កាលពីម្សិលមិញ សាលាឧទ្ធរណ៍បានផន្ទាទោសបុរសចំនួនពីរនាក់ឲ្យជាប់ក្នុងពន្ធនាគាររយៈពេល២០ឆ្នាំ ពីបទចាប់រំលោភ ហើយសម្លាប់ក្មេងស្រីពីរនាក់យ៉ាងព្រៃផ្សៃកាលពីឆ្នាំ២០០៩ នៅក្នុងខេត្តពោធិ៍សាត់ និងបានបង្គាប់ឲ្យដោះលែងបុរសទី៣ម្នាក់ ដែលជាប់ពាក់ព័ន្ធក្នុងរឿងក្តីនេះ។
លោក ប៉ាក ច័ន្ទសំបូរ ចៅក្រមប្រធានក្រុមប្រឹក្សាជំនុំជម្រះកាលពីម្សិលមិញបានសម្រាលកម្រិតបទចោទប្រកាន់ និងបានកាត់ទោសជនល្មើសឈ្មោះ ហម សុភា អាយុ៣២ឆ្នាំ និងឈ្មោះ ទូច រុន អាយុ២២ឆ្នាំ ដែលកំពុងរត់គេចខ្លួន ឲ្យជាប់ពន្ធនាគាររយៈពេលយូរ ក្រោយពីពួកគេដើមឡើយត្រូវបានលើកលែងការចោទប្រកាន់កាលពីខែតុលា ឆ្នាំ២០១០។ឈ្មោះ សែម ឌុច អាយុ៤៣ឆ្នាំត្រូវបានលើកលែងការចោទប្រកាន់ជាលើកទី២ ដោយសារខ្វះភ័ស្តុតាង។
លោកចៅក្រម ច័ន្ទសំបូរថ្លែងថា “ សាលាឧទ្ធរណ៍]បានសម្រេចកែប្រែបទចោទប្រកាន់ពីការធ្វើឃាតគ្រោងទុកជាមុន ទៅជាបទចាប់រំលោភយ៉ាងខ្លាំងក្លានិងបានសម្រេចផ្តន្ទាទោសឈ្មោះ ហម សុភា និងទូច រុន ដែលមិនទាន់ចាប់ខ្លួនបាននៅឡើយនោះ ឲ្យជាប់ក្នុងពន្ធនាគារម្នាក់ៗរយៈពេល២០ឆ្នាំ”។
លោកចៅក្រមបានឲ្យដឹងថា “ សាលាឧទ្ធណ៍ក៏បានបង្គាប់ឲ្យចាប់ខ្លួនឈ្មោះ ទូច រុន និងដោះលែងឈ្មោះ សែម ឌុច ភ្លាមដែរ”។ លោកបានបដិសេធមិនពន្យល់ពីមូលហេតុដែលបុរសទាំងពីរនាក់ត្រូវបានផ្តន្ទាទោស ខណៈដែលជនទីបីត្រូវបានដោះលែង។
លោក ច័ន្ទ ហឿន មេធាវីរបស់ឈ្មោះ សែម ឌុច និង ហម សុភា បានលើកឡើងថា លោកនឹងប្តឹងសារទុក្ខជំទាស់នឹងសេចក្តីសម្រេចចំពោះឈ្មោះ ហម សុភា។
លោកបានមានប្រសាសន៍ថា “សេចក្តីសម្រេចចំពោះឈ្មោះ ហម សុភា មិនត្រឹមត្រូវទេ…។ យើងនឹងប្តឹងឧទ្ធរណ៍សារទុក្ខទៅតុលាការកំពូលដើម្បីរកយុត្តិធម៌”។
សាលក្រមកាលពីម្្សិលមិញ គឺជាដំណើរវិវឌ្ឍន៍ថ្មីមួយទៀតនៅក្នុងរឿងក្តី ដែលបានអូសបន្លាយពេល ចាប់តាំងពីខែមករាឆ្នាំ២០០៩ នៅពេលសាកសពបងប្អូនជីដូនមួយពីរនាក់ ឈ្មោះ ណៃ វ៉ាន់ អាយុ១១ឆ្នាំ និងឈ្មោះ ផល សុភឿន អាយុ១៤ឆ្នាំត្រូវបានគេប្រទះឃើញស្ថិតក្នុងស្ថានភាពមានរបួស និងព្យួរកពីដើមឈើមួយដើមនៅក្នុងស្រុកក្រគរ ខេត្តពោធិ៍សាត់។
ក្មេងស្រីទាំងពីរនាក់នេះត្រូវបានរាយការណ៍ថា បានបាត់ខ្លួនរយៈពេលមួយថ្ងៃ បន្ទាប់ពីពួកគេចូលទៅក្នុងព្រៃដើម្បីរកអុស នៅថ្ងៃទី៤ ខែមករា ឆ្នាំ ២០០៩ និងត្រូវបានរកឃើញរយៈពេលពីរថ្ងៃក្រោយមក ដោយបងប្រុសរបស់ក្មេងស្រីឈ្មោះ ផល សុភឿន។ ក្មេងស្រីម្នាក់ក្នុងចំណោមក្មេងស្រីទាំងពីរនាក់នោះ មានស្នាមជាំ ជើងរបស់អ្នកទាំងពីរបានបាក់ ហើយភ្នែករបស់ពួកគេត្រូវបានខ្វេះយកចេញ និងម្នាក់ទៀតបាក់ក និងបាក់ជើងម្ខាង។
ប្រជាជននៅឃុំស្វាយស ជាមូលដ្ឋានទីលំនៅរបស់ក្មេងស្រីទាំងពីរនាក់ មានការខឹងសម្បារដោយសារតែអំពើសាហាវឃោរឃៅក្្នុងសំណុំរឿងនេះ និងបានដាក់ញត្តិមួយដែលមានប្រជាជនចុះហត្ថលេខាជាង៦០០នាក់ ដើម្បីជំរុញឲ្យនគរបាលចាប់ខ្លួនជនដៃដល់ និងនាំពួកគេទៅតុលាការដើម្បីផ្តន្ទាទោស។
រយៈពេលប្រាំបួនខែ បន្ទាប់ពីពួកគេត្រូវបានចាប់ខ្លួនកាលពីខែកញ្ញា ឆ្នាំ២០១០ ឈ្មោះ ហម សុភា និងឈ្មោះ សែម ឌុច បានឡើង សាលាដំបូងខេត្តពោធិ៍សាត់ ខណៈដែល ឈ្មោះ ទូច រុន ត្រូវបានកាត់ទោសកំបាំងមុខ។នៅថ្ងៃទី២៦ ខែតុលា ជនល្មើសទាំងបីនាក់ត្រូវបានលើកលែងការចោទប្រកាន់ពីបទមនុស្សឃាតគិតទុកជាមុន ដោយសារតែខ្វះភ័ស្តុតាង៕ ប៊ុននី