28 C
Phnom Penh

គណបក្ស​​​សង្គ្រោះ​​​​​​ជាតិ​ទទួល​បាន​ការ​​​ធានា​​​ថា នឹង​គ្មាន​​​ការ​​​បិទ​​​ផ្លូវ​​​​​អំឡុងពេល​​​ធ្វើ​​​​​​បាតុកម្ម​​​

ដោយ ឌឹ ខេមបូឌា ដេលី

បទវិភាគ

កាលពី​​​យប់​​​មិញ​​​លោកស្រី​​​ មូរ សុខហួរ តំណាង​​​រាស្ត្រ​​​ជាប់​​​ឆ្នោត​​​របស់​​​គណបក្ស​​​សង្គ្រោះ​​​ជាតិ​​​បាន​​​ចេញពី​​​កិច្ច​​​ប្រជុំ​​​ជាមួយ​​​តំណាង​​​សាលារាជធានីភ្នំពេញ ដោយបាន​​​​​​អះអាង​​​ថា លោក​​​ស្រី​​​ទទួល​​​បាន​​​ការ​​​ធានា​​​ពី​​​​​​ស្នង​​​ការ​​​នគរ​​​បាល​​​រាជធានី​​​ថា នឹង​​​គ្មាន​​​ការ​​​បិទ​​​ផ្លូវ​​​នៅ​​​ក្នុង​​​ ឬ​​​ជុំ​​​វិញ​​​រាជធានីភ្នំពេញ​​​ឡើយ អំឡុង​​​ការ​​​ធ្វើ​​​​​​បាតុកម្ម​​​ចំនួន​​​បីថ្ងៃ​​​របស់​​​គណ​​​បក្ស​​​ប្រឆាំង​​​ដែល​​​ចាប់​​​ផ្ដើម​​​នៅ​​​ថ្ងៃ​​​នេះ។

លោស្រី​​​បាន​​​មាន​​​ប្រសាសន៍​​​កាលពី​​​យប់​​​មិញ​​​ថា “យើង​​​ទទួល​​​បាន​​​លទ្ធផល​​​វិជ្ជមាន​​​ពី​​​កិច្ច​​​ប្រជុំ​​​របស់​​​យើង​​​ជាមួយ​​​សាលា​​​រាជធានី​​​នៅ​​​ក្នុង​​​ថ្ងៃ​​​នេះ​​​” ។ លោកស្រី​​​​​​បន្ថែម​​​ថា “លោក​​​ ជួន សុវណ្ណ [ ស្នងការ​​​នគរ​​​បាល​​​រាជ​​​ធានី​​​ភ្នំពេញ ]​​ ​​​បាន​​​​​​ធានា​​​ចំពោះ​យើង​​​ថា នឹង​​​គ្មាន​​​ការ​បិទ​​​ផ្លូវ​​​ដើម្បី​​​រារាំង​​​ការ​​​ធ្វើ​​​បាតុកម្ម​​​ឡើយ ​​​​​​ទាំង​​​នៅ​​​ក្នុង​​​ និង​​​ជុំវិញ​​​រាជធានី​​​”។

លោកស្រី​បាន​បន្ត​ថា “ប្រសិន​​​បើ​​​មាន​​​ការ​​​​​​បិទ​​​ផ្លូវ​​​មែននោះ វា​​​នឹង​​​ជា​​​ការ​​​ទទួល​​​ខុស​​​ត្រូវ​​​របស់​​​ក្រសួងមហាផ្ទៃ​​​ ពីព្រោះ​​​យើង​​​ទទួល​​​បាន​​​ការស​​​ន្យា​​​ពី​​​លោក​​​ស្នង​​​ការ​​​​​​រាជធានីរួច​​​ហើយ​​​។ អំឡុង​​​ការ​​​ធ្វើ​​​បាតុកម្ម​​​ចំនួន​​​បី​​​ថ្ងៃ​​​លើក​​​មុន​​​របស់​​​គណបក្ស​​​សង្គ្រោះ​​​ជាតិ កាល​​​ពី​​​ពាក់​​​កណ្ដាល​​​ខែ​​​កញ្ញា របាំង​​​និង​​​របាំង​​​លួស​​​បន្លា​​​ប្រើ​​​សម្រាប់​​​បិទ​​​ផ្លូវ​​​ បាន​​​ធ្វើ​​​ឲ្យ​​​ខណ្ឌ​​​ចំនួន​​​បួន​​​ក្នុង​​​រាជធានីភ្នំពេញស្ទើ​​​រតែ​​​មិន​​​អាច​​​ធ្វើ​​​ចរាចរ​​​ទៅ​មក​បាន​​​​​​។

នៅ​​​ពេល​​​ល្ងាច​​ក្នុង​​​ថ្ងៃ​​​ទី​​​១ នៃ​​​ការ​​​ធ្វើ​​​បាតុ​​​កម្ម​​​ ការ​​​បិទ​​​ផ្លូវ​​​នៅ​​​ជុំវិញ​​​ស្ពាន​​​ព្រះ​​​មុនី​​​វង្ស​​​ បាន​​​ធ្វើ​​​ឲ្យ​​​អ្នក​​​ធ្វើ​​​ដំណើរ​​​ និង​​​អ្នក​​​តវ៉ា​​​មាន​​​កំហឹង​​​​យ៉ាង​​​ខ្លាំង​​​​​​។ អ្នក​​​តវ៉ា​​​ប្រដាប់​​​ដោយ​​​ដុំ​​​​​​​​​ថ្មបាន​​​ប៉ះ​​​ទង្គិច​​​គ្នា​​​ជាមួយ​​​នគរ​​​បាល​​​ និង​​​កង​​​រាជ​​​​​​អាវុធហត្ថ​​​ ដែល​​​បាន​​​បើក​​​ការ​​​បាញ់​​​ប្រហារ​​​​​​​​​ជា​​​ការ​​​ឆ្លើយ​​​តប​​​​​​ ដោយ​​​ធ្វើ​​​ឲ្យ​​​បុរស​​​ម្នាក់​​​បាត់​​​បង់​​​ជីវិត​​​ និងជា​​​ច្រើន​​​នាក់​​​ផ្សេង​​​ទៀត​​​រង​​​របួស​​​។

លោកស្រី មូរ សុខហួរ ​​​​​​បាន​​​លើក​​​ឡើង​​​កាល​​​​​​​​​​​​ពី​​​​​​យប់​​​មិញ​​​ថា ការ​​​សន្យា​​​មិន​​​បិទ​​​ផ្លូវ​​​របស់​​​អាជ្ញា​​​ធរ​​​បាន​​​ផ្ដល់​​​ក្ដី​​​សង្ឃឹម​​​ថា  ការ​ធ្វើ​បាតុកម្ម​​​​​​លើ​​​ក​​​នេះ​​​នឹង​​​ប្រព្រឹត្ត​​​​​​​​​ទៅ​​​ដោយ​​​គ្មាន​​​ហេតុការណ៍​​​អាក្រក់​​​​​​កើត​​​ឡើង​​​ម្ដង​​​ទៀត​​​ឡើយ​​​។ លោក​ស្រី​បាន​មាន​ប្រសាសន៍​ថា “គ្មាន​​​ការ​​​​​​​​​បិទ​​​ផ្លូវ​​​​​​គឺ​​​មានន័យ​​​ថា ប្រជា​​​ពល​​​រដ្ឋ​​​ទាំង​​​បាតុករ​​​និង​​​ពល​​​រដ្ឋ​​​ធម្មតា​​​អាច​​​ធ្វើ​​​ដំណើរ​​​បាន​​​យ៉ាង​​​​​​​​​ស្រួល​​​ និង​​​ដោយ​​​សេរី​​​ក្នុង​​​រាជធានីភ្នំពេញ​​​។ យើង​​​ [គណ​​​​​​​​​បក្ស​​​សង្គ្រោះ​​​ជាតិ ] ជឿ​​​ជាក់​​​ថា ពួកគេ​​​នឹង​​​មិន​​​បិទ​​​ផ្លូវ​​​ឡើយ”។

