27.5 C
Phnom Penh

លោក​ស្រី ប៊ុន​ រ៉ានី រិះគន់​គណបក្ស​ប្រឆាំង​​ពេល​​ចែក​អំណោយ​

ដោយ ឌឹ ខេមបូឌា ដេលី

បទវិភាគ

កាល​ពី​ថ្ងៃ​សៅរ៍​ លោក​ស្រី​ ប៊ុន​ រ៉ានី ភរិយា​របស់​លោក​នាយក​រដ្ឋ​មន្ត្រី​ ហ៊ុន សែន​ បាន​​ប្រើ​ពិធី​ចែក​អំណោយ​​របស់​​កាក​បាទ​​ក្រហម​​កម្ពុជា​​ដល់​ជន​រង​គ្រោះ​​ដោយ​សារ​ទឹក​ជំនន់​ ដើម្បី​ថ្កោល​ទោស​​​ចំពោះ​ការ​​ធ្វើ​បាតុកម្ម​ និង​ការ​ហែក្បួន​រយៈ​ពេល​បី​ថ្ងៃ​របស់​គណ​បក្ស​សង្គ្រោះ​ជាតិ​​នៅ​ក្នុង​ក្រុង​ភ្នំពេញ​កាល​​ពី​សប្ដាហ៍​មុន ដែលបាន​ខិត​ខំ​ប្រឹង​ប្រែង​​ដើម្បីបោកបញ្ឆោតប្រជាជន​​កម្ពុជា​។

លោក​ស្រី​ ប៊ុន​ រ៉ានី​ បាន​ធ្វើ​ជា​ប្រធាន​​កាក បាទ​ក្រហម​កម្ពុជា​ចាប់​​តាំង​ពី​​​បាន​កាន់​កាប់​តួនាទី​នេះ​បន្ត​​ពី​ភរិយា​របស់​​ព្រះ​អង្គ​ម្ចាស់​នរោត្តម​ រណប្ញទ្ធិ ​​នាយក​រដ្ឋ​មន្ត្រី​ទី១​ ដែល​ត្រូវ​បាន​បណ្ដេញ​ចេញ​កាល​ពី​ឆ្នាំ​១៩៩៨​ ហើយ​លោក​ស្រី​បាន​ធ្វើ​ដំណើរ​ទៅ​​ក្រុង​​ប៉ៃលិន​ ដើម្បី​ចែក​អំណោយ​ឲ្យ​ជន​រងគ្រោះ​ដោយ​​សារ​ទឹក​ជំនន់​នៅ​ពេល​បច្ចុប្បន្ន​ប្រហែល​​២.១៨៨​នាក់។​ ទឹក​ជំនន់​នេះ​​​បាន​សម្លាប់​មនុស្ស​អស់​១៦៨​​នាក់​នៅ​ទូទាំង​ប្រទេស​ ហើយ​ធ្វើ​ឲ្យ​មនុស្ស​ជាង​៥០​.០០០​គ្រួសារ​​បាត់​បង់​ទីជម្រក​នៅ​ទូទាំង​ប្រទេស​ក្នុង​រយៈ​ពេល​មួយ​ខែ​មក​​នេះ​។

បន្ទាប់​ពី​​ការ​ថ្លែង​សុន្ទរកថា​​ខ្លី​មួយ​​របស់​លោក​ អ៊ី ឈាន អភិបាល​ខេត្ត​ប៉ៃលិន​ និ​ង​ជា​​​អតីត​​កង​អង្គរក្ស​​របស់​ប៉ុល ពត​ នោះ​ លោក​​ស្រី​ ប៊ុន​ រ៉ានី​ បាន​មានប្រ​សា​សន៍​ថា ការ​​តវ៉ា​​របស់​គណបក្ស​សង្គ្រោះ​ជាតិ​​​ គឺ​​ដើម្បី​ចង់​បាន​​តែ​តួនាទី​​ល្អ​នៅ​ក្នុង​រដ្ឋាភិបាល​សម្រាប់​​មេដឹក​នាំ​គណបក្ស​ប្រឆាំងតែ​ប៉ុណ្ណោះ​ ហើយ​គណ​បក្ស​នេះ​​មិន​ចាប់​អារម្មណ៍​ពិត​​ប្រាកដ​​ចំពោះ​ការ​រក​យុត្តិធម៌​ឲ្យ​ប្រជាជន​ទេ​។

លោក​ស្រី​ ប៊ុន រ៉ានី​ ក៏​បាន​មានប្រសាសន៍​​ទំនង​ជា​សំដៅ​ដល់​​លោក​ សម រង្ស៊ី ប្រធាន​គណបក្ស​សង្គ្រោះ​ជាតិ​​ថា “ពួក​គេ​​បោកបញ្ឆោត​ប្រជាជន​ជា​រៀង​រាល់​ថ្ងៃ​ ដើម្បី​បាន​អំណាច ​​ឧទាហរណ៍ ​ប្រសិន​បើ​​គេ​ឲ្យ​​តំណែង​ប្រធាន​​រដ្ឋ​សភាទៅ​គាត់ គាត់​​នឹង​​ទទួល​យក​ភ្លាម​​”។

លោក​ស្រី​ ប៊ុន រ៉ានី បាន​ពន្យល់​​ប្រាប់​ថា លោក​ស្រី​គិត​ថា ​ការ​ខំប្រឹង​ប្រែង​របស់​គណ​បក្ស​ប្រឆាំង​​​ក្នុង​ការ​រៀប​ចំ​ការ​ហែក្បួន​នៅ​ក្នុង​ទីក្រុង​ភ្នំពេញ​ ដែល​មាន​មនុស្ស​​រាប់​សែន​នាក់​ចូលរួម​ ដើម្បី​​អំពាវនាវ​ឲ្យ​មាន​ការ​ផ្លាស់​ប្ដូរ​រដ្ឋាភិបាល​​នោះ​​ គួរ​តែ​​ផ្ដោត​លើ​កា​រ​ជួយ​ជន​រងគ្រោះ​​ដោយ​សារ​ទឹក​ជំនន់​វិញ​។ លោក​​​​ស្រី​​​​បាន​មានប្រសាសន៍ថា “ពួក​​គេ​និយាយ​ថា​ ពួក​គេ​ស្វែង​រក​យុត្តិធម៌​សម្រាប់​ឆន្ទៈ​របស់​ប្រជាជន​ ប៉ុន្តែ​ឥឡូវ​នេះ​​ឆន្ទៈ​របស់​ប្រជាជន​ គឺ​ត្រូវ​ការ​អង្ករ​ ដូច្នេះ​ហេតុអ្វី​បាន​​ជា​ពួក​គេ​មិន​​ជួយ​​ប្រជា​ជន​ទាំង​នោះ?”។ លោក​ស្រី​បាន​ប្រាប់​ប្រជាជន​​ថា ពួក​គេ​​អាច​សុំ​ជំនួយ​​តែ​​ពី​គណបក្ស​ប្រជា​ជន​កម្ពុជា​​របស់​​ស្វាមីលោក​ស្រី​ប៉ុណ្ណោះ​។

លោក​ស្រី​ ប៊ុន​ រ៉ានី បាន​មានប្រសាសន៍​ថា “នៅ​ពេល​មាន​ទឹក​ជំនន់​ ឬ​​ឧប្បត្តិហេតុ​ផ្សេង​ទៀត​ ពុកម៉ែ​បង​ប្អូន​​បាន​មើល​ឃើញ​ហើយ​​ថា មិន​មាន​គណបក្ស​ផ្សេង​​ចុះ​មក​  ​ជួយ​​​ពុក​ម៉ែ​បង​ប្អូន​នៅ​ទី​នេះ​ទេ​ គឺ​មាន​តែ​គណបក្ស​ប្រជា​ជ​ន​​កម្ពុជា​ប៉ុណ្ណោះ​ ពីព្រោះ​មន្ត្រី​រាជការ​ទាំង​អស់​សុទ្ធ​តែ​ជា​​អ្នក​គាំទ្រ​គណ​បក្ស​​ប្រជា​ជន​កម្ពុជា​”។

អំឡុង​ពេល​ធ្វើ​បាតុកម្ម​រយៈ​ពេល​បី​ថ្ងៃ​លើកទី២​របស់​ខ្លួន​កាលពី​សប្ដាហ៍​មុន​ គណ​បក្ស​សង្គ្រោះ​ជាតិ​បាន​​ដាក់​ញត្តិ​​ទៅ​ការិយា​ល័យ​អង្គការ​សហប្រជាជាតិ​​​ ដោយ​មាន​​ស្នាម​មេដៃ​ប្រជាជន​ជាង​២​លាន​នាក់​ ដើម្បី​ស្នើ​សុំ​ឲ្យ​មាន​​ការ​អន្តរាគមពី​អន្តរជាតិ​ បន្ទាប់​ពី​មាន​ជម្លោះ​នៅ​ក្នុង​ការ​បោះឆ្នោត ​ខណៈ​ដែល​​​​មាន​មនុស្ស​ប្រហែល​២៥.០០០​នាក់​ដើរ​ក្បួន​​តាម​ផ្លូវ​​ក្នុង​ក្រុង​ភ្នំពេញ​​កាល​ពី​ថ្ងៃ​សុក្រ​ ដើម្បី​​ដាក់​ញត្តិ​ជូន​ស្ថាន​ទូត​បរទេស​។

លោក​ស្រី​ ប៊ុន រ៉ានី បាន​លើក​ឡើង​​ថា នៅ​​ពេល​អនាគត​មនុស្ស​ទាំង​​២លាន​នាក់​ដែល​បាន​ផ្ដិត​មេដៃ​​​លើ​ញត្តិ​របស់​គណបក្ស​​សង្គ្រោះ​ជាតិ​​គួរ​តែ​ទាម​ទារ​​សំណង​​ចំពោះ​ការ​​គំាទ្រ​​របស់​ខ្លួន​​លើ​គណបក្ស​ប្រឆាំង​។ លោក​ស្រី​បាន​មានប្រសាសន៍​ថា “សូម​ពុក​ម៉ែ​បងប្អូន​ទាំង​អស់​ ពេល​ក្រោយ​នៅ​ពេល​ដែល​គេ​​សុំ​ឲ្យ​បង​ប្អូន​ផ្ដិត​មេដៃ​​ ត្រូវ​សួរ​ពួក​គេ​រក​មូលហេតុ បើ​​ផ្ដិត​មេដៃ​​ឲ្យ​ដី​ អង្ករ​ ឬ​សម្លៀក​បំពាក់​ ​ចំា​ផ្ដិត​មេដៃ​ឲ្យ។ ប្រសិន​បើ​ពួក​គេ​មិន​​ប្រាប់​មូល​េហតុ​ច្បាស់​លាស់​ទេ​ សូម​បង​ប្អូន​​កុំ​ផ្ដិត​មេដៃ​ឲ្យ​”។

លោក​ស្រី​ ម៉ែន នារីសុភ័ក្រ​ អគ្គលេខា​ធិការ​រង​​កាក​បាទ​​ក្រហម​កម្ពុជា​បាន​បដិ​សេធ​មិន​ធ្វើ​អត្ថាធិប្បាយ​កាល​ពី​ម្សិលមិញ​​នៅ​ពេល​សួរ​ថា តើ​​ការ​ដែល​លោក​ស្រី​ ប៊ុន រ៉ានី​ រិះគន់​គណបក្ស​ប្រឆាំង​នេះ​ត្រឹម​ត្រូវ​ ឬ​មិន​ត្រឹម​ត្រូវ​​ក្នុង​នាម​ជា​ប្រធាន​​កាកបាទ​ក្រហម​ ជា​ស្ថាប័ន ដែល​មាន​​ឈ្មោះ​អព្យាក្រឹត​ផ្នែក​នយោបាយ​នោះ​។

​លោក​ សម រង្ស៊ី ប្រធាន​គណបក្ស​សង្គ្រោះ​​ជាតិ​បាន​មានប្រសាសន៍​ថា លោក​​គិត​ថា គណ​បក្ស​ប្រជាជន​​កម្ពុជា​កំពុង​​រក​វិធី​​ផ្សេង​ទៀត​ ដើម្បី​រិះគន់​គណបក្ស​សង្គ្រោះ​ជាតិ​ បន្ទាប់​ពី​​តួនាទី​របស់​លោក​ ហ៊ុន​ សែន​ រង​ការ​​ប៉ះពាល់​ក្រោយ​ពី​​ការ​បាត់​បង់​សំឡេង​ឆ្នោត​​ដ៏​ច្រើន​នៅ​ក្នុង​​ការ​បោះឆ្នោត​នេះ​។ លោក​ សម រង្ស៊ី បាន​មានប្រសាសន៍​ថា “ថ្នាក់​ដឹកនាំ​គណបក្ស​សង្គ្រោះ​ជាតិ​ និ​ង​ក្រុម​ការងារ​គណបក្ស​សង្គ្រោះ​ជាតិ​បាន​​ចែក​​អំណោយ​ដល់​ជន​រងគ្រោះ​ដោយ​​ទឹក​ជំនន់​​ទាំង​មុន​ការ​ធ្វើ​​បាតុកម្ម​ និ​ង​ក្រោយ​ការ​ធ្វើ​បាតុកម្ម​​។​ ក្នុង​រយៈ​ពេល​ពី​រ​បី​សប្ដាហ៍​មក​នេះ​ យើ​ងបាន​​​អំពាវនាវ​ទៅ ដល់​ប្រជាជន​​ខ្មែរ​ ដែល​​រស់​នៅ​ក្រៅ​ប្រទេស​ឲ្យ​ជួយ​ផ្ដល់​ជំនួយ​ ហើយ​យើង​បាន​​ខំប្រឹង​ប្រែង​យ៉ាង​ខ្លាំង​​នៅ​ក្នុង​ការ​ចែក​អំណោយ​ដល់​ជន​រង​គ្រោះ​ដោយ​សារ​ទឹក​​ជំនន់​”។លោក​បាន​បន្ថែម​ថា “យោង​តាម​​​អ្នក​សង្កេត​ការណ៍​ជា​ច្រើន​​ឲ្យ​ដឹងថា ​តាម​ពិត​​​យើង​បាន​ចែក​អំណោយ​​​សកម្ម​​ជាង​កាកបាទ​ក្រហម​ទៅ​ទៀត​”។

កាកបាទ​ក្រហម​គឺ​ជា​អង្គការ​ផ្ដល់​ជំនួយ​មនុស្ស​ធម៌​ ដែល​ទទួល​មូលនិធិ​ច្រើន​នៅ​ក្នុង​ប្រទេស​ ដោយ​មាន​​ពាណិជ្ជករ​​ និង​អ្នក​នយោ​​បាយ​សំខាន់ៗ​ ដែល​មាន​ទំនាក់​ទំនង​ជាមួយ​គណបក្ស​ប្រជាជាន​កម្ពុជា​បាន​បរិច្ចាគ​​​ថវិកា​ផ្ទាល់​ដៃ​សរុប​ចំនួន​១៤​លាន​ដុល្លារ​​ដល់​លោក​​ស្រី​ ប៊ុន រ៉ានី កាល​ពី​ថ្ងៃ​ទី​៨ ខែ​មីនា​ អំឡុង​​ពេល​​​ប្រារព្ធ​ទិវា​កាកបាទ​ក្រហម​ពិភពលោក​។

ទោះ​ជា​យ៉ាង​ណា​ កាកបាទ​ក្រហម​នេះ​ទទួ​លរង​ការ​រិះគន់​ពី​មន្ត្រី​មូលដ្ឋាន​​ចំពោះ​ការ​​មិន​ផ្ដល់​ជំនួយ​​ឲ្យ​បាន​ទាន់​ពេល​ ជា​ពិសេស​នៅ​ក្នុង​ដំណាក់​កាល​ដំបូង​​នៃ​គ្រោះ​ទឹក​​​ជំនន់​​។​ ប្រធាន​កាកបាទ​ក្រហម​ខេត្ត​​មួយ​រូប​​បាន​ប្រាប់​អ្នក​យក​ព័ត៌មាន​នៅ​ពេល​នោះ​ថា កាកបាទ​ក្រហម​​កម្ពុជា​មិន​អាច​ជួយ​​ប្រជា​ជន​បាន​ទេ​​នៅ​ពេល​ដែល​បុគ្គលិក​​ឈប់សម្រាក​​នៅ​ថ្ងៃ​បុណ្យ​ភ្ជុំបិណ្ឌ។

ព្រះអង្គ​ម្ចាស់​​ ស៊ីសុវត្ថិ ធម្មិកោ សមាជិក​គណបក្ស​​សង្គ្រោះ​ជាតិ​ ដែល​បាន​រិះគន់​គណ​បក្ស​ធំៗ​ទាំង​ពីរ​ចំពោះ​ការ​យក​​កម្ម​វិធី​​ចែក​អំណោយ​​ដល់​ជន​រងគ្រោះ​​​ដោយ​សារ​ទឹក​ជំនន់​នាពេល​ថ្មីៗ​នេះ​ធ្វើ​ន​​យោបាយ​នោះ​​បាន​មានបន្ទូល​ថា កាកបាទ​ក្រហម​ជាប់​ពាក់​ព័ន្ធ​នឹង​​នយោបាយ​យ៉ាង​ខ្លាំង​នៅ​ក្រោម​រដ្ឋា​ភិបាល​គណបក្ស​ប្រជាជន​កម្ពុជា​របស់​លោក​ ហ៊ុន សែន​។

ព្រះអង្គម្ចាស់​បាន​មាន​បន្ទូល​ថា “គណ​បក្ស​ប្រជាជន​កម្ពុជា​​នៅ​តែ​ជា​គណបក្ស​ម៉ាកឡេ​និន​​និយម​ដដែល​ ដូច្នេះ​ហើយ​គ្រប់​ស្ថាន​ប័ន​ទាំង​អស់​ត្រូវ​បម្រើ​ផល​ប្រយោជន៍​របស់​គណបក្សនេះ។​ រឿង​នេះ​ត្រូវ​បាន​គេ​យល់​បែប​នេះ​ឯង​”៕

ប្រែសម្រួលដោយ​ មូល គឹមហឿន​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស