កាលពីម្សិលមិញ គណបក្សសង្គ្រោះជាតិបានចេញលិខិតមួយច្បាប់ជូនទៅក្រុមហ៊ុនវិនិយោគ ប្រទេសនានា និងស្ថាប័នអន្តរជាតិថា ប្រសិនបើគណបក្សរបស់ខ្លួនបានបង្កើតរដ្ឋាភិបាលនោះ ខ្លួននឹងពិនិត្យសើរើឡើងវិញនូវរាល់កិច្ចសន្យាទាំងឡាយណាដែលធ្វើឡើងជាមួយរដ្ឋាភិបាលគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន អំឡុងអាណត្តិបច្ចុប្បន្ននេះ។
លិខិតនេះលើកឡើងថា រាល់កិច្ចសន្យាទាំងឡាយណាដែលចុះហត្ថលេខាដោយរដ្ឋាភិបាលក្នុងអាណត្តិបច្ចុប្បន្នគឺ “ខុសច្បាប់” ពីព្រោះរដ្ឋាភិបាលនេះបង្កើតឡើងដោយសភាឯកបក្ស បន្ទាប់ពីការបោះឆ្នោតជាតិកាលពីថ្ងៃទី២៨ខែកក្កដាដ៏ចម្រូងចម្រាស។ លិខិតនេះលើកឡើងទៀតថា “គណបក្សសង្គ្រោះជាតិមិនទទួលស្គាល់ និងពិនិត្យសើរើឡើងវិញនូវរាល់កិច្ចសន្យាផ្តល់ប្រាក់កម្ចី ការផ្តល់អាជ្ញាប័ណ្ណលើគម្រោងវិនិយោគ ការទិញលក់ ការដោះដូរ និងការជួលអចលនទ្រព្យ ដែលជាសម្បត្តិឯកជនរបស់រដ្ឋ ដែលភាគីពាក់ព័ន្ធធ្វើជាមួយរដ្ឋាភិបាលកម្ពុជា (បង្កើតដោយរដ្ឋសភានីតិកាលទី៥) ដែលបានបើកសម័យប្រជុំរបស់ខ្លួនកាលពីថ្ងៃទី២៤ ខែកញ្ញា”។
គណបក្សសង្គ្រោះជាតិបានអះអាងថា រដ្ឋាភិបាលរបស់លោកនាយករដ្ឋមន្ត្រី ហ៊ុន សែន គឺខុសច្បាប់ ដោយសារកើតឡើងចេញពីការកោះប្រជុំសភាដែលមិនមានវត្តមានសមាជិកសភា៥៥រូបរបស់គណបក្សប្រឆាំង។
កាលពីដើមខែនេះ លោក សម រង្ស៊ី ប្រធានគណបក្សសង្គ្រោះជាតិបានធ្វើដំណើរទៅកាន់ប្រទេសនៅតំបន់អឺរ៉ុប និងសហរដ្ឋអាមេរិក ដោយជំរុញឲ្យរដ្ឋាភិបាលបរទេសឈប់ទទួលស្គាល់ប្រទេសកម្ពុជា លុះណាតែរដ្ឋាភិបាលដែលគ្រប់គ្រងដោយគណបក្សប្រជាជនកម្ពុជាយល់ព្រមឲ្យមានការស៊ើបអង្កេតលើការបោះឆ្នោតដ៏ចម្រូងចម្រាស កាលពីថ្ងៃទី២៨ ខែកក្កដា ឬឲ្យមានកិច្ចព្រមព្រៀងចែករំលែកអំណាចជាមុនសិន។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានមានប្រសាសន៍ថា លិខិតរបស់គណបក្សប្រឆាំងនេះគួរត្រូវបានចាត់ទុកថា ជាលិខិតត្រឹមត្រូវសម្រាប់ក្រុមហ៊ុននានា ដែលមានបំណងចង់វិនិយោគនៅក្នុងប្រទេសកម្ពុជា ហើយថា រាល់កិច្ចព្រមព្រៀងដែលធ្វើឡើងជាមួយរដ្ឋាភិបាលរបស់លោក ហ៊ុន សែន អាចត្រូវទុកជាមោឃៈ។
លោកបានមានប្រសាសន៍ថា “យើងបានចេញលិខិតនេះ ដើម្បីក្រើនរំឭកដល់ប្រទេសនានាកុំឲ្យចុះកិច្ចព្រមព្រៀងជាមួយរដ្ឋាភិបាលនេះ” ដោយលោកពន្យល់ថា លោកគ្មានការព្រួយបារម្ភ ចំពោះការដែលរដ្ឋាភិបាលថ្មីចុះកិច្ចសន្យាខ្ចីបំណុលបរទេសនោះឡើយ។ លោក យឹម សុវណ្ណ បានមានប្រសាសន៍ថា “ច្បាប់អន្តរជាតិត្រូវគោរពច្បាប់របស់ប្រទេសនេះ និងឆន្ទៈរបស់ប្រជាពលរដ្ឋ ហើយច្បាប់អន្តរជាតិក៏តម្រូវឲ្យមានរដ្ឋាភិបាលស្របច្បាប់ផងដែរ”។
លោក ប៊ូ សារឿន អ្នកនាំពាក្យធនាគារពិភពលោកក្នុងរាជធានីភ្នំពេញ បានមានប្រសាសន៍ថា ការចោទសួរថា តើធនាគារនេះនឹងមានភាពស្ទាក់ស្ទើរក្នុងការចាប់ផ្តើមគម្រោងអភិវឌ្ឍន៏នៅក្នុងប្រទេសកម្ពុជា ឬយ៉ាងណានោះ ត្រូវបង្វែរទៅទីក្រុងវ៉ាស៊ីនតោន។
លោក ស្ទេហ្វិន ហិកហ្គិន អតីតនាយកប្រតិបត្តិធនាគារ អេអិនហ្សិត រ៉ូយ៉ាល់ ដែលបានសរសេរអំពីកាតព្វកិច្ចផ្លូវច្បាប់របស់រដ្ឋាភិបាលបច្ចុប្បន្ន ក្នុងការសងបំណុល ដែលរបប លន់ នល់ បានជំពាក់នោះបានមានប្រសាសន៍ថា ការគំរាមរបស់គណបក្សសង្គ្រោះជាតិក្នុងការទុកជាមោឃៈរាល់កិច្ចសន្យានានានោះដូចជាគ្មានតម្លៃ ហើយមិនប៉ះពាល់ខ្លាំងដល់ទំនុកចិត្តរបស់សហគមន៍ពាណិជ្ជកម្មឡើយ។
លោក ហិកហ្គិន បានមានប្រសាសន៍ថា ការមិនសងបំណុល ឬការលុបចោលកិច្ចព្រមព្រៀងវិនិយោគដោយរដ្ឋាភិបាលគណបក្សសង្គ្រោះជាតិនៅពេលអនាគតនឹងធ្វើឲ្យស្ថាប័នបរទេស និងក្រុមហ៊ុននានា មានអារម្មណ៍មិនល្អក្នុងការធ្វើជំនួញនៅក្នុងប្រទេសនេះ។ លោកបានមានប្រសាសន៍ថា “ខ្ញុំមិនគិតថា វាជាការគំរាមកំហែងធ្ងន់ឡើយ ពីព្រោះប្រសិនបើត្រូវបានអនុវត្តមែននោះ វានឹងធ្វើឲ្យប៉ះពាល់ដល់កេរ្តិ៍ឈ្មោះវិនិយោគក្នុងប្រទេសកម្ពុជាយូរណាស់”។លោកបានមានប្រសាសន៍ថា “ប្រសិនបើក្រុមហ៊ុនសម្លឹងមើលអ្វីដែលមានភាពចម្រូងចម្រាសខ្លាំងពេក ដែលចេះតែកើតមានដោយសារតែនិន្នាការនយោបាយនោះ វាអាចឆ្លុះបញ្ចាំងពីរលើក ហើយទោះបីជាយ៉ាងណា ការធ្វើជំនួញជាធម្មតាត្រូវតែអ៊ីចឹងហើយ”។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានមានប្រសាសន៍ថា លិខិតនេះ គ្រាន់តែជា “វោហារសាស្ត្រ” ប៉ុណ្ណោះ និងមិនធ្វើឲ្យវិនិយោគិនភ័យខ្លាចមិនហ៊ានចុះកិច្ចព្រមព្រៀងជាមួយរដ្ឋាភិបាលរបស់លោក ហ៊ុន សែន នោះឡើយ។ លោកបានមានប្រសាសន៍បន្ថែមទៀតថា “លិខិតនេះ នឹងមិនធ្វើឲ្យវិនិយោគិនភ័យខ្លាចមិនហ៊ានមកវិនិយោគក្នុងប្រទេសកម្ពុជាឡើយ។ វិនិយោគិនស្គាល់គណបក្សប្រឆាំងនេះហើយ គឺពួកគេគ្រាន់តែធ្វើការគំរាមដើម្បីធ្វើឲ្យគេស្គាល់គណបក្សតូចរបស់ខ្លួនប៉ុណ្ណោះ”៕ (សារុន)