ក្រុងសៀមរាបបាននាំមុខគេនៅក្នុងបញ្ជី “ទីក្រុងកំពូលទាំង១០នៅអាស៊ី” គឺនាំមុខទីក្រុងបាងកក និងទីក្រុងតូក្យូក្នុងបញ្ជីពានរង្វាន់ Readers’ Choice Awards របស់ទស្សនាវដ្តី Conde Nast Traveler ដ៏មានកិត្យានុភាព។
បញ្ជីពានរង្វាន់របស់ទស្សនាវដ្តីនេះក៏បានផ្តល់ចំណាត់ថ្នាក់លេខ២ដល់សណ្ឋាគារសូហ្វីតែល ភ្នំពេញ ភូគីត្រា Sofitel Phnom Penh Phokeethra ក្នុងចំណោមសណ្ឋាគារល្អបំផុតទាំង២៥នៅអាស៊ីអាគ្នេយ៍ផងដែរ។ យោងតាមលទ្ធផលដែលចុះផ្សាយក្នុងទស្សនាវដ្តីទេសចរណ៍នេះកាលពីសប្តាហ៍មុននេះ ក្រុងសៀមរាបទទួលបានពិន្ទុ៨៣,៦ភាគរយផ្នែកស្វាគមន៍រាក់ទាក់ ៨១ភាគរយផ្នែកបរិយាកាស ៨០,៣ភាគរយផ្នែកកន្លែងស្នាក់នៅ និង៦៣,៨ភាគរយផ្នែកភោជនីយដ្ឋាន។
លោក ហូវ៉ាន់ឌី សហប្រធានក្រុមការងារទេសចរណ៍ មានប្រសាសន៍ដោយក្តីរំភើបថា “ ជយោ! នេះដោយសារតែការប្តេជ្ញាចិត្តយ៉ាងខ្លាំងក្លារបស់វិស័យឯកជនក្នុងការផ្តល់សេវាល្អ ផ្តល់ភ្ញៀវទេសចរណ៍។ យើងត្រូវតែផ្តល់សេវាល្អក្នុងតម្លៃសមរម្យ” ដែលមិនមែនរឿងសាមញ្ញឡើយ។
លោក ឆាល ហ៊ែនរី ឆេវេត (Charles-Henri Chevet) នាយកគ្រប់គ្រងទូទៅនៅសណ្ឋាគារសូហ្វីតែល មានប្រសាសន៍ថា នេះជាដំណឹងភ្ញាក់ផ្អើលគួរឲ្យស្វាគមន៍ដែលសណ្ឋាគារភ្នំពេញ ភូគីត្រា ដែលបានបើកទ្វារកាលពីពីរឆ្នាំមុន ដណ្តើមបានចំណាត់ថ្នាក់លេខ២ ក្នុងបញ្ជីសណ្ឋាគារល្អបំផុតនៅអាស៊ីអាគ្នេយ៍បន្ទាប់ពីសណ្ឋាគាររមណីយដ្ឋានអាម៉ាន់គីឡា (Amankila) នៅលើកោះបាលី ក្នុងប្រទេសឥណ្ឌូណេស៊ី។
គួរបញ្ជាក់ថា មានទស្សនាវដ្តីទេសចរណ៍ជាភាសាអង់គ្លេសចំនួនពីរ ដែលការស្ទង់មតិអ្នកអានរបស់ខ្លួន ផ្តល់លទ្ធផលពាក់ព័ន្ធនឹងភាពឥតខ្ចោះក្នុងវិស័យសណ្ឋាគារ នោះគឺទស្សនាវដ្តី Travel+Leisure និងទស្សនាវដ្តី Conde Nast Traveler ។
លោកឆាល ហ៊ែនរី ឆេវេតបានមានប្រសាសន៍ថា “ឥឡូវនេះយើងត្រូវតែរក្សាគុណភាពក្នុងកម្រិតនេះឲ្យបាន។ នេះគ្រាន់តែជាការចាប់ផ្តើមប៉ុណ្ណោះ” ដោយបានពន្យល់ថា ការទទួលបានចំណាត់ថ្នាក់លេខ២របស់សណ្ឋាគារសូហ្វីតែលនេះ នឹងតម្រូវឲ្យ បុគ្គលិករបស់សណ្ឋាគារនេះបន្តការប្តេជ្ញាចិត្តក្នុងការរក្សាបទដ្ឋានឲ្យស្ថិតក្នុងកម្រិតខ្ពស់។
សណ្ឋាគារផ្សេងៗទៀតនៅក្នុងប្រទេសកម្ពុជាក៏បានទទួលចំណាត់ថ្នាក់ល្អគួរឲ្យកត់សម្គាល់ក្នុងការស្ទង់មតិនេះផងដែរ។ បញ្ជីចំណាត់ថ្នាក់ សណ្ឋាគារកំពូលទាំង២៥” នៅកម្ពុជា ឥណ្ឌូណេស៊ី សិង្ហបុរី ហ្វីលីពីន និងវៀតណាមនេះ រួមមានសណ្ឋាគារចំនួន៥ក្នុងប្រទេសកម្ពុជា។ សណ្ឋាគារឡារ៉េស៊ីដង់ អង្គរ (La Residence d’Angkor) និងសណ្ឋាគារ ហ្គ្រង់ អូតែល អង្គរ(Raffles Grand Hotel d’Angkor) ដែលសុទ្ធតែស្ថិតនៅក្នុងក្រុងសៀមរាប ទទួលបានចំណាត់ថ្នាក់លេខ៣ និងលេខ៤តាមរៀងគ្នា។
សណ្ឋាគារអាម៉ាន់សារ៉ា (Amansara)ដែលស្ថិតក្នុងក្រុងសៀមរាបដែរនោះ ជាប់ចំណាត់ថ្នាក់លេខ១៥ នាំមុខសណ្ឋាគារអាំងទែរកុងទីណង់តាល់ ក្នុងប្រទេសសិង្ហបុរី(InterContinental Singapore) ហើយសណ្ឋាគារឡឺរ៉ូយ៉ាល់ (Raffles Hotel Le Royal) ក្នុងរាជធានីភ្នំពេញ ជាប់ចំណាត់ថ្នាក់លេខ១៩ បន្ទាប់ពីសណ្ឋាគារសូហ្វីតែល ផ្លាហ្សា (Sofitel Plaza) ក្នុងទីក្រុងហាណូយ។
យោងតាមគេហទំព័ររបស់ទស្សនាវដ្តីទេសចរណ៍ Conde Nast Traveler នេះ អ្នកអានទស្សនាវដ្តីនេះក្នុងចំនួនច្រើនបំផុតធ្លាប់មាន បានចូលរួមក្នុងការស្ទង់មតិនេះ ដោយពួកគេត្រូវបានស្នើឲ្យដល់ចំណាត់ថ្នាក់សណ្ឋាគារ និងរមណីយដ្ឋានដែលខ្លួនពេញចិត្តផ្អែកលើចំណុចមួយចំនួនដែលមានចាប់ពីគុណភាពអាហាររហូតដល់ការតុបតែងសណ្ឋាគារ។
អ្នកអានសរុបចំនួន៧៩.២៦៨នាក់បានផ្តល់ចំណាត់ថ្នាក់ដល់សណ្ឋាគារ និងរមណីយដ្ឋានជាង១៦.០០០កន្លែង ហើយក៏បានចូលរួមក្នុងការស្ទង់មតិពីក្រុមហ៊ុនអាកាសចរណ៍ ល្អបំផុត ទីក្រុងល្អបំផុត។ល។និង។ល។ផងដែរ៕
ប្រែសម្រួលដោយ ស៊ា ស៊ុយឈាង