28 C
Phnom Penh

មាន​ការ​ចល័ត​ទ័ព​ក្នុង​ខេត្ត​ព្រះវិហារ​​មុន​ការ​ប្រកាស​សាល​ក្រម​

ដោយ ឌឹ ខេមបូឌា ដេលី

បទវិភាគ

ខណៈ​មន្ត្រី​ថៃ​ និង​មន្ត្រី​កម្ពុជា​នៅក្នុង​ក្រុង​​ប៉ោយប៉ែត​​បាន​ប្ដេជ្ញារក្សា​ទំនាក់​ទំនង​​ទ្វេ​ភាគី​​ឲ្យ​​​នៅ​​​ល្អ​​​​មុន​​ពេល​​​តុលា​ការ​​​​​​​​យុត្តិធម៌​​​អន្តរជាតិ​​​​​ប្រកាស​​​​សាល​​ក្រម​​​ពាក់ព័ន្ធ​​​នឹង​​​វិវាទ​​​ព្រំដែន​​​​​​​ដែល​គេ​ទន្ទឹង​រង់ចាំ​ជា​យូរ​មក​ហើយ​នោះ​ កង​ទ័ព​​កម្ពុជា​រាប់​ពាន់​​​នាក់​​បាន​​​ប្រមូល​ផ្ដុំ​គ្នា​ក្បែរ​តំបន់​​​​ព្រំដែន​​​​​​នេះ កាល​ពី​ម្សិល​មិញ​។

មន្ត្រី​យោធា​​​​ដែល​ឈរ​ជើង​នៅ​ក្នុង​ខេត្ត​ព្រះវិហារ​ បាន​ឲ្យ​ដឹង​ថា កង​ទ័ព​បានមក​តំបន់​នេះ​​​​​​​ដើម្បី​ទទួល​អំណោយ​​​​​ពី​​កូនៗ​​របស់​លោក​នាយក​រដ្ឋ​មន្ត្រី​ ហ៊ុន សែន​ ដែល​រួម​មាន​ទាំង​លោក​ ហ៊ុន ម៉ាណែត​ ឧត្តម​សេនីយ៍​​ឯក​ក្នុង​ជួរ​​កង​យោធពល​​ខេមរភូមិន្ទ​ ប៉ុណ្ណោះ​។

លោក​ ជា តារា​​​ នាយឧត្តម​សេនីយ៍​​​​នៃ​​​កង​យោធ​ពល​ខេមរ​ភូមិន្ទ ​បាន​មានប្រសាសន៍​ថា “ថ្ងៃ​នេះ​​​​​កូន​ប្រុស​​នាយក​រដ្ឋ​មន្ត្រី​របស់​​យើង​ គឺ​លោក​ ហ៊ុន​ ម៉ាណែត​ និង​ប្អូន​ស្រី​របស់​ខ្លួន​​​​​គឺ​អ្នក​​​​ស្រី ហ៊ុន ម៉ាណា បាន​មក​ចែក​អំណោយ​​​​​​​​ជា​ស្បៀង​អាហារ​​ និង​ប្រាក់​​កាស​ដល់​គ្រួសារ​​កង​​ទ័ព​កង​យោធពល​ខេមរភូមិន្ទ​​គ្រប់​ៗ​រូប​ ក្នុង​នោះ​​ក៏​មាន​អាវ​រងា​​​សម្រាប់​​កង​ទ័ព​​របស់​យើង​​ផង​ដែរ​ ព្រោះ​ថា​​​រដូវ​រងា​បាន​ចូល​មក​​ដល់​ហើយ​​”។

