជធានីភ្នំពេញ​ ដើម្បី​ដាក់​ញត្តិ​​ទៅ​​ការិយាល័យ​អង្គការ​សហប្រជាជាតិ​​ និង​ស្ថាន​ទូត​បរទេស​ចំនួន​ប្រាំបី អំឡុង​មហា​បាតុ​កម្ម​​រយៈ​ពេល​​បី​ថ្ងៃ​​របស់​ខ្លួន​ ដែលត្រូវ​​ចាប់​​ផ្ដើម​​នៅ​ថ្ងៃ​នេះ​​។

អ្នក​​​គាំទ្រ​​​គណបក្ស​​​សង្គ្រោះ​ជាតិ​នាំ​គា្ន​​​ជ្រក​ក្រោម​ឆត្រ​ដើម្បី​​​ចូល​រួម​មហា​បាតុ​​មក្ម​នៅ​ឯ​ទី​លាន​​​ប្រជា​ធិប​តេយ្យ​​​កាល​ពី​ព្រឹក​មិញ ដែល​គណ​បក្ស​សង្រ្គោះ​ជាតិ​គ្រោង​ធ្វើ​រយ​ពេល​បី​ថ្ងៃ ​។​ (ភោគ ដន/The Cambodia Daily
អ្នក​​​គាំទ្រ​​​គណបក្ស​​​សង្គ្រោះ​ជាតិ​នាំ​គា្ន​​​ជ្រក​ក្រោម​ឆត្រដែលកម្តៅថ្ងៃកំពុងក្តៅខ្លាំង ​ដើម្បី​​​ចូល​រួម​មហា​បាតុ​​កម្មនៅ​ឯ​ទី​លាន​​​ប្រជា​ធិប​តេយ្យ​​​កាល​ពី​ព្រឹក​មិញ ដែល​គណ​បក្ស​សង្រ្គោះ​ជាតិ​គ្រោង​ធ្វើ​រយៈ​ពេល​បី​ថ្ងៃ ​។​ (ភោគ ដន/The Cambodia Daily

កិច្ច​ប្រជុំ​នៅ​សាលា​រាជធានី​ភ្នំពេញ​នេះ​ធ្វើ​ឡើង​​មួយ​ថ្ងៃ​​បន្ទាប់​ពី​លោក​ ស ខេង​ រដ្ឋមន្ត្រី​​ក្រសួង​មហាផ្ទៃ​បាន​ចេញ​សេចក្ដី​ប្រកាស​អំពាវនាវ​ឲ្យ​សាលា​រាជធានី​​ព្រម​ព្រៀង​​តាម​គណបក្ស​សង្គ្រោះ​ជាតិ ដើម្បី​ផ្ដល់​​ច្រក​សុវត្ថិភាព​​សម្រាប់​ការ​ហែក្បួនរបស់​​សមាជិក​គណបក្ស​ប្រឆាំង​​មួយ​នេះ​នៅ​​​​ទូទាំង​រាជ​ធានី​ភ្នំពេញ​  ក្នុង​ការ​ដាក់​ញត្តិ​របស់​ខ្លួន​ដើម្បី​អំពាវ​នាវ​​ឲ្យ​ស្ថាន​ទូត​បរទេស​នានា​ជួយ​អន្ត​រាគមន៍​ក្នុង​ស្ថាន​ភាព​​ជាប់​គាំង​​ផ្នែក​នយោបាយ​​នា​ពេល​បច្ចុ​ប្បន្ន​។

សាលា​រាជធានី​​ភ្នំពេញ​ធ្លាប់​បាន​លើក​ឡើង​ថា នឹង​​មិន​អនុញ្ញាត​ឲ្យ​គណបក្ស​សង្គ្រោះ​​​ជាតិ​​ហែក្បួន​​ឡើយ​​អំឡុង​បាតុកម្ម​របស់​ខ្លួន​ ខណៈ​ដែល​​មេដឹកនាំ​គណបក្ស​ប្រឆាំង​បាន​លើក​ឡើង​ម្ដង​ហើយ​ម្ដង​ទៀត​ថា ក្រឹត្យ​​បែប​នេះមិន​ស្រប​ច្បាប់​ទេ​ ហើយ​ខ្លួន​នឹង​​មិន​គោរព​តាម​ឡើយ​។

សេចក្ដី​ជូន​ដំណឹង​​មួយ​ចេញ​អំឡុង​​​កិច្ច​ប្រជុំ​កាល​ពី​ម្សិលមិញ​នឹង​​ដែល​​ចុះ​​ហត្ថ​លេខា​ដោយ​លោក​ បា៉ សុជាតិវង្ស អភិបាល​រាជធានីភ្នំពេញ​បាន​​​លើក​ឡើង​ភាគ​ច្រើន​​​តាម​សេចក្ដី​​​ប្រកាស​​របស់​លោក​ ស ខេង​ កាល​ពី​ថ្ងៃ​ច័ន្ទ ប៉ុន្តែ​បាន​បញ្ជាក់​ថា អនុញ្ញាត​​ឲ្យ​​មនុស្ស​​តែ​១.០០០​នាក់ប៉ុណ្ណោះ ដែល​អាច​ហែ​ក្បួន​បាន​ទូទាំង​រាជធានី​។

សេចក្ដី​ជូន​ដំណឹង​​នោះ​មាន​ខ្លឹម​សារ​ថា “អ្នក​ដែល​​យក​ញត្តិ​​ទៅ​ប្រគល់​ជូន​​ស្ថានទូត​នានា​មិន​ត្រូវ​លើស​ពី​ចំនួន​១.០០០​នាក់​ឡើយ​ ដើម្បី​រក្សា​​សន្ដិសុខ​ សុវត្ថិភាព​សង្គម និង​សណ្ដាប់​ធ្នាប់​សាធារណៈ ព្រម​ទាំង​បញ្ចៀស​​​​ការ​កកស្ទះ​ចរាចរណ៍ និង​ដើម្បី​គ្រប់​គ្រង​បាតុករ​​ផង​ដែរ”។

សេចក្ដី​ជូន​ដំណឹង​​នេះ​បាន​បន្ថែម​ថា អនុញ្ញាត​ឲ្យ​​តំណាង​តែ​១០​រូប​ប៉ុណ្ណោះ​ ប្រគល់​​ញត្តិ​ទៅ​ឲ្យ​​ស្ថានទូត​នានា។ មហាបាតុកម្ម​រយៈ​ពេល​បី​ថ្ងៃ​របស់​គណ​បក្ស​សង្គ្រោះ​ជាតិ​ត្រូវ​បាន​កំណត់​ពេល​​ធ្វើ​ឡើង​ឲ្យ​ស្រប​គ្នា​​នឹង​ខួប​ទី២២​ នៃ​ការ​ចុះ​​កិច្ច​ព្រម​ព្រៀង​​ទីក្រុងបា៉រីស​ ឆ្នាំ​១៩៩១ គឺ​នៅ​ថ្ងៃ​នេះ​ឯង​។

គណបក្ស​​ប្រឆាំង​បាន​ចំណាយ​ពេល​ពីរ​សប្ដាហ៍​កន្លង​មក​នេះ​ ដើម្បី​ប្រមូល​​ស្នាម​មេដៃ​ និង​ហត្ថលេខា​សម្រាប់​ញត្តិ​មួយដើម្បី​​អំពាវ​នាវ​ឲ្យ​អង្គការ​សហប្រជាជាតិ​ និង​រដ្ឋាភិ​បាល​នៃ​ប្រទេស​​ចំនួន​១៨ ដែល​ជា​ម្ចាស់​ហត្ថលេខី នៃ​កិច្ច​ព្រម​ព្រៀង​​ទីក្រុង​ប៉ារីស​ឆ្នាំ​១៩៩១ ជួយ​អន្តរាគមន៍​​ដើម្បី​ការ​ពារ​ឲ្យ​​លទ្ធិ​ប្រជាធិបតេយ្យ​​​នៅ​ក្នុង​ប្រទេស​កម្ពុជាឲ្យ​មាន​ជីវិត​​រស់​រាន​​ ក្រោយ​ពី​លទ្ធផល​​ដ៏​ចម្រូង​ចម្រាសនៃ​ការបោះឆ្នោត​ជាតិ​កាល​​ពី​ថ្ងៃ​ទី២៨ ខែ​កក្កដា​។

ពេល​ចេញ​ពី​កិច្ច​ប្រជុំ​រយៈ​ពេល​៣​ម៉ោង​​​នៅ​សាលា​រាជធានី​​នៅ​ម៉ោង​ជិត​៥​ល្ងាច​កាល​​ពី​ម្សិលមិញ លោក​ គួយ ប៊ុន​រឿន តំណាង​​រាស្ត្រ​ជាប់​ឆ្នោត​របស់​គណបក្ស​សង្គ្រោះ​ជាតិ​ ដែល​ជាអ្នក​​មាន​តួនាទី​​ឈាន​មុខ​គេ​​នៅ​ក្នុង​ការ​ចរចា​​ជាមួយ​​រដ្ឋាភិបាល​​បក្ស​ប្រជាជន​កម្ពុជា​របស់​លោក​​នាយក​រដ្ឋ​មន្ត្រី ហ៊ុន សែន ចាប់​តាំង​ពី​ការ​បោះឆ្នោត​​ដ៏​ចម្រូង​ចម្រាស​មក​នោះ​ បាន​មាន​ប្រសាសន៍​ថា គណបក្ស​​សង្គ្រោះ​ជាតិ​ និង​សាលា​រាជធានី​​ភ្នំពេញ​បាន​ព្រម​ព្រៀង​គ្នា​លើ​ចំណុច​​ពេល​វេលា និង​ផ្លូវ​សម្រាប់​ការ​ហែក្បួន​ ដែល​​ត្រូវ​ចាប់​ផ្ដើម​នៅ​ថ្ងៃ​នេះ​។

លោក​ គួយ ប៊ុនរឿន បាន​មានប្រសា​សន៍​ថា “នៅ​ថ្ងៃ​ទី​២៣ យើង​នឹង​ចាប់​ផ្ដើម​​ហែ​ក្បួន​ទៅ​កាន់​ការិយាល័យ​អង្គការសហ​ប្រជា​ជាតិ​​នៅ​ម៉ោង​​៣​រសៀល​។ នៅ​ថ្ងៃ​ទី២៤ វេលា​ម៉ោង​៨​ព្រឹក​ យើង​នឹង​ហែក្បួន​ពី​ទីលាន​​ប្រជាធិបតេយ្យ​ឆ្ពោះ​ទៅ​កាន់​ស្ថាន​ទូត​បារាំង​​ ស្ថានទូត​អង់គ្លេស​  និង​ស្ថានទូត​សហ​រដ្ឋ​អា​មេរិក​។ នៅ​ថ្ងៃ​ទី​២៥ យើង​​នឹង​​ហែ​ក្បួន​នៅ​ម៉ោង​៨​ព្រឹក​ ឆ្ពោះ​ទៅ​កាន់​ស្ថាន​ទូត​អូស្ត្រា​លី​ ស្ថានទូត​រុស្ស៊ី ស្ថានទូត​ជប៉ុន​ ស្ថាន​ទូត​​ឥណ្ឌូ​ណេស៊ី ហើយ​ចុង​ក្រោយ​បង្អស់​ យើង​នឹង​ហែ​ទៅ​​ស្ថានទូត​ចិន”។ លោក​បាន​មានប្រសាសន៍​បន្ថែម​ទៀត​ថា “ ក្រសួង​​មហាផ្ទៃ​បាន​ស្នើ​​សុំ​ឲ្យ​យើង​រក្សា​ចំនួន​មនុស្ស​​ក្រោម​១.០០០​នាក់​ ប៉ុន្តែ​យើង​ស្នើ​សុំ​៥.០០០​នាក់​។ យើង​នឹង​ចាប់​ផ្ដើម​ពី​ចំនួន​១.០០០​នាក់​ ហើយ​ប្រហែល​ជា​អ្នក​ផ្សេង​ទៀត​​​នឹង​ចូល​រួម​​ដែរ​”។

លោក​ស្រី​ មូរ សុខហួរ ប្រធាន​អ្នក​រៀប​ចំ​មហា​បាតុកម្ម​នេះ​​មាន​ការ​ជឿ​ជាក់​ខ្លាំង​លើ​​ការ​ព្យាករ​របស់​​គណបក្ស​ប្រឆាំង​។​ លោក​ស្រី​បាន​មានប្រសាសន៍​ថា “យើង​​​បាន​ស្នើ​សុំ​​៥.០០០​នាក់​ ហើយ​យើង​​​គ្រោង​​ទុក​សម្រាប់​៥.០០០​នាក់​។ ប្រសិន​​បើ​ពួក​គេ​ចង់​រាប​់​ចំនួន​១.០០០​នាក់​ ស្រេច​តែ​ពួក​គេ​ទៅ​”។

លោក​ ឡុង​ ឌីម៉ង់ អ្នក​នាំពាក្យ​សាលា​រាជ​ធានី​​បាន​មានប្រសាសន៍​ថា សេចក្ដី​សម្រេច​អនុញ្ញាត​ជា​ពិសេស​​ឲ្យ​មនុស្ស​១.០០០​នាក់​ហែ​ក្បួន​អំឡុង​បាតុកម្ម​​របស់​គណបក្ស​​ប្រឆាំង​នេះ​ធ្វើ​ឡើង​តាម​បទ​បញ្ជា​ផ្ទាល់​ពី​រដ្ឋ​មន្ត្រី​​ក្រសួង​មហាផ្ទៃ​។ លោក​បាន​មានប្រសាសន៍​ថា “សេចក្ដី​សម្រេច​នេះ​ចេញ​ពី​ក្រសួង​មហាផ្ទៃ​ យើង​គ្មាន​សិទ្ធ​ិ​ធ្វើ​សេចក្ដីសម្រេច​នេះ​ទេ​”។

លោក​បាន​​ពន្យល់​ថា​ សាលារាជធានី​បាន​អនុវត្តតាម​បទ​បញ្ជា​របស់​​រដ្ឋ​មន្ត្រី​ក្រសួង​មហាផ្ទៃ​ឲ្យ​ព្រម​ព្រៀង​តាម​ផែនការ​របស់​​គណបក្ស​សង្គ្រោះជាតិ​។
លោក​បានមានប្រសាសន៍​ថា “ផ្លូវ​​ដែល​ពួក​គាត់​នឹង​ត្រូវ​ប្រើ​ [ថ្ងៃ​នេះ] គឺ​ផ្លូវ​លេខ​៥១។ ពួក​គាត់​​នឹង​ហែ​ក្បួ​ន​រហូត​ដល់​ផ្លូវ​លេខ​​៣០២ ដោយ​​បាតុករ​​​​​នឹង​ត្រូវ​រង់ចាំ​នៅ​​ទី​នោះ ហើយ​​តំណាង​​ប្រាំ​រូប​នឹង​​ចូល​​ទៅ​ការិយាល័យ​អង្គការ​សហប្រជាជាតិ​ ហើ​យ​បន្ទាប់​មក​​ពួក​គាត់​​នឹង​ត្រឡប់​ទៅ​​ទី​លាន​ប្រជា​ធិបតេយ្យ​វិញ​”។

លោក​ ឡុង ឌីម៉ង់ បាន​ពន្យល់​ទៀត​ថា ខណៈ​ដែល​​មនុស្ស​១.០០០​នាក់​ទទួល​បាន​ការ​អនុញ្ញាត​ឲ្យ​ហែក្បួន​នៅ​ទូទាំង​រាជធានី​​ភ្នំពេញ​នោះ​ ការ​ហែ​ក្បួន​ត្រូវ​​តែ​ឈប់​​នៅ​ចម្ងាយ​យ៉ាង​ហោច​ណាស់​១០០​ម៉ែត្រ​​ពី​ស្ថានទូត​នីមួយ​ៗ​ ចំណែក​ឯ​​តំណាង​​របស់​ពួក​គេ​​​នឹង​​ទទួល​បាន​​ការ​អនុញ្ញាត​ឲ្យ​​ដើរ​ចូល​ទៅ​ស្ថានទូត​នីមួយៗ។ លោក​មានប្រសាសន៍​ថា “យើង​បាន​ទទួល​​​សំណើ​ពី​ស្ថានទូត​​ទាំង​នោះ​​ ដែល​លើក​​ឡើង​​ថា ពួក​គាត់​​មិន​ចង់​​​ឲ្យ​បាតុករ​ដើរ​កាត់​ស្ថាន​ទូត​របស់​ពួក​គាត់​ឡើយ​”។

