30 C
Phnom Penh

គណបក្ស​ប្រឆាំង​ដាក់​ញត្តិ​ជូន​ស្ថានទូត​​ចំនួនបី​  ខណៈ​បាតុករ​ថយចុះ​

ដោយ ឌឹ ខេមបូឌា ដេលី

បទវិភាគ

​​កាល​ពី​ម្សិលមិញ​ លោក​ សម រង្ស៊ី និង​​លោក​ កឹម សុខា មេដឹកនាំ​គណបក្ស​ប្រឆាំង​បាន​ដឹកនាំ​អ្នក​គាំទ្រ​​ជាង​១.០០០​នាក់​ ​ហែ​ក្បួន​ដើម្បី​ដាក់​ញត្តិ​ជូន​​​ស្ថានទូត​​បារំាង ​ ស្ថានទូត​អង់​គ្លេស​ និង​ស្ថានទូត​សហរដ្ឋ​អាមេរិក​ មុន​ពេល​​​បោះតង់​ស្នាក់​នៅ​​ក្នុង​ថ្ងៃ​ទី​២ នៃ​មហា​បាតុ​កម្ម​របស់​គណបក្ស​សង្គ្រោះ​ជាតិ​នៅ​ទីលាន​ប្រជាធិបតេយ្យ​ ដែល​មាន​ចំនួន​អ្នក​គំាទ្រ​​ចូល​រួម​តិច​ជាង​​ឆ្ងាយ​បើ​ប្រៀប​ធៀប​ទៅ​កាល​ពី​ថ្ងៃ​ពុធ​ នៅ​ពេល​ល្ងាច​មាន​មនុស្ស​ច្រើន​បំផុត​ត្រឹម​ប្រហែល​៧.០០០​នាក់​​ប៉ុណ្ណោះ​។

លោក​ នីកូឡាស បូឌុង លេខាទី១ប្រចាំស្ថានទូត​បារាំង​​រង​់ចាំ​ទទួល​ស្វាគមន៍​លោក​​ សម រង្ស៊ី ក្នុង​រាជធានីភ្នំពេញ​កាល​ពី​ម្សិលមិញ​។ Ben Woods/The Cambodia daily
លោក​ នីកូឡាស បូឌុង លេខាទី១ប្រចាំស្ថានទូត​បារាំង​​រង​់ចាំ​ទទួល​ស្វាគមន៍​លោក​​ សម រង្ស៊ី ក្នុង​រាជធានីភ្នំពេញ​កាល​ពី​ម្សិលមិញ​។ Ben Woods/The Cambodia daily

នៅ​វេលាម៉ោង​ប្រហែល​៩​ព្រឹក​ លោក​ កឹម សុខា បាន​ថ្លែង​​សុន្ទរកថា​យ៉ាង​ខ្លី​ទៅ​កាន់​ក្រុម​អ្នក​គាំទ្រ​របស់​គណបក្សសង្គ្រោះ​ជាតិ​​នៅ​ទី​លាន​ប្រជាធិបតេយ្យ​​ ដែល​ភាគ​ច្រើន​ក្នុង​ចំណោម​អ្នក​គាំទ្រ​ទាំង​​នោះមក​​ពី​បណ្តា​ខេត្ត ដែល​បាន​បោះ​តង់​ស្នាក់​នៅ​ទីលាន​​ប្រជា​ធិបតេយ្យ​នៅ​ពេល​យប់​ រួច​បាន​ចាប់​ផ្ដើម​​​ហែ​ក្បួន​ឆ្ពោះ​​ទៅ​កាន់​​ស្ថានទូត​បារាំង ​​ដោយ​នៅ​ទី​នោះ​បាន​ជួប​ជាមួយ​អ្នក​គាំទ្រ​​មួយ​ក្រុម​ទៀត​ដែល​កំពុង​រង់​ចាំ​លោក​ សម រង្ស៊ី នៅ​ខាង​មុខ​ស្ថានទូត​នេះ។ ​មេដឹក​នាំ​គណបក្ស​សង្គ្រោះ​ជាតិបួន​រូប​​​បាន​ចូល​​ទៅ​ខាង​​ក្នុង​ស្ថានទូត​ ដើម្បីជួប​ពិភាក្សា​​គ្នា​មួយ​​ស្របក់​​​​ជាមួយ​ឯ​កអគ្គ​រដ្ឋ​ទូត​បារាំង​ សឺ​ហ្សេ ម៉ូស្ទូរ៉ា (Serge Mostura) និង​ដើម្បី​​ដាក់​ញត្តិ​ ដែល​មាន​​ស្នាម​មេដៃ​ប្រជា​ពលរដ្ឋ​ជាង​២​លាន​​ ដើម្បីអំពាវ​នាវ​ឲ្យ​បណ្ដា​ប្រទេស​​ជា​ម្ចាស់​​ហត្ថ​លេខី​នៃ​កិច្ច​​ព្រម​ព្រៀង​​​សន្ដិភាព​​ទីក្រុង​ប៉ារីស ឆ្នាំ​​១៩៩១ ​​ធ្វើ​តាម​ការ​ប្ដេជ្ញា​ចិត្ត​របស់​​ខ្លួន​ក្នុង​ការ​ធានា​ឲ្យ​​មាន​លទ្ធិ​ប្រជា​ធិប​តេយ្យ​សេរី​ពហុបក្ស​នៅ​កម្ពុជា។

លោក​ នីកូឡាស បូឌុង (Nicolas Baudouin) លេខាទី១​ប្រចាំ​ស្ថានទូត​បារំាង​​បាន​​មាន​ប្រសា​សន៍​​ថា “ថ្ងៃ​នេះឯក​​​អគ្គរដ្ឋទូត​របស់​យើង​បាន​​ជួប​​ពិភាក្សា​គ្នា​​មួយ​​ស្របក់​​ជាមួយ​​គណៈ​ប្រតិភូ​នៃ​គណបក្ស​សង្គ្រោះ​ជាតិ​​ ជុំ​វិញ​​ការ​បន្ត​ចរចា​​រវាង​គណបក្ស​នយោបាយ​​នៅ​ក្នុង​ប្រទេស​កម្ពុជា​”។

លោក​ សម រង្ស៊ី បាន​ធ្វើ​ដំណើ​រ​ទៅ​​កាន់​ទីក្រុង​ប៉ារីស​កាល​ពី​​សប្ដាហ៍​មុន​ ដើម្បី​ជួប​ជាមួយ​មន្ត្រី​រដ្ឋាភិបាលបារំាង​​​ជា​ផ្នែក​នៃ​​ដំណើរ​​ទស្សន​កិច្ច​​ជា​អន្តរជាតិ​របស់​លោក​ ដើម្បី​​ជំរុញ​​ឲ្យ​ប្រទេស​នានា​កាត់​ផ្ដាច់​​ទំនាក់​ទំនង​ជាមួយ​​រដ្ឋាភិបាល​​គណបក្ស​ប្រជា​ជន​កម្ពុជា ​របស់​លោក​នាយក​រដ្ឋ​មន្ត្រី​ ហ៊ុន សែន។ តែ​​ទោះ​ជាយ៉ាង​ណា​ នាយក​រដ្ឋ​មន្ត្រី​បារំាង​ លោក ហ្សង់​ ម៉ាក ​អាយរ៉ូល​ (Jean-Marc Ayrault) បាន​​ផ្ញើ​លិខិត​​មួយ​ច្បាប់​​​ជូន​លោក​​នាយក​រដ្ឋ​មន្ត្រី​ ហ៊ុន​ សែន​ កាល​ពី​ថ្ងៃ​​ទី​១៣ ខែ​តុលា​ ដើម្បី​អប​អរ​​សាទរ​​ចំពោះ​​ជ័យ​ជម្នះ​​របស់​​លោក​​​នៅ​ក្នុង​ការ​បោះឆ្នោត​។

ញត្តិ​របស់​គណបក្ស​សង្គ្រោះ​ជាតិ​​​​អំពាវ​នាវ​ឲ្យ​​រដ្ឋាភិបាល​​​នៃ​បណ្ដា​ប្រទេស​ ដែល​បាន​ចុះ​កិច្ច​ព្រម​ព្រៀង​សន្ដិភាព​ទីក្រុង​ប៉ារីស​ឆ្នាំ​១៩៩១​នេះ​ “ធានាឲ្យ​មាន​ការ​​អនុវត្ត​” តាម​កិច្ច​ព្រម​ព្រៀង​សន្ដិភាព​នេះ​​ ប៉ុន្តែ​មិន​បញ្ជាក់​​ថា តើ​​កិច្ច​ព្រមព្រៀង​នេះ​​​គួរ​តែ​​សម្រេច​​បាន​សមិទ្ធ​ផល​​​បែប​ណា​ខ្លះ​​នោះ​ឡើយ​​។ កាល​ពី​លើក​មុន លោក​ សម រង្ស៊ី ធ្លាប់​បាន​​​ស្នើសុំឲ្យ​​អន្តរ​ជាតិគំរាម​​កាត់​ផ្ដាច់​ជំនួយ​ ឬ​​ដាក់​ទណ្ឌកម្ម​​លើ​ប្រទេសកម្ពុជា។

ញត្តិ​នេះ​មាន​​ខ្លឹមសារ​​ដូច្នេះ​ថា “យើង​​​សូម​​ស្វែង​រក​ជំនួយ​​របស់​​អ្នក​​នៅ​ក្នុង​ការ​​ដោះ​ស្រាយ​ស្ថានភាព​​នយោបាយ​ជាប់​​គាំង​​នា​ពេល​បច្ចុប្បន្ន​ តាម​រយៈ​ការ​​ធានា​ឲ្យ​មាន​ការ​​​អនុវត្ត​តាម​កិច្ច​ព្រម​ព្រៀងសន្ដិភាព​ទីក្រុង​ប៉ារីស​ ដែល​ជា​មូលដ្ឋាន​ស្នូល​សម្រាប់​លទ្ធិ​ប្រជាធិបតេយ្យ​សេរី​ពហុបក្ស​ និ​ងការ​​អភិ​វឌ្ឍ​សម្រាប់​ប្រទេស​របស់​យើង​”។

កន្លែង​ឈប់​សំចត​​ទី​២នៅ​ក្នុង​ការ​ហែក្បួន​របស់​គណបក្ស​សង្គ្រោះ​ជាតិ​​កាល​ពី​ម្សិល​មិញ​​ គឺស្ថានទូត​អង់គ្លេស​ ដោយ​នៅ​​ទីនោះ​ក្រុម​តំណាង​បក្សត្រូវ​នាំ​ចូល​ទៅ​ខាង​ក្នុង​ស្ថានទូត ខណៈពេល​ក្រុម​អ្នក​គាំ​ទ្រ​​របស់​ពួក​គេ​រង់​ចាំ​នៅ​ខាង​ក្រៅ​។

លោក​ ប្រ៊ីយ៉ូនី ម៉ាត់ស៊ូ (Bryony Mathew) អនុប្រធាន​បេសកកម្ម​​នៅ​ស្ថានទូត​អង់គ្លេស​គ្រាន់​តែ​បាន​មានប្រសាសន៍​ថា “យើង​​បាន​ទទួល​យក​ញត្តិ​ ហើយ​បាន​សន្ទនា​គ្នា​មួយ​ភ្លែត​​” ប៉ុណ្ណោះ​។ លោក​បាន​បដិសេធ​​មិន​​​លើក​ឡើង​​ថា តើ​អ្នក​ណា​​ជា​អ្នក​ជួប​ជាមួយ​​គណៈប្រតិភូ​គណបក្ស​សង្គ្រោះ​ជាតិ​ ដែល​មាន​សមាសភាព​ដូច​ជា​លោក​ សម រង្ស៊ី លោក​ កឹម សុខា លោក​ យ៉ែម បុញ្ញរិទ្ធ​ តំណាង​​រាស្ត្រ​ជាប់​ឆ្នោត​ កែម មនោ​វិទ្យា​ ជា​​សមាជិក​​គណៈ​កម្មាធិការ​អចិន្ត្រៃយ៍​របស់​គណបក្ស​សង្គ្រោះ​ជាតិ​ និង​កូន​ស្រី​របស់​លោក​ កឹម សុខា។

បន្ទាប់ពី​មាន​ការ​បិទកំណាត់​​​មហា​វិថី​មុនី​វង្ស ដោយសារ​​ការ​ហែក្បួន​របស់​ពួក​គេ​នោះ​ គណបក្ស​សង្គ្រោះ​ជាតិ​បាន​​ឈប់​សំចត​​ចុង​ក្រោយ​គេ​បង្អស់​នៅ​ស្ថាន​ទូត​សហរដ្ឋ​អាមេ​រិក​ ដោយ​នៅ​ទីនោះ​មេដឹក​នាំ​គណបក្ស​សង្គ្រោះ​​ជាតិ​​​បាន​ជួប​គ្នា​​​លើ​ចិញ្ចើម​​ផ្លូវ​ក្រៅ​ស្ថានទូត​ ហើយ​បាន​ប្រគល់​ញត្តិ​​ឲ្យ​មន្ត្រី​សន្ដិសុខ​ម្នាក់​​បម្រើ​ការងារ​នៅ​ទីនោះ​​ ដែល​បាន​ចេញ​មក​​ចាប់ដៃ​ស្វាគមន៍​ ហើយ​បាន​​ដើរ​​ចូល​ក្នុង​បរិវេណ​ស្ថាន​ទូត​វិញ​យ៉ាង​ប្រញាប់​។

លោក​ សៀន ម៉ាគិនតូស​ ​អ្នក​​នាំពាក្យ​ស្ថានទូត​អាមេរិក​បាន​លើក​ឡើ​ង​នៅ​ក្នុង​អ៊ីម៉េល​មួយ​ថា “មន្ត្រី​សន្តិសុខ​​ម្នាក់របស់​ស្ថានទូត​​សហរដ្ឋ​អាមេរិក​​បាន​ទទួល​យក​ញត្តិ​នោះ​។ ដូច​យើង​តែង​តែ​បាន​លើក​​ឡើង​អី​ចឹង​ គឺ​សហរដ្ឋ​អាមេរិក​ជំរុញ​ឲ្យ​​គណ​បក្ស​ទាំង​ពីរ​ស្វែង​រក​ដំណោះស្រាយ​​នៅ​​ក្នុង​វិវាទ​​បោះឆ្នោត​​តាម​រយៈ​​ការ​ចរចា ដែល​​ជំរុញ​ឲ្យ​មាន​កំណែ​ទម្រង់​”។

រដ្ឋាភិបាល​​សហរដ្ឋ​អាមេរិក​ និ​ង​រដ្ឋាភិ​បាល​អង់គ្លេស​មិន​ទាន់​​អប​អរ​សាទរ​ជា​ផ្លូវ​ការ​​ចំពោះ​ជ័យ​ជម្នះ​​នៃ​ការ​បោះឆ្នោ​តរបស់​លោក​ ហ៊ុន​ សែន​ នៅ​ឡើយ​ទេ​។
បន្ទាប់ពី​​ដាក់​ញត្តិ​​ជូន​​ស្ថានទូត​នានា​រួច​ លោក សម រង្ស៊ី បាន​ថ្លែង​ទៅ​​កាន់​អ្នក​ហែក្បួន​​តាម​​ឧគ្ឃោសនស័ព្ទ​។​ លោក​បាន​​មានប្រសាសន៍​នៅ​ខាង​ក្រៅ​ស្ថាន​ទូត​សហរដ្ឋ​អាមេរិក​​ថា “ជំហរ​របស់​​សហ​​រដ្ឋអាមេរិក​ គឺ​មាន​សារៈ​សំខាន់​បំផុត​​នៅ​ពេល​​នេះ​ ពីព្រោះ​​ពួក​គេ​បាន​​​ស្នើ​សុំ​​ឲ្យ​មាន​​ការ​ស៊ើប​​អង្កេត​ឯក​រាជ​្យ​ដើម្បី​លាត​ត្រដាង​ការពិត​ និង​​ដើម្បី​ដោះ​ស្រាយ​ភាព​មិន​ប្រក្រតី​”។

អំឡុង​ពេ​ល​ហែក្បួន​ទាំង​មូល​ គេ​ឃើញ​​មាន​វត្តមាន​នគរបាល​​តិច​តួច​ប៉ុណ្ណោះ​ គឺ​តិច​ជាង​​កាល​ពី​ថ្ងៃ​ពុធ​ទៅ​ទៀត​ ហើយ​ក្រុម​អ្នក​​គាំទ្រ​​គណបក្ស​សង្គ្រោះ​ជាតិ​​​បាន​​​ដើរ​ហែ​ក្បួន​​​ដោយ​​គ្មាន​ការរារាំង​​រំខាន​​ពី​​សំណាក់​សមត្ថ​កិច្ច​ឡើយ​។ ពេល​ត្រឡប់​ទៅ​​ទី​លាន​ប្រជាធិបតេយ្យ​វិញ​ លោក​ សម រង្ស៊ី និង​លោក​ កឹម សុខា​ បាន​​ថ្លែង​​យ៉ាង​ខ្លី​ទៅ​កាន់​អ្នក​គាំទ្រ ហើយ​បាន​​លើក​ឡើង​ថា ពួក​លោក​​នឹង​ត្រឡប់​មក​វិញ​​នៅ​ពេល​រសៀល​ ដើម្បី​ស្ដាប់​អ្នក​គាំទ្រ​​បង្ហាញពី​​ក្ដី​សង្ឃឹម​របស់​​ខ្លួន​ចំពោះ​គណបក្ស​សង្គ្រោះ​ជាតិ​ និ​ង​ការ​​ប្ដឹង​តវ៉ា​ប្រឆាំង​​នឹង​រដ្ឋាភិបាល​​​របស់​លោក​ ហ៊ុន សែន​។

នៅ​ពេល​ពេញ​មួយ​រសៀល​ អ្នក​គាំទ្រ​ប្រហែលពីរបី​ពាន់​នាក់​បាន​ស្នាក់​នៅ​ទីលាន​ប្រជាធិបតេយ្យ​ ដោយ​ពួក​គេ​​ភាគ​ច្រើន​​ចូល​​ជ្រក​ក្រោម​តង់​ដ៏​ធំ​ ខណៈ​ពេល​​អ្នក​គាំទ្រ​​​គណបក្ស​សង្គ្រោះ​ជាតិ​​មក​ពី​ទូទាំង​ប្រទេស​​​ឡើង​លើ​ឆាក​​។ សកម្មភាព​ផ្សេង​ៗ​ទៀត​​​រួម​មាន​ដូច​ជា​ការ​ច្រៀង​រាំ​របស់​​​តារា​ចម្រៀង​ និង​​សម្តែង​​សៀក​រហ័សកម្ម​លេប​​ផ្លែ​ឡាម​​ ហើយ​ខ្ជាក់​មក​វិញ​សម្រាប់​​អ្នក​គំាទ្រ​​ទស្សនា​​​កម្សាន្ត​​ជា​ដើម។

កាល​ពី​​រសៀល​​ម្សិលមិញ​ ចំនួន​អ្នក​គាំទ្រ​​ច្រើន​បំផុត​ គឺ​​តិច​ជាង​ពាក់​កណ្ដាល​​នៃ​ចំនួន​​បាតុករ​ចូល​រួម​​កាល​ពី​​ថ្ងៃ​ពុធ​ ដែល​មាន​អ្នក​គាំទ្រ​គណបក្សសង្គ្រោះ​ជាតិ​ជាង​២០.០០​០​នាក់​​បាន​ចេញ​មក​​ធ្វើ​ការ​តវ៉ា ​ហើយ​ទាក់​ទិន​នឹង​ការ​ធ្លាក់​ចុះ​​នេះ​ ​លោក​ យឹម សុវណ្ណ អ្នក​នាំ​ពាក្យ​គណ​បក្ស​​សង្គ្រោះ​ជាតិ​​មាន​ប្រសា​សន៍ថា ​ដោយ​សារ​តែ​ថ្ងៃ​ពុធ​ គឺ​ជា​​ថ្ងៃ​បុណ្យ​ឈប់​​សម្រាក​ ហើយ​អ្នក​គាំទ្រ​មក​ពី​ជន​បទ​​បាន​វិល​ត្រឡប់​ទៅ​​​ផ្ទះ​រៀង​ៗ​ខ្លួន​វិញ​ និង​ដោយ​សារ​​​តង់​​ផ្ទុក​មនុស្ស​លើស​សមត្ថភាព​នៅ​ពេល​​យប់​។

នៅ​ម៉ោង​​៥​លើស​បន្ដិច លោក​ កឹម សុខា និង​លោក​ សម រង្ស៊ី បាន​មានប្រសាសន៍​តាម​ឧគ្ឃោសនស័ព្ទ​​ជា​ថ្មី​ម្ដង​ទៀត។​ លោក​ សម រង្ស៊ី ​​បាន​​ថ្លែង​ទៅ កាន់​អ្នក​​គំាទ្រ​​ថា “ខ្ញុំ​ដឹង​​ពី​បញ្ហា​នោះ​ទាំង​អស់ ប៉ុន្តែ​នៅ​ពេល​ខ្ញុំ​ស្ដាប់​លើក​​នេះ​ ខ្ញុំ​ក្ដុកក្ដួល​” ដោយ​លោក​​បាន​​បន្ត​រិះ​គន់​រដ្ឋា​ភិបាល​របស់​លោក​ ហ៊ុន សែន​ ខ្លាំង​ៗ។
លោក​បាន​មានប្រសាសន៍​ថា “ស្ដាប់​​បង​​ប្អូន​មក​ពី​​ភ្នំពេញ​​​និយាយ​អំពី​បឹង​កក់​។ ស្ដាប់​បង​ប្អូន​មក​ពី​រតនគិរី មណ្ឌល​គិរី​ ដែល​​មាន​ការ​​​លួច​​ប្លន់​​ដីចម្ការ​ និង​ផ្ទះ​សំបែង​ពួក​គេ​បាន​កាប់​​ព្រៃ​ឈើ បំផ្លាញ​ធនធាន​​ធម្មជាតិ​ អ្វី​ៗ​គ្រប់​យ៉ាង​​ ដែល​​ជួយ​ទ្រ​ទ្រង់​​ការ​រស់​នៅ​ប្រចាំ​​ថ្ងៃ​របស់​យើង​”។

​លោក​បាន​មានប្រសាសន៍​​ទៀត​ថា “ពេល​​នេះ​ពួក​គេ​ចង់​សម្លាប់​ឆន្ទៈ​របស់​ប្រជា​ពលរដ្ឋ​។​ ពួក​គេ​ចង់​សម្លាប់​​ប្រទេស​របស់​យើង។ ពួក​គេ​ចង់​ធ្វើ​ឲ្យ​ដី​​ទទេ​ស្អាត​ ហើយ​​ប្រគល់​វា​ឲ្យ​ទៅ​ជន​​បរទេស​ឈ្លាន​ពាន​​”។ បាតុកម្ម​បាន​បន្ត​ឈាន​ចូល​ដល់​​ថ្ងៃ​ទី​៣ និង​ជា​ថ្ងៃ​​ចុង​ក្រោយ​នៅ​ថ្ងៃ​នេះ​ ដោយ​គណ​បក្ស​ប្រឆាំង​​គ្រោង​នឹង​​​ហែក្បួន​​ទៅ​កាន់​ស្ថានទូត​រុស្ស៊ី ស្ថានទូត​អូស្ត្រាលី​ និង​ស្ថានទូត​ជប៉ុន​ ដើម្បី ​ប្រគល់​ញត្តិ​៕

ប្រែសម្រួលដោយ តែម សុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស