26 C
Phnom Penh

គណបក្ស​ប្រឆាំង​​ហែក្បួន​ក្នុង​រាជធានី​​ភ្នំពេញ​​ និង​ដាក់​​​ញត្តិ​ជូន​អង្គការ​សហប្រជាជាតិ​

ដោយ ឌឹ ខេមបូឌា ដេលី

បទវិភាគ

អ្នក​គំាទ្រ​​គណបក្ស​សង្គ្រោះ​ជាតិ​ជាង​១០.០០០​នាក់​បាន​ដើរ​ក្បួន​​​​ចេញ​ពី​ទី​​លាន​ប្រជាធិបតេយ្យ​​ឆ្ពោះ​ទៅ​ការិយាល័យ​​សិទ្ធិ​មនុស្ស​​របស់​អង្គការ​សហប្រ​ជា​ជាតិ​​នៅ​ក្នុង​រាជធានី​ភ្នំពេញ​កាល​ពី​ម្សិលមិញ​ ដើម្បី​​ដាក់​ញត្តិ​​​ជំរុញ​​ឲ្យ​បណ្ដា​ប្រទេស​​ជា​ម្ចាស់​ហត្ថ​លេខី​​នៃ​កិច្ច​ព្រម​ព្រៀង​សន្ដិភាព​ទីក្រុង​ប៉ារីស​ ឆ្នាំ​១៩៩១ ជួយ​អន្តរាគមន៍​នៅ​ក្នុង​ស្ថានភាព​ជាប់​គាំង​​ផ្នែក​​នយោបាយនា​ពេល​បច្ចុប្បន្ន​។

ក្រុម​​​អ្នក​គាំ​ទ្រ​គណ​បក្ស​សង្គ្រោះ​​​ជាតិ​​​​ ​នាំ​គ្នា​ហែ​ក្បួ​​​ន​​​​ក្នុង​ទី​ក្រុងភ្នំ​ពេញ​​កាល​ពី​ម្សិលមិញ​ ដើម្បី​​​យក​​​ស្នាម​មេ​ដៃ​ជាង​២​លាននាក់​​​ដាក់​​​ជូន​ឧត្តម​​​ស្នង​​​ការ​​​​​​អង្គការ​​​សហ​​​ប្រ​ជា​ជាតិ​​​។​
ក្រុម​​​អ្នក​គាំ​ទ្រ​គណ​បក្ស​សង្គ្រោះ​​​ជាតិ​​​​ ​នាំ​គ្នា​ហែ​ក្បួ​​​ន​​​​ក្នុង​ទី​ក្រុងភ្នំ​ពេញ​​កាល​ពី​ម្សិលមិញ​ ដើម្បី​​​យក​​​ស្នាម​មេ​ដៃ​ជាង​២​លាននាក់​​​ដាក់​​​ជូន​ឧត្តម​​​ស្នង​​​ការ​​​​​​អង្គការ​​​សហ​​​ប្រ​ជា​ជាតិ​​​។​

ការ​ហែក្បួន​នេះ​បាន​បង្ហាញ​ពី​ចំនួន​អ្នក​គាំទ្រ​​យ៉ាង​ច្រើន​​កុះករនៅ​​​​ក្នុង​ថ្ងៃ​ដំបូង​​នៃ​​មហាបាតុកម្ម​រយៈ​ពេល​បី​ថ្ងៃ​របស់​គណបក្ស​សង្គ្រោះជាតិ​​ ដែល​បាន​ចាប់​ផ្ដើម​នៅ​ទីលាន​ប្រជាធិបតេយ្យ​​នៅ​វេលា​ម៉ោង​៨​ព្រឹក​ និង​​ដែល​ត្រូវ​បាន​​កំណត់​ពេល​​​ធ្វើ​ឲ្យ​ស្រប​​នឹង​ថ្ងៃ​​ខួប​ទី​២២ នៃ​ការ​ចុះ​កិច្ច​ព្រម​ព្រៀង​​សន្ដិភាព​​ទីក្រុង​ប៉ារីស​ ឆ្នាំ​១៩៩១ ដែល​បាន​សន្យា​​ធ្វើ​ឲ្យ​មាន​​លទ្ធិ​ប្រជាធិបតេយ្យ​​សេរី​ពហុបក្ស​​នៅ​ប្រទេស​កម្ពុជា​​។

