នគរបាលបានឲ្យដឹងកាលពីម្សិលមិញថា បុរសជនជាតិអង់គ្លេសអាយុ៣៥ឆ្នាំម្នាក់ ដែលត្រូវកាត់ឲ្យជាប់ទោស ត្រូវបានចាប់ខ្លួនកាលពីថ្ងៃអាទិត្យនៅផ្ទះសំណាក់ដែលខ្លួនស្នាក់នៅ ក្នុងរាជធានីភ្នំពេញ។ នៅទីនោះ នគរបាលប្រឆាំងការជួញដូរមនុស្សបានឃើញ បុរសចូលចិត្តរួមភេទជាមួយកុមាររូបនេះ កំពុងនៅជាមួយក្មេងប្រុសអាយុ៨ឆ្នាំម្នាក់។
លោកវរសេនីយ៍ទោ ឡៅ លីន ប្រធាននាយកដ្ឋានប្រឆាំងការជួញដូរមនុស្សនៅ ក្រសួងមហាផ្ទៃ បានឲ្យដឹងថា លោក រីឆាត ហ្រ៊ូន (Rechard Fruin) ដែលបានភៀសខ្លួនមកប្រទេសកម្ពុជា បន្ទាប់ពីជាប់ក្នុងពន្ធនាគាររយៈពេលមួយឆ្នាំនៅក្នុងចក្រភពអង់គ្លេស ពីបទផលិតរូបអាសអាភាសកុមារ ត្រូវបានចាប់ខ្លួននៅក្នុងផ្ទះសំណាក់បឹងមាស ក្នុងខណ្ឌដូនពេញ នៅវេលាម៉ោងប្រមាណជា៨យប់កាលពីថ្ងៃអាទិត្យ។ លោក ឡៅ លីន បានឲ្យដឹងកាលពីម្សិលមិញថា “យើងបានចាប់ខ្លួនជននេះ ពីបទដេក ជាមួយក្មេងប្រុសអាយុ៨ឆ្នាំរូបនេះនៅផ្ទះសំណាក់ដែលជននេះស្នាក់នៅ”។
លោកបានមានប្រសាសន៍បន្តថា “យើង កំពុងស៊ើបអង្កេត ដើម្បីកំណត់ថា តើជននេះ បានរួមភេទជាមួយក្មេងប្រុសរូបនេះដែរឬអត់”។ លោកបានឲ្យដឹងបន្ថែមទៀតថា ជនសង្ស័យឈ្មោះ ហ្រ៊ូន កំពុងត្រូវឃុំខ្លួននៅក្រសួងមហាផ្ទៃ ហើយនឹងត្រូវបញ្ជូនខ្លួនទៅសាលាដំបូងរាជធានីភ្នំពេញ នៅពេលនគរបាលបញ្ចប់ការសាកសួររបស់ខ្លួន។
អ្នកស្រី ប៉ែន ចាន់ថា ម្ចាស់ផ្ទះសំណាក់បឹងមាស បានឲ្យដឹងថា ជនសង្ស័យឈ្មោះ ហ៊្រូន បាននិងកំពុងស្នាក់នៅក្នុងផ្ទះសំណាក់នៅក្នុងសង្កាត់ស្រះចកនេះអស់រយៈពេលប្រហែលមួយខែមកហើយ។ អ្នកស្រី ចាន់ថា បានមានប្រសាសន៍ថា “ខ្ញុំ រន្ធត់ចិត្ត ពេលនគរបាលមកចាប់ខ្លួនគាត់…។ ខ្ញុំមិនដែលឃើញអ្វីប្លែកទេ ពេលគាត់កំពុងស្នាក់នៅក្នុងផ្ទះសំណាក់របស់ខ្ញុំ”។
យោងតាមអង្គការសកម្មភាពដើម្បីកុមារ(NGO Action pour les Enfants, APLE) ជាអង្គការ ក្រៅរដ្ឋាភិបាលប្រឆាំងការរួមភេទជាមួយកុមារ ដែលបានចាប់ផ្តើមស៊ើបអង្កេតករណីលោក ហ៊្រូន កាលពីខែមុន បានឲ្យដឹងថា ជនជាតិអង់គ្លេសដែលបានរំលោភកុមាររូបនេះ បាននិងកំពុងធ្វើការជាគ្រូបង្រៀនភាសាអង់គ្លេស នៅក្នុងរាជធានីភ្នំពេញ។
ក្នុងឆ្នាំ២០០៥ ជនសង្ស័យឈ្មោះ ហ៊្រូន ត្រូវបានតុលាការគ្លូសេស្ទ័រ ក្រោន (Gloucester Crown Court) នៅក្នុងប្រទេសអង់គ្លេសចោទប្រកាន់ក្នុងរឿងក្តីចំនួន១៥ករណី ពីបទផលិត រូបអាសអាភាសកុមារ ក៏ប៉ុន្តែត្រូវបានដោះលែងឲ្យនៅក្រៅឃុំជាបណ្តោះអាសន្ន និងបានភៀសខ្លួនចេញពីប្រទេសនេះអស់រយៈពេលប្រាំពីរឆ្នាំ នេះបើយោងតាមអង្គការ សកម្មភាពដើម្បីកុមារ ហើយជននេះបានធ្វើដំណើរទៅទ្វីបអាហ្រ្វិក និងអាស៊ីអាគ្នេយ៍ មុនពេលវិលត្រឡប់ទៅកាន់ចក្រភពអង់គ្លេសវិញ។ នៅប្រទេសរបស់ខ្លួន ជននេះក៏ត្រូវបានចាប់ខ្លួនម្តងទៀតក្នុងឆ្នាំ២០១២ និងត្រូវបានផ្តន្ទាទោសឲ្យជាប់ពន្ធនាគាររយៈពេល មួយឆ្នាំ។ បន្ទាប់ពីជាប់ទោស គាត់បានធ្វើដំណើរមកប្រទេសកម្ពុជាភា្លម។
លោក ឃឿម វ៉ាន់ដូ អនុប្រធានគ្រប់គ្រងគម្រោងនៅអង្គការសកម្មភាពដើម្បីកុមារ បានមានប្រសាសន៍កាលពីម្សិលមិញថា “ជននេះមានប្រវត្តិរំលោភ ហើយក្រុមនគរបាលក៏បានរកឃើញជនរងគ្រោះ[កម្ពុជា]កាន់តែច្រើនឡើងៗផងដែរ”។ ម្តាយរបស់ក្មេងប្រុសអាយុ៨ឆ្នាំ ដែល ត្រូវបានឃើញនៅជាមួយជនសង្ស័យឈ្មោះ ហ៊្រូន កាលពីយប់ថ្ងៃអាទិត្យ បានឲ្យដឹងកាលពីម្សិលមិញថា បន្ទាប់ពីការចាប់ខ្លួនជនរួមភេទជាមួយកុមាររូបនេះ កូនប្រុសទាំងបីនាក់របស់អ្នកស្រី បូករួមទាំងកូនប្រុសពីរនាក់អាយុ១០ឆ្នាំនិង១១ឆ្នាំផងដែរ បានប្រាប់នគរ បាលថា ពួកគេសុទ្ធតែត្រូវបានបុរសជនជាតិអង់គ្លេសរូបនេះរំលោភ។
ស្ត្រីជាម្តាយបានលើកឡើងថា “បើនគរបាលមិនចាត់វិធានការកាលពីយប់មិញទេនោះ ខ្ញុំមិនដឹងថា គាត់ធ្វើអ្វីខ្លះចំពោះកូនប្រុស របស់ខ្ញុំទេ”។ អ្នកស្រីបានបន្ថែមថា ជនសង្ស័យឈ្មោះ ហ៊្រូន បានទៅលេងតូបលក់នៅតាមចិញ្ចើមផ្លូវរបស់អ្នកស្រី ក្នុងរាជធានីភ្នំពេញអស់រយៈពេលជិតមួយខែ ហើយកន្លងមក ជននេះបាននាំកូនប្រុសបងពីរនាក់របស់អ្នកស្រីទៅកាន់ផ្ទះសំណាក់ដែលខ្លួនស្នាក់នៅ។ ស្ត្រីជាម្តាយរបស់កុមារអាយុ៨ឆ្នាំរូប នេះបាននិយាយបន្ថែមទៀតថា “ខ្ញុំមិនដឹងថា គាត់មានបំណងធ្វើបាបកូនខ្ញុំទេ”៕
ប្រែសម្រួលដោយ ចេវ ប៊ុននី