តាមគេហទំព័ររបស់ទីភ្នាក់ងារព័ត៌មានរដ្ឋ អាកាប៉េ (AKP) បានឲ្យដឹងថា លោក គ្រីស ដ័រ (Chris Dawe) អគ្គនាយកកាសែតភ្នំពេញប៉ុស្តិ៍បានអបអរសាទរជាផ្លូវការចំពោះគណបក្សប្រជាជនកម្ពុជាដែលកំពុងកាន់អំណាចរបស់លោកនាយករដ្ឋមន្ត្រី ហ៊ុន សែន ដែលបានឈ្នះការបោះឆ្នោតជាតិដ៏ចម្រូងចម្រាសកាលពីខែកក្កដា។
តាមអត្ថបទដែលចុះផ្សាយដោយទីភា្នក់ងារព័ត៌មានអាកាប៉េកាលពីថ្ងៃសុក្របានឲ្យដឹងថា អំឡុងជំនួបពិភាក្សាជាមួយលោក ខៀវ កាញារិទ្ធ រដ្ឋមន្ត្រីក្រសួងព័ត៌មានកាលពីថ្ងៃព្រហស្បតិ៍ “លោក គ្រីស ដ័រ បានអបអរសាទរជ័យជម្នះរបស់គណបក្សប្រជាជនកម្ពុជា”។ ទីភា្នក់ងារព័ត៌មានអាកាប៉េបានឲ្យដឹងទៀតថា លោក គ្រីស ដ័រ ក៏បានអបអរសាទរចំពោះលោក ខៀវ កាញារិទ្ធ ផងដែរដែលនៅបន្តកាន់តំណែងជារដ្ឋមន្ត្រីក្រសួងព័ត៌មាន និង “បានបញ្ជាក់ថា នឹងបន្តសហប្រតិបត្តិការល្អនៅក្នុងការលើកស្ទួយលទ្ធិប្រជាធិបតេយ្យនិងសេរីភាពសារព័ត៌មាន”។
លោក គ្រីស ដ័រ មិនបានឆ្លើយតបនឹងសំណើសុំការអត្ថាធិប្បាយទេ។លោក អាឡាំង ផាកហៅ (Alan Parkhouse) ជានិពន្ធនាយកកាសែតភ្នំពេញប៉ុស្តិ៍បានមានប្រសាសន៍ថា អគ្គនាយករបស់លោក “មិនពាក់ព័ន្ធនឹងផ្នែកនិពន្ធរបស់កាសែតនេះទេ”។ លោក ផាកហៅ បានឲ្យដឹងតាមរយៈអ៊ីម៉ែលថា “ខ្ញុំមិនបានចូលរួមនៅក្នុងជំនួបពិភាក្សាទេ ហើយខ្ញុំមិនបានដឹងថា មានការពិភាក្សាពីអ្វីដែរ”។
បើទោះបីជាគណបក្សប្រជាកម្ពុជាបានឈ្នះការបោះឆ្នោតជាផ្លូវការដោយទទួលបាន៦៨អាសនៈច្រើនជាងគណបក្សប្រឆាំងដែលទទួលបាន៥៥អាសនៈក៏ដោយ ក៏គណបក្សសង្គ្រោះជាតិបានធ្វើពហិការមិនចូលរួមប្រជុំសភា ដោយសារគណបក្សនេះបានអះអាងថា មានភាពមិនប្រក្រតីដ៏រាលដាល ហើយបានបណ្តាលឲ្យមនុស្សរាប់ម៉ឺននាក់ចូលរួមក្នុងមហាបាតុកម្មក្នុងទីក្រុងភ្នំពេញកាលពីខែមុននិងសប្តា៍មុន ដើម្បីទាមទារឲ្យមានការស៊ើបអង្កេតឯករាជ្យមួយលើការបោះឆ្នោតកាលពីខែកក្កដា។
លោក មឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សាផ្នែកព័ត៌មានបានមានប្រសាសន៍ថា ស្របពេលដែលមានក្រុមហ៊ុនជាច្រើនដែលរកស៊ីនៅក្នុងប្រទេសកម្ពុជាព្យាយាមរក្សាទំនាក់ទំនងល្អជាមួយរដ្ឋាភិបាលនោះ ការបង្ហាញការគាំទ្ររបស់លោក គ្រីស ដ័រ ចំពោះគណបក្សប្រជាជនកម្ពុជា ដែលកំពុងកាន់អំណាច មិនបានជួយអ្វីដល់កាសែតរបស់លោកទេ។
លោក មឿន ឈានណារិទ្ធ បានមានប្រសាសន៍ថា “សម្រាប់ប្រជាជនកម្ពុជា ពួកគេនឹងមិនគិតថា វាជាបញ្ហាធំដុំនោះទេ ពីព្រោះសារព័ត៌មានភាគច្រើននៅទីនេះគាំទ្ររដ្ឋាភិបាល…ប៉ុន្តែសម្រាប់ជនបរទេសដែលមកពីបស្ចិមប្រទេសកាន់លទ្ធិប្រជាធិបតេយ្យ ដែលបណ្តាញព័ត៌មានរបស់ពួកគេមានលក្ខណៈចាស់ទុំនិងប្រកបដោយវិជ្ជាជីវៈនោះ ពួកគេនឹងងឿងឆ្ងល់ថា ហេតុអ្វីបានជាអគ្គនាយកកាសែតភ្នំពេញប៉ុស្តិ៍អបអរសាទរគណបក្សប្រជាជនកម្ពុជា”។
លោកបានមានប្រសាសន៍ថា “ខ្ញុំគិតថា សម្រាប់អ្នកអានធម្មតា ពួកគេនឹងមានចម្ងល់ដូចគ្នាថា ហេតុអ្វីបានជាបណ្តាញព័ត៌មានមួយផ្ញើសារអបអរបែបនេះចំពោះគណបក្សប្រជាជនកម្ពុជា ខណៈពេលសាធារណជនទូទៅជឿថា មានភាពមិនប្រក្រតីច្រើននៅក្នុងការបោះឆ្នោតនោះ”។
កាលពីខែមុន សារតាមអ៊ីម៉េលមួយចំនួនធំដែលបែកធ្លាយ ហើយដែលបានចេញ ផ្សាយដោយគេហទំព័រវីគីលីក (Wikileaks) នោះ បានបង្ហាញពីទំនាក់ទំនងចែករំលែកព័ត៌មានគ្នារវាងក្រុមហ៊ុនស៊ើបអង្កេតឯកជនមួយ ឈ្មោះ Stratfor ដែលមានមូលដ្ឋាននៅសហរដ្ឋអាមេរិកនិងបណ្តាញព័ត៌មានជាច្រើននៅទូទាំងពិភពលោករួមទាំងកាសែតភ្នំពេញប៉ុស្តិ៍ផងដែរ។
នៅក្នុងសេចក្តីថ្លែងការណ៍ដែលភ្ជាប់ជាមួយនឹងអ៊ីម៉េលទាំងនោះ វីគីលីកបានសរសេរថា “ស្របពេលដែលការដោះដូរព័ត៌មានរបស់អ្នកកាសែត ឬលក់ព័ត៌មានទៅឲ្យអង្គភាពព័ត៌មានដទៃទៀតអាចទទួលយកបាននោះ ទំនាក់ទំនងទាំងនេះមានអំពើពុករលួយ ពីព្រោះក្រុមហ៊ុន Stratfor គឺជាស្ថាប័នស៊ីបអង្កេតឯកជនមួយ ដែលបម្រើឲ្យរដ្ឋាភិបាល និងអតិថិជនឯកជន” ។
នៅក្នុងអត្ថបទមួយដែលចុះផ្សាយកាលពីថ្ងៃទី៦ខែមីនា ឆ្នាំមុន ប្រកាសតែងតាំងលោក គ្រីស ដ័រ ជំនួសលោក មួន រ៉ាម៉ាឌី ជាអគ្គនាយកកាសែតភ្នំពេញប៉ុស្តិ៍នោះ លោក គ្រីស ដ័រ បានហៅកាសែតរបស់លោកថា ជា “បណ្តាញព័ត៌មានឯករាជ្យតែមួយគត់នៅក្នុងប្រទេសកម្ពុជា”៕
ប្រែសម្រួលដោយ អ៊ូច សូនី