បន្ទាប់​ពី​​ការ​ថ្លែង​សុន្ទរកថា និង​ការ​ប្រគំ​តន្ត្រី​​នៅ​ពេល​ព្រឹក​​ ដើម្បី​​ចាប់​ផ្ដើម​យុទ្ធនាការ​ក៏​ដូច​ជា​បាតុកម្ម​របស់​​គណបក្ស​សង្គ្រោះ​ជាតិនោះ​ លោក​ សម រង្ស៊ី ប្រធាន​គណ​បក្ស​សង្គ្រោះ​ជាតិ​ និង​លោក​ កឹម សុខា អនុ​ប្រធាន​​​គណបក្ស​​នេះ​បាន​​ធ្វើ​ដំណើរ​​​ទៅ​ដល់​ទីលាន​ប្រជាធិបតេយ្យ​​នៅ​ចន្លោះ​ម៉ោង​២ និង​៣០​នាទី​​ទៅ​ម៉ោង​៣​រសៀល​​ ដើម្បី​ស្វាគមន៍​អ្នក​គាំទ្រ​ ដែល​​​កំពុង​តែ​ស្រែក​ហ៊ោ​កញ្ជ្រៀវ។

មនុស្ស​ជាង​២០.០០០​នាក់​បាន​​ជួប​ជុំ​គ្នា​​នៅ​​ទី​លាន​ប្រជាធិបតេយ្យ​ និង​​ផ្លូវ​​ជុំ​វិញ​នោះ​ ដើម្បី​ស្ដាប់​​មេដឹកនាំ​ទាំង​ពី​រ​​ថ្លែង​សុន្ទរ​កថា អំពី​ញត្តិ​របស់​​ពួក​គាត់​​ និង​​កិច្ច​ព្រម​ព្រៀង​​​សន្ដិភាព​​ទី​​ក្រុង​ប៉ារីស​ មុន​ពេល​​​ចំនួន​​អ្នក​ចូល​រួម​ពាក់​កណ្ដាល​​បានដើរតាម​លោក​​ទាំង​ពីរ​​ហែ​ក្បួន​ឆ្ពោះទៅ​ផ្លូវ​លេខ​៥១​ ដើម្បី​ដាក់​ញត្តិ​​ជូន​ការិយាល័យ​អង្គការ​សិទ្ធិ​មនុស្ស​​របស់​អង្គការ​សហប្រជាជាតិ​។

កង​​សន្ដិសុខ​​របស់​គណបក្ស​សង្គ្រោះ​ជាតិ​​ដែល​​ស្លៀក​ពាក់​ឯក​សណ្ឋាន​ពណ៌​ទឹក​ប៊ិច​ និង​ពណ៌​ខ្មៅ​បាន​អម​ការពារ​លោក​ សម រង្ស៊ី លោ​ក កឹម សុខ និង​លោក​ស្រី មូរ សុខហួរ​ ខណៈ​ពេល​ពួក​លោក​​ដឹកនាំ​​បាតុករ​​ហែ​ក្បួន​​តាម​បណ្ដោយ​ផ្លូវ​លេខ​៥១​​នៅ​វេលា​ម៉ោង​ប្រហែល​​៣ និង​៣០​នាទី​រសៀល​ ដោយ​ធ្វើ​ឲ្យ​អ្នក​ហែក្បួន​​​បន្ត​ដំណើរ​​ទៅ​មុខ​​​យ៉ាង​លឿន​ ខណៈ​ពេល​​មនុស្ស​ជា​ច្រើន​​ព្យាយាម​ឈប់​ ដើម្បី​ថត​រូប​​មេដឹកនាំ​ទាំង​នេះ​។

​កាលពី​ម្សិញ​នេះ ​ភាគ​ច្រើនលោក​ សម រង្ស៊ី និង​លោក​ កឹម សុខា បាន​ព្យាយាម​​គេច​ពី​អ្នក​គាំទ្រ​ដែល​មាន​ចិត្ត​រំភើប​​យ៉ាង​ខ្លាំង​ និង​​​បានលើក​ដៃ​​ជា​សញ្ញា​ស្វាគមន៍​អ្នក​ឈរ​មើល​ ដែល​បាន​​តម្រង់​ជួរ​គ្នា​​តាម​ផ្លូវ​លេខ​៥១​ ដោយ​​​​ទះ​ដៃ​ និង​​ស្រែក​ថា “ដូរ​ ដូរ​”។ នៅ​ពេល​មេដឹកនាំ​ទាំង​ពីរ​ទៅ​ដល់​ចំណុច​រូប​សំណាក​​លោក​ ជា​ វិជ្ជា​ មេដឹកនាំ​សហ​ជីព ដែល​ត្រូវ​បា​ន​ឃាត​ក​របាញ់​សម្លាប់​ នៅ​លើ​​កំណាត់​មហា​វិថី​​ព្រះ​សីហនុនោះ ​ ពួក​លោក​​​ទាំង​ពីរ​បាន​លុត​ជង្គង់​បួងសួង​។

ពេល​​ទៅដល់​ចំណុច​ប្រសព្វ​​នៃ​ផ្លូវ​លេខ​៥១ និង​ផ្លូវ​លេខ​៣០២​នៅ​វេលា​ម៉ោង​៤​និង​៣០​នាទី​រសៀល​ លោ​ក​ សម រង្ស៊ី និង​លោក​ កឹម សុខា​ បាន​ដឹកនាំ​អ្នក​ហែក្បួនមួយ​ក្រុម​តូច​​តាម​ការ​ព្រម​ព្រៀង​គ្នា​មួយ​ជាមួយ​សាលា​រាជធានី​​កាល​ពី​ថ្ងៃ​អ​ង្គារ​ ដើរ​ឆ្ពោះ​ទៅ​កាន់​ការិយាល័យ​ឧត្តម​ស្នង​ការ​សហ​ប្រជា​​ជាតិ​ទទួល​បន្ទុក​សិទ្ធិ​មនុស្ស​ ​។

មេដឹកនាំ​ទាំង​នេះ​បាន​​ដើរ​ចូល​​ក្នុង​អគារ​​ការិយាល័យ​ឧត្តម​ស្នង​ការ​សហ​ប្រជា​​ជាតិ​ទទួល​បន្ទុក​សិទ្ធិ​មនុស្ស ខណៈ​ដែល​​អ្នក​គាំទ្រ​គណបក្សសង្គ្រោះ​ជាតិ​បួន​នាក់​ទៀត​នាំ​គ្នា​​​លើក​ប្រអប់​ដាក់​ក្រដាសញត្តិ​​ដែល​មាន​ស្នាម​​​​មេដៃ​ចេញ​ពី​រថយន្ត​មួយ​គ្រឿង​ ហើយ​បាន​ប្រគល់​ញត្តិ​ទាំង​នោះ​ជូន​បុគ្គលិក​អង្គការ​សហ​​ប្រជាជាតិ​ ដែល​កំពុង​រង់​ចាំ​នៅ​ច្រក​ទ្វារ​ចូល​។​

ញត្តិ​​របស់​គណបក្ស​សង្គ្រោះ​ជាតិ​អំពាវ​នាវ​​ឲ្យ​អង្គការ​សហប្រជាជាតិ​​ និង​ប្រទេស​ចំនួន​១៨ ដែល​​បាន​ចុះ​កិច្ច​ព្រម​ព្រៀង​សន្ដិ​ភាព​ទី​ក្រុង​ប៉ារីស​ ឆ្នាំ ១៩៩១ ធានា​ការពារ​លទ្ធិប្រជាធិបតេយ្យ​សេរី​ពហុបក្ស​ និង​​ការ​​គោរព​សិទ្ធិ​មនុស្ស​នៅ​ក្នុង​ប្រទេស​កម្ពុជា​ ក្រោយ​ពី​​ចេញ​លទ្ធផល​​ដ៏​ចម្រូង​ចម្រាស​ ​នៃ​ការ​បោះឆ្នោត​កាល​ពី​ថ្ងៃ​ទី​២៨ ខែ​កក្កដា និង​​​ការ​ឆ្លើយ​តប​យ៉ាង​ចាស់​ដៃ​លើ​មហាបាតុកម្ម​​រយៈ​ពេល​បី​ថ្ងៃ​លើក​ដំបូង​កាល​ពី​ខែ​មុន​។ ​គណបក្ស​ប្រឆាំង​លើក​ឡើង​ថា ខ្លួន​ប្រមូល​​​បាន​ស្នាម​មេដៃ​​ពី​​ប្រជាពលរដ្ឋ​បាន​ចំនួន​២.០៣២​.៦៥២ ក្នុង​រយៈ​ពេល​ពី​រ​សប្ដាហ៍​កន្លង​មក​នេះ​​។

លោក​ សម រង្ស៊ី និង​លោក​ កឹម សុខា បាន​ចេញពី​ការិយាល័យ​​ឧត្តម​ស្នង​ការ​សហ​ប្រជា​​ជាតិ​ទទួល​បន្ទុក​សិទ្ធិ​មនុស្ស​​​​​នៅ​រយៈ​ពេល​ប្រាំ​នាទី​​ក្រោយ​ពី​ចូល​ទៅ​ខាង​ក្នុង​ ហើយ​បាន​ធ្វើ​សន្និសីទ​កាសែត​​ភ្លាមៗ​​​ដោយ​ឥត​​​ព្រាង​ទុក​​​ទៅ​កាន់​ក្រុម​អ្នក​យក​ព័ត៌មាន​ ដែ​ល​កំពុង​រង់​ចាំ​នៅ​ខាង​មុខ​​ច្រក​ទ្វារ​ចូល​។

លោក​ សម រង្ស៊ី បាន​​មាន​ប្រសាសន៍​ថា “យើង​​រីករាយ​យ៉ាង​ខ្លាំង ដែល​បាន​​ប្រគល់​​ស្នាម​មេដៃ​ជាង​២លាន​​ជូន​​ការិយា​ល័យ​អង្គ​ការ​សហប្រជាជាតិ​ ហើយ​យើង​​សូម​សម្ដែង​ការ​​ដឹកគុណ​យ៉ាង​ជ្រាលជ្រៅ​ចំពោះ​​តំណាង​របស់​អង្គកា​សហប្រជាជាតិ​ ដែល​បាន​ទទួល​​យកស្នាម​មេដៃ​ទាំង​នោះ​”។ លោក​បាន​មានប្រសាសន៍​ទៀត​ថា “យើង​​បាន​ស្នើសុំ​​ឲ្យ​អង្គការ​សហប្រជាជាតិ​ជួយ​ស្វែង​រក​យុត្តិធម៌​ជូន​​ប្រជាពលរដ្ឋ​កម្ពុជា​ ដើម្បី​ធ្វើ​ឲ្យ​ប្រាកដ​ថា ​ឆន្ទៈ​​របស់​ប្រជា​ពល​រដ្ឋ​កម្ពុជា​​ត្រូវ​បាន​ទទួល​ស្គាល់​​ និង​ដើម្បី ​ធានា​ការពារ​កិច្ច​ព្រម​ព្រៀង​សន្ដិភាព​ទីក្រុង​​ប៉ារីស ឆ្នាំ​១៩៩១”។

បន្ទាប់​មក​​លោក​ សម រង្ស៊ី និង​លោក​ កឹម សុខា បាន​វិល​ត្រឡប់​ទៅ​ចំណុច​ប្រសព្វ​​នៃ​ផ្លូវ​លេខ​៥១​​នៅ​វេលាម៉ោង​​ប្រហែល៤ និង​៤៥​នាទី​​រសៀ​ល​ ដើម្បីទទួល​ការ​ស្វាគមន៍​​អប​អរ​​ពី​ក្រុម​​បាតុករ​ដែល​កំពុង​រង់​​ចាំ​ក្រោម​ការ​​យាម​កាម​ពី​​មន្ត្រី​យោធា​ និង​នគរ​បាល​បង្ក្រាប​បាតុ​កម្ម​មួយ​ក្រុមតូច។

នៅ​តាម​ផ្លូវ​ឆ្ពោះ​ទៅ​ទីលាន​ប្រជា​ធិ​ប​តេយ្យ​វិញ លោក​ សម រង្ស៊ី និង​លោក​ កឹម សុខា ​បាន​ដើរ​វាង​​​ឆ្ពោះ​ទៅ​របាំង​រាំង​ផ្លូវ​ ដែល​ត្រូវ​បាន​ដាក់​​នៅ​លើ​កំណាត់​​មហា​វិថី​ព្រះ​សីហនុ​ក្នុង​បំណង​រារាំង​អ្នក​ហែក្បួន​​មិន​ឲ្យ​​ធ្វើ​ដំណើរ​តាម​​ផ្លូវ​លេខ​៥១​ ហើយ​បាន​​ឆ្ពោះទៅ​វិមាន​ឯករាជ្យ​ និង​ភូមិ​គ្រឹះ​របស់​​លោក​នាយក​រដ្ឋ​មន្ត្រី​ ហ៊ុន សែន។

លើក​ដៃ​ឡើង​លើ​ ហើយ​ទះ​​ព្រម​ៗ​គ្នា​​ជា​កាយវិការ​ ដែល​បាន​ក្លាយ​ជា​និមិត្ត​រូប​​នៃ​សាមគ្គី​ភាព​របស់​គណបក្ស​ប្រឆាំង​ចាប់​តាំង​ពី​​ការ​​ច្របាច់​បញ្ចូល​គ្នា​​រវាង​​គណបក្ស​​ សម រង្ស៊ី និង​​គណបក្ស​សិទ្ធិ​មនុស្ស​ កាលពី​ខែ​កក្កដា ឆ្នាំ​២០១២​នោះ​ លោក​ សម រង្ស៊ី និង​លោក​ កឹម សុខា បាន​បញ្ចេញ​ស្នាម​ញញឹម​​ខណៈ​​ពេល​​​នគរបាល​​ស្លៀក​ពាក់​​ឯក​សណ្ឋាន​ការពារ​​ខ្លួន​រាប់​សិប​នាក់​​នៅ​ពីក្រោយ​។

បន្ទាប់​ពី​​ត្រឡប់​​ទៅ​ដល់​ទីលាន​ប្រជា​ធិ​ប​តេយ្យ​វិញ​នៅ​ម៉ោង​​៥និង​៣០​នាទី​​ជាង​ លោក​ សម រង្ស៊ី និង​លោក​ កឹម សុខា បាន​ស្វាគមន៍​​អ្នក​តវ៉ា​​ជា​ថ្មី​ម្ដង​ទៀត​ មុន​ពេល​​​បិទ​កម្មវិធី​​ហែក្បួន​​សម្រាប់​​ថ្ងៃ​ម្សិលមិញ​នេះ ។

​មុន​ពេល​សន្យា​​ចំពោះ​​ក្រុម​អ្នក​តវ៉ា​​ថា ​ប្រទេស​កម្ពុជា​​ ដែល​គ្រប់គ្រង​ដោយ​គណ​បក្ស​សង្គ្រោះ​ជាតិ​នឹង​​គ្មាន​អំពើ​ពុក​លួយ និង​​​ការ​ចាប់​យក​ដីធ្លី​ លោក​ សម រង្ស៊ី បាន​មាន​ប្រសាសន៍​ថា “អង្គការ​សហប្រជាជាតិ​​​​​​បាន​ទទួលយក​​ស្នាម​មេដៃ​ជាង​​២លាន​​ពី​ពួក​យើង​ ហើយ​យើង​នឹង​ទទួល​ជ័យ​ជម្នះ​​ នៅ​ពេល​យើង​​ប្រមូលបាន​ជាង​៣​លាន​”។

នៅ​មុន​ពេល​ហែក្បួន​​ លោក​ កឹម សុខា បាន​​​ផ្ដល់​កម្លាំង​ចិត្ត​ដល់អ្នក​​គាំទ្រ​​ជាង​២​ម៉ឺន​នាក់​នៅ​ទីលាន​ប្រជាធិបតេយ្យ​​​តាម​រយៈ​​ការ​ភ្ជាប់​​ខួប​​លើ​ក​ទី​២២ នៃ​ការ​ចុះ​កិច្ច​ព្រម​ព្រៀង​​សន្ដិភាព​ទីក្រុង​ប៉ារីស ឆ្នាំ​១៩៩១ ទៅ​នឹង​​ស្ថានភាព​នយោបាយ​នៅ​ក្នុង​ប្រទេស​​នា​ពេល​បច្ចុប្បន្ន​។

លោក​ កឹម សុខា បាន​សួរ​ទៅ​អ្នក​គំាទ្រ​ថា តើ​កម្ពុជា​​បាន​ក្លាយ​ជា​ប្រទេស​​មួយ​ ដែ​​ល​មាន​លទ្ធិ​ប្រជាធិបតេយ្យ​ ឯករាជ្យ​ និង​គ្មាន​ការ​ឈ្លាន​ពាន​ពី​សំណាក់​បរទេស​ហើយ​ឬ​នៅ​​ចាប់​តាំង​ពី​ឆ្នាំ ១៩៩១​មក​​ ដោយ​ពួក​គេ​បាន​ឆ្លើយ​​​យ៉ាង​មុត​មាំ​ថា “នៅ​ទេ!” ។ បន្ទាប់​មក​​លោក​ កឹម សុខា បាន​សួរ​​ក្រុម​អ្នក​គាំទ្រ​​ដោយ​ប្រើប្រាស់​ចម្លើយ​របស់​ខ្លួន​ ដើម្បី​ពន្យល់​ពី​ភាព​ចាំ​បាច់​​នៃ​ការ​ដាក់​ញត្តិ​ជូន​ទៅ​អង្គការ​សហប្រជាជាតិ​ថា “ពេល​ប្រទេស​ណា​មួយ​​​ដឹកនាំ​ដោយ​គណបក្ស​តែ​មួយ​ តើ​​ប្រទេសជាតិ​​នឹង​ទៅ​ជា​យ៉ាង​ណា​?។  ប្រសិន​បើ​យើង​មិន​ចង់​ឲ្យ​​បក្ស​តែ​មួយ​ដឹក​នាំទេ​នោះ​ យើង​ត្រូវ​តែ​ធ្វើ​បាតុកម្ម​ ដើម្បី​​មាន​​​មេដឹកនាំ​ច្រើន​បក្ស​​”។

លោក​ សម រង្ស៊ី​  ក៏​បាន​​មាន​​ប្រសាសន៍​ដែរ​អំពី​ការ​កែប្រែ​សេចក្ដី​សម្រេច​របស់​រដ្ឋាភិបាល ដែល​កាល​ពីមុន​​ធ្លាប់​បាន​លើក​ឡើង​ថា  គណបក្ស​សង្គ្រោះ​ជាតិ​ នឹង​មិន​ត្រូវអនុញ្ញាត​ឲ្យ​ហែ​ក្បួន​តាម​ដង​ផ្លូវ​។ លោក​បាន​មានប្រសាសន៍​ថា “គណបក្ស​ប្រជាជន​កម្ពុជា​មិន​​ចង់​ឲ្យ​យើង​ធ្វើ​បាតុកម្ម​ធំ​ដូច​នេះ​ទេ ពីព្រោះ​វា​បង្ហាញ​ពី​ឆន្ទៈ​របស់​ប្រជាពល​រដ្ឋ​” មុន​ពេល​​លោក​​ឆ្លៀត​ឱកាស​​និយាយ​ចម្អក​ឲ្យ​រដ្ឋាភិបាល​។ លោក​បាន​លើក​​ឡើង​ទៀត​ថា “សម្រាប់​គណបក្ស​ប្រជា​ជន​កម្ពុជា​ ពួក​គេ​មិន​អាច​ធ្វើ​បាតុកម្ម​ធំ​​បែប​នេះ​បាន​​ឡើយ​ ពួក​គេ​​​ធ្វើ​​មិន​ដូច​​យើង​ទេ”។

ថ្វី​បើបាតុកម្ម​​ និ​ងការ​ហែក្បួន​​បាន​ប្រព្រឹត្ត​ទៅ​យ៉ាង​រលូន​ និ​ងដោយ​សន្ដិ​វិធីក៏​ដោយ ​​ក៏​លោក​ ជួន សុ​វណ្ណ ស្នង​ការ​រាជធានី​ភ្នំពេញ​​បាន​​រិះគន់​ការ​ដោះស្រាយ​របស់​គណបក្ស​សង្គ្រោះ​ជាតិ​​នៅ​ក្នុង​ថ្ងៃ​នោះ ហើយ​បាន​អំពាវនាវ​ឲ្យ​ក្រុម​មេដឹកនាំ​បក្ស​​គោរព​​តាម​​កិច្ច​ព្រមព្រៀង​ ដែល​ពួក​លោក​បាន​​ធ្វើ​ជាមួយ​អាជ្ញាធរកាល​ពី​ថ្ងៃ​អង្គារ​។

លោក​ ជួន​ សុវណ្ណ​ បាន​មានប្រសាសន៍​​ដោយ​មិន​បញ្ជាក់​​ពី​កន្លែង​ ដែល​អ្នក​ហែ​ក្បួន​បាន​​​ហែ​​ខុស​ផ្លូវ​ថា​ “អ្វី​ដែល​យើង​​បាន​សង្កេត​ឃើញ​ និង​ដែល​បាន​ធ្វើ​ឲ្យ​យើង​ខក​ចិត្ត​ នោះ​គឺ​អនុប្រធាន​​ និង​ប្រធាន​​គណ​​បក្ស​នេះ​​មិន​អាច​គ្រប់គ្រង​​បាតុករ​បាន​ ហើយ​​បាន​បណ្តោយ​ឲ្យ​ពួក​គេ​ដើរ​ពាស​វាល​ពាស​កាល​អំឡុង​ពេលហែ​​​ក្បួន”។)

លោ​កបាន​មានប្រសាសន៍​ទៀត​ថា “នៅ​ក្នុង​កិច្ច​ប្រជុំ​នោះ​ យើង​ក៏​បាន​ស្នើ​សុំ​ឲ្យ​ពួក​គេ​ និង​សាលា​រាជធានី​ អនុញ្ញាត​​ឲ្យ​មាន​អ្នក​ហែ​ក្បួន​​ពី​១.០០០​នាក់​ទៅ​៥.០០០​នាក់​ ប៉ុន្តែ​ពេល​នេះ​​មាន​មនុស្ស​ប្រហែល​១០.០០០​នាក់​ ដែល​បាន​ហែក្បួន​ និងជា​ការ​ល្មើស​របស់​​ពួក​គេ​ ហើយ​វា​បង្ហាញថា ពួក​គេ​មិន​បាន​គោរព​​កិច្ច​ព្រម​ព្រៀង​នោះ​ឡើយ​”។​

គណបក្ស​សង្គ្រោះ​ជាតិ​​បាន​ជូន​ដំណឹង​ទៅ​សាលា​រាជធានី​ភ្នំពេញ​ កាល​ពី​ថ្ងៃ​ទី​១៧ ខែ​តុលាថា ខ្លួន​នឹង​ហែក្បួន​តាម​ផ្លូវ​នានា​ក្នុង​រាជធានី​ភ្នំពេញ​អំឡុង​មហាបាតុកម្ម​រយៈ​ពេល​បី​ថ្ងៃ​ជាប់ៗ​គ្នា​​ ជា​សេចក្ដី​សម្រេច​មួយ​ ដែល​អាជ្ញាធរ​​បាន​អះអាង​ថា ខុស​ច្បាប់​ រហូត​ដល់​​លោក​ ស ខេង​ រដ្ឋ​មន្ត្រី​ក្រសួង​មហាផ្ទៃ​បាន​​អន្តរាគមន៍​នៅ​នាទី​ចុង​ក្រោយ​​កាល​ពី​យប់​ថ្ងៃ​ច័ន្ទ​។ កាល​ពី​ថ្ងៃ​អង្គារ​​ក្រសួង​មហាផ្ទៃ​បាន​និយាយ​ថា ខ្លួន​នឹង​អនុញ្ញាត​ឲ្យ​មនុស្ស​១.០០០​នាក់​ ដើរ​ក្បួន​​តាម​ផ្លូវ​អំឡុង​បាតុកម្មរយៈ​ពេល​បី​ថ្ងៃ​នេះ​។

លោក​ សម រង្ស៊ី បានមានប្រសាសន៍​តាម​ទូរស័ព្ទ​ បន្ទាប់ពី​​បិទ​បាតុកម្ម​កាល​ពី​ម្សិល​មិញ​ថា លោក​បាន​និយាយ​ជាមួយ​លោក​ ស ខេង​ ទាំង​មុន​ និង​ក្រោយ​ពី​​ពេល​ហែ​ក្បួន​​ទៅ​កាន់​ការិយាល័យ​អង្គការ​សហប្រជា​ជាតិ​ ហើយ​ថា ទំនាក់​ទំនង​ជា​មួយ​អាជ្ញាធរ​នៅ​ល្អ​នៅ​ឡើយ​។ លោក​បាន​មានប្រសាសន៍​ថា “យើង​​ទាំង​ពីរ​ពេញ​ចិត្ត​​ ពីព្រោះ​គ្មាន​​អំពើ​ហិង្សា​។ លោក​ ស ខេង​ បាន​ប្រាប់​ខ្ញុំ​ថា គាត់​​បាន​​ណែ​នាំ​ឲ្យ​នគរ​បាល​​ធ្វើ​ការ​ហាត់​សម ដែល​ខ្ញុំ​​អាច​បញ្ជាក់​បាន​។ ហើយ​យើង​បាន​ប្រកាន់​ខ្ជាប់​នូវ​ក្រម​សីល​ធម៌​របស់​យើង​ និង​ការ​ព្រម​ព្រៀង​​របស់​យើង​ជាមួយ​អាជ្ញាធរ”។

លោក​ សម រង្ស៊ី បាន​មាន​ប្រសាសន៍​ទៀត​ថា មិន​ថាការ​ហែក្បួន​នេះ​ប្រព្រឹត្តទៅ​ដោយ​រលូន​ឬយ៉ាង​ណា​ទេ ក្ដី​បារម្ភ​របស់​ស្នង​ការ​រូប​នេះ​ចំពោះ​ចំនួន​អ្នក​ហែក្បួន​តាម​ផ្លូវ​គឺ​មិន​ត្រូវ​រឿង​ឡើយ​។ លោក​ សម រង្ស៊ី បាន​មានប្រសាសន៍​ថា “គាត់​ប្រាកដ​ជា​​យល់​ ខ្ញុំ​មិន​អាច​ដាក់​កំហិត​ចំនួន​​១.០០០​នាក់​បាន​ទេ។ អ្វី​ដែល​សំខាន់​គឺ​ថា ការ​ហែក្បួន​ដោយ​សន្ដិវិធី។ មិន​ថា ចំនួន​១.០០០​នាក់ ឬ​៥.០០០​នាក់​នោះ​ទេ វា​មិន​ជា​បញ្ហា​ឡើយ​”។

លោក​ ឡុង​ ឌីម៉ង់ អ្នក​នាំពាក្យ​សាលា​រាជ​ធានីភ្នំពេញ​បាន​មានប្រសាសន៍​ថា កិច្ច​ប្រជុំ​មួយ​ជាមួយ​តំណាង​​គណបក្ស​សង្គ្រោះ​ជាតិ​​កាល​ពី​យប់មិញ​នៅ​សាលា​រាជធានី​ គណ​បក្ស​​សង្គ្រោះ​ជាតិ​បាន​យល់​ព្រ​ម​កាត់​បន្ថយ​ចំនួន​អ្នក​​ហែ​ក្បួន​តាម​ផ្លូវ​នានា​អំឡុង​ការ​ហែក្បួន​ទៅ​កាន់​ស្ថានទូត​នានា​នៅ​ថ្ងៃ​នេះ និង​ថ្ងៃ​សុក្រ។

មហា​បាតុកម្ម​​រយៈ​ពេល​​បី​ថ្ងៃ​របស់​គណ​បក្ស​សង្គ្រោះ​ជាតិ​​ បាន​ឈាន​ចូល​ដល់​ថ្ងៃ​ទី​២ ហើយ​នៅ​ថ្ងៃ​នេះ។ លោក សម រង្ស៊ី និង​លោក​ កឹម សុខា នឹង​ដឹកនាំ​បាតុករ​ចេញ​ពី​ទីលាន​ប្រជាធិបតេយ្យ​ចាប់​ពី​ម៉ោង​៨​ព្រឹក​ឆ្ពោះ​ទៅ​ភាគ​ខាង​ជើង ដើម្បី​ប្រគល់​​លិខិត​ជូន​ដំណឹង​ស្ដី​ពី​ញត្តិ​ដាក់​ជូន​ការិយាល័យ​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​​ ទៅ​​ស្ថានទូត​សហរដ្ឋ​អាមេរិក​ ស្ថាន​ទូត​អង់គ្លេស​ និង​ស្ថាន​ទូត​បារាំង​។

លោក​ សម រង្ស៊ី បាន​មានប្រសាសន៍​ថា មនុស្ស​ប្រហែល​២.០០០​នាក់​បាន​​បោះ​តង់​នៅ​​​ទីលាន​ប្រជាធិបតេយ្យ​កាល​ពី​យប់​មិញ​ ទោះ​បី​ជា​សាលា​រាជធានី​លើក​ឡើង​ថា ការ​បោះ​តង់​​នៅ​ទីលាន​នេះ​ត្រូវ​បាន​ហាម​ឃាត់ក៏​ដោយ​៕

(ធ្វើ​សេចក្ដី​រាយការណ៍​ដោយ ឃី សុវុឌ្ឍី  Alex Willemyns ម៉ិច ដារ៉ា អូន ភាព​ Colin Meyn  ​និង Ben Woods)
ប្រែសម្រួលដោយ​ តែម សុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស