ជំនួបរយៈពេលពីរថ្ងៃរវាងក្រុមមេដឹកនាំសហជីព មន្ត្រីជាន់ខ្ពស់របស់រដ្ឋាភិបាល និងតំណាងមកពីរោងចក្រកាត់ដេរអេសអិល (SL Garment Factory) កាលពីម្សិលមិញ មិនបានឈានដល់មានដំណោះស្រាយណាមួយ សម្រាប់កម្មកររោងចក្រដែលកំពុងតែធ្វើកូដកម្មចាប់តាំងពីដើមខែសីហាមកទេ ហើយកាលពីថ្ងៃច័ន្ទ កម្មករទាំងនោះបានធ្វើបាតុកម្មនៅមុខភូមិគ្រឹះរបស់លោកនាយករដ្ឋមន្ត្រី ហ៊ុន សែន នៅក្នុងរាជធានីភ្នំពេញ។
លោក អាត់ ធន់ ប្រធានសម្ពន្ធសហជីពប្រជាធិបតេយ្យកម្មករកាត់ដេរកម្ពុជា បានឲ្យដឹងថា ខណៈកិច្ចប្រជុំដែលបានចាប់ផ្តើមកាលពីថ្ងៃច័ន្ទ ដើម្បីចៀសវាងការប្រឈមមុខដាក់គ្នាដ៏តានតឹងរវាងកម្មកររោងចក្រកាត់ដេរចំនួន២.០០០នាក់ និងនគរបាលប្រឆាំងកុបកម្មចំនួន២០០នាក់នៅក្បែរភូមិគ្រឹះរបស់លោក ហ៊ុន សែននោះ មិនមែនទទួលបរាជ័យទាំងស្រុងនោះទេ ហើយតំណាងរោងចក្រនេះមិនព្រមពិចារណាអំពីការសងប្រាក់រយៈពេលពីរបីខែ ដែលកម្មករបាននិងកំពុងធ្វើកូដកម្មទេ។
លោក អាត់ ធន់ បានលើកឡើងកាលពីម្សិលមិញ បន្ទាប់ពីកិច្ចប្រជុំ ដែលមានការចូលរួមផងដែរពីសំណាក់លោក ប៉ា សុជាតិវង្ស អភិបាលរាជធានីភ្នំពេញ និងលោក អ៊ិត សំហេង រដ្ឋមន្ត្រីក្រសួងការងារបណ្តុះបណ្តាល និងវិជ្ជាជីវៈ មេដឹកនាំសហជីពប្រហែល១០នាក់ និងម្ចាស់រោងចក្រឈ្មោះ វង់ ហុងមីង (Wong Hong Ming) ថា “ប្រសិនបើក្រុមហ៊ុនយល់ព្រមសង [កម្មករ] អំឡុងពេលធ្វើកូដកម្ម បញ្ហាទាំងអស់នៅត្រូវបានដោះស្រាយ”។
លោក អាត់ ធន់ បានថ្លែងថា លោក វង់ ហុងមីង បានយល់ព្រមឆ្លើយតបទៅនឹងការទាមទាររបស់កម្មករ ពោលគឺយល់ព្រមដកនាយកងរាជអាវុធហត្ថស្លៀកពាក់ស៊ីវិលដែលធ្វើការផ្នែកយាមរោងចក្រនេះ និងរៀបចំឡើងវិញនូវគម្រោងពេលវេលាធ្វើការ ដែលបូករួមទាំងពេលឈប់សម្រាករយៈពេលកន្លះម៉ោង សម្រាប់ទទួលទាហារផងដែរ។
លោក អ៊ិត សំហេង បានយល់ព្រមចរចាជាមួយលោក មាស សុថា ជាសមាជិកភាគហ៊ុនក្នុងរោងចក្រនេះ ដែលកម្មករបានស្តីបន្ទោស ដោយសារតែមានវត្តមានរបស់កងប្រដាប់អាវុធនៅរោងចក្រនេះ។ ក៏ប៉ុន្តែ លោក វង់ ហុងមីង ដែលជាម្ចាស់រោងចក្រកាត់ដេរសម្លៀកបំពាក់ សម្រាប់ផ្គត់ផ្គង់ឲ្យក្រុមហ៊ុន Gap និង H&M បានច្រានចោលគំនិតទារសំណងនេះភ្លាមៗ។
លោក អ៊ុំ មាន រដ្ឋលេខាធិការនៅក្រសួងការងារ បណ្តុះបណ្តាល និងវិជ្ជាជីវៈ ដែលមានវត្តមាននៅទីនោះផងដែរបានមានប្រសាសន៍ថា “ជំនួបនេះទទួលបានលទ្ធផលវិជ្ជមាន ប៉ុន្តែ យើងមិនបានព្រមព្រៀងគ្នាគ្រប់ចំណុចទេ ហើយយើងត្រូវតែបន្តជួបចរចា[ជាមួយមេដឹកនាំសហជីព]”។
លោក អាត់ ធន់ បានថ្លែងថា បន្ទាប់ពីថ្ងៃឈប់សម្រាកនៅថ្ងៃនេះ គឺថ្ងៃប្រារព្ធខួប លើកទី២២នៃកិច្ចព្រមព្រៀងទីក្រុងប៉ារីសឆ្នាំ១៩៩១ លោកនឹងជួបកម្មកររោងចក្រអេសអិល ដើម្បីរៀបចំផែនការតវ៉ានៅពេលអនាគត។
ឈ្មោះ អ៊ុយ នឿន អាយុ៣២ឆ្នាំ ជាកម្មករនៅរោងចក្រអេសអិល ដែលបានចូលរួមបាតុកម្មកាលពីថ្ងៃច័ន្ទ បានលើកឡើងថា ប្រសិនបើគ្មានសំណងសម្រាប់រយៈពេលដែលលោកបានធ្វើកូដកម្មទេនោះ លោកនឹងមិនអាចដោះស្រាយតម្រូវការចាំបាច់ជាមូលដ្ឋានផ្សេងៗបានទេ។ លោក អ៊ុយ នឿន បានឲ្យដឹងថា “ ខ្ញុំជំរុញឲ្យរដ្ឋាភិបាលជួយយើង ព្រោះឥឡូវនេះខ្ញុំគ្មានប្រាក់បង់ថ្លៃជួលផ្ទះ ទឹកភ្លើងទេ”។
លោក កែន លូ អគ្គលេខាធិការសមាគមរោងចក្រកាត់ដេរនៅកម្ពុជា បានលើកឡើងថា គំនិតដែលលើកឡើងថា ត្រូវទទួលបានប្រាក់ឈ្នួលសម្រាប់ការងារ ដែលអ្នកមិនបានធ្វើ គឺជាគំនិត “មិនសមហេតុផលឡើយ”។ លោក កែន លូ បានមានប្រសាសន៍ថា “កម្មករយល់ច្រឡំអំពីប្រាក់ឈ្នួល បើទោះជាពួកគេធ្វើកូដកម្មក៏ដោយ។ វាពិតជាមិនត្រឹមត្រូវទេទោះបីជាមានមូលហេតុនៅពីក្រោយការធ្វើកូដកម្មនេះក៏ដោយ”៕
ប្រែសម្រួលដោយ ចេវ ប៊ុននី
នគរបាលបង្ក្រាបបាតុកម្មដេញវាយ