28 C
Phnom Penh

រដ្ឋាភិបាល​​​បញ្ជា​​​ឲ្យ​​​ផ្អាក​​​ការ​​​កាប់​​​ព្រៃឈើ​​​លើដី​​​សម្បទាន​​​របស់ទំនប់​​​វារី​​​អគ្គិសនី​​​

ដោយ ឌឹ ខេមបូឌា ដេលី

បទវិភាគ

រដ្ឋាភិបាល​​​បាន​​​ចេញ​​​បទ​​​បញ្ជា​​​ឲ្យ​​​ការិយា​​​ល័យ​​​មេធាវី​​​ Ang & Associates ជា​​​ក្រុម​​​ហ៊ុន​​​គ្រប់​​​​​​គ្រង​​​ដោយ​​​លោក​​​ គិត ម៉េង អ្នក​​​ជំនួញ​​​ក្នុង​​​ស្រុក​​​ដ៏ល្បីឈ្មោះ ឲ្យ​​​ផ្អាក​​​ការ​​​កាប់​​​ព្រៃឈើ​​​នៅ​​​ក្នុង​​​តំបន់​​​មួយ​​​ក្នុង​​​​​​ខេត្ត​​​ស្ទឹង​​​ត្រែង​​​ ដែល​គេ​​​គ្រោ​​​ង​​​នឹង​​​សាង​​​សង់​​​​​ទំនប់​​​វារីអគ្គិសនី​​​។

លោកស្រី​​​ យាង ស្រីសារី អភិបាល​​​ស្រុក​​​សេ​​​សាន បាន​​​លើក​​​ឡើង​​​កាលពីម្សិលមិញ​​​ថា មន្ត្រី​​​មួយ​​​ក្រុម​​​មកពី​​​ក្រសួង​​​កសិកម្ម​​​ ដែល​​​ដឹក​​​នាំ​​​ដោយ​​​លោករដ្ឋលេខាធិការ​​​ ទី សុគន្ធ បាន​​​បើក​​​កិច្ច​​​ប្រជុំ​​​មួយ​​​ជាមួយ​​​អាជ្ញាធរ​​​ខេត្ត​​​ដើម្បី​​​ប្រកាស​​​ថា ការ​​​កាប់​​​ព្រៃឈើ​​​ត្រូវ​​​ផ្អាក​​​មួយរយៈសិន​​​ រហូត​​​ដល់​​​ព្រំ​ប្រទល់​នៃ​​​អាង​​​ទំនប់​​​វារីអគ្គិសនី​​​ដែល​​​គេ​​​គ្រោ​​​ង​​​នឹង​​សាង​​​សង់​​​ឡើង​​​​​​ ត្រូវ​​​បាន​​​វាស់​​​វែង​​​រួច​​​រាល់​​​។

លោកស្រីបាន​​​មាន​​​ប្រសាសន៍​​​ថា “ការ​​​​​​ផ្អាក​​​នេះ​​​​​​ត្រូវតែ​​​អនុវត្ត​​​ឲ្យ​​​មាន​​​ប្រសិទ្ធ​​​ភាព​​​ចាប់​​​​​​ពីថ្ងៃ​​​នេះ​​​ទៅ​​​”។ លោក​​​ស្រី​​​បាន​​​បន្ថែម​​​ថា ការ​​​សម្រេច​​​នេះ​​​ត្រូវ​​​បាន​​​ធ្វើ​​​ឡើង​​​ដោយ​​​សារ​​​មាន​​​សេចក្ដី​រាយការណ៍​ពីការ​​​កាប់​​​ឈើ​​​ខុស​​​ច្បាប់​​​នៅ​​​ខាង​​​ក្រៅ​​​តំបន់​​​ព្រៃ​​​សម្បទាន​​​របស់​​​ក្រុម​​​ហ៊ុន​​​។ លោកស្រី​​​បាន​​​មាន​​​ប្រសាសន៍​​​បន្ថែម​​​ទៀត​​​ថា “មាន​​​សេចក្ដី​​​ការណ៍ពី​​​សហគមន៍​​​ និង​​​អាជ្ញា​​​ធរ​​​មូល​​​ដ្ឋាន​​​អំពីការ​​​កាប់​​​ឈើ​​​ខុស​​​ច្បាប់​​​នេះ ប៉ុន្តែ​​​យើង​​​មិន​​​មាន​​​របាយការណ៍​​​ច្បាស់​​​លាស់​​​ណាមួយ​​​ថា តើ​​​ការ​​​កាប់​​​ឈើ​​​នៅ​​​ក្នុង​​​ និង​​​ខាង​​​ក្រៅ​​​តំបន់​​​ទំនប់​​​វារីអគ្គិសនី​​​នេះមាន​​​ទំហំ​​​ប៉ុណ្ណា​​​នោះ​​​ទេ”។

ចាប់​​​តាំងពី​​​ខែមេសាមក មាន​​​បណ្ដឹង​​​ជា​​​​​​ច្រើន​​​​​​ពាក់​​​ព័ន្ធ​​​ការ​​​កាប់​​​ឈើ​​​នៅ​​​ខាង​​​ក្រៅ​​​ព្រំ​​​ប្រទល់​តំបន់​​​សម្បទាន​​​​​​​​​ទំហំ​​​៣៦​​​.០០០​​​ហិកតា សម្រាប់​​​ការ​​​សាង​​​សង់​​​ទំនប់​​វារី​​​អគ្គិ​​​សនី​​​​​​សេសាន​​​​​​​​​ក្រោម​​​២ ដែ​​​ល​​​ស្ថិត​​​នៅ​​​ក្នុង​​​ស្រុក​​​សេសាន ខេត្ត​ស្ទឹង​ត្រែង​។ តំបន់​​​សម្បទាន​​​នេះ​​​ គឺ​​​ជា​​​តំបន់​​​បណ្ដាក់​​​ទុន​​​រួម​​​គ្នា​​​រវាង​​​ក្រុម​​​ហ៊ុន រ៉ូយ៉ាល់​​​គ្រុប របស់​​​លោក គិត​​​ ម៉េង និង​​​ក្រុមហ៊ុន​​​ថាម​​​ពល​​​អន្តរជាតិ HydroLancang ​​​របស់​​​ចិន​​​។

យោង​​​តាម​​​ឯក​​​សារ​​​ចុះ​​​កាលបរិច្ឆេទ​​​ខែមករា ឆ្នាំ២០១៣ ដែលទទួល​​​បាន​​​ដោយ​​​កាសែត​​​​​​ខេមបូឌា ដេលី បាន​​​ឲ្យ​​​ដឹង​​​ថា ការ​​​កាប់​​​រាន​​​ព្រៃ​​​នៅ​​​តំបន់​​​សម្ប​​​ទាន​​​សម្រាប់​​​ការ​​​សាងសង់​​​ទំនប់​​​វារីអគ្គិសនី​​​នេះ​​​ គឺ​​​ត្រូវ​​​បាន​​​ចុះ​​​កិច្ច​​​សន្យា​​​រវាង​​​ក្រុម​​​ហ៊ុន Ang & Associates របស់​​​លោក គិត ម៉េង និងលោក សុខ វណ្ណា ដែល​​​ជា​​​បង​​​ប្អូន​​​ប្រុស​​​ជា​មួយ​​​លោក សុខ គង់ ស្ថាបនិក​​​ក្រុម​​​ហ៊ុន​​​សូគីម៉ិច គ្រុប ជា​​​ក្រុម​​​ហ៊ុន​​​ដ៏ធំមួយ​​​នៅ​ក្នុង​​​ប្រទេស​​​កម្ពុជា​​​។

យោង​តាម​ឯកសារ​របស់​​​ទីស្ដីការ​​​គណៈ​​​រដ្ឋមន្ត្រី​​​ ចុះកាលបរិច្ឆេទ​​​ថ្ងៃ​​​ទី​​​១៦ ខែ​​​តុលា ហើយ​​​ដែលទទួល​​​បាន​​​កាលពី​​​ម្សិលមិញ​​​ រដ្ឋ​​​មន្ត្រី​​​ក្រសួង​​​កសិកម្ម​​​ថ្មី លោក អ៊ុក​​​ រ៉ាប៊ុន អតីត​​​រដ្ឋលេខា​​​​​​ក្រសួង​​​សេដ្ឋកិច្ច​​​ និង​​​ហិរញ្ញវត្ថុ បាន​​​ស្នើ​​​​​​កាលពីថ្ងៃ​​​ទី​​​១១ ខែតុលា ឲ្យក្រុម​​​ហ៊ុន​​​ Ang & Associates ​​​ផ្អាក​​​​​​ប្រមូល​​​អនុផល​​​ព្រៃ​​​ឈើ​​​​​​នៅ​​​ក្នុង​​​តំបន់​​​សម្រាប់​​​សាង​​​សង់​​​ទំនប់​​​វារីអគ្គិ​​​សនី​​​សេសានក្រោម​​​២។

ឯកសារ​​​នេះ​​​​​​មាន​ខ្លឹម​សារ​​​​ថា សំណើ​​​នេះ​​​ត្រូវ​​​បានយល់​​​ព្រម​​​​​​ដោយ​​​លោកនាយក​​​រដ្ឋ​​​មន្ត្រី ហ៊ុន សែន  កាលពី​​​ថ្ងៃ​​​ទី​​​១២ ខែ​​​តុលា។ ឯកសារ​​​នេះ​​​ដែល​ចុះ​ហត្ថលេខា​​​ដោយ​​​លោក ប៊ុន អ៊ុយ រដ្ឋលេខាធិការ​​​ទីស្ដីការ​​​គណៈ​​​​​​រដ្ឋមន្ត្រី​​​ មាន​​​ខ្លឹម​​សារ​​​ថា “ [ការ​​​ផ្អាក​​​នេះ​​​ត្រូវ​​​បាន​​​អនុម័ត​​​] ដើម្បី​​​ចាត់​​​វិធានការ​​​ឲ្យ​​​មាន​​​​​​​​​ប្រសិទ្ធភាព​​​នៅ​​​ក្នុងការ​​​លុប​​​បំបាត់​​​ការ​​​កាប់​​​បំផ្លាញ​​​ព្រៃ​​​ឈើ​​​យ៉ាង​​​អនាធិបតេយ្យ​​​នៅ​​​ក្នុង​​​ខេត្ត​​​ស្ទឹង​​​ត្រែង និង​​​ដើម្បី​​​អនុវត្ត​​​នីតិវិធី​​​ឲ្យ​​​បាន​​​ត្រឹម​​​ត្រូវ​​​នៅពេល​​​មាន​​​ការ​​​ប្រមូលអនុផល​​​ព្រៃ​​​ឈើ​​​”។ ឯក​​​សារ​​​នេះ​​​​មាន​ខ្លឹម​​​សារ​​​បន្ត​​​ថា “ រដ្ឋាភិ​បាល​​​បាន​​​យល់​​​ព្រម​​​ឲ្យ​​​​​​ផ្អាក​​​ការ​​​ប្រមូល​​​អនុ​​​ផល​​​ព្រៃ​​​នៅ​​​ក្នុង​​​តំបន់​​​សម្រាប់​​​សាង​​​សង់​​​ទំនប់​វារីអគ្គិសនី​​​សេសាន​​​ក្រោម​​​២ មួយ​​​រយៈ​​​ រហូត​​​ដល់​​​ព្រំ​​​ប្រទល់​​​​​​នៃតំបន់​​​នេះ​​​ត្រូវ​​​បាន​​​វាស់​​​វែង​​​ច្បាស់​​​លាស់​​​”។

លោក​​​ អង្គ ចាន់ លេខាផ្ទាល់​​​របស់​​​លោក សុខ​​​ វណ្ណា ដែល​​​បាន​​​ចុះ​​​កិច្ច​​​សន្យា​​​ជាមួយ​​​ក្រុម​​​ហ៊ុន Ang & Associates របស់​​​លោក គិត ម៉េង​​​ ដើម្បី​​​ចែក​​​ផល​​​ចំណេញ​​​ពីការ​​​កាប់​​​ឈើ​​​នៅ​​​ក្នុង​​​តំបន់​​​នេះ​​​ជាមួយ​​​គ្នា បាន​​​លើក​​​ឡើង​​​ថា លោក​​​ វណ្ណា បាន​​​ឈប់​​​កាប់​​​ឈើ​​​នៅ​​​ក្នុង​​​តំបន់​​​​​​សម្បទាន​​​សម្រាប់​​​សាង​​​សង់​​​ទំនប់​​​វារីអគ្គិសនី​​​នេះ​​​ហើយ​​​។ លោក អង្គ ចាន់ ​​​បាន​​​មាន​​​ប្រសាសន៍​​​ថា “ លោក សុខ វណ្ណា បាន​​​ឈប់​​​កាប់​​​ឈើ​​​ជា​​​យូរ​​​​​​​​​​​​មក​​​ហើយ​​​។​​​ ខ្ញុំ​​​មិន​​​បាន​​​ឃើញ​​​គាត់​​​ពាក់​​​ព័ន្ធ​​​នឹងរឿង​​​នេះ​​​ប្រហែល​​​មួយ​​​ខែ​​​​​​មកហើយ​​​”។ លោក​​​បាន​​​បង្វែរ​​​សំណួរ​​​បន្ថែម​​​ទៅ​​​ឲ្យ​​​លោក គិត ម៉េង  ដែល​​​មិន​​​បាន​​​ឆ្លើយ​​​តប​​​នឹង​​​សំណើ​​​សុំ​​​ការ​​​ធ្វើ​​​អត្ថាធិប្បាយ​​​នោះ​។

លោក សេក មេគង្គ មេឃុំស្រែគរ កន្លែង​​​ដែល​​​ទំនប់​​​វារីអគ្គិសនីនឹង​​​ត្រូវ​​​សាង​​​សង់​​​ បាន​​​សាទរ​​​ចំពោះការ​​​ផ្អាក​​​នេះ ហើយ​​​លោក​​​បាន​​​លើក​​​ឡើង​​​ថា ទោះបី​​​ជាយឺត​​​បន្តិច​​​ក៏ដោយ ប៉ុន្តែ​​​វា​​​ប្រសើ​​​រជាង​​​ការ​​​ដែល​​​មិន​​​បាន​​​ធ្វើ​​​។  លោក​​​ មេគង្គ មាន​​​ប្រសាសន៍​​​បន្ថែម​​ទៀត​ថា ការ​​​សម្រេច​​​ឲ្យ​​​មាន​​​ការ​​​ផ្អាក​​​​​​ការ​​​កាប់ឈើ​​​នេះ​​​វា​​​យឺត​​​បន្តិច​​​ហើយ ពីព្រោះ​​​ឈើ​​​ប្រណីត​​​ និង​​​ឈើ​​​ធំៗ​​​ជា​​​ច្រើន​​​​​​បាន​​​បាត់​​​បង់​​​រួច​​​​​​ទៅ​ហើយ ហើយមាន​​​តែ​​​ឈើ​​​មួយ​​​ចំនួន​​​តូច​​​ប៉ុណ្ណោះដែល​​​នៅ​​​សល់​​ ប៉ុន្តែ​​​ វា​​​នៅ​​​​​​មិនទាន់​​​យឺត​​​ពេល​​​ពេក​​​ទេ សម្រាប់​​​​​​ព្រៃ​​​ឈើ​​​របស់​​​យើង​​​​​​​រស់​​​រាន​​​តទៅ​​​មុខ​​​នោះ”។​​​

លោក មាច មៀន អ្នកសម្របសម្រួល​​​នៅ​​​អង្គការបណ្ដាញ​​​​​​ការពារ​​​ទន្លេ​​​បី បាន​​​លើក​​​ឡើង​​​ថា រដ្ឋាភិបាល​​​គួរ​​​តែ​​​ស៊ើប​​​អង្កេត​​​ឲ្យ​​​បាន​​​ហ្មត់​​​ចត់ពីអ្វី​​​ដែល​​​បា​​​ន​​​កើត​​​ឡើង​​​នៅ​​​ក្នុង​​​ស្រុក​​​សេសាន ។ លោក​​​បាន​​​មាន​​​ប្រសាសន៍​​​ថា “រដ្ឋាភិបាល​​​គួរ​តែ​តាម​​​ដាន​​​រឿង​​​នេះ ហើយ​​​ចាត់វិធាន​​​ការ​​​​​​ប្រសិន​​​ក្រុមហ៊ុន​​​មិន​​​ធ្វើ​​​តាម​​​ច្បាប់​​​​ [ឲ្យ​​បាន​​​ត្រឹម​​​ត្រូវ​​​នោះ​​​] ។ ហើយ​​​រដ្ឋាភិបាល​​​​​​គួរ​​​តែ​​​ដក​​​ហូត​​​ [តំបន់​​​សម្បទាន​​​] នេះ​​​មក​​​វិញ​​​”៕

ប្រែសម្រួល​​​ដោយ ស៊ា ស៊ុយឈាង​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស