កាលពីម្សិលមិញ អង្គការសិទ្ធិមនុស្សក្នុងស្រុកអាដហុកបានជំរុញឲ្យសាលាឧទ្ធរណ៍ផ្តន្ទាទោសឲ្យបានធ្ងន់បន្ថែមទៀតលើលោក ឈូក បណ្ឌិត អតីតអភិបាលក្រុងបាវិត ដែលត្រូវបានកាត់ឲ្យជាប់ទោសកាលពីខែមិថុនាពីបទបាញ់កម្មការិនីបីនាក់ឲ្យរងរបួស ហើយកំពុងរត់គេចខ្លួន នៅពេលដែលរឿងក្តីរបស់លោកត្រូវបានបើកសវនាការនៅថ្ងៃនេះ។
អង្គការអាដហុកបានលើកឡើងនៅក្នុងសេចក្តីថ្លែងការណ៍ថា ការផ្តន្ទាទោសឲ្យជាប់ពន្ធនាគាររយៈពេល១៨ខែដោយសាលាដំបូងខេត្តស្វាយរៀងកាលពីខែមិថុនានោះគឺស្រាលពេក ហើយបង្ហាញឲ្យឃើញថា គ្មានន័យអ្វីសោះ ពីព្រោះជននេះមិនទាន់ជាប់ពន្ធនាគារនៅឡើយទេ។ អង្គការនេះបានលើកឡើងទៀតថា “លើសពីនេះទៅទៀត ប្រសិនបើសាលាឧទ្ធរណ៍ចង់ពង្រឹងយុត្តិធម៌នៅក្នុងប្រទេសកម្ពុជានោះ សាលាឧទ្ធរណ៍ត្រូវតែឃុំខ្លួន [ឈូក បណ្ឌិត] ហើយផ្តន្ទាទោសឲ្យបានធ្ងន់ដើម្បីឲ្យស័ក្តិសមនឹងស្ថានទម្ងន់ទោសនៃបទឧក្រិដ្ឋរបស់គាត់”។
អតីតអភិបាលក្រុងដែលអបយសរូបនេះត្រូវបានផ្តន្ទាទោស និងពិន័យជាប្រាក់ចំនួន៩.៥០០ដុល្លារពីបទបង្ករបួសស្នាមដោយអចេតនា បន្ទាប់់ពីគាត់បានបាញ់កម្មការិនីបីនាក់ឲ្យរងរបួសអំឡុងការតវ៉ាកាលពីខែកុម្ភៈ ឆ្នាំ២០១២។ បើទោះណាជាតុលាការចេញដីកាចាប់ខ្លួនគាតិហើយក៏ដោយ ក៏លោក ឈូក បណ្ឌិតនៅក្រៅឃុំដែរ ហើយមេធាវីរបស់គាត់បានប្តឹងឧទ្ធរណ៍ទៀតផង។
កញ្ញា នុត សុខន ជាជនរងគ្រោះម្នាក់ក្នុងចំណោមជនរងគ្រោះទាំងបីដែលបានរងរបួសត្រង់ដៃ និងខ្នងនោះ បានមកដល់រាជធានីភ្នំពេញកាលពីម្សិលមិញ ដើម្បីចូលរួមសវនាការនៅថ្ងៃនេះ។ នាងបាននិយាយថា “ខ្ញុំសូមស្នើឲ្យសាលាឧទ្ធរណ៍ដាក់ទោស លោក ឈូក បណ្ឌិត ឲ្យបានធ្ងន់ជាងសេចក្តីសម្រេចរបស់សាលាដំបូងខេត្តស្វាយរៀង ហើយយើងទាមទារសំណងបន្ថែមទៀតលើសពីអ្វីដែលសាលាដំបូងខេត្តបានបង្គាប់”៕សារុន