លោក កាន វុទ្ធី អភិបាលរងខេត្តព្រះវិហារកាលពីម្សិលមិញ បានប្រាប់តំណាងអ្នកភូមិ៥០នាក់រ ដែលមកពីស្រុករវៀង ដែលជាប់ពាក់ព័ន្ធនៅក្នុងជម្លោះដីធ្លីជាមួយអាជ្ញាធរថា ទោះបីជាពួកគាត់តវ៉ាយ៉ាងណាក៏ដោយ ក៏ដីដែលពួកគាត់ធ្លាប់រស់នៅនេះនឹងត្រូវឈូសឆាយនៅក្នុងថ្ងៃនេះ ដើម្បីធ្វើជាដីសម្បទានសង្គមកិច្ច។
កាលពីសប្ដាហ៍មុន អ្នកភូមិប្រហែលជា១០០គ្រួសារបានរារាំងគ្រឿងចក្រឈូសឆាយចំនួនពីរលើកមិនឲ្យឈូសឆាយដីនៅក្បែរផ្ទះសំបែងរបស់ខ្លួននៅក្នុងភូមិអូរពោធិ៍ ឃុំរមណីយទេ បន្ទាប់ពីអាជ្ញាធរបានចេញសេចក្ដីជូនដំណឹងមួយកាលពីថ្ងៃទី១០ ខែតុលា ឲ្យពួកគាត់ចាកចេញពីតំបន់នេះ។ ដីធ្លីរបស់អ្នកភូមិទាំងនេះ គឺនៅជាប់នឹងចម្ការកៅស៊ូដ៏ធំមួយរបស់លោក ទ្រី ភាព អ្នកជំនួញក្នុងស្រុកដ៏ល្បី។ បុគ្គលិក និងគ្រឿងចក្រឈូសឆាយរបស់លោក ទ្រី ភាព កំពុងតែឈូសឆាយដីនេះ។
លោក ឯ សារ៉ូ អភិបាលស្រុករវៀង ដែលមានវត្តមានអំឡុងកិច្ចប្រជុំជាមួយអភិបាលរងខេត្តបានមានប្រសាសន៍ថា “អភិបាលរង [ខេត្ត] បានប្រាប់អ្នកភូមិជាច្រើនគ្រួសារនេះមិនឲ្យរារាំងអាជ្ញាធរពីការការឈូសឆាយដីនេះនៅ [ថ្ងៃនេះ] ទេ ព្រោះអាជ្ញាធរកំពុងវាស់វែងដីសម្បទានសង្គមកិច្ចសម្រាប់គ្រួសារជនជាតិភាគតិចគួយចំនួន [២១២គ្រួសារ]”។
លោក សារ៉ូ ក៏បានឲ្យអ្នកភូមិ ដែលបានលើកឡើងថា ខ្លួនបានផ្លាស់ទីពីខេត្តផ្សេងៗមករស់នៅតំបន់នេះកាលពីឆ្នាំ២០១០ដោយមានការអនុញ្ញាតពីអាជ្ញាធរមូលដ្ឋាន បង្ហាញឯកសារ ដែលបញ្ជាក់ថា ពួកគាត់រស់នៅលើដីនេះដោយស្របច្បាប់ផងដែរ។ លោកបានមានប្រសាសន៍ថា “យើងនឹងមិនប្រើកងកម្លាំង តទល់នឹងប្រជាពលរដ្ឋជាច្រើនគ្រួសារនេះទេ ប្រសិនបើពួកគាត់តវ៉ានៅថ្ងៃស្អែក ពេលយើងចាប់ផ្ដើមឈូសឆាយដីនេះ ប៉ុន្តែយើងនឹងព្យាយាមពន្យល់ពួកគាត់ម្ដងទៀត ឲ្យយល់ពីអ្វីដែលយើងកំពុងធ្វើ”។
ប្រជាពលរដ្ឋទាំង១០០គ្រួសារនេះត្រូវបានផ្ដល់ដីថ្មី ដែលមានចម្ងាយប្រហែល៥០០ម៉ែត្រពីកន្លែងចាស់ ប៉ុន្តែតំណាងអ្នកភូមិម្នាក់និយាយថា ទីតាំងថ្មីនេះគឺស្ថិតនៅក្នុងព្រៃយ៉ាងជ្រៅ ហើយនៅឆ្ងាយពីផ្លូវជាតិ ដែលធ្លាប់តែលក់ដូរទំនិញផ្សេងៗបាននោះ។
លោក សៀក សុខា អាយុ៥២ឆ្នាំ បាននិយាយថា “យើងមិនយល់ព្រមចំពោះការដោះដូរនេះទេ ហើយយើងមានបំណងតវ៉ាម្ដងទៀតនៅក្នុង [ថ្ងៃនេះ] ប្រសិនបើអាជ្ញាធរនៅតែព្យាយាមឈូសឆាយដីនេះ”។
លោក សារ៉ូ បានលើកឡើងកាលពីថ្ងៃអាទិត្យថា ដីដែលកំពុងត្រូវបានឈូសឆាយដោយក្រុមហ៊ុនរបស់លោក ទ្រី ភាព នេះ គឺមានចម្ងាយប្រហែលមួយគីឡូម៉ែត្រនៅខាងក្រៅដីសម្បទានសង្គមកិច្ច។
លោក ឡោ ចាន់ អ្នកសម្របសម្រួលនៅអង្គការសិទ្ធិមនុស្សអាដហុក ប្រចាំខេត្តព្រះវិហារ បានលើកឡើងកាលពីថ្ងៃច័ន្ទថា លោកជឿជាក់ថា លោក ទ្រី ភាព ប្រហែលជាកំពុងឈូសឆាយដីនេះ ដើម្បីពង្រីកចម្ការកៅស៊ូរបស់ខ្លួន។ លោកបានមានប្រសាសន៍ថា “តាមបទពិសោធន៍របស់យើង នៅពេលអាជ្ញាធរមូលដ្ឋានស្នើឲ្យមានដីសម្បទានសង្គមកិច្ច ពួកគេផ្ដល់ដីឲ្យអ្នកភូមិតែប៉ុន្មានគ្រួសារប៉ុណ្ណោះ ហើយដីដែលនៅសល់ពួកគេទុកសម្រាប់លក់ខ្លួនឯង”។
លោកបានមានប្រសាសន៍បន្ថែមថា “ខ្ញុំមិនអាចនិយាយឲ្យបាន [ច្បាស់] នៅពេលនេះទាក់ទិននឹងដីនៅជាប់ចម្ការកៅស៊ូរបស់ក្រុមហ៊ុន [លោក ទ្រី ភាព] ទេប៉ុន្តែខ្ញុំមានសង្ឃឹមតិចតួចដែលថា គ្រួសារជនជាតិភាគតិចនឹងទទួលបានដីសម្បទានសង្គមកិច្ចទាំងអស់នោះ។ លោកបានមានប្រសាសន៍បន្តទៀតថា “ដីនេះមានតម្លៃណាស់ ពីព្រោះវាមានទីតាំងនៅជាប់ផ្លូវជាតិលេខ៦២” ដោយលោកបានសំដៅទៅលើផ្លូវហាយវេមួយខ្សែទើបតែស្ថាបនារួចប្រវែងប្រហែល១២៨គីឡូម៉ែត្រ ដែលប្រទេសចិនជាអ្នកឧបត្ថម្ភ ដើម្បីធ្វើឲ្យហេដ្ឋារចនាសម្ព័ន្ធដែលខ្សត់ខ្សោយ នៅក្នុងខេត្តព្រះវិហារកាន់តែប្រសើរឡើង។ ហេដ្ឋារចនាសម្ព័ន្ធដែលខ្សត់ខ្សោយនេះជាកត្តារារាំងដល់ក្រុមហ៊ុននានាក្នុងការទាញយកធនធានឲ្យបានពេញលេញនៅក្នុងតំបន់នេះ៕ (ស៊ុយឈាង)