នៅពេលធ្វើសេចក្តីសន្និដ្ឋានបិទបញ្ចប់ការពិភាក្សាដេញដោលនៅសាលាក្តីខ្មែរក្រហមកាលពីម្សិលមិញ ក្រុមមេធាវីរបស់ជនសង្ស័យឧក្រិដ្ឋកម្មសង្គ្រាម ខៀវ សំផន បានប្រើយុទ្ធសាស្ត្រមួយដែលមានជាយូរមកហើយ ដើម្បីលើកឡើងថា កូនក្តីរបស់ខ្លួនគ្រាន់តែជាបុគ្គលមានបំណងល្អម្នាក់ដែលចង់បានតែសេចក្តីល្អសម្រាប់ប្រទេសរបស់គាត់ បន្ទាប់ពីមានជម្លោះជាច្រើនឆ្នាំ។
លោក គង់ សំអុន មេធាវីរបស់ ខៀវ សំផន បានមានប្រសាសន៍ថា ខណៈដែល ខៀវ សំផន ត្រូវបានចាត់ទុកថា ជាមុខមាត់របស់បក្សកុម្មុយនីស្តកម្ពុជាទាំងនៅក្នុងស្រុកនិងក្រៅប្រទេសនោះ “ តួនាទីរបស់គាត់គឺសម្រាប់តែពិធីការប៉ុណ្ណោះ”។ លោក គង់ សំអុន បានមានប្រសាសន៍ថា “ ប៉ុល ពត មើលឃើញផលប្រយោជន៍ក្នុងការពង្រីកចលនាបដិវត្តន៍នេះ” ដោយការប្រើប្រាស់ប្រជាប្រិយភាពរបស់មនុស្សផ្សេងរួមទាំងព្រះអង្គម្ចាស់ នរោត្តម សីហនុ ដែលត្រូវបានបណ្តេញចេញពីអំណាចក្នុងឆ្នាំ១៩៧០ ហើយបានដឹងថា ខៀវ សំផន គឺជាមនុស្សម្នាក់សម្រាប់ទាក់ទងរបស់អ្នកទាំងនោះ។
លោកបានមានប្រសាសន៍អំពីតួនាទីមានតែឈ្មោះរបស់កូនក្តីលោកថា “នេះហើយជាមូលហេតុដែល ខៀវ សំផន បានទទួលតួនាទីមួយជាប្រធានរណសិរ្សដែលនិរទេសខ្លួននេះ ដើម្បីបញ្ជាក់ពីឯករាជភាព និងបូរណភាពទឹកដីរបស់ជាតិ។ គាត់សុខចិត្តធ្វើជាតំណាងនិងជាចំណុចទំនាក់ទំនងរវាង សីហនុ និងក្រុងប៉េកាំង ជាមួយបក្សកុម្មុយនីស្តកម្ពុជា និងមានលទ្ធភាពក្នុងការតស៊ូនិងបង្រួបបង្រួមកម្លាំង”។
លោក គង់ សំអុន បានមានប្រសាសន៍ថា ខៀវ សំផន ក៏មើលឃើញឱកាសបង្កើតចលនាថ្មីមួយដោយជោគជ័យនៅក្នុងការបង្រួបបង្រួមប្រទេសជាតិឡើងវិញ ទោះបីជាគាត់ដឹងថា ការងារនេះគឺជាការងារគ្មានន័យអ្វីក៏ដោយ។ លោកបានបន្តថា ខៀវ សំផន គឺជាមនុស្សស្មោះត្រង់ម្នាក់។ តុលាការពិតជាខុស ប្រសិនបើមានការចាប់អារម្មណ៍ទៅលើ ខៀវ សំផន ថា ជាយោធាម្នាក់ដែលប្តេជ្ញាបង្កើតយុទ្ធសាស្ត្រយោធានោះ។
លោក សំអុន បានមានប្រសាសន៍ថា “គាត់គ្មានសមត្ថភាព ឬការបណ្តុះបណ្តាល ឬបញ្ជាការផ្នែកយោធាទេ។ នៅក្នុងឋានានុក្រមយោធា [អតីតមេបញ្ជាការទាហានខ្មែរក្រហម] សុន សេន និង ប៉ុល ពត គឺជាអ្នកទទួលខុសត្រូវ មិនមែន ខៀវ សំផន ទេ”។
លោកបានមានប្រសាសន៍ថា លោក ស្ទីហ្វេន ហេដ័រ ប្រវត្តិវិទូខ្មែរក្រហមបានប្រាប់តុលាការអំឡុងពេលគាត់ផ្តល់សក្ខីកម្មកាលពីដើមឆ្នាំនេះថា តួនាទីរបស់ ខៀវ សំផន ជាមេបញ្ជាការរងនៅមុនឆ្នាំ១៩៧៥នោះ គ្រាន់តែជានិមិត្តរូបប៉ុណ្ណោះ។ លោកបានបន្ថែមថា “នៅពេលដែលគាត់ធ្វើដំណើរទៅក្រៅប្រទេស អៀង សារី កាន់កាប់អំណាចនេះ ហើយ ខៀវ សំផន គឺជាប្រធានរដ្ឋ ប៉ុន្តែ នៅពេលដែល អៀង សារី នៅទីនោះ គាត់មានអំណាចខ្លាំង។ យុត្តិធម៌សម្រាប់ ខៀវ សំផន គឺការដោះលែង និងការសម្រេចឲ្យគាត់រួចផុតពីការចោទប្រកាន់”។
លោក អាសឺ វើកខេន មេធាវីជនជាតិបារាំងរបស់ ខៀវ សំផន បានក្រើនរំឭកចៅក្រមអង្គបុរេជំនំុជម្រះ ចំពោះការផ្តន្ទាទោសកូនក្តីរបស់លោកលើសំណុំរឿងមួយដែលគាត់បាននិយាយថា ព្រះរាជអាជ្ញាមិនផ្អែកតាមអង្គហេតុ ប៉ុន្តែ ផ្អែកតាមការសន្មតមិនច្បាស់លាស់។ លោកបានមានប្រសាសន៍ថា “គេកំពុងស្នើសុំឲ្យអស់លោកវិនិច្ឆ័យជនជាប់ចោទរូបនេះចំពោះការមានបំណងចង់បង្កើតរបបកុម្មុយនីស្តនៅកម្ពុជា។ អ្វីដែលកាន់តែច្បាស់ទៅទៀតនោះ គឺទ្រឹស្តីនាពេលថ្មីៗនេះ អំពីជំរំទាសករ។
ចៅក្រមស៊ើបអង្កេតត្រូវមានភាពស្មោះត្រង់ក្នុងការអះអាងថា គោលនយោបាយរបស់កម្ពុជាប្រជាធិបតេយ្យមិនមែនសុទ្ធតែជាបទឧក្រិដ្ឋនោះទេ។ ទ្រឹស្តីថ្មីដែលលើកឡើងដោយព្រះរាជអាជ្ញាអំពីជំរំទាសករនៅទូទាំងប្រទេសនៅក្នុងសំណុំរឿងនេះពិតជាបង្ហាញអំពីវិធីនៃការដោះស្រាយសំណំុរឿងនេះ គឺមានលក្ខណៈនយោបាយច្រើនជាងលក្ខណៈច្បាប់”។
លោកបានមានប្រសាសន៍ថា សំណុំរឿងរបស់ពួកគេប្រឆាំង ខៀវ សំផន ចំពោះការសន្មតពីការជាប់ពាក់ព័ន្ធរបស់គាត់នៅក្នុងការសម្លាប់ទាហាន លន់ នល់ និងមន្ត្រីនៅទួលពោធិ៍ជ្រៃក្នុងខេត្តពោធិ៍សាត់នោះ គឺមិនច្បាស់លាស់ទេ។ លោកបានមានប្រសាសន៍ថា “ អស់លោកក៏មិនបានឮផងដែរអំពីសក្ខីកម្មរបស់សាក្សីដែលថា ពួកគេបានឃើញការសម្លាប់មនុស្សសូម្បីតែម្នាក់។ ពួកគេស្ថិតនៅចម្ងាយពី១០ ទៅ១៥ គីឡូម៉ែត្រ”។
លោកបានមានប្រសាសន៍ថា ព្រះរាជអាជ្ញាប្រញាប់សន្និដ្ឋានពេក មិនគិតឲ្យបានហ្មត់ចត់ដោយការព្យាយាមបង្ហាញភ័ស្តុតាងឲ្យច្បាស់ថា មានគោលនយោបាយសម្លាប់ទាហានមែន និងបង្ហាញថា ខៀវ សំផន បានជាប់ពាក់ព័ន្ធនៅក្នុងរឿងនេះ។
លោក វើកខេន បានមានប្រសាសន៍ថា ការផ្សព្វផ្សាយតាមវិទ្យុរបស់ ខៀវ សំផន ដែលគេបានឮជាទូទៅក្នុងការស្នើឲ្យមានការចាប់ខ្លួនកំពូលជនក្បត់ទាំងប្រាំពីរនាក់នោះ មិនមែនជាភ័ស្តុតាងបង្ហាញពីការជាប់ពាក់ព័ន្ធរបស់គាត់នៅក្នុងការសម្លាប់អតីតមន្ត្រី លន់ នល់ ជាលក្ខណៈប្រព័ន្ធនោះទេ។
លោកបានមានប្រសាសន៍ថា “ទស្សនវិស័យមិនស្មោះត្រង់នៃប្រវត្តិសាស្ត្រមិនត្រូវមានទេនៅក្នុងសាលសវនាការ ដែលមានព្រះរាជអាជ្ញាចម្រុះជាតិសាសន៍ជាច្រើនរូបនេះ”។ ហើយ លោកបានស្នើឲ្យចៅក្រមកុំយកចិត្តទុកដាក់នឹងការលើកឡើងមិនពិតនេះ។
លោកស្រី អានតា ហ្គីស សហមេធាវីរបស់ ខៀវ សំផន បានសង្ខេបពីគោលជំហរបស់ក្រុមលោកស្រី ដោយការប្រាប់ចៅក្រមថា ខៀវ សំផន ត្រូវបានចាត់ទុកថា ជាមនុស្សឃោរឃៅ ដែលការពិតមិនជឿថា គាត់ត្រូវបានចោទប្រកាន់ពីបទល្មើសទាំងអស់នេះទេ។ លោកស្រីបានមានប្រសាសន៍ថា “ចម្លើយគឺថា អស់លោកត្រូវសម្រេចឲ្យជនជាប់ចោទរូបនេះរួចផុតពីការចោទប្រកាន់។
ទោះបីជាអស់លោកបានឮពីការឈឺចាប់របស់ភាគីដើមបណ្តឹងរដ្ឋប្បវេណីក៏ដោយ អស់លោកត្រូវតែសម្រេចឲ្យគាត់រួចផុតពីការចោទប្រកាន់។ ថ្វីបើមានសម្ពាធពីអន្តរជាតិក៏ដោយ អស់លោកត្រូវតែសម្រេចឲ្យគាត់រួចផុតពីការចោទប្រកាន់។ អស់លោកមានភារកិច្ចពាក់ព័ន្ធនឹងច្បាប់ ពាក់ព័ន្ធនឹងនីតិវិធី ហើយត្រូវតែឯករាជ្យនៅក្នុងការវិនិច្ឆ័យរបស់អស់លោក។ តើនេះជាភារកិច្ចដែលអស់លោកនឹងបំពេញឬ? មានតែអស់លោកទេអាចឆ្លើយសំណួរនេះឲ្យបានល្អិតល្អន់”៕ (គឹមហឿន)