លោក ប៉ា សុជាតិវង្ស អភិបាលរាជធានីភ្នំពេញបានចេញឱសានវាទដល់ក្រុមហ៊ុន ស៊ីនទ្រី ជាក្រុមហ៊ុនប្រមូលសំរាមនៅក្នុងរាជធានី ឲ្យសម្អាតផ្លូវ និងថែរក្សាផ្លូវឲ្យបានស្អាត បើមិនដូច្នោះទេ ត្រូវបាត់បង់កិច្ចសន្យារបស់ខ្លួន។
នៅឯកិច្ចប្រជុំមួយរវាងក្រុមហ៊ុន ស៊ីនទ្រី និងសាលារាជធានី ព្រមទាំងមន្ត្រីសាលារាជធានីគ្រប់ជាន់ថ្នាក់ទាំងអស់កាលពីថ្ងៃច័ន្ទ លោក ប៉ា សុជាតិវង្ស បានប្រាប់អ្នកជាប់ពាក់ព័ន្ធទាំងអស់ថា លោកត្រូវចាត់វិធានការតាមពាក្យបណ្តឹងពាក់ព័ន្ធនឹងសំរាមនៅក្នុងរាជធានីភ្នំពេញ។ លោកបានប្រាប់អ្នកជាប់ពាក់ព័ន្ធថា “ពាក់ព័ន្ធនឹងការប្រមូលសំរាម ក្រុមហ៊ុន ស៊ីនទ្រី ត្រូវបញ្ជាក់ថា តើខ្លួនអាចធ្វើការងារនេះបានត្រឹមត្រូវ ឬមិនត្រឹមត្រូវ។ ប្រសិនបើពួកគេ មិនអាចធ្វើការងារនេះបានត្រឹមត្រូវទេ យើងត្រូវរកក្រុមហ៊ុនជំនួស”។
លោក ប៉ា សុជាតិវង្ស បានមានប្រសាសន៍ថា ក្រុមហ៊ុននេះចំណាយពេលវេលា និងកម្លាំងកាយច្រើនណាស់នៅក្នុងការពង្រីកប្រតិបត្តិការរបស់ខ្លួន ហើយបំពេញការងារប្រមូលសំរាមរបស់ខ្លួនមិនបានទាន់ពេលនៅក្នុងរាជធានី ប៉ុន្តែ មិនបានប្រាប់ច្បាស់លាស់ថា តើពេលណាក្រុមហ៊ុន ស៊ីនទ្រី ត្រូវកែលម្អការងាររបស់ខ្លួននោះទេ។
លោកបានមានប្រសាសន៍ថា “វាមិនសំខាន់ទេក្នុងការដែលក្រុមហ៊ុននេះពង្រីកតំបន់ប្រមូលសំរាមរបស់ខ្លួន ប៉ុន្តែ វាជាការសំខាន់ណាស់ក្នុងការឲ្យក្រុមហ៊ុននេះបំពេញតួនាទីរបស់ខ្លួនដូចដែលមានចែងនៅក្នុងកិច្ចសន្យា។ មានការរិះគន់ជាច្រើនពីប្រជាពលរដ្ឋថា ក្រុមហ៊ុន ស៊ីនទ្រី មិនបានប្រមូលសំរាមបានទាន់ពេលទេ ហើយគិតតែប្រមូលលុយ”។
នៅពេលទាក់ទងកាលពីម្សិលមិញ លោក សេង ចំរើន អនុប្រធានក្រុមហ៊ុន ស៊ីនទ្រី បានមានប្រសាសន៍ថា សាលារាជធានីត្រឹមត្រូវហើយចំពោះការមិនពេញចិត្តនឹងស្ថានភាពរបស់រាជធានីភ្នំពេញ ប៉ុន្តែ លោកបានលើកឡើងថា ធនធានរបស់លោកត្រូវបានពង្រីកយ៉ាងច្រើនក្នុងរយៈពេលប៉ុន្មានខែថ្មីៗនេះ ដោយនៅពេលធ្វើយុទ្ធនាការឃោសនាបោះឆ្នោត និងការធ្វើបាតុកម្មជាបន្តបន្ទាប់បានធ្វើឲ្យបុគ្គលិករបស់លោកខំប្រឹងប្រែងធ្វើការយ៉ាងខ្លាំង។
លោកបានមានប្រសាសន៍ថា “ខ្ញុំយល់ពីការត្អូញត្អែររបស់សាលារាជធានី ប៉ុន្តែយើងត្រូវបម្រើមនុស្ស២លាននាក់នៅក្នុងរាជធានីភ្នំពេញ”។ លោកបានបន្ថែមថា “អំឡុងពេលធ្វើបាតុកម្ម មានការបិទផ្លូវដែលធ្វើឲ្យមានការលំបាកដល់ការប្រមូលសំរាម ហើយមានមនុស្សកាន់តែច្រើនឡើងៗនៅក្នុងទីក្រុង ដែលធ្វើឲ្យមានសំរាមកាន់តែច្រើន”។
លោក ចំរើន បានមានប្រសាសន៍ថា កំណើនប្រជាជនក្នុងទីក្រុងពីប្រហែល១,២លាននាក់ក្នុងឆ្នាំ២០០០ដល់ប្រហែល២,២លាននាក់សព្វថ្ងៃនេះ គឺច្រើនណាស់ បុគ្គលិករបស់លោកមិនអាចប្រមូលសំរាមបានទាន់ពេលនោះទេ។ លោកបានមានប្រសាសន៍បន្ថែមទៀតថា “កាលពី១០ឆ្នាំមុន យើងបានចុះកិច្ចសន្យាជាមួយសាលារាជធានីថា យើងប្រមូលសំរាមពីកន្លែងមួយតែមួយដងប៉ុណ្ណោះក្នុងមួយថ្ងៃ។ ឥឡូវនេះ ជួនកាលយើងត្រូវប្រមូលបួន ឬប្រាំដងក្នុងមួយថ្ងៃ ហើយប៉ុណ្ណឹងវាច្រើនណាស់ទៅហើយ”។
កាលពីឆ្នាំ២០០២ ក្រុមហ៊ុន ស៊ីនទ្រី បានចុះកិច្ចសន្យារយៈពេល៥០ឆ្នាំ ដើម្បីផ្តល់សិទ្ធិឲ្យក្រុមហ៊ុននេះប្រមូលសំរាមក្នុងរាជធានីភ្នំពេញ។ ទាំងសាលារាជធានី និងក្រុមហ៊ុន ស៊ីនទ្រី មិនបានផ្តល់ព័ត៌មានលម្អិតអំពីកិច្ចសន្យាទេនេះកាលពីម្សិលមិញ ប៉ុន្តែ ភាគីទាំងពីរបាននិយាយថា ខ្លួនបានប្តេជ្ញាគោរពតាមកិច្ចសន្យានេះ។
លោក ឡុង ឌីម៉ង់ អ្នកនាំពាក្យសាលារាជធានី បានមានប្រសាសន៍កាលពីម្សិលមិញថា កិច្ចសន្យារវាងក្រុមហ៊ុន ស៊ីនទ្រី និងសាលារាជធានីត្រូវតែត្រួតពិនិត្យឡើងវិញ ប៉ុន្តែមិនទាន់ដល់ថ្នាក់បញ្ចប់កិច្ចសន្យានោះទេ។ លោកបានមានប្រសាសន៍ថា “វាជាការធម្មតាទេនៅក្នុងការធ្វើអាជីវកម្ម ប្រសិនភាគីណាមួយដែលបានចុះកិច្ចសន្យារួចហើយមិនបានគោរពតាមកិច្ចសន្យារបស់ខ្លួនទេនោះត្រូវតែមានការត្រួតពិនិត្យកិច្ចសន្យានោះឡើងវិញ”។ មុនពេលបញ្ចប់ការសន្ទនា និងបដិសេធមិនធ្វើអត្ថាធិប្បាយបន្ថែមទៀតនោះ លោកបានបន្ថែមថា “ ប៉ុន្តែ យើងពេញចិត្តព្យាយាមដោះស្រាយបញ្ហានេះជាមួយគ្នា”។
លោក ប៉ា សុជាតិវង្ស ក៏បានបដិសេធមិនធ្វើអត្ថាធិប្បាយអំពីការដាក់ឱសានវាទកាលពីថ្ងៃច័ន្ទនេះដែរ៕ (គឹមហឿន)