32 C
Phnom Penh

កម្ពុជាមិន​ទាន់​ត្រៀម​ខ្លួន​រួច​រាល់​សម្រាប់​អនុវត្តកម្ម​​​វិធីសុំ​​កូន​ចិញ្ចឹម​​អន្តរប្រទេសនៅឡើយទេ

ដោយ ឌឹ ខេមបូឌា ដេលី

បទវិភាគ

រយៈពេ​ល​មួយ​ឆ្នាំ​បាន​កន្លង​ផុត​ បន្ទាប់​ពី​ប្រទេស​កម្ពុជា​បាន​ប្រកាស​ថា ខ្លួន​បាន​ដក​បម្រាម​​​​លើ​ការ​សុំ​​កូន​ចិញ្ចឹម​រវាង​ប្រទេស​ផ្សេងៗ ដោយ​ចាប់​ផ្ដើម​កាលពីថ្ងៃ​ទី១ ខែមករា ឆ្នាំ​២០១៣។ ក៏ប៉ុន្តែ ទោះ​បីជា​បាន​សរសើរ​​ប្រទេស​កម្ពុជា​ ដែល​បាន​ខិត​ខំ​អនុវត្ត​បទ​បញ្ញត្តិ​អន្តរជាតិ​ក៏ដោយ ក៏ប្រទេស​នានា​ដែល​​​​ដាក់​បម្រាម​លើការ​សុំ​កូន​ចិញ្ចឹម​របស់​ប្រទេស​កម្ពុជា​ បាន​លើក​ឡើង​ថា  ពួក​​​គេ​​​មិន​បាន​ឈាន​ដល់​ការ​ដក​លក្ខ​ខណ្ឌ​រឹ​ត​បន្តឹង​ទេ។

កាលពី​ខែ​ធ្នូ ឆ្នាំ​២០១១ សហ​រដ្ឋអាមេរិក​​ផ្អាក​ការ​សុំ​​កូន​ចិញ្ចឹម​ពី​ប្រទេស​កម្ពុជា​ ដោយ​បាន​លើក​ឡើង​ពី “ ការលក់​​ទារក​ និង​ការ​ចាប់​ពង្រត់​ទារក​”  និង​គុណ​វិបត្តិ​ធំៗ​ផ្សេងៗ​ទៀត។ ចក្រ​ភព​អង់​គ្លេស អូស្ត្រាលី បារាំង អាល្លឺម៉ង់ និង​ប្រទេស​អុីតាលី ស្ថិត​ក្នុង​បណ្ដា​ប្រទេស​ផ្សេងៗ​ទៀត ដែល​អនុវត្ត​បែប​នេះ​ដែរ​។ សហ​រដ្ឋ​អាមេរិកបាន​ឲ្យ​ដឹង​ក្នុង​សប្ដាហ៍​នេះ​ថា ស្ថាន​ភាព​ដែល​នាំ​ឲ្យ​មាន​ការ​ផ្អាក​​បែ​ប​នេះ​ មិន​មាន​ការ​ប្រែ​ប្រួល​ទេ ហើយ​ខ្លួន​មិន​មាន​ផែន​ការ​ចាប់​ផ្ដើម​ឲ្យ​មាន​ការ​សុំ​​កូន​ចិញ្ចឹម​ឡើង​វិញ​ទេ។ លោកស្រី​ អាស្លី ហ្គារីហ្គូស (Ashley Garrigus) អ្នក​នាំពាក្យ​ការិយាល័យ​
សម្រប​សម្រួល​គោល​នយោបាយ​ និង​កិច្ច​ការ​សាធារណៈ​នៃ​ក្រសួង​ការ​បរទេស​សហ​រដ្ឋ​អាមេរិក បាន​មាន​ប្រសាសន៍​ថា “ ក្រសួង​ការ​បរទេស​នៅ​តែ​រក្សារ​កា​រ​មិន​អនុវត្ត​កម្ម​វិធី​សុំ​​កូន​ចិញ្ចឹម​ពី​ប្រទេស​កម្ពុជា​ដដែល​”។

លោកស្រី​បាន​មាន​ប្រសាសន៍​​បន្ថែម​ថា “ ក្រសួង​ការ​បរទេស​ក៏​មិន​មាន​គម្រោង​សម្រាប់​អនុញ្ញាត​ឲ្យ​មាន​ការ​សុំ​កូន​ចិញ្ចឹម​ពី​ប្រទេស​កម្ពុជា​ឡើង​វិញ​ដែរ​។ យើង​កំពុង​តែ​បន្ត​​ពិនិត្យ​​​ដោយ​យក​ចិត្ត​ទុក​ដាក់​ទៅលើ​វឌ្ឍន​​​ភាព​របស់​ប្រទេស​កម្ពុជា​ក្នុង​ការ​អនុវត្ត​អនុ​​​សញ្ញា​ស្ដីពី​ការ​សុំ​កូន​ចិញ្ចឹម​ទីក្រុង​ឡាអេ”។ប្រទេស​កម្ពុជា​បាន​ចុះ​ហត្ថលេខា​លើ​សន្ធិសញ្ញា​ស្ដីពីកា​រសុំ​កូន​ចិញ្ចឹម​ទីក្រុង​ឡាអេ កាលពី​ឆ្នាំ​២០០៧ ក៏ប៉ុន្តែ​បាន​បញ្ឈប់​សកម្ម​ភាព​សុំ​កូន​ចិញ្ចឹម​អន្តរប្រទេស​​ក្នុង​ឆ្នាំ​២០០៩​ អំឡុង​ពេល​មាន​សំឡេង​រិះគន់​យ៉ាង​ច្រើន​អំពី​អំពើ​រំលោភ​បំពាន​ដែល​បាន​កើត​ឡើង​នៅ​ក្នុង​ប្រព័ន្ធ​សុំកូន​ចិញ្ចឹម​របស់​ខ្លួន​ ហើយ​ខ្លួន​ក៏​ទទួល​បរាជ័យ​ក្នុង​ការ​ដាក់​ចេញ​នូវ​ចំណាត់​ការ​ឲ្យ​បាន​សម​ស្រប​​ផ្នែក​បទ​បញ្ញត្តិ​ដើម្បី​ការ​ពារ​ផ​ល​ប្រយោជន៍​អាទិភាព​បំផុត​របស់​កុមារ​។

កាលពី​ខែ​ធ្នូ​ ឆ្នាំ​២០០៩​រដ្ឋាភិបាល​កម្ពុជា​បាន​អនុម័ត​ច្បាប់​សុំ​កូន​ចិញ្ចឹម​ និង​តាំង​ពី​ពេល​នោះមក​ខ្លួនក៏​បាន​រឹត​បន្តឹង​លក្ខខណ្ឌ​ផ្សេងៗ​ដូច​ជា​កំណត់​នីតិ​វិធី​ចំពោះ​គូ​​ស្វាមី​ភរិយា​​​បរទេស​​​ដែល​មាន​​អាយុ​​៣០​ឆ្នាំ​​ឡើង​ ហើយ​ត្រូវ​មាន​គម្លាត​អាយុ​យ៉ាង​តិច​២២​ឆ្នាំ​រវាង​អាយុ​របស់​ខ្លួ​ន​ និង​អាយុ​កូន​ដែល​ត្រូវ​សុំ​យក​ចិញ្ចឹម។ ចំណាត់​ការ​នេះ​បាន​ទាក់ទាញ​សហ​គមន៍​អន្តរជាតិ​ឲ្យ​យល់​ឃើញ​ថា យុទ្ធសាស្ត្រ​ការ​ពារ​សម​ស្រប​បាន​ចូល​ជា​ធរមាន​ហើយ​។

ទោះ​ជា​យ៉ាង​ណា​ កាលពីថ្ងៃ​ពុធ​ រដ្ឋាភិ​បាល​អូស្ត្រាលី បាន​លើក​ឡើង​ម្ដង​ទៀត​អំពី​ជំហរ​របស់​សហ​រដ្ឋ​អាមេរិក​ថា ស្ថាន​ភាព​នៃ​ការ​សុំ​កូន​ចិញ្ចឹម​នៅ​ប្រទេស​កម្ពុជា​មិន​មាន​ការ​ប្រែ​ប្រួល​ទេ។

អ្នក​នាំពាក្យ​នាយក​ដ្ឋាន​អគ្គមេធាវី​របស់​​ប្រទេស​អូស្ត្រាលី បាន​មាន​ប្រសាសន៍​ដូច្នេះ​ថា “ ប្រទេស​អូស្ត្រាលី មាន​កម្មវិធី​សុំកូន​ចិញ្ចឹម​​​អន្តរប្រទេស​​ ជាមួយ​ប្រទេស​ដែល​អនុវត្ត​តាម​អនុសញ្ញា​ទីក្រុង​ឡាអេ​…​។ ទោះ​បីជា​ប្រទេស​កម្ពុជា​បាន​ចុះ​ហត្ថលេខា​លើ​អនុ​សញ្ញា​នេះ​កាលពី​ថ្ងៃ​ទី​១ ខែ​សីហា​ ឆ្នាំ​២០០៧​ក៏ដោយ ក៏​ប្រទេ​ស​នេះមិន​ទាន់​មាន​ដំណើរ​ការ​អនុវត្ត​អនុសញ្ញា​នេះ​ឲ្យ​បាន​ពេញ​លេញ​ជា​ធរមាន​នៅ​ឡើយ​ទេ”។

កាលពី​ខែ​កុម្ភៈ បើ​គិត​រហូត​មក​ទល់​ពេល​នោះ ប្រទេស​អុីតាលី​បាន​ក្លាយ​ជា​ប្រទេស​តែ​មួយ​គត​់​ដែល​បាន​ចុះ​ហត្ថលេខា​លើ​កិច្ច​ព្រម​ព្រៀង​អនុវត្ត​កម្មវិធី​សុំ​កូន​អន្តរ​ប្រទេស​ឡើង​វិញ​ ក៏ប៉ុន្តែ​ស្ថានទូត​អុីតាលីនៅ​ទីក្រុង​បាង​កក​ មិន​បាន​ឆ្លើយ​តប​ទៅនឹង​សំណើសុំ​ព័ត៌មាន​បន្ថែម​ទេ​៕ សុធា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស