36 C
Phnom Penh

គណបក្ស​ប្រជាជន​កម្ពុជា​ប្តូរ​យុទ្ធ​សាស្ត្រ​តប​ត​ទៅ​នឹង​បាតុកម្ម​​របស់​​គណបក្ស​សង្គ្រោះ​ជាតិ​

ដោយ ឌឹ ខេមបូឌា ដេលី

បទវិភាគ

ការព្រមាន​អំពី​ការ​ត្រៀម​ទប់​ទល់​​ពី​សំណាក់​​កម្លាំង​​កង​រាជអាវុធហត្ថ​ និង​នគរ​បាល​ប្រឆាំ​ងកុបកម្ម​ទៅ​នឹង​ការ​ដើរ​ហែ​ក្បួន​រយៈ​ពេល​បីថ្ងៃ​របស់​គណបក្ស​សង្គ្រោះ​ជាតិ​​នៅ​តាម​ផ្លូវ​នានា​​ក្នុង​រាជធានីភ្នំពេញ​ បាន​នាំ​ឲ្យ​មានការ​ទស្សទាយ​​ថា នឹង​មាន​ការ​ប៉ះ​ទង្គិច​គ្នា​ដែល​ដាក់​សម្ពាធ​ទៅលើ​និន្នាការផ្តាច់​ការ​និយម​របស់​រដ្ឋាភិបាល​គណបក្ស​ប្រជាជន​។

ចំណង​ជើង​មួយ​នៅក្នុង​ទស្សនាវដ្តី ថែម  (TIME Magazine) កាល​ពីថ្ងៃ​អង្គារ បាន​បង្ហាញ​ថា រាជធានីភ្នំពេញ​ត្រូវ​បាន​រៀប​ចំ​សម្រាប់​ “ការ​បង្ហូរ​ឈាម​គ្នា​” ដែល​នេះ​ជា​ការ​បង្ហាញ​មួយ​​ដែល​ស៊ីគ្នា​ទៅ​នឹង​ខ្លឹម​សារ​ចំអក​​នៅ​តាម​​ប្រព័ន្ធ​ផ្សព្វផ្សាយ​ក្នុង​សង្គម។ សកម្មភាព​ហាត់​សម​គ្រប់គ្រង​កុបកម្ម​ដែល​ត្រូវ​បាន​ធ្វើ​ឡើង​នៅ​ទូទាំ​ងរាជធានី​ ក្នុង​នោះ​ក៏មាន​ការហាត់​សម​​នៅ​ទីលាន​ប្រជា​   ធិ​បតេយ្យ​ មួយ​ថ្ងៃ​មុន​ពេល​គណបក្ស​សង្គ្រោះ​ ​ជាតិ​​ចាប់​ផ្តើម​ធ្វើ​មហាបាតុកម្ម​​ កាល​ពីថ្ងៃ​ពុធ​ បាន​ជំរុញ​ឲ្យ​នគរបាល​បង្ហាញ​កម្លាំ​ងរបស់ខ្លួន​ដែល​ពួក​គេ​បាន​ហ្វឹក​ហាត់​បំពាក់​បំប៉ន​ ដោយ​​​មាន​ដំបង​ និង​ខែល​សម្រាប់​ការពារ​។

បន្ទាប់​មក​ នៅ​ល្ងាច​ថ្ងៃ​អង្គារ​ រដ្ឋាភិបាល​បាន​ផ្លាស់​ប្តូរ​យុទ្ធសាស្ត្រ​ភ្លាមៗ​ និង​បាន​ប្រកាស​ថា គណបក្ស​សង្គ្រោះ​ជាតិ​​មិន​ត្រឹម​តែ​ត្រូវ​បាន​អនុញ្ញាត​ឲ្យ​​ដើរ​ហែ​ក្បួន​ដោយ​មិន​មាន​ការ​រំខាន​ នៅ​ទូទាំង​រាជធានី​ប៉ុណ្ណោះ​ទេ​ ក៏​ប៉ុន្តែ ថែម​ទាំង​ត្រូវ​បាន​ការពារ​ដោយ​​កម្លាំង​នគរបាល​ទៀត​ផង​។

ទិដ្ឋភាព​សន្តិភាព​បាន​លេច​ចេញ​ឡើង​កាល​ពីថ្ងៃពុធ នៅពេល​អ្នកគាំទ្រ​គណបក្ស​សង្គ្រោះ​ជាតិ​​ជាង​១ម៉ឺន​នាក់​ ដើរ​តាម​មេ​ដឹក​នាំគណបក្ស​ប្រឆាំ​ងនេះ​ ពី​ទីលាន​ប្រជាធិប​តេយ្យ​ដែល​មាន​អ្នកគាំទ្រ​ជាច្រើន​ចូល​រួម​ សំដៅ​ទៅកាន់​​អង្គការ​សហ​ប្រជាជាតិ​ ដើម្បី​ដាក់​ញត្តិ​នៅ​ទី​នោះ​ក្នុង​គោល​បំណង​អំពាវ​នាវ​ឲ្យ​មាន​អន្តរាគមន៍​ការពារលទ្ធិ​ប្រជាធិប​តេយ្យ​សេរីពហុបក្ស​ នៅ​ក្នុង​ប្រទេស​កម្ពុជា​។

លោក​ កែម​ ឡី អ្នកវិភាគ​នយោបាយ​ឯក​រាជ្យ​ និង​ជាអ្នកស្រាវជ្រាវ​ បាន​មាន​ប្រសាសន៍ ថា “ រដ្ឋាភិបាល​បាន​ស្តាប់​យោបល់​របស់​ទី​ប្រឹក្សា​ ដើម្បី​ទទួល​បាន​នូវ​គំនិត​ និង​ផ្តល់​ឱកាស​ដល់​ប្រជាជន​សម្រាប់​បង្ហាញ​ខ្លួន​ឯង​”។ លោក​បាន​មាន​ប្រសាសន៍​បន្ត​ទៀត​ថា “នៅក្នុង​បាតុកម្ម​កាល​ពីពេល​មុន  ​គណបក្ស​ប្រជាជន​បាន​សង្ស័យ​ថា គណបក្ស​ប្រឆាំង​ប្រហែល​ជា​ព្យាយាម​ផ្តួលរំលំ​រដ្ឋាភិបាល​ [​តាម​​ រយៈ​បាតុកម្ម​]​។ ឥឡូវ​  ពួក​គេ​ដឹង​ច្បាស់​ថា រឿង​នេះ​មិន​ទំនង​ជាកើត​ឡើង​ទេ​ ហើយ​​ក៏​បន្ទន់ឥរិយាបទ​​ក្នុង​ការ​ឆ្លើយ​តប​”។

អំឡុង​មហា​បាតុកម្ម​ដំបូ​ងរបស់​​គណបក្ស​សង្គ្រោះ​ជាតិ​​កាល​ពីខែមុន​ រដ្ឋាភិបាល​បាន​ដាក់​ទីក្រុង​ភ្នំពេញ​នៅ​ក្នុង​ស្ថាន​ភាព​សន្តិសុខ​ស្ទើរ​តែគ្រប់​ទីកន្លែង​ដោយ​បាន​បិទ​ផ្លូវ​ និង​ប្រើ​ប្រាស់​របាំង​លួស​បន្លា​ជាច្រើន​ ក៏ដូចជា​កម្លាំង​កង​រាជអាវុធ​ហត្ថ​។ នៅ​ពេល​អ្នក​មើល​ និ​ងអ្នក​តវ៉ាបាន​ធ្វើ​ដំណើរ​ទៅ​ផ្ទះ​ចេញ​ពី​បាតុកម្ម​ដោយ​សន្តិវិធី​រយៈពេល​ពេញ​មួយ​ថ្ងៃ​ដំបូង​​ នៅក្នុង​រាជធានីភ្នំពេ​ញ​ បុរស​អាយុ​២៩​ឆ្នាំម្នាក់​ ត្រូវ​បាន​បាញ់​សម្លាប់​ និង​ជាច្រើន​នាក់​ទៀត​ទទួល​រង​របួស​ ដោយ​សារ​អាជ្ញាធរ​ អំឡុង​ហេតុការណ៍​ចោល​ដុំ​ថ្ម​​ នៅក្បែរស្ពានព្រះ​មុនីវង្ស​ ហើយ​ហេតុការ​ណ៍​នេះ​កើ​តឡើង​ដោយ​សារ​ប្រជាជន​សាមញ្ញ​មាន​អារម្មណ៍​ខឹង​សម្បាចំពោះ​បញ្ហា​ស្ទះ​ចរា​ចរណ៍​បង្ក​ឡើង​ដោយ​ការ​បិទផ្លូវ​ពី​សំណាក់​​ក្រុម​នគរបាល​។

លោក សុខ សំអឿន ប្រធាន​គណៈកម្មា​ធិ​ការ​សកម្មភាព​សិទ្ធិ​មនុស្ស​កម្ពុជា​ បាន​លើក​ឡើង​ថា ការ​កាត់​បន្ថយ​ការ​ទប់​ស្កាត់​ពីសំណាក់​អាជ្ញាធរ​ អាច​បង្រួម​កម្រិត​ជំរុញ​ទឹក​ចិត្ត​ក្នុង​ចំណោម​អ្នក​គាំទ្រ​គណបក្ស​ប្រឆាំង​ ក្នុ​ងការ​បន្ត​ធ្វើ​​បាតុកម្ម​ ដែល​នេះ​ជា​ប្រយោជន៍​ដែល​អាច​កើត​ឡើង​សម្រាប់​គណបក្ស​ប្រជាជន​កម្ពុជា។​

លោក​បាន​មាន​ប្រសាសន៍ថា “ រដ្ឋាភិបាល​ប្រហែល​ជា​បាន​រៀន​សូត្រ​ពីបទ​ពិសោធ​កន្លង​មក​។ ប្រសិន​បើ​បាតុករ​តវ៉ា​ បន្ត​សកម្ម​ភាព​របស​់​ខ្លួន​រយៈពេល​យូរ​ដោយ​មិន​មាន​លទ្ធផល​នោះ​ប្រជាជន​អាច​នឹង​ហត់​នឿយ​ ប៉ុន្តែ ប្រសិន​បើ​រដ្ឋាភិបាល​ព្យាយាម​បង្ក្រាប​  អ្នកគាំទ្រ​កាន់​តែ​ច្រើន​នឹងចូលរួម​ធ្វើ​បាតុកម្ម​”។
លោក ព្រាប កុល នាយក​អង្គការ​តម្លាភាព​អន្តរជាតិ​កម្ពុជា​ បាន​លើកឡើង​ថា ការ​បន្ទន់​ជំហរ​របស់គណបក្ស​ប្រជាជន​កម្ពុជា ក្នុង​ស្ថាន​ភាព​មាន​ការ​ខ្វែង​គំនិត​គ្នា​ ដែល​បង្ហាញ​នៅ​តាម​ដង​ផ្លូវ​នានា​ក្នុង​រាជធានី​ភ្នំពេញ​ គឺជារឿង​ល្អ​ ក៏​ប៉ុន្តែ ក៏ទំនង​ជា​ចំណាត់​ការ​មួយ​ ដោយ​សារ​តែ​មាន​ការព្រួយ​បារម្ភ​អំពី​មុខ​មាត់​របស់​រដ្ឋាភិ​បាល​នៅឆាក​អន្តរជាតិ​។

លោក​បាន​មាន​ប្រសាសន៍ថា “វាជា​រឿង​ល្អ​ ដែល​រដ្ឋាភិបាល​បន្ទន់​ឥរិយា​បថ​​ ហើយ​​ឆន្ទៈ​ល្អ​គឺជា​យុទ្ធ​សាស្ត្រ​ ប្រសិន​បើ​គេយល់​ឃើញ​ថា មុខ​មាត់​របស់​រដ្ឋាភិបាល​អា​ចនឹង​ធ្លាក់​ចុះ​កាន់​តែ​ច្រើន​ ប្រសិន​បើ​គេ​បង្ក្រាប​បាតុករ​តវ៉ា​ ឬ​ក៏​ដាក់​គំនាប​លើគណបក្ស​ប្រឆាំង​ដោយ​ប្រើ​ហិង្សា​”។ លោក​ ព្រាប​ កុល បាន​ពន្យល់​ថា គណ​បក្ស​ប្រជាជន​កម្ពុជា​បាន​ដឹង​ថា ប្រសិន​បើ​ខ្លួន​បន្ទន់​ឥរិយា​បថ​អំឡុង​ពេល​ធ្វើ​បាតុកម្ម​​របស់​គណបក្ស​សង្គ្រោះ​ជាតិ​​ នោះ​នឹង​មាន​ព័ត៌​មាន​តិច​តួច​ដែល​ត្រូវ​រាយការណ៍​តាម​ប្រព័ន្ធ​ផ្សព្វផ្សាយ​ ហើយ​​អាជីវកម្ម​អាច​ដំណើរការ​ជា​ធម្មតា​។

លោក ផៃ​ សីុផាន អ្នកនាំពាក្យ​ទីស្តីការ​គណៈរដ្ឋមន្ត្រី​ បាន​លើកឡើង​ថា មេដឹកនាំ​គណបក្ស​សង្គ្រោះ​ជាតិ​​ប្រហែល​ជា​សោក​ស្តាយ​ដែល​ក្រសួ​ងមហាផ្ទៃ​បាន​ចេញ​សេចក្តី​សម្រេច​ឲ្យ​ពួក​គេ​ដើរ​ហែ​ក្បួន​​។ លោក​បាន​មាន​ប្រសាសន៍ថា “គណបក្ស​ប្រឆាំង​ចង់​ឃើញ​ការ​ប៉ះ​ទង្គិច​គ្នា​។ ពួកគេ​កំពុង​តែ​ចង់​ឲ្យ​ប្រព័ន្ធ​ផ្សព្វផ្សាយ​ផ្តោ​ត​អារម្មណ៍​ [ទៅ​លើ​ពួក​គេ​] និង​សរសេរ​អំពី​សិទ្ធិ​មនុស្ស​។ ពួក​គេ​ស៊ំាទៅ​នឹង​ការ​ប្រើ​ប្រាស់​​​បាតុករ​តវ៉ា​ជាខែល​ និង​ដើម្បី​រក​ផល​ប្រយោជន៍​ ហើយ​ឥឡូវ​យើង​យល់​អំពី​រឿង​នេះ​ហើយ​”។

លោក​ កឹម​ សុខា អនុប្រធាន​គណបក្ស​សង្គ្រោះ​ជាតិ​​ បាន​លើក​ឡើង​ថា គណបក្ស​ប្រឆាំង​រីករាយ​ដែល​សម្ពាធ​ដែល​គណបក្ស​​នេះ​​ដាក់​ទៅលើ​រដ្ឋាភិបាល​​បាន​ទប់​ស្កាត់​ការ​បង្ក្រាប​ការ​ដើរ​ហែក្បួន​របស់ខ្លួន​។ លោក​បាន​ថ្លែង​ថា “យើង​មិនមាន​​បំណង ចង់​ឲ្យ​មាន​ការ​ប៉ះទង្គិច​គ្នា ឬក៏​អំពើ​ហិង្សា​ណា​មួយ​ទេ​។ មូលហេតុ​ដែល​យើង​កំពុង​ធ្វើ​បាតុ​កម្ម​នេះ​ គឺដើម្បី​ស្វែង​រក​យុត្តិ​ធម៌​​ទាក់ទង​ទៅ​នឹង​ភាព​មិន​ប្រក្រតី​ក្នុង​ការ​បោះ​ឆ្នោត​”។

លោក សម  រង្ស៊ី  ប្រធាន​គណបក្ស​សង្គ្រោះ​ ជាតិ​​​ បាន​លើកឡើង​ថា វាជា​រឿង​​ “ អវិជ្ជមាន​” ​ដោយ​ចាត់​ទុក​លទ្ធផល​​សហ​ការ​រវាង​គណ​បក្ស​សង្គ្រោះ​ជាតិ​ និង​គណបក្ស​ប្រជាជន​កម្ពុជា​ ជាការ​ហ្វឹក​ហាត់​សកម្មភាព​របស់​គណ​បក្ស​ប្រឆាំង​ ដោយ​លោក​លើក​ឡើង​ថា អ្នក​គាំទ្រ​កាន់​តែច្រើន​នឹង​ចូល​រួម​នាពេល​អនា​គត​ នៅពេល​ដែល​ពួក​គេ​ដឹង​ថា ពួក​គេ​អាច​ចូល​រួម​បាន​ដោយ​មិន​មាន​គ្រោះ​ថ្នាក់​។ លោកបាន​ថ្លែង​ថា “ ការ​ពិត​គឺ​ថា យើង​អាច​ដើរ​ហែក្បួន​ដោយ​សន្តិវិធី​ ហើយ​វា​ជា​រឿង​​ដ៏ល្អមួយ​​។ វា​ផ្តល់​នូវ​ទំនុក​​ចិត្ត​​ និង​​ការ​​ធានា​​ដល់​អ្នក​គាំទ្រ​របស់​យើង​ ទោះ​​ជា​ប្រព័ន្ធ​ ផ្សព្វ​ផ្សាយ​​ផ្តោ​តអារម្មណ៍​តិច​ជាង​មុន​ក៏​ដោយ​”។

លោក​ មឿន តុលា ប្រធាន​កិច្ច​ការ​ពល​កម្ម​នៅ​មជ្ឈមណ្ឌល​អប់​រំច្បាប់សម្រាប់​សហ​គមន៍​បាន​លើកឡើង​ថា  ចំណាត់​ការ​របស់​គណ​បក្ស​ប្រជាជន​កម្ពុជា ទំនង​ជា​​មិន​មាន​បំណង​គិត​ទុក​ជាមុន​អំពី​សកម្មភាព​របស់​គណ​បក្ស​សង្គ្រោះ​ជាតិ ឬក៏​ជៀស​វាង​ការ​មាន​មុខ​មាត់​មិនល្អ​ក្នុង​ស្ថានភាព​នយោបាយ​មិនទៀង​ទាត់​ទេ​។ ក៏ប៉ុន្តែ លោក មឿន តុលា បាន​បន្ត​ទៀត​ថា ចំណាត់ការរបស​់គណបក្ស​ប្រជាជន​កម្ពុជា​ទំនង​ជាការ​ដឹង​បែប​ធម្មតា​ថា កម្លាំ​ង​សន្តិសុខ​របស់ខ្លួន​​​ប្រហែល​ជា​មិន​ដឹង​អំពី​ចេតនា​​ណាមួយ​ទេ​ ហើយ​​នឹង​ដាក់​សម្ពាធ​ទៅ​លើ​សកម្មភាព​ដើរ​ហែក្បួន​របស់​គណ​បក្ស​សង្គ្រោះ​ជាតិ​​ ដែល​មាន​អ្នក​គាំទ្រ​ជា​ច្រើន​ម៉ឺន​នាក់​។

លោក​ មឿន​ តុលា​ បាន​មាន​ប្រសាសន៍​ថា “ពួក​គេ​យល់​ឃើញថា ចំនួន​ប្រជាជន​​ដែល​ចូលរួម​ធ្វើ​បាតុកម្ម​​​មាន​ច្រើន​ជាង​ចំនួន​សមាជិក​កង​រាជអាវុធ​ហត្ថ​ និង​នគរបាល​ប្រឆាំង​កុបកម្ម​ ដែល​អាច​ធ្វើ​ប្រតិបត្តិការ​បង្ក្រាប​បាន”។ លោក​បានមាន​ប្រសាសន៍បន្ថែម​ទៀត​ថា “ ប្រសិន​បើ​មាន​បាតុកម្ម​មួយ​ ដែល​មាន​អ្នក​ចូល​រួម​ត្រឹម​តែ​១០០នាក់​ ឬក៏​២០០នាក់​ពួក​គេ​អាច​នឹង​បង្ក្រា​ប​ម្តង​ទៀត​”៕

ប្រែ​​​សម្រួល​​​ដោយ កង​ សុធា​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស