នគរបាលបានឲ្យដឹងថា កាលពីម្សិលមិញសាលាដំបូងខេត្តបន្ទាយមានជ័យបានចោទប្រកាន់ក្មេងប្រុសជំទង់អាយុ១៦ឆ្នាំម្នាក់ពីបទសម្លាប់កសិករម្នាក់ ហើយបន្ទាប់មករំលោភកូនស្រីអាយុ១៤ឆ្នាំរបស់កសិកររូបនេះ។
យោងតាមនគរបាលបានឲ្យដឹងថា ក្មេងប្រុសជំទង់រូបនេះត្រូវបានចាប់ខ្លួនកាលពីព្រឹកថ្ងៃសៅរ៍នៅឃុំទួលពង្រ ស្រុកម៉ាឡៃ បន្ទាប់ពីបាញ់សម្លាប់លោក ណេត សល់ អាយុ៤២ឆ្នាំ ហើយបានរំលោភកូនស្រីអាយុ១៤ឆ្នាំរបស់គាត់នៅក្នុងផ្ទះឈើតូចមួយរបស់ជនរងគ្រោះកាលពីទៀបភ្លឺថ្ងៃសុក្រ។
លោក សិទ្ធ ឡោះ ស្នងការរងទទួលបន្ទុកការិយាល័យកណ្តាលនគរបាលព្រហ្មទណ្ឌខេត្តបានមានប្រសាសន៍ថា “បន្ទាប់ពីត្រូវបានចាប់ខ្លួន ជនសង្ស័យបានសារភាពថា ខ្លួនបានសម្លាប់ឪពុករបស់ជនរងគ្រោះ ហើយរំលោភជនរងគ្រោះបីលើក” ដោយបានបន្ថែម ថាជនសង្ស័យត្រូវបានបញ្ចូនទៅតុលាកាលពីម្សិលមិញ។
លោក សៅ ប៊ុន ជាអធិការស្រុកម៉ាឡៃបានមានប្រសាសន៍ថា អំឡុងពេលចាប់ខ្លួន នគរបាលរឹបអូសបានកាំភ្លើងវែងម៉ាកSKS ផលិតនៅសហភាពសូវៀត ដែលក្មេងជំទង់អាយុ១៦ឆ្នាំរូបនេះបានប្រើប្រាស់ដើម្បីបាញ់លោក ណេត សល់ ត្រង់ក្បាលពីខាងក្រោយ មុនពេលរំលោភកូនស្រីរបស់គាត់នៅចំពោះមុខប្អូនស្រីអាយុ១០ឆ្នាំរបស់នាងនិងកាំភ្លើងកែច្នៃមួយដើម។
លោក សៅ ប៊ុន បានមានប្រសាសន៍ថា ក្មេងប្រុសជំទង់រូបនេះបានប្រាប់នគរបាលថា ”ខ្លួនបានសម្លាប់ឪពុករបស់ជនរងគ្រោះដោយអចេតនា”។ លោកបានបន្ថែមថា ជនរងគ្រោះនិងកូនស្រីពីរនាក់ទៀតរបស់គាត់ធ្វើការងារនៅលើដីដែលត្រូវបានកាន់កាប់មួយផ្នែក ដោយឪពុករបស់ជនសង្ស័យរូបនេះ៕
ប្រែសម្រួលដោយ អ៊ូច សូនី