30 C
Phnom Penh

គ្រឿងចក្រ​​របស់​ក្រុមហ៊ុន​ ទ្រី ភាព​ ត្រឡប់​មក​ឈូស​ឆាយ​ជា​ថ្មី​ ប៉ុន្តែ​ត្រូវ​អ្នក​ភូមិរារាំង​ម្ដង​ទៀត​

ដោយ ឌឹ ខេមបូឌា ដេលី

បទវិភាគ

មន្ត្រី​ និង​ប្រជាពលរដ្ឋ​ក្នុង​មូលដ្ឋាន​បាន​និយាយ​ថា កាល​ពី​ថ្ងៃ​សៅរ៍​ អ្នក​ភូមិ​ប្រហែល​​១០០​នាក់​នៅ​ស្រុក​រវៀង​ ខេត្ត​ព្រះ​វិហារ​​បាន​​ចេញ​មក​​​តវ៉ា​ជា​លើក​ទី​២ នៅ​សប្ដាហ៍​នេះ​ ដើម្បី​រារាំង​​គ្រឿង​ចក្រ​ឈូស​ឆាយ​ដី​ ដែល​ជា​កម្មសិទ្ធិ​របស់​លោក​ ទ្រី​ ភាព​ ជា​អ្នក​ជំនួញ​ដ៏​ល្បី​ល្បាញ​មិន​ឲ្យ​រាន​ដី​របស់​ពួក​គាត់​ ដែល​ស្ថិត​នៅ​​ក្បែរ​ចម្ការ​កៅស៊ូ​របស់​លោក​នោះ​។

លោក​ សៀក​ សុខា អាយុ​៥២​ឆ្នាំ​​ជា​អ្នក​ភូមិ​ម្នាក់​ក្នុង​ចំណោម​អ្នក​ភូមិ​ដែល​ធ្វើ​ការ​តវ៉ា​​បាន​និយាយ​ថា លោក​អភិបាល​ស្រុក​បាន​និយាយ​ជា​​មួយ​គ្រួសារ​​ប្រជាពលរដ្ឋ​ ដែល​រង​​ផល​ប៉ះពាល់​ ហើយ​បាន​ប្រាប់​ពួក​​គាត់​ថា អាជ្ញាធរ​​រាន​ដី​តំបន់​នេះ​ ដើម្បី​កំណត់​ព្រំ​ប្រទល់​​សម្បទាន​​ដី​សង្គម​កិច្ច​ទំហំ​១.០០០​ហិក​តា​​ សម្រាប់​​អ្នក​ភូមិ​ជនជាតិ​ភាគ​តិច​កួយ​​ ចំនួន​២០០​នាក់​ ហើយ​ថា អាជ្ញាធរ​​មាន​គម្រោង​​ក​សាង​​ភូមិ​ថ្មី​មួយ​ ដើម្បី​តាំង​ទី​លំនៅ​ថ្មី​សម្រាប់​ប្រជាពលរដ្ឋ​ ដែល​បាត់​បង់​​ដី​ធ្លី​របស់​ខ្លួន​។​

លោក​ សុខា បាន​និយាយ​ថា “យើង​មិន​ជំទាស់​នឹង​ផែនការ​របស់​ស្រុក​ ក្នុង​ការ​បង្កើត​​ភូមិ​​នោះ​​ទេ​ ប៉ុន្តែ​យើង​មិន​ព្រម​​ឲ្យ​គេ​បណ្ដេញ​​ចេញ​​ពី​ដី​ និង​រុះរើ​ផ្ទះ​សម្បែង​​របស់​​យើ​ងទេ​”។ ដោយ​សំដៅ​ដល​់​​ការ​រាន​ដី​កាល​ពី​ថ្ងៃ​ព្រហស្បតិ៍ ដែល​ក៏​ត្រូវ​បាន​គ្រួសារ​​ប្រជា​ពលរដ្ឋ​​រារាំង​តាម​រយៈ​ការ​តវ៉ា​ផង​ដែរ​​នោះ​ លោក​​ សុខា បាន​និយាយ​ថា “យើង​​​រារាំង​ការ​រាន​ដីនេះ​​ពីព្រោះ​…  ពួក​គេ​​មិន​បាន​ជូន​ដំណឹង​​យើង​អំពី​ការ​រាន​ដី​ជា​លើក​ទី​២ទេ”។

នៅ​ថ្ងៃ​ដដែល​​នោះ​​ អ្នក​តវ៉ា​ជាង​​១០០​នាក់​​ ដែល​តំណាង​ឲ្យ​ប្រជាពលរដ្ឋ​​ប្រហែល​១០០​គ្រួសារ​​មក​ពី​ឃុំ​រមណីយ ដែល​​រស់​នៅ​តំបន់​​ជាប់​នឹង​​​ចម្ការ​​កៅស៊ូ​​របស់​លោក​ ទ្រី ភាព​ បាន​រារាំង​គ្រឿង​ចក្ររបស់​ក្រុម​ហ៊ុន​លោក​ ពីព្រោះ​ពួក​គាត់​ជឿថា ដី​នេះ​​កំពុង​ត្រូវ​​បាន​រាន​ ដើម្បី​ពង្រីក​ចម្ការ​កៅស៊ូ​របស់​លោក​ ទ្រី ភាព ដែល​គេ​ប៉ាន់​ប្រមាណ​ថា មាន​​ទំហំ​ប្រហែល​​១០.០០០​ហិកតា។

លោក​ ឈិត​ អឿង​ នាយ​ប៉ុស្ដិ៍​ឃុំ​រមណីយ​​បាន​មាន​ប្រសាសន៍កាល​ពី​ថ្ងៃ​ព្រហស្បតិ៍​ថា ការ​រាន​ដី​នេះ​ត្រូវ​បាន​ផ្អាក​ ដើម្បី​ទុក​ពេល​ឲ្យ​គ្រួសារ​​ប្រជាពលរដ្ឋ​ និង​អាជ្ញាធរ​អាច​ចរចា​គ្នា​​។​ ប៉ុន្តែ​​កាល​ពី​ព្រឹក​​ថ្ងៃ​សៅរ៍​ គ្រឿង​ចក្រ​ឈូសដី​​​ជាមួយ​នឹង​​​សន្ដិសុខ​​​មួយ​ក្រុម​មាន​​គ្នា​១០​នាក់​​ ដែល​ដឹកនាំដោយ​លោក​ ឯសារ៉ូអភិបាល​​ស្រុក​រវៀង​​​​បាន​ត្រឡប់​មក​វិញ​ ហើយ​ចាប់​ផ្ដើម​រាន​ដី​មួយ​កន្លែង​ទៀត ​​ស្ថិត​នៅ​ចម្ងាយ​ប្រហែល​ប្រាំ​រយម៉ែត្រ​ពី​​កន្លែង​ដែល​ត្រូវ​បាន​រានពី​​ដំបូង​។

លោក​ សៀក​ សុខា បាន​និយាយ​ថា លោក​​​អភិបាល​ស្រុក​​បាន​អញ្ជើញ​​អ្នក​តវ៉ា​ឲ្យ​ចូល​រួម​ប្រជុំ​​កាល​ពី​ថ្ងៃ​សៅរ៍ ប៉ុន្តែ​​​​នៅ​ពេល​នោះ​លោក​បែរ​ជា​មិន​បាន​​​​បង្ហាញ​​ខ្លួន​ទៅ​វិញ​​ ហើយ​ក្រោយ​​មក​លោក​ សារ៉ូ បាន​​បន្ទោស​​​​​ថា ​​កាល​វិភាគ​ដ៏​​មមា​ញឹក​របស់​លោក​​បាន​បណ្ដាល​ឲ្យ​លោក​​អវត្ត​មាន​។ លោក​ សារ៉ូ បានមាន​ប្រសាសន៍​​បន្ថែម​​កាល​ពី​ម្សិលមិញ​ថា​ អ្នក​ភូមិ​យល់​ខុស​​ចំពោះ​​វត្តមានរបស់​​​គ្រឿង​ចក្រ​​ឈូសឆាយ​ដី​នេះ​។

លោក​បាន​មានប្រសាសន៍​ថា “ប្រជាពល​រដ្ឋ​ព្រួយ​បារម្ភ​​ ពីព្រោះ​ពួក​គាត់​​ខ្លាច​ថា យើង​​រាន​ដី​ចម្ការ​ និងរុះរើ​​ផ្ទះ​សម្បែង​​របស់​​ពួក​គាត់។ ខ្ញុំ​បាន​ប្រាប់​​ពួក​គាត់​ថា ឥឡូវ​នេះ​យើង​​គ្រាន់​តែ​​កំណត់​​ព្រំ​ប្រទល់​​​សម្បទាន​ដី​សង្គម​កិច្ច​​តែ​ប៉ុណ្ណោះ​ ប៉ុន្តែ​ពួក​គាត់​មិន​អនុ​ញ្ញាត​ឲ្យ​យើង​​ធ្វើ​ដូច្នេះ​​ទេ​”។​ នៅ​ពេល​សួរ​ថា តើ​ដី​ដែល​ត្រូវ​បាន​រាន​​កាល​ពី​ថ្ងៃ​សៅរ៍​  ​​ក៏​ជា​ផ្នែក​មួយ​នៃ​សម្បទាន​ដី​សង្គម​កិច្ច​ ដែល​​បាន​រាយការណ៍​​ឬ​យ៉ាង​ណា​នោះ​ លោក​ សារ៉ូ ​បាន​មាន​ប្រសា​សន៍​ថា លោក​មិន​ដឹង​​ច្បាស់​​ថា សម្បទាន​ដី​សង្គម​កិច្ច​​​ចាប់​ផ្ដើម​​និង​បញ្ចប់​​ត្រឹម​ណា​​នោះ​ទេ​។ បន្ទាប់​មក​​លោក​ សារ៉ូ បាន​​ទទួល​ស្គាល់​​ថា តំបន់​ដែល​បច្ចុប្បន្ន​កំពុង​ត្រូវ​បាន​រាន​​ដោយ​ក្រុម​ហ៊ុន​ ទ្រី ភាព​ នេះ​​ស្ថិត​​នៅ​​ចម្ងាយ​ប្រហែល​មួយ​គីឡូ​ម៉ែត្រ​ក្រៅ​​តំបន់​សម្ប​ទាន​ដី​សង្គម​កិច្ច​ ដែល​​បាន​ស្នើ​នោះ​​។​

លោ​ក ឡោ ចាន់​ អ្នក​សម្រប​សម្រួល​​ប្រចាំ​​ខេត្ត​មក​ពី​អង្គការ​សិទ្ធិ​មនុស្ស​អាដ​ហុក​ ដែល​មាន​វត្តមាន​នៅ​​ក្នុង​ការតវ៉ា​កាល​ពី​ថ្ងៃ​សៅរ៍​នោះ​ បាន​មានប្រសាសន៍​ថា បើ​ទោះបី​ជា​ផ្នែក​​​នៃ​សម្បទាន​ដី​សង្គម​កិច្ច​ ដែល​តាម​​ព័ត៌មាន​ថា ត្រូវ​បាន​លៃលក​សម្រាប់​​គ្រួសារ​​ជន​ជាតិ​ភាគ​តិច​កួយ​​ក៏​ដោយ​ ក៏​លោក​ជឿ​ថា ផ្នែក​​នៅ​សល់​នៃ​ដី​នេះ​​នឹង​ត្រូវ​​លក់​​ទៅ​​ឲ្យ​ក្រុមហ៊ុន​ ទ្រី​ ភាព​។ លោក​បាន​មានប្រសាសន៍​ថា “ខ្ញុំ​គិត​ថា អាជ្ញាធរ​កំពុង​រាន​ដី​​ឲ្យ​លោក​ឧកញ៉ា​ ទ្រី ភាព​ ពីព្រោះ​គ្រឿង​ចក្រ​ឈូសឆាយ​ដី​ និង​អ្នក​បើកបរ​​សុទ្ធ​តែ​មក​​ពី​ក្រុមហ៊ុន​ទ្រី ភាព​ ហើយ​អាជ្ញាធរ​បាន​​ផ្ដល់​ហេតុផល​​ខុសគ្នា​​អំពី​មូល​ហេតុ​​នៃ​ការ​រាន​ដី​នេះ​”៕

ប្រែសម្រួលដោយ​ អ៊ូច សូនី

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស