33 C
Phnom Penh

ឈ្មោះ​ស្ទួនទាំង​អស់​មិន​បានលប់​ចេញ​ពី​បញ្ជី​ចុះ​ឈ្មោះ​អ្នក​បោះ​ឆ្នោត​ថ្មីនោះ​ទេ​

ដោយ ឌឹ ខេមបូឌា ដេលី

បទវិភាគ

កាល​ពីម្សិល​មិញ គណៈកម្មាធិការ​ជាតិ​រៀប​ចំការបោះឆ្នោត​ហៅកាត់​ថា គ.ជ.ប.​បាន​ឈាន​ដល់​ពេល​វេលា​ចុងក្រោយ​បំផុត​​សម្រាប់​ការ​ចុះឈ្មោះ​អ្នក​បោះ​ឆ្នោត​ផ្លូវ​ការ​ប​​ន្ទាប់ពីបាន​ចំណាយ​ពេល​២០​ថ្ងៃ​សម្រាប់​បំពេញកិច្ចការងារនេះ ហើយ​បាន​ឃើញ​ថា មានប្រជាជនជាង​១៧០.០០០នាក់​​បន្ថែម​ទៀត​ បានទៅ​ចុះ​ឈ្មោះ និង​ចំនួន​​​ឈ្មោះ​ជិត​១០​០.​​០០០នាក់​​ត្រូ​វបាន​កាត់​ចេញ​ពី​បញ្ជី​។

បញ្ជីឈ្មោះ​អ្នក​បោះឆ្នោត​នេះ​រង​ការ​រិះ​គន់​ខ្លាំង​ៗពីសំណាក់​ក្រុមអ្នកសង្កេតការណ៍​បោះ​ឆ្នោត​ ដែលបាន​លើកឡើង​ថា ការ​ចុះ​បញ្ជី​នេះ​ភាគ​ច្រើន​ចុះ​​ដោយ​ដៃ​ គឺ​ជា​មូល​ហេតុ​ដែលនាំ​ឲ្យ​ឈ្មោះ​ប្រជាជន​ជាច្រើ​ន​បាត់​ដោយ​​សារ​បញ្ហា​ខុស​ឆ្គង​​ពី​បញ្ជី​នៅ​ថ្ងៃ​បោះ​ឆ្នោត​ក្នុង​ខែ​កក្កដា។

លោក ទេព នីថា អគ្គលេខាធិការ​គណៈ​កម្មាធិការជាតិ​រៀបចំការ​បោះឆ្នោត​ បាន​មាន​ប្រសាសន៍ថា “មាន​ឈ្មោះអ្នកបោះ​​​ឆ្នោត​​​​ចំនួន​១៧​៤​.​១០៥​នាក់​ត្រូវ​បាន​ចុះ​បន្ថែម​ និងឈ្មោះ​៩៨.៤៦៨នាក់​ត្រូវ​បាន​លប់​ចេញ​ពី​បញ្ជី​ឈ្មោះអ្នកបោះឆ្នោត​នៅក្នុង​ឃុំ​ចំនួន​១.៦​១​៦​​ក្នុង​ចំណោម​ឃុំ​ចំនួន​១.៦៣៣​នៅ​ទូ​ទាំង​ប្រទេស​”។

បើ​ទោះ​ជា​ឈ្មោះជិត​១០០.០០០​នាក​់​ត្រូវ​បាន​លប់​ចេញ​ពី​បញ្ជី​ឈ្មោះអ្នក​បោះ​ឆ្នោត​ក៏​ដោយ​ ក៏​ចំនួនឈ្មោះអ្នក​បោះឆ្នោត​នៅ​តែ​ខុស​គ្នា​ឆ្ងាយ​ពី​ចំនួន​ឈ្មោះ​អ្នក​បោះ​ឆ្នោត​​២៧០.០០០នាក់ ដែល​គណៈ​កម្មា​ធិការ​ជាតិ​រៀបចំការ​បោះឆ្នោត​សារ​ភាព​ថា ជាឈ្មោះស្ទួ​ន​​នៅក្នុងបញ្ជីនេះ។ គ.ជ.ប.​ដើមឡើយ​ក៏​បាន​ប៉ាន់​ប្រមាណ​កាល​ពីដើម​ខែ​តុលាថា ប្រជាជន​ប្រហែល​៣៣៧.០០០នាក់​បន្ថែម​ទៀត​នឹង​ចុះឈ្មោះ​បោះឆ្នោត។

លោក​ ទេព​ នីថា បាន​ឲ្យ​ដឹង​ថា “គ.ជ.ប.​បាន​ប៉ាន់​ប្រមាណ​ថា នឹង​មាន ‘ឈ្មោះ​ខ្មោច​’ ២០០.០០០នាក់ ត្រូវ​បាន​លប់​ចេញ​នៅ​ឆ្នាំ​នេះ ក៏​ប៉ុន្តែ សម្រាប់​រយៈ​ពេល​២០​ថ្ងៃនៃ​ការ​ចុះ​ឈ្មោះ​ គ.ជ.ប.​បាន​លប់​ឈ្មោះ​ចំនួន​៩៨.៤៦៨​នាក់​ ពីព្រោះការ​លប់​ឈ្មោះ​ប្រជាជន​ដែល​ស្លាប់​ទៅ​ ងាយស្រួល​ជាង​ការលប់​ឈ្មោះ​អ្នក​ដែល​ផ្លាស់ទីលំនៅ​ ឬក៏​ឈ្មោះ​ស្ទួន​​”។ លោក​បាន​​ពន្យល់​អំពីការ​ធ្លាក់​ចុះ​នៃ​ឈ្មោះ​ដែល​ត្រូវ​​លប់​ចេញពី​បញ្ជីឈ្មោះ​អ្នក​បោះឆ្នោត​។

លោក​បានមាន​ប្រសាសន៍ថា “គ.ជ.ប.​ នឹង​លប់​ [ ឈ្មោះ​ស្ទួន] នៅ​ពេល​ដែល​ខ្លួន​មាន​ឯកសារ​គ្រប់​គ្រាន់​” នៅ​ជុំ​បន្ទាប់​​នៃ​ការ​ចុះ​ឈ្មោះ​បោះ​ឆ្នោត ​ក្នុង​ពេលណា​​មួយ​ក្នុង​ឆ្នាំ​នេះ។ លោក​បន្ថែម​ថា  មូលហេតុ​​ដែល ​មាន​​ការ​ចុះ​ឈ្មោះ​បាន​តិច​ គឺ​ដោយ​សារ​ទឹក​ជំនន់​មាននៅច្រើនតំបន់។លោក​​ថ្លែង​ថា ដើម្បី​ធ្វើ​ដូច្នេះ អ្នក​ដែល​សង្ស័យ​ថា ខ្លួន​មាន​ឈ្មោះ​ស្ទួន​​ត្រូវ​តែ​រាយការណ៍​អំពី​បញ្ហា​នេះ​ទៅ​ការិយាល័យ​ឃុំ-សង្កាត់​របស់​ខ្លួន ​មុន​ពេល​គណៈកម្មាធិ​​ការ​រៀប​ចំ​ការ​បោះឆ្នោត​ឃុំ​​​​​សង្កាត់​អា​ច​លប់​ឈ្មោះ​គេ​ចេញ​។

គណបក្ស​សង្គ្រោះជាតិ​បាន​អះអាង​ថា ឈ្មោះស្ទួន​ និង​ការលប់​ឈ្មោះ​ខុស​នៅ​ក្នុង​បញ្ជីឈ្មោះ​ មាន​ន័យ​ថា មនុស្ស​យ៉ាង​តិច​១​លាន​នាក់​បាត់សិទ្ធិ​អំឡុង​ពេល​បោះឆ្នោត​។

លោក​ សម រង្ស៊ី មេដឹកនាំ​គណបក្ស​សង្គ្រោះ​ជាតិ​ បាន​ចុះ​ឈ្មោះ​ កាល​ពីថ្ងៃទី​៧ ខែ​តុលា​ បន្ទាប់​ពីឈ្មោះ​របស់លោក​ត្រូវ​បាន​លុបចេញ​ពីបញ្ជីឈ្មោះ​កាល​ពីដើម​ឆ្នាំ​នេះ​ ដោយសារ​តែ​លោក​ជាប់ទោស​ព្រហ្មទណ្ឌ​តាម​ការ​ចោទ​ប្រកាន់​​ ដែលមជ្ឈដ្ឋានជា​ច្រើន ​ជឿ​ថា​ ជារឿង​នយោបាយ​៕

ប្រែ​​​សម្រួល​​​ដោយ ចេវ ប៊ុននី

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស