នគរបាលខេត្តបាត់ដំបងបានឲ្យដឹងថា រថយន្តទួរីសមួយគ្រឿងដឹកអ្នកកាសែត និងបុគ្គលិកកាកបាទក្រហមកម្ពុជាពីរាជធានីភ្នំពេញទៅកាន់តំបន់រងគ្រោះដោយសារទឹកជំនន់នៅខេត្តបាត់ដំបងបានបុករថយន្តក្រុងមួយគ្រឿងកាលពីរសៀលម្សិលមិញ ដោយបណ្ដាលឲ្យមនុស្សចំនួនពីរនាក់ស្លាប់ និងយ៉ាងតិចណាស់ពីរនាក់ផ្សេងទៀតរងរបួសធ្ងន់។
អ្នកកាសែតបីនាក់ និងបុគ្គលិកកាកបាទក្រហមចំនួនបួននាក់បានជិះរថយន្តទួរីសមួយគ្រឿងទៅកាន់ឃុំតាគ្រាម ស្រុកបាណន់ ជាកន្លែង ដែលលោកស្រី ប៊ុន រ៉ានី ប្រធានកាកបាតក្រហមកម្ពុជា និងជាភរិយារបស់លោកនាយករដ្ឋមន្ត្រី ហ៊ុន សែន គ្រោងនឹងផ្ដល់ជំនួយឲ្យជនរងគ្រោះដោយសារទឹកជំនន់នៅថ្ងៃនេះ។
លោក សាត គឹមសាន នាយការិយាល័យនគរបាលចរាចរខេត្តបាត់ដំបងបានមានប្រសាសន៍ថា “បុរសចំនួនពីរនាក់ ដែលអង្គុយផ្នែកខាងមុខបានស្លាប់ ហើយប្រាំនាក់ផ្សេងទៀតបានរងរបួសនៅពេលរថយន្តរបស់ពួកគេបុករថយន្តក្រុងរបស់ក្រុមហ៊ុនកាពីតូល ពីក្រោយ”។
លោក សៀក ភា អធិការរងនគរបាលស្រុកមោងប្ញស្សី ជាទីដែលគ្រោះថ្នាក់ចរាចរណ៍នេះកើតឡើងបានលើកឡើងថា វាទំនងជាកំហុសរបស់អ្នកបើកបររថយន្តទួរីស ព្រោះចង់ជែងរថយន្តក្រុងរបស់ក្រុមហ៊ុនកាពីតូល ប៉ុន្តែបន្ទាប់មកបានព្យាយាមកាច់ចង្កូតត្រឡប់មកវិញនៅពេលឃើញរថយន្តធុនធំមួយគ្រឿងមកពីមុខ។ លោក សៀក ភា បានមានប្រសាសន៍ថា “នេះជាមូលហេតុដែលរថយន្តទួរីសបុករថយន្តក្រុង”។
លោក សុខ វិចិត្រ អ្នកបើកបររថយន្តទួរីស និងជាបុគ្គលិកកាកបាទក្រហមកម្ពុជា និង លោក ទី អ៊ុយសុង អ្នកកាសែតកោះសន្ដិភាពបានស្លាប់នៅនឹងកន្លែង រីឯលោក ស្រូយ នីកា អ្នកកាសែតរស្មីកម្ពុជា និងលោក ប៊ុន រ៉ា អ្នកថតរូបនៅស្ថានីយទូរទស្សន៍ ហង្សមាស បានរងរបួសធ្ងន់ ហើយកំពុងសម្រាកព្យាបាលនៅក្នុងមន្ទីរពេទ្យ នេះបើយោងតាមលោក មាស រិទ្ធី ដែលជាសហការីរបស់លោក ប៊ុន រ៉ា។
យោងតាមនគរបាលខេត្តពោធិ៍សាត់បានឲ្យដឹងថា នៅក្នុងេហតុការណ៍គ្រោះថ្នាក់ចរាចរណ៍មួយដាច់ដោយឡែកផ្សេងទៀត ស្ត្រីម្នាក់បានស្លាប់ និងបីនាក់ផ្សេងទៀតបានរងរបួសធ្ងន់នៅពេលរថយន្តក្រុងដឹកអ្នកដំណើររបស់ក្រុមហ៊ុនរិទ្ធមុនី បានក្រឡាប់ដោយសារបែកកង់នៅក្នុងស្រុកក្រគរ ខេត្តពោធិ៍សាត់។
លោក ថេត សុវណ្ណធី នាយរងប៉ុស្ដិ៍ឃុំអន្សាចំបក់ កន្លែងដែលរថយន្តក្រុងក្រឡាប់បានលើកឡើងថា “ស្ត្រីអាយុ២៤ឆ្នាំម្នាក់ ឈ្មោះ ស្រី លីស ត្រូវរថយន្តក្រុងសង្កត់លើ ហើយស្លាប់ភ្លាមៗ”។ នៅពេលត្រូវបានសួរថា តើគ្រួសារជនរងគ្រោះនឹងទទួលបានប្រាក់សំណងឬក៏អត់ លោក សំ វិចិត្រ ជំនួយការប្រធានក្រុមហ៊ុនដឹកជញ្ជូនរិទ្ធមុនី បានលើកឡើងថា ក្រុមហ៊ុនរបស់លោកមិនមែនជាអ្នកទទួលខុសត្រូវទេ។ លោកបានមានប្រសាសន៍ថា “ពីព្រោះយើងបានទិញធានារ៉ាប់រងពី [ក្រុមហ៊ុនធានារ៉ាប់រងជាតិកម្ពុជា] កាំមីនកូ ក្រុមហ៊ុននេះទទួលខុសត្រូវទាំងស្រុងនៅពេលហេតុការណ៍បែបនេះកើតឡើង”។
កាលពីឆ្នាំមុនមានគ្រោះថ្នាក់ចរាចរណ៍ធ្ងន់ៗជាច្រើនដោយសាររថយន្តក្រុង រួមមានគ្រោះថ្នាក់បីលើកគ្រាន់តែក្នុងមួយខែ ដែលបង្កឡើងដោយរថយន្តក្រុងរិទ្ធមុនី និងរថយន្តរបស់ក្រុមហ៊ុនដៃគូខ្លួន គឺក្រុមហ៊ុនប៉ារ៉ាម៉ោន អង្គរអ៊ិចប្រេស (Paramount Angkor Express) ដោយមូលហេតុនេះបានធ្វើឲ្យក្រសួងសាធារណការនិងដឹកជញ្ជូនចេញសេចក្ដីប្រកាសថា រថយន្តក្រុងរបស់ក្រុមហ៊ុនណា ដែលបើកលើសល្បឿន បំពានច្បាប់ចរាចរណ៍ ឬក៏បង្ករបួសស្នាមដល់អ្នកដំណើរអាចនឹងប្រឈមការបាត់បង់អាជ្ញាប័ណ្ណ ប្រសិនបើបង្កឲ្យមានគ្រោះថ្នាក់ចំនួនបីលើកនោះ។
ប៉ុន្តែក្រុមហ៊ុនដឹកជញ្ជូនប៉ារ៉ាម៉ោន អង្គរអ៊ិចប្រេស និងក្រុមហ៊ុនរិទ្ធមុនី បានបង្កឲ្យមានគ្រោះថ្នាក់លើសពីបីលើករួចទៅហើយ តែអាជ្ញាប័ណ្ណរបស់ពួកគេគ្មាននរណាដកឡើយ៕
ប្រែសម្រួលដោយ ស៊ា ស៊ុយឈាង