អង្គការ WWF បានអះអាងកាលពីម្សិលមិញថា ដំរីពីរក្បាលក្នុងចំណោមដំរីទាំងបីក្បាលដែលងាប់នៅក្នុងដែនជម្រកសត្វព្រៃភ្នំព្រិច ក្នុងខេត្តមណ្ឌលគិរី កាលពីថ្ងៃច័ន្ទ ត្រូវក្រុមអ្នកប្រមាញ់ខុសច្បាប់សម្លាប់។ អង្គការនេះក៏បានអំពាវនាវឲ្យរដ្ឋាភិបាលបើកការស៊ើបអង្កេត ដើម្បីតាមស្វែងរកក្រុមអ្នកប្រមាញ់ខុសច្បាប់ទាំងនោះផងដែរ។
គួររំឭកថា អ្នកភូមិរស់នៅក្នុងដែនជម្រកសត្វព្រៃដែលដើររកដើមជ័រទឹកបានប្រទះឃើញខ្មោចដំរីទាំងបីក្បាលនេះកាលពីថ្ងៃអាទិត្យ។ ដំរីទាំងនេះមានពីរក្បាលជាដំរីចាស់ និងមួយក្បាលទៀតជាដំរីជំទង់ ហើយពួកវាសុទ្ធតែបានងាប់ឃ្លាតពីគ្នាត្រឹមតែពីរបីម៉ែត្រប៉ុណ្ណោះនៅក្នុងព្រៃមួយដែលគេហៅថា ក្រង ជីឡូក។
អង្គការ WWF បានលើកឡើងក្នុងសេចក្ដីថ្លែងការណ៍មួយថា “ភ័ស្តុតាងបង្ហាញថា ដំរីទាំងនេះត្រូវក្រុមអ្នកប្រមាញ់រៀបផែនការសម្លាប់” ដោយបញ្ជាក់ថា គេនៅមិនទាន់ដឹងថា តើដំរីទី៣ ដែលជាដំរីជំទង់ងាប់ដោយសារមូលហេតុអ្វីនៅឡើយទេ។ សេចក្ដីថ្លែងការណ៍នេះមានខ្លឹមសារបន្តថា “អង្គការ WWF សូមអំពាវនាវឲ្យរដ្ឋាភិបាលចាត់វិធានការស៊ើបអង្កេតឲ្យបានហ្មត់ចត់ និងជាបន្ទាន់លើការសម្លាប់ដំរីទាំងនេះ និងសូមអំពាវនាវឲ្យមានការចាត់វិធានការការពារនៅតំបន់ការពារជាបន្ទាន់ផងដែរ”។
មន្ត្រីអង្គការ WWF បានបដិសេធមិននិយាយថា តើហេតុអ្វីបានជាដំរីទាំងនេះត្រូវគេសម្លាប់នោះទេ គឺគ្រាន់តែអះអាងថា ដំរីញីទំាងនេះគ្មានភ្លុកប៉ុណ្ណោះ។
លោក ជែក ហាយវូដ (Jack Highwood) អ្នកគ្រប់គ្រងកម្មវិធីសម្រាប់គម្រោង Elephant Valley Project នៅក្នុងក្រុងសែនមនោរម្យ ខេត្តមណ្ឌលគិរី បានលើកឡើងពីកត្តាមួយចំនួន ដែលអាចជាមូលហេតុបណ្ដាលឲ្យដំរីទាំងនេះត្រូវគេសម្លាប់។
លោក ហាយវូដ បានមានប្រសាសន៍ថា “មានការជួញដូរសត្វដំរី និងសត្វផ្សេងៗឆ្លងដែនជាច្រើន ព្រោះមានអ្នកខ្លះជឿជាក់ថា សត្វទាំងនេះអាចធ្វើជាថ្នាំបាន។ មានតម្រូវការខ្ពស់នៅក្នុងប្រទេសវៀតណាម ប្រទេសចិន និងប្រទេសផ្សេងៗទៀតនៅតំបន់អាស៊ី ហើយបញ្ហានេះបានបង្កការលំបាកយ៉ាងខ្លាំងដល់ការអភិរក្សសត្វដំរីនៅក្នុងប្រទេសកម្ពុជានិងនៅទូទាំងពិភពលោក”។
លោកបានមានប្រសាសន៍បន្តថា “ហើយមិនមែនតែនៅបរទេសទេ មនុស្សមួយចំនួននៅក្នុងប្រទេសកម្ពុជាក៏បរិភោគសាច់ដំរីដែរ។ ក្រុមអ្នកប្រមាញ់ខុសច្បាប់អាចចេញប្រមាញ់សត្វដំរី ហើយក្រោយមកអាចយកសាច់ដំរីទាំងនេះទៅលក់លើទីផ្សារក្នុងរាជធានីភ្នំពេញ ខេត្តសៀមរាប និងខេត្តកំពង់ចាម”។ លោកបន្ថែមថា សព្វថ្ងៃមានតែដំរីប្រហែល២៥០ក្បាលប៉ុណ្ណោះដែលនៅសេសសល់ក្នុងព្រៃនៅទូទាំងប្រទេសកម្ពុជា។
លោក មីកាហ្វ អ៊ីនហ្គល (Micah Ingalls) ប្រធានស្ដីទីអង្គការ WWF ប្រចាំប្រទេសកម្ពុជា បានលើកឡើងថា ការសម្លាប់សត្វព្រៃនេះបង្កបញ្ហាយ៉ាងខ្លាំងដល់ការអភិរក្សនៅក្នុងប្រទេសកម្ពុជា។ លោកមានប្រសាសន៍ថា “ការប្រមាញ់សត្វព្រៃនិងសកម្មភាពខុសច្បាប់ផ្សេងៗបានបង្កការលំបាកដល់ការអភិរក្ស និងការគ្រប់គ្រងតំបន់ការពារ ដែលរដ្ឋាភិបាលកម្ពុជា និងអង្គការ WWF បានប្រឹងប្រែងធ្វើអស់ជាច្រើនឆ្នាំមកហើយនោះ។ ហើយសកម្មភាពល្មើសនៅក្នុងដែនជម្រកសត្វព្រៃភ្នំព្រិចត្រូវតែលុបបំបាត់ឲ្យបានបើពុំដូច្នោះទេ យើងនឹងបាត់បង់សត្វព្រៃដែលរស់នៅក្នុងដែនជម្រកសត្វព្រៃដ៏ធំនៅតំបន់ខ្ពង់រាបភាគខាងកើត”។
លោក អ៊ុក សុខន អនុរដ្ឋលេខាធិការនៅក្រសួងកសិកម្ម បានបដិសេធមិនធ្វើអត្ថាធិប្បាយអំពីការប្រមាញ់ដោយខុសច្បាប់នេះឡើយ៕ ស៊ុយឈាង