ឧត្តម​សេនីយ៍​ ជា តារា​​​ បាន​​ឲ្យ​ដឹង​ថា កូនៗ​របស់​លោក​នាយក​រដ្ឋ​មន្ត្រី​មិន​​បាន​​ទៅ​​ដល់់​ប្រាសាទ​​ព្រះ​វិហារ​ ដែល​ជាតំបន់មានជម្លោះ​​ ហើយបណ្ដាល​ឲ្យ​មាន​​ការ​ប្រយុទ្ធ​បង្ហូរ​ឈាម​​ជាមួយ​​ភាគី​ថៃ​ប៉ុន្មាន​លើក​​មក​ហើយ​​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ​​ គឺ​គ្រាន់​តែ​បាន​ទៅ​​សួរ​សុខ​ទុក្ខកង​ទ័ព​​នៅ​ក្នុង​មូលដ្ឋាន​មួយ​​ក្បែរ​​នោះ​ប៉ុណ្ណោះ​។ លោក​បាន​បដិសេធ​មិន​បញ្ជាក់​​ថា តើ​មាន​កង​ទ័ព​ចំនួន​ប៉ុន្មាន​ឲ្យ​ប្រាកដ​ ដែល​បាន​មក​​ចូល​រួម​ក្នុង​ពិធី​ចែក​អំណោយ​នេះ​ទេ​ ដោយ​គ្រាន់​តែ​បាន​​​​បង្ហើប​​​ឲ្យ​ដឹង​ថា មាន​ចំនួន​លើស​ពី​១.០០០​នាក់​។

លោក​បាន​ឲ្យ​ដឹង​ថា ស្ថានភាព​នៅ​តាម​​បណ្ដោយ​ព្រំដែន​​ គឺ​មាន​សភាព​ស្ងប់ស្ងាត់​ ហើយ​គ្មាន​​អ្វី​ខុ​ស​ប្រក្រតី​ជុំ​វិញ​ការ​​ពង្រឹង​​កម្លាំ​ង​នៅ​មូលដ្ឋាន​នេះ​ទេ​។
លោក​បាន​មានប្រសាសន៍​ថា “​​​ព្រំដែន​​របស់​យើង​នៅ​ប្រាសាទ​​ព្រះ​វិហារ គឺ​​​​​ពុំ​មាន​បញ្ហា​អ្វី​ទេ​ ទោះ​បី​ភាគី​ថៃ​​បាន​ចល័ត​ ឬ​ផ្លាស់​ប្ដូរ​​កង​​​កម្លាំង​របស់​​ខ្លួន​ក៏​ដោយ​។ កង​ទ័ព​​កម្ពុជា​​​​របស់​យើង​​កំពុង​រស់​នៅ​​ដូច​សព្វ​មួយ​ដង​”​​​។

វរសេនីយ៍​ឯក​ មាស​ យឿន​ មេបញ្ជា​ការ​​រង​កង​យោធពល​​ខេមរភូមិ​ន្ទ​ប្រចាំ​ខេត្ត​នេះ​ បាន​​ឲ្យ​ដឹង​ថា អំណោយ​​ទាំង​នោះ​រួម​មាន​​ថ្នាំ​ពេទ្យ​ និ​​​ង​គ្រឿង​ឧបភោគ​បរិភោគ​ ដូច​ជា​​ សាច់​ជ្រូក ត្រី​ងៀត​ និង​បន្លែ​ជា​ដើម​។

លោក​ ទៀ បាញ់​ រដ្ឋមន្ត្រី​ក្រសួង​​ការពារ​ជាតិ​ បាន​ឲ្យ​ដឹង​ថា កង​ទ័ព​កម្ពុជា​​កំពុង​ត្រូវ​បាន​​ដាក់​​ពង្រាយ​ឡើង​វិញ​នៅ​ក្នុង​ខេត្ត​នេះ​ មែន​​​ ប៉ុន្តែ​លោក​​បាន​បដិសេធ​មិន​បរិយាយ​​លម្អិត​ទេ​ ហើយ​​បាន​​សង្កត់​ធ្ងន់ថា វា​គ្មាន​អ្វី​ខុស​ពី​​ប្រក្រតី​ឡើយ​។ លោក​បាន​មានប្រសាសន៍​បន្ត​​​ថា “យើង​ត្រូវ​​ផ្លាស់​ប្ដូរ​កង​ទ័ព​​មួយ​ចំនួននៅ​តំបន់​​មួយ​ចំនួន​ ដូច្នេះ​វា​គ្មាន​អ្វី​ថ្មី​ទេ​”។

គួរ​បញ្ជាក់​ថា  ការ​ដាក់​ពង្រាយ​​កង​ទ័ព​ឡើង​វិញ​នេះ​ គឺ​ធ្វើ​ឡើង​រយៈ​ពេល​តែ​ពីរ​​សប្ដាហ៍​ប៉ុណ្ណោះ​​មុន​ពេល​តុលាការ​យុត្តិធម៌​អន្តរជាតិ​​ចេញ​សាល​ក្រម​ដែល​ត្រូវ​បាន​​គេ​ទន្ទឹង​​រង់​ចាំ​ជា​យូរ​មក​ហើយ​នៅថ្ងៃ​ទី​១១​ ខែ​វិច្ឆិកា។ សាល​ក្រម​នេះ​​គឺ​​​នឹ​ងកំណត់​​ថា តើ​ប្រទេសមួយ​ណា​​ជា​ម្ចាស់​​ដី​​ទំហំ​៤,៦​គីឡូ​ម៉ែត្រ​ក្រឡា​ក្បែរ​ប្រាសាទ​ព្រះវិហារ​។ គួរ​រំឭក​​​​ផងដែរ​​​ថា កង​ទ័ព​ថៃ​ និង​កង​ទ័ព​កម្ពុជា​​ធ្លាប់​​​បាន​ធ្វើ​​​ការ​ប្រយុទ្ធ​​​​​​គ្នា​​​ បណ្ដាល​ឲ្យ​មាន​​​មនុស្ស​ស្លាប់​រយៈ​ពេល​ប៉ុន្មាន​ថ្ងៃ​​ជាប់​​​​​​​គ្នា​​នៅ​​​​ទី​នោះ​ ​​​កាលពី​​​​ដើម​​ឆ្នាំ​២០១១។

លោក​ ធី តារា ដែល​ធ្វើ​ការ​​ជាមួយ​​នឹង​អង្គការ​​ Jesuit Relief Service of Cambodia ក្នុង​ខេត្ត​នេះ​ បាន​ឲ្យ​ដឹង​ថា ខ្លួន​បាន​ឃើញ​​កង​ទ័ព​​ប្រដាប់​អាវុធ​​រាប់​ពាន់​នាក់​មក​តំបន់​នេះ​​​​តាំង​ពី​ថ្ងៃ​សុក្រ​មក​​​ម៉្លេះ​​​​។​ លោក​​ តារា បាន​បន្ថែម​​​ថា ខ្លួន​បាន​ឃើញ​រថយន្ត​​ដឹក​កង​ទ័ព​​បំពាក់​អាវុធ​ស្វ័យ​ប្រវត្តិ​ជាង​​២៥​គ្រឿង​​ធ្វើ​ដំណើ​រ​ឆ្ពោះ​ទៅ​ព្រំដែន​​កាល​ពី​ថ្ងៃ​សុក្រ​​ កា​ត់​តាម​​​ស្រុក​រវៀង​។ នៅ​ពេល​ធ្វើ​ដំណើរ​​កាត់​ស្រុក​គូលែន​ កាល​ពី​ថ្ងៃ​​​ម្សិល​មិញ​ លោក​បាន​​ឃើញ​កង​ទ័ព​រាប់រយ​នាក់​បោះ​ជំរំ​​​នៅ​តាម​បណ្ដោយ​ផ្លូវ​នោះ​។

លោក​បាន​មាន​ប្រសាសន៍​ថា “វា​ជា​រឿង​​ចម្លែក​មួយ​ដែល​យើង​ឃើញ​កង​ទ័ព​គ្រប់​កន្លែង​បែប​នេះ​។ ខ្ញុំ​មិន​ដែល​ឃើញ​កង​ទ័ព​នៅ​ទី​នោះ​ទេ​ពី​មុន​មក​”។
ថៃ​ និង​កម្ពុជា​​ បាន​ដក​កងទ័ព​របស់ខ្លួន​​ចេញ​ពី​តំបន់​ប្រាសាទ​ព្រះវិហារ​​តាម​សេចក្ដី​បង្គាប់​របស់​​តុលាការ​យុត្តិធម៌​អន្តរជាតិ​​​​ក្នុង​ឆ្នាំ​២០១២ ប៉ុន្តែ​​បាន​រក្សា​ទុក​​កងទ័ព​​នៅ​តំបន់​ក្បែរ​នោះ​ដដែល។

ក្នុង​រយៈ​ពេល​ប៉ុន្មាន​ថ្ងៃ​ចុង​ក្រោយ​នេះ​ រដ្ឋាភិបាល​ទាំង​ពីរ​​បាន​ជំរុញ​កង​ទ័ព​របស់​ខ្លួន​​ឲ្យ​រក្សា​ភាព​ស្ងប់​ស្ងៀម​​មុន​ការ​​ប្រកាស​​សាល​ក្រម​​នៅ​​ខែ​ក្រោយ​ ដោយ​សារ​មាន​ការ​​​ព្រួយ​​​​​បារម្ភ​ថា ​វា​អាច​បង្ក​ឲ្យ​មាន​ការ​ប្រយុទ្ធ​គ្នា​​ជា​ថ្មី​ទៀត​ ហើយ​បាន​ប្ដេជ្ញា​អនុវត្ត​​​តាម​​​សេចក្ដី​សម្រេច​​របស់​តុលាការ​​យុត្តិធម៌​អន្តរជាតិ​ទោះ​បី​ជា​​សេចក្ដី​សម្រេច​នោះ​មាន​ខ្លឹម​សារ​​យ៉ាង​ណា​ក៏​ដោយ​ចុះ​​​។ រដ្ឋ​មន្ត្រី​ក្រសួង​ការបរទេស​​នៃ​ប្រទេស​ទាំង​ពី​រ​​បាន​ដឹក​នាំ​កិច្ច​ប្រជុំ​បន្ទាន់​មួយ​​នៅ​ក្នុង​ក្រុង​ប៉ោយប៉ែត​ កាល​ពី​ម្សិលមិញ​​​​នេះ​​​។

ឧត្ត​មសេនីយ៍​ ទៀ បាញ់​ ដែល​បាន​ចូល​រួម​ក្នុង​កិច្ច​ប្រជុំ​នេះ​ បាន​ឲ្យ​ដឹង​ថា ភាគី​ទាំង​ពីរ​​បាន​បញ្ជាក់​សាជាថ្មី​​ពី​ការ​ប្ដេជ្ញា​របស់​​ខ្លួន​​ក្នុង​ការ​បញ្ចៀស​​ការ​ប្រើ​អំពើហិង្សា​​ ទោះ​ជា​សាល​ក្រម​ពី​​​តុលាការ​​​មាន​សេចក្ដី​សម្រេច​​បែប​ណា​ក៏​ដោយ​”។ លោក​បានថ្លែង​ថា “យើង​នឹង​​មិន​បណ្ដោយ​​​​ឲ្យ​មាន​ការ​ប្រឈ​​​ម​​​មុខ​ដាក់គ្នា​ទេ​ ព្រោះ​ភាគី​របស់​យើង​នឹង​​ប្រកាន់​​​​ជំហរ​​អហិង្សា​  ហើយ​ភាគីថៃ​នឹង​ធ្វើ​ដូចគ្នា​ដែរ​។ យើង​​ដាច់​ខាត​មិន​​​បណ្ដោយ​ឲ្យ​ភាគី​ទាំង​ពីរ​​ប៉ះទង្គិច​គ្នា​ទេ​ ហើយ​យើង​នឹង​រក្សា​កិច្ច​សហ​ប្រតិបត្តិការ​​”។​ លោក​បាន​បដិសេធ​​មិនបញ្ជាក់​ថា តើ​ភាគី​ទាំង​ពីរ​​កំពុង​ចាត់​វិធានការ​អ្វី​ ដើម្បី​ធានា​ឲ្យ​បាន​ថា ភាគី​ទាំង​ពីរ​​នឹង​​ចៀស​ផុត​ពី​ការ​ប៉ះ​ទង្គិច​គ្នា​​​​ទេ​​​ ហើយ​ក៏​មិន​ធ្វើ​អត្ថាធិប្បាយ​អំពី​​ខ្លឹម​​​​សារ​​នៃ​កិច្ច​ប្រជុំ​នេះ​ដែរ​៕ (សេរីវុធ)

(រាយការណ៍​បន្ថែម​ដោយ​ ឃី សុវុឌ្ឍី និង Zsombor Peter​)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស