លោក ឈូក បណ្ឌិត អតីតអភិបាលក្រុងបាវិត មិនបានបង្ហាញខ្លួននៅសាលាឧទ្ធរណ៍ស្ដាប់ការជំនុំជម្រះឡើងវិញនូវរឿងក្ដីបាញ់កម្មការិនីរោងចក្រកាត់ដេរបីនាក់ឲ្យរងរបួសកាលពីខែកុម្ភៈ ឆ្នាំ២០១២ទេ។
គិតមកទល់ពេលនេះវាមានរយៈពេលជាង២០ខែហើយ ចាប់តាំងពីថ្ងៃ ឈូក បណ្ឌិត បាញ់សំដៅកម្មករ កម្មការិនី អំឡុងបាតុកម្មទាមទារប្រាក់ឈ្នួល និងអត្ថប្រយោជន៍ច្រើនជាងមុននៅតំបន់សេដ្ឋកិច្ចពិសេសក្នុងខេត្តស្វាយរៀង បណ្ដាលឲ្យរបួសកម្មការិនីបីនាក់។
ចាប់តាំងពីពេលនោះមក រឿងក្ដីរបស់លោក ឈូក បណ្ឌិត បានវិលចុះវិលឡើងរវាងសាលាដំបូងខេត្ត និងសាលាឧទ្ធរណ៍នៅរាជធានីភ្នំពេញ។
បន្ទាប់ពីសាលាដំបូងខេត្តបានប្រកាសកាលពីខែធ្នូ ថា ខ្លួនបានសម្រេចលើកលែងបទចោទប្រកាន់ទាំងអស់លើលោក ឈូក បណ្ឌិត ដែលមានមិត្តភក្តិជាមនុស្សដ៏មានឥទ្ធិពលក្នុងជួរគណបក្សប្រជាជនកម្ពុជាកំពុងកាន់អំណាចនោះ សាលាឧទ្ធរណ៍បានសើរើរឿងក្ដីនេះឡើងវិញ បន្ទាប់ពីមានសំណើមួយពីក្រសួងយុត្តិធម៌ ដែលបានលើកឡើងពីភាពចំាបាច់ក្នុងការមានការសុើបអង្កេតដ៏ហ្មត់ចត់មួយ។
លោក កាយ វិសាល មេធាវីរបស់អតីតអភិបាលក្រុងបាវិតនេះ បានឲ្យដឹងថា មុននេះ លោករំពឹងថា កូនក្ដីរបស់ខ្លួននឹងបង្ហាញខ្លួនក្នុងសវនាការនេះ។
លោកមានប្រសាសន៍ថា “កូនក្ដីរបស់ខ្ញុំដឹងថា ថ្ងៃណាត្រូវឡើងសវនាការនេះ ព្រោះភរិយារបស់គាត់បានប្រាប់គាត់រួចហើយ”។ លោក វិសាល បានបដិសេធមិនធ្វើអត្ថាធិប្បាយបន្ថែមពីទីសំចតបច្ចុប្បន្នរបស់កូនក្ដីខ្លួនទេ។
សាក្សីដែលបានផ្ដល់សក្ខីកម្មក្នុងសវនាការកាលពីម្សិលមិញបានរំលឹកឡើងវិញនូវរឿងរា៉វដែលគេបានដឹងរួចមកហើយ។
វរសេនីយ៍ត្រី កែវ សុខន អធិការរងនគរបាលក្រុងបាវិត បានរៀបរាប់ថា លោកបានឃើញលោក ឈូក បណ្ឌិត កាន់កាំភ្លើងខ្លីរបស់ខ្លួនបន្ទាប់ពីបានបាញ់បោះរួច ហើយលោកបានជួយគាត់ក្នុងការគេចខ្លួនពីកន្លែងកើតហេតុ។
វរសេនីយ៍ត្រីរូបនេះបាននិយាយថា “ឈូក បណ្ឌិត កាន់កំាភ្លើងក្នុងដៃពេលរត់គេចខ្លួន។ ខ្ញុំបានប្រាប់គាត់ឲ្យរត់ទៅរោងចក្រកាត់ដេរមួយក្បែរនោះ ហើយខ្ញុំបានជួយឲ្យគាត់ផ្លោះរបងរោងចក្រនោះ”។
វរសេនីយ៍ត្រី រាជ បណ្ឌិត ជាមន្ត្រីកងរាជអាវុធហត្ថក្រុងបាវិត បានផ្ដល់សក្ខីកម្មថា “ខ្ញុំបានឃើញ ឈូក បណ្ឌិត កាន់កំាភ្លើង ហើយតម្រង់ទៅកម្មករ កម្មការិនី” ដោយបន្ថែមថា ខ្លួនមិនបានឃើញគាត់បាញ់ទេ។
នៅពេលសាលាឧទ្ធរណ៍បើកការស៊ើបអង្កេតរឿងក្ដីនេះឡើងវិញកាលពីខែមីនា មានតែមនុស្សម្នាក់ប៉ុណ្ណោះ គឺលោក ឡុង ភ័ណ្ឌ នាយប៉ុស្ដិ៍រងសង្កាត់ប្រាសាទ ក្រុងបាវិត ដែលផ្ដល់សក្ខីកម្មថា ខ្លួនបានឃើញអតីតអភិបាលក្រុងបាវិតនេះកេះកៃកំាភ្លើង។
លោក ឡុង ភ័ណ្ឌ មិនបានបង្ហាញខ្លួននៅសាលាឧទ្ធរណ៍ដើម្បីផ្ដល់សក្ខីកម្មទេកាលពីម្សិលមិញ ប៉ុន្តែក្រឡាបញ្ជីមួយរូបបានអានលិខិតមានសក្ខីកម្មរបស់គាត់។
លិខិតនេះមានខ្លឹមសារថា “ខ្ញុំបានឃើញឈូក បណ្ឌិត តម្រង់កាំភ្លើងសំដៅទៅកម្មករកម្មការិនី ហើយក្រោយមក [ខ្ញុំឃើញ] កម្មករកម្មការិនីដួល”។
ជនរងគ្រោះទាំងបីនាក់ ដែលបានរងរបួស គឺឈ្មោះ ប៊ុន ចិន្តា ឈ្មោះ កែវ នា និងឈ្មោះ នុត សាខន ក៏បានបង្ហាញខ្លួនអំឡុងសវនាការកាលពីម្សិលមិញដើម្បីប្ដឹងជំទាស់ទៅតុលាការសុំប្រាក់សំណងជំងឺចិត្តច្រើនជាងមុន សរុប១៤០.០០០ដុល្លារដែរ។
ឈ្មោះ សាខន ដែលបានរងរបួសត្រង់ខ្នង និងដៃ បាននិយាយថា “ខ្ញុំត្រូវបានគេបាញ់ពីក្រោយខ្នង ដូច្នេះខ្ញុំមិនដឹងថា នរណាបាញ់ខ្ញុំទេ ប៉ុន្តែខ្ញុំឮកម្មករ កម្មការិនីផ្សេងៗទៀតស្រែកថា គឺអភិបាលក្រុងនេះ ដែលបាញ់កម្មករ កម្មការិនី ហើយរត់គេចខ្លួន”។
មេធាវីរបស់អតីតអភិបាលក្រុងរូបនេះបានប្ដឹងជំទាស់ទៅតុលាការឲ្យលើកលែងបទចោទប្រកាន់លើកូនក្ដីរបស់ខ្លួន ដោយបានអះអាងថា គ្មានសាក្សីមើលឃើញការបាញ់បោះនេះទេ។
លោក វុត្ថា បាននិយាយថា “គ្មាននរណាម្នាក់ឃើញកូនក្ដីរបស់ខ្ញុំបាញ់ទៅលើកម្មករកម្មការិនីទេ គឺអាចមានមនុស្សទី៣ដែលបានបាញ់ពួកគេ។
លោក តាំង ស៊ុនឡាយ ប្រធានក្រុមប្រឹក្សាជំនុំជម្រះបានឲ្យដឹងថា សាលដីកានឹងត្រូវប្រកាសនៅថ្ងៃទី៤ ខែវិច្ឆិកា៕ សេរីវុធ