ទោះ​​​បីជា​​​មាន​​​​ការ​​​ធានា​​​បែប​នេះ​ក៏ដោយ​​​ ក៏​​​អង្គការ​​​សិទ្ធិ​​​មនុស្ស​​​លីកាដូ បាន​​​ចុះ​​​ផ្សាយ​​​នៅ​​​លើ​​​គេហទំព័រ​​​របស់​​​ខ្លួន​​​កាលពី​​​រសៀល​​​ម្សិលមិញ​​​ថា នគរ​​​បាល​​​ជាតិ​​​ និង​​​កង​​​រាជ​​​អាវុធ​​​ហត្ថ​​​បាន​​​បង្កើត​​​ចំណុច​​​ត្រួត​​​ពិនិត្យ​​​សន្តិ​​​សុខ​​​នៅ​​​តាម​​​ផ្លូវ​​​ជាតិ​​​​​​ចូល​​​មក​​​រាជ​​​ធានី​​​ភ្នំពេញទាំង​​​ប្រាំមួយ​​​​​​រួច​​​ហើយ។

ឧត្តម​សេនីយ៍​ត្រី​​​​​​ ខេង ទីតូ អ្នក​​​នាំពាក្យ​​​កង​​​រាជអាវុធ​​​ហត្ថ​​​លើ​​​ផ្ទៃ​​​ប្រទេស​​​បាន​​​លើក​​​ឡើង​​​ថា ចំណុច​​​ត្រួត​​​ពិនិត្យ​​​គឺ​​​វា​​​មាន​​​សារៈសំខាន់​​​ក្នុង​​​ការ​​​ធានា​​​សុវត្ថិភាព​​​ជូន​​​ប្រជា​​​ពល​​​រដ្ឋ​​​អំឡុង​​​ពេល​​​ធ្វើ​​​បាតុកម្ម​​​​​​។ លោក​បាន​មាន​ប្រសាសន៍​​​ថា កង​​​កម្លាំង​​​របស់​​​យើង​​​បាន​​​បង្កើត​​​ចំណុច​​​ត្រួត​​​ពិនិត្យ​​​ជុំ​​​វិញ​​​រាជធានីភ្នំពេញ ដើម្បី​​​ត្រួត​​​ពិនិត្យ​​​រក​​​អាវុធ​​​ខុស​​​ច្បាប់​​​​​​ដែល​​​អាច​​​នឹង​​​​​​ប្រើ​​​ដើម្បី​​​បង្ក​​​អំពើ​​​ហិង្សា​​​នៅ​​​ក្នុង​​​ចំណោម​​​អ្នក​​​តវ៉ា​​​ជា​​​ច្រើន​​​នាក់”។

ឧត្តម​​​សេនីយ៍​​​ត្រី​​​ ខេង ទីតូ ​​​ថ្លែង​​​ថា “យើង​​​មិន​​​ហាម​​​ឃាត់​​​អ្នក​​​តវ៉ា​​​ដែល​​​មាន​​​បំណង​​​​​​​​​ចូល​​​មក​​​រាជ​​​ធានី​​​ភ្នំពេញ​​​នោះទេ ពីព្រោះ​​​ប្រជា​ពល​​​រដ្ឋ​​​មាន​​​សិទ្ធិ​​​ធ្វើ​​​បាតុកម្ម​​​ ប៉ុន្តែ​​​ពួកគាត់​​​ត្រូវ​​​តែ​​​គោរព​​​ច្បាប់​​​” ។ លោក​​​បាន​​​បន្ថែម​​​ថា តែ​​​ទោះ​​​ជាយ៉ាង​​​ណា​​​ ការ​​​បិទ​​​ផ្លូវ​​​នៅ​​​ក្នុង​​​រាជធានី​​​អាច​​​នឹង​​​មាន​​​ ប្រសិន​​​បើ​​​ស្ថាន​​​ភាព​​​បង្ខំ​​​ឲ្យ​​​ធ្វើ​​​ដូច្នោះ​​​នោះ។ លោក​​​​​​បន្ថែម​​​ថា “ យើង​​​នឹង​​​បិទ​​​ផ្លូវ​​​សំខាន់​​​ៗ​​​​​​​​​មួយ​​​ចំនួន​​​ ដូចជា​​​ភូមិ​​​គ្រឹះ​​​របស់​​​លោក​​​នាយក​​​រដ្ឋ​​​មន្ត្រី​​​ ហ៊ុន សែន និង​​​ស្ថាប័ន​​​រដ្ឋ​​​សំខាន់ៗ​​​ ប្រសិន​​​​​​​​​បើ​​​ចាំបាច់​​​”៕

ប្រែសម្រួល​​​ដោយ ស៊ា ស៊ុយ​​​ឈាង​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស