លោក សម រង្ស៊ី មេដឹកនាំគណបក្សប្រឆាំងមានគម្រោងទូរស័ព្ទទៅលោក ស ខេង រដ្ឋមន្ត្រីក្រសួងមហាផ្ទៃមកពីគណបក្សប្រជាជនកម្ពុជានៅថ្ងៃនេះ ដើម្បីពិភាក្សាអំពីការចាប់ផ្តើមការចរចាឡើងវិញរវាងគណបក្សទាំងពីរ។
លោក សម រង្ស៊ី បានមានប្រសាសន៍ថា លោកសង្ឃឹមថា លោក ស ខេង នឹងបញ្ជាក់ ប្រាប់ថា តើគណបក្សប្រជាជនកម្ពុជាបើកចំហដោយគ្មានលក្ខខណ្ឌចំពោះការចរចាបន្ថែមទៀត ឬថា តើគណបក្សនេះនៅតែទាមទារឲ្យសមាជិកសភាជាប់ឆ្នោតទាំង៥៥រូបរបស់គណបក្សសង្គ្រោះជាតិស្បថចូលកាន់តំណែងជាសមាជិករដ្ឋសភា មុនពេលមានការចរចា ដើម្បីផ្តល់ភាពស្របច្បាប់ឲ្យបានពេញលេញដល់រដ្ឋាភិបាលរបស់លោកនាយករដ្ឋមន្ត្រី ហ៊ុន សែន ទៀតឬយ៉ាងណា។
លោក សម រង្ស៊ី បានមានប្រសាសន៍ថា “ខ្ញុំនឹងទូរស័ព្ទទៅលោក ស ខេង ពីព្រោះនេះគឺជាយន្តការដើម្បីជួបគ្នា”។ លោកបានបន្ថែមថា លោកនឹងទូរស័ព្ទនៅមុន ឬក្រោយពេលធ្វើសន្និសីទកាសែតដែលគណបក្សសង្គ្រោះជាតិគ្រោងធ្វើនៅម៉ោង៩ព្រឹក។ លោកបានមានប្រសាសន៍ថា “ យើងចង់ឮដោយផ្ទាល់ពីមាត់របស់គណបក្សប្រជាជនកម្ពុជា តើមានលក្ខខណ្ឌជាមុនទៀត ឬអត់? មានការប៉ាន់ប្រមាណនិងបកស្រាយថា មានការផ្លាស់ប្តូរមួយចំនួន [ចំពោះគោលជំហររបស់គណបក្សប្រជាជនកម្ពុជា]”។
ដោយសំដៅដល់សេចក្តីប្រកាសមួយដែលគណបក្សសង្គ្រោះជាតិបានចេញកាលពីម្សិលមិញ ដែលនៅក្នុងសេចក្តីប្រកាសនោះ គណបក្សប្រឆាំងលើកឡើងថា ខ្លួននឹងបន្តជំរុញឲ្យមានការស៊ើបអង្កេតលើការបោះឆ្នោតដ៏ចម្រូងចម្រាសកាលពីខែកក្កដានេះ និងការកែទម្រង់ប្រព័ន្ធបោះឆ្នោត រួមទាំងការលាលែងពីតំណែងរបស់គណៈកម្មាធិការជាតិរៀបចំការបោះឆ្នោតដែលមានសមាជិកប្រាំបួនរូបនេះផងនោះ លោក សម រង្ស៊ី បានមានប្រសាសន៍ថា “ យើងបានបង្ហាញពីទស្សនរបស់យើងយ៉ាងច្បាស់” ។
គណបក្សសង្គ្រោះជាតិបានលើកឡើងក្នុងសេចក្តីប្រកាសរបស់ខ្លួនថា “យើងត្រូវតែដោះស្រាយបញ្ហានៃភាពស្របច្បាប់ចំពោះការបោះឆ្នោតកាលពីពេលថ្មីៗនេះជាមុនសិន មុនពេលពិចារណាពីការចូលរដ្ឋសភា និងការទទួលស្គាល់ភាពស្របច្បាប់របស់រដ្ឋាភិបាលណាមួយនោះ”។ លោក ជាម យៀប អ្នកនាំពាក្យគណបក្សប្រជាជនកម្ពុជា និងជាប្រធានគណៈកម្មការហិរញ្ញវត្ថុរបស់រដ្ឋសភាមានប្រសាសន៍កាលពីថ្ងៃអង្គារថា គណបក្សកាន់អំណាចនឹងធ្វើការចរចាជាមួយថ្នាក់ដឹកនាំគណបក្សសង្គ្រោះជាតិ តែក្រោយពីពួកគេបានស្បថចូលកាន់តំណែងជាសមាជិកសភារួចហើយប៉ុណ្ណោះ។
នៅពេលទាក់ទងកាលពីម្សិលមិញ លោក ជាម យៀប បានបដិសេធថា គណបក្សប្រជាជនកម្ពុជាមិនបានកំណត់លក្ខខណ្ឌសម្រាប់ការចរចាថែមទៀតឡើយ។ លោកមានប្រសាសន៍ថា “ យើងមិនដែលដាក់លក្ខខណ្ឌទេ ប៉ុន្តែ គណបក្សសង្គ្រោះជាតិខ្លួនឯងទាមទារច្រើនពេក។ គណបក្សសង្គ្រោះជាតិទទួលបានអាសនៈតិចជាងនៅក្នុងរដ្ឋសភា ដូច្នេះ ពួកគេគួរតែបត់បែនដោយការទទួលយកនូវអ្វីដែលយើងផ្តល់ឲ្យ គឺសម្បទានតំណែងជាអនុប្រធានរដ្ឋសភា ប្រធានគណៈកម្មការចំនួនបួន និងអនុប្រធានគណៈកម្មការចំនួនប្រាំ”។
បក្សប្រជាជនកម្ពុជាបានយល់ព្រមធ្វើសម្បទានស្រដៀងគ្នានេះ អំឡុងពេលចរចាដែលបរាជ័យលើកចុងក្រោយកាលពីថ្ងៃ១៥ និង១៦ ខែកញ្ញា តែនៅពេលនោះគណបក្សប្រជាជនក៏បានប្តេជ្ញាជាគោលការណ៍ចំពោះកំណែទម្រង់ប្រព័ន្ធបោះឆ្នោតផងដែរ ប៉ុន្តែ គណបក្សសង្គ្រោះជាតិមិនទទួលយកទេ។
លោក គល់ បញ្ញា នាយកប្រតិបត្តិគណៈកម្មាធិការខុមហ្វ្រែលបានមានប្រសាសន៍ថា ការដែលគណបក្សទាំងពីរដាក់លក្ខខណ្ឌជាមុនបែបនេះធ្វើឲ្យក្តីសង្ឃឹមសម្រាប់ការចរចាមិនច្បាស់លាស់។ លោកមានប្រសាសន៍ថា “ប្រសិនបើមេដឹកនាំគណបក្សទាំងពីរដាក់លក្ខខណ្ឌ [មុនពេលជួបចរចាបន្ថែមទៀតនោះ] វាធ្វើឲ្យស្ថានភាពកាន់តែពិបាក”។
លោក គល់ បញ្ញា បានមានប្រសាសន៍ថា “ពួកគេមិនគួរនិយាយថា ‘ លោកត្រូវធ្វើឲ្យរដ្ឋាភិបាលរបស់ខ្ញុំស្របច្បាប់ជាមុនសិនចាំយើងចរចា’ ឬ ‘លោកត្រូវដោះស្រាយបញ្ហានេះជាមុនសិន ចាំមកចរចានោះទេ’ ពួកគេគួរតែចរចា និងចេះតែបន្តចរចាទៀតទៅ។ នេះគឺជាវិធីតែមួយគត់ដែលពួកគេអាចសម្របសម្រួល និងទទួលបានលទ្ធផលល្អ”។
លោក ធន សារាយ ប្រធានអង្គការអាដហុក និងជាប្រធានគណៈកម្មាធិការខុមហ្វ្រែលក៏បានថ្លែងថា ស្ថានភាពនេះហាក់ដូចជាមិនល្អទេ។ លោក ធន សារាយ មានប្រសាសន៍ថា “ ខ្ញុំមិនមានសុទិដ្ឋិនិយមអំពីការចរចាទេ ពីព្រោះវាហាក់បីដូចជាគោលជំហររបស់គណបក្សទាំងពីរកាន់តែឃ្លាតឆ្ងាយពីគ្នា”។
លោកបានមានប្រសាសន៍ថា “ ជាពិសេសគណបក្សប្រឆាំង ពួកគេមិនចង់និយាយទៀតទេ អំពីការបែងចែកអំណាចនៅក្នុងរដ្ឋសភា ហើយពួកគេបែរជានិយាយអំពីកំណែទម្រង់គ.ជ.ប. និងកំណែទម្រង់ដំណើរការបោះឆ្នោតទូទៅវិញ”។ លោកបានបន្ថែមថា ឥរិយាបថរបស់គណបក្សប្រជាជនកម្ពុជាក្រោយការបោះឆ្នោតនេះ ក៏ធ្វើឲ្យគណបក្សសង្គ្រោះជាតិពិបាកជឿចំពោះការសន្យាធ្វើការកែទម្រង់របស់ពួកគេផងដែរ។
លោកបានមានប្រសាសន៍ទៀតថា “ថ្នាក់ដឹកនាំគណបក្សប្រជាជនកម្ពុជានៅតែធ្វើតាមស្ទីលចាស់ដដែល ដោយមិនមានស្ទីលថ្មីឡើយ។ ពួកគេនិយាយអំពីការផ្លាស់ប្តូរ ឬការកែទម្រង់ប្រទេស ប៉ុន្តែការនិយាយនេះផ្ទុយពីទង្វើរបស់ពួកគេ។ ពួកគេនៅតែចោទអ្នកដែលចង់កែទម្រង់ថា ប្រឆាំងជាមួយពួកគេ។ នេះមានន័យថា ពួកគេនៅតែគិតអំពីផលប្រយោជន៍សម្រាប់គណបក្សរបស់ខ្លួនដដែល”៕ គឹមហឿន