អ្នក​នាំពាក្យ​សាលា​រាជធានី​រូប​នេះ ក៏​បាន​គូស​បញ្ជាក់​​​ដែរ​ពី​ផ្លូវ​​ដូច​បាន​ព្រម​ព្រៀង​​គ្នា​ សម្រាប់​​ការ​ហែ​ក្បួន​នៅ​​ព្រឹក​​ថ្ងៃ​ព្រហស្បតិ៍ និង​ព្រឹក​ថ្ងៃ​សុក្រ​​។
នៅ​ថ្ងៃ​ព្រហស្បតិ៍​ បាតុករ​នឹង​ហែ​ក្បួន​​ចេញ​ពី​ទីលាន​ប្រជាធិបតេយ្យ​តាម​បណ្ដោយ​ផ្លូវ​លេខ​៦១​​ឆ្ពោះ​ទៅ​ភាគ​ខាង​ជើង​ ដើម្បី​ដាក់​ញត្តិ​ជូន​ស្ថានទូត​សហរដ្ឋ​អាមេរិក​ ដែល​នៅ​ក្បែរ​នោះ។ បន្ទាប់​មក​ពួក​គេ​​នឹង​បន្ត​ដំណើរ​តាម​បណ្ដោយ​ផ្លូវ​នេះ​ឆ្ពោះ​ទៅ​ចំណុច​ប្រសព្វ​ជាមួយ​នឹង​ផ្លូវ​​លេខ​៤៧​ ដែល​ភ្ជាប់​​ចំណុច​រមណីយដ្ឋាន​​វត្តភ្នំ​។

យោង​តាម​​​កិច្ច​ព្រម​ព្រៀង​នេះ​ អ្នក​ហែ​ក្បួន​នឹង​ត្រូវ​​រង់ចាំ​ ខណៈ​ពេល​តំណាង​​របស់​ខ្លួន​​​ដើរ​​ទៅ​​តែ​ឯង​ ដើម្បី​ដាក់​ញត្តិ​ជូន​ស្ថាន​ទូត​បារាំង​ និង​ស្ថានទូត​​អង់គ្លេស​ដែល​នៅ​ក្បែរ​នោះ ហើយ​បន្ទាប់​មក​នឹង​ត្រូវ​​ត្រឡប់​​​ក្រោយ​​ឆ្ពោះ​ទៅ​ទីលាន​ប្រជាធិ​បតេយ្យ​​វិញ​នៅ​ម៉ោង​១០​និង​៣០​នាទី​ព្រឹក​​។

នៅ​ថ្ងៃសុក្រ​ បាតុករ​នឹង​ហែក្បួន​ម្ដង​ទៀត​​តាម​​ផ្លូវ​​លេខ​៥១​ រហូត​ដល់​ផ្លូវ​លេខ​៣០២​​ ចំណុច​​ដែល​ពួក​គេ​ត្រូវ​​បត់​ទៅ​​ប៉ែក​ខាង​កើត​​ឆ្ពោះ​ទៅ​មាត់​​ទន្លេ​។ អ្នក​ហែក្បួន​​​នឹង​​​ត្រូវ​រង់ចាំ​នៅ​ជិត​​ចំណុច​ប្រសព្វ​​នៃ​ផ្លូវ​លេខ​២៩៤ និង​​មហាវិថី​សុធារស​ ខណៈ​ពេល​​​មេដឹកនាំ​​បាតុកម្ម​​ដាក់​ញត្តិ​​ទៅ​​​ស្ថានទូត​អូស្ត្រាលី និង​ស្ថានទូត​រុស្ស៊ី។

បន្ទាប់​មក​​ការ​ហែក្បួន​​នឹង​​​បន្ត​​តាម​​បណ្ដាយ​មហាវិថី​ព្រះ​នរោត្តម​ ឆ្ពោះ​ទៅ​ភាគ​ខាង​ត្បូង​ និង​​បន្ត​ទៅ​មហា​វិថី​​ម៉ៅសេទុង​​ កន្លែង​ដែល​ត្រូវ​ដាក់​ញត្តិ​ជូន​ស្ថានទូត​ជប៉ុន​ និង​ស្ថានទូត​​ចិន​។ នៅ​​ម៉ោង​ប្រហែល​១១​ព្រឹក​ថ្ងៃ​សុក្រ​ អ្នក​ហែក្បួន​នឹង​ឆ្ពោះទៅ​មហា​វិថី​ព្រះ​មុនីវង្ស ហើយ​​នឹង​បន្ត​​ឆ្ពោះ​ទៅ​​ផ្លូវ​លេខ​១១០ ដើម្បី​ត្រឡប់​​ទៅ​ទី​លាន​ប្រជា​ធិបតេយ្យ​វិញ​។

សាលា​រាជធានី​ក៏​បាន​ចេញ​សេចក្ដី​ជូន​ដំណឹង​​មួយ​ស្នើ​សុំ​ឲ្យ​​ប្រជាពលរដ្ឋ​ក្នុង​រាជ​ធានី​ភ្នំពេញ​ចៀស​វាង​ផ្លូវ​នានា​ ដែល​បាតុករ​​ប្រើ​ប្រាស់​អំឡុង​​ពេល​​​ហែក្បួន​តាម​ការ​ព្រម​ព្រៀង​គ្នា​​នេះ​។

លោក​ ជួន​ សុវណ្ណ ស្នង​ការ​រាជធានី​ភ្នំពេញ​ ដែល​មាន​វត្តមាន​​នៅ​ក្នុង​កិច្ច​ប្រជុំ​កាល​ពី​ម្សិលមិញ​ដែរ​ បាន​មានប្រសាសន៍​ថា ប្រសិន​បើ​​មនុស្ស​ជាង​១.០០០​នាក់​ ហែក្បួន​តាម​ផ្លូវ​នៅ​រយៈ​ពេល​បី​ថ្ងៃ​ក្រោយ​ វា​នឹង​បង្ហាញ​ថា គណបក្ស​សង្គ្រោះ​ជាតិ​​ចរចា​ឲ្យ​តែ​​រួច​ពីមាត់​។ លោក​បាន​មានប្រសាសន៍​បន្ថែម​ទៀត​ថា “ប្រសិន​បើ​ពួក​គាត់​បន្ត​​លើស​ពី​ចំនួន​ [មនុស្ស​] ដែល​សាលា​រាជធានី​បាន​កំណត់​ វា​​នឹង​បង្ហាញ​​ពី​ចរិត​របស់​គណបក្ស​​សង្គ្រោះ​ជាតិ​ក្នុង​ការ​អនុវត្ត​ច្បាប់​”។

ឧត្តម​សេនីយ៍​ត្រី ខេង ទីតូ អ្នក​នាំពាក្យ​កង​រាជ​អាវុធ​ហត្ថ​លើ​ផ្ទៃ​ប្រទេស​បាន​មាន​ប្រសាសន៍​ថា សាលា​រាជធានី​ត្រៀម​​ផ្ដល់​សន្ដិសុខ​រួច​ជា​ស្រេច​ ដើម្បី​ការពារ​បាតុករ​​ខណៈ​ពេលពួក​គេ​​ហែក្បួន​ ប៉ុន្តែ​ថា កង​រាជ​អាវុធ​ហត្ថ​នឹង​ប្រចាំ​ការ​ ដើម្បី​អនុវត្ត​តាម​កិច្ច​ព្រម​​​ព្រៀង​ធ្វើ​ឡើង​កាល​ពី​ម្សិលមិញ​នេះ​ ប្រសិន​បើ​ចាំ​បាច់​។ លោក​បាន​មានប្រសាសន៍​ថា “យើង​នឹង​ប្រើប្រាស់​នគរបាល​​ ដើម្បី​រក្សា​សណ្ដាប់​ធ្នាប់​សាធារណៈ​ ប៉ុន្តែ​​ប្រសិន​បើ​​នគរបាលគ្រប់​គ្រង​​​លែង​បាន​ យើង​នឹង​បញ្ជូន​​កង​រាជអាវុធ​ហត្ថ​​ដើម្បី​ធ្វើ​ការ​​បង្ក្រាប​​លើ​បាតុករ​រហូត​​ដល់​​​យើង​ទទួល​ជ័យ​​ជម្នះ​”។

លោក​ស្រី​ ម៉ារី ដូមីនិក ផារិន (Marie-Dominique Parent) មន្ត្រី​ទទួល​បន្ទុក​​ និង​ជា​អនុ​តំណាង​ការិយាល័យ​ឧត្តម​ស្នងការ​អង្គការ​សហ​ប្រជា​ជាតិ​​ទទួល​បន្ទុក​សិទ្ធិ​មនុស្ស​​ប្រចាំ​នៅ​កម្ពុជា​​ បាន​មានប្រសាសន៍​កាល​ពី​ថ្ងៃ​ព្រហ​​ស្បតិ៍​ថា ការិយាល័យ​អង្គការ​សហ​ប្រជា​ជាតិ​​នឹង​ទទួល​យក​ញត្តិ​របស់​គណបក្ស​សង្គ្រោះ​ជាតិ ​​នៅ​ពេល​​​គណបក្ស​​សង្គ្រោះ​ជាតិ​ប្រគល់​​ញត្តិ​នោះ ហើយខ្លួន​​នឹង​ផ្ញើ​វា​ទៅ​​ការិយាល័យ​របស់​​លោក​​ បាន គីមូន អគ្គ​លេខាធិការ​​​អង្គ​ការ​សហប្រជាជាតិ​​ក្នុង​បុរី​ញូវយ៉ក សហរដ្ឋ​អាមេរិក​។

តំណាង​ស្ថានទូត​បារំា​ង​ ស្ថានទូត​ជប៉ុន និង​ស្ថានទូត​ឥណ្ឌូណេសីុ បាន​លើក​ឡើង​​កាល​ពី​ម្សិលមិញ​ថា ពួក​គេ​​ក៏​នឹង​ទទួល​​​យក​ញត្តិ​របស់​គណបក្ស​សង្គ្រោះ​ជាតិ​ដែរ​តាម​ផ្លូវ​ការ​ទូត​ រីឯ​តំណាង​ស្ថានទូត​សហរដ្ឋ​អាមេរិក​ ស្ថានទូត​អង់គ្លេស​ និង​ស្ថានទូត​​អូស្ត្រាលី ​បាន​​បដិសេធ​​​មិន​លើក​ឡើង​​ថា តើ​ពួក​គេ​នឹង​ទទួល​យក​ញត្តិ​នោះ​ឬ​ក៏​អត់​ឡើយ​។ ចំណែក​ឯ​ស្ថានទូត​រុស្ស៊ី​វិញ​មិន​អា​ច​ទាក់​ទង​សុំ​ការ​បំភ្លឺបាន​ឡើយ​។

លោក​​ ឈឹង​ ហុង​​ប៉ ប្រធាន​ផ្នែក​នយោ​បាយ​​នៅ​ស្ថានទូត​ចិន​​​ប្រចាំ​ប្រទេស​កម្ពុជា​បាន​​មាន​ប្រសាសន៍​ថា ស្ថានទូត​របស់​លោក​ នឹង​ពិចារណា​ទទួល​​​យក​ញត្តិ​នោះ​​ ក្រោយ​តែ​​ពី​ខ្លួន​​ទទួល​បាន​សំណើ​ផ្លូវ​ការ​​ពី​​គណបក្ស​សង្គ្រោះ​ជាតិ​ប៉ុណ្ណោះ។

លោក​ គួយ ប៊ុន​រឿន ដែល​ជា​តំណាង​រាស្ត្រ​ជាប់​ឆ្នោត​មក​ពី​គណបក្ស​សង្គ្រោះជាតិ​​​បានមាន​ប្រសាសន៍​ថា គណ​បក្ស​សង្គ្រោះ​ជាតិ​បាន​ផ្ញើ​លិខិត​ទៅ​ស្ថានទូត​ចិន​រួច​ហើយ​កាលពី​ល្ងាច​ម្សិលមិញ​។

គណបក្ស​សង្គ្រោះ​ជាតិ​បាន​លើក​ឡើង​ថា ខ្លួន​​ប្រមូល​បាន​​ស្នាម​មេដៃ​ជាង​២​លាន​​​សម្រាប់​ញត្តិ​របស់​ខ្លួន​អំពាវនាវ​សុំ​អន្តរា​គមន៍​នៅ​ក្នុង​ប្រទេស​កម្ពុជា​ ពីសំណាក់​​បណ្ដា​​ប្រទេស​ជាម្ចាស់​​ហត្ថលេខី​​នៃ​កិច្ច​ព្រម​ព្រៀង​​ទី​ក្រុង​ប៉ារីស​ ឆ្នាំ​១៩៩១​ ដើម្បី​ធានា​ឲ្យ​មាន​​ការគោរព​សិទ្ធិ​មនុស្ស​ និង​គោរព​លទ្ធិ​ប្រជា​ធិបតេយ្យ​៕

(រាយការណ៍​បន្ថែម​ដោយ គីម ចាន់ និង​ អូន ភាព​)
ប្រែសម្រួលដោយ តែម សុខុម

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស