នាងគឺជាបេក្ខនារីតំណាងឲ្យប្រទេសវៀតណាម ក្នុងការប្រកួតបវរកញ្ញាចក្រវាលនៅឆ្នាំនេះក៏ពិតមែន ប៉ុន្តែ កញ្ញា ត្រួង ធី ម៉ៃ (Truong Thi May) បានឲ្យដឹងថា នាងមានឈាមជ័រជាខ្មែរ មិនខុសពីពលរដ្ឋខ្មែរនៅតំបន់ព្រំដែនភាគខាងលិចទេ។
បវរកញ្ញាវៀតណាមឆ្នាំ២០១៣ រូបនេះ បានកើតក្នុងរាជធានីភ្នំពេញ និងធំដឹងក្តីនៅក្នុងតំបន់មួយនៃប្រទេសវៀតណាម ដែលប្រជាពលរដ្ឋខ្មែរភាគច្រើនហៅថា កម្ពុជាក្រោម។ កញ្ញា ម៉ៃ បាននិយាយថា “ឪពុកម្តាយ និងយាយតារបស់ខ្ញុំគឺជាខ្មែរកម្ពុជាក្រោម។ ម្តាយរបស់ខ្ញុំបានមករកស៊ីនៅប្រទេសកម្ពុជា ហើយខ្ញុំបានកើតនៅរាជធានីភ្នំពេញក្នុងឆ្នាំ១៩៨៨”។ កញ្ញាបាននិយាយបែបនេះជាភាសាខ្មែរ តាមប្រព័ន្ធសន្ទនា ស្កាយ (Skype) តាមអ៊ីនធើណិតពីទីក្រុងមូស្គូ ប្រទេសរុស្ស៊ី ដែលបានរៀបចំព្រឹត្តិការណ៍ប្រឡងបវរកញ្ញាចក្រវាលសម្រាប់ឆ្នាំនេះ។ កញ្ញា ម៉ៃ បាននិយាយបន្តថា “ម្តាយរបស់នាងខ្ញុំបានប្រាប់ខ្ញុំថា នៅពេលដែលខ្ញុំមានអាយុប្រហែល១ខួប គាត់ក៏បាននាំយើងទៅប្រទេសវៀតណាមវិញ”។
ព្រឹត្តិការណ៍ប្រឡងបវរកញ្ញាចក្រវាល រយៈពេលបីសប្តាហ៍ ដែលបានចាប់ផ្តើមកាលពីថ្ងៃ ទី២០ ខែតុលានោះបានឈានដល់វគ្គផ្តាច់ព្រ័ត្រ និងវគ្គបំពាក់មកុដ លើក្បាលបវរកញ្ញាចក្រវាលថ្មី នៅក្រុងមូស្គូ កាលពីយប់ថ្ងៃសៅរ៍។ ក៏ប៉ុន្តែ ព្រឹត្តិការណ៍នេះមិនបានបង្ហាញបេក្ខនារីបវរកញ្ញាកម្ពុជាជាផ្លូវការទេ។
កញ្ញា ម៉ៃ ដែលមានឈ្មោះខ្មែរថា រស្មី នៅក្នុងគ្រួសាររបស់នាងនៅតំបន់ដីសណ្តមេគង្គ ក្នុងប្រទេសវៀតណាមនោះ បានឲ្យដឹងថា ដោយមិនមានវត្តមានរបស់បវរកញ្ញាផ្លូវការមកពីប្រទេសកម្ពុជា នាងសង្ឃឹមថា នឹងបានតំណាងវប្បធម៌ទាំងពីរ ដែលនាងទទួលបានតាំងពីកុមារភាព។
កញ្ញា ម៉ៃ បាននិយាយបន្តថា “កម្មវិធីប្រឡងបវរកញ្ញាចក្រវាលនេះ គឺជាព្រឹត្តិការណ៍ធំបំផុត ដូច្នេះខ្ញុំចង់…ជាពិសេសណែនាំឲ្យពិភពលោកស្គាល់ប្រជាជនវៀតណាម និងកម្ពុជា និងប្រពៃណីរបស់ប្រទេសទាំងពីរ”។ កញ្ញាបានបន្តថា “ខ្ញុំចង់បង្ហាញឲ្យអ្នករាល់គ្នា និងប្រទេសទាំងអស់ថា កូនខ្មែរមានចរិតសុភាពរាបសារ និងចិត្តល្អ”។
កញ្ញា ម៉ៃ បានលើកឡើងថា ម្តាយរបស់កញ្ញាបានយកចិត្តទុកដាក់ថែទាំក្នុងការចិញ្ចឹមបីបាច់កញ្ញា ដើម្បីធ្វើឲ្យប្រាកដថា កញ្ញាមិនភ្លេចពូជពង្សកម្ពុជារបស់កញ្ញាទេ ហើយម្តាយរបស់កញ្ញា ក៏បានធ្វើឲ្យប្រាកដផងដែរថា ភាសាកំណើតរបស់កញ្ញា គឺភាសាខ្មែរ។ ក៏ប៉ុន្តែ កម្មវិធីបង្ហាញសាវតាផ្នែកវប្បធម៌របស់បវរកញ្ញាវៀតណាមរូបនេះនៅក្នុងព្រឹត្តិការណ៍ប្រឡងបវរកញ្ញាចក្រវាលនេះនឹងមិនមានការដាក់បញ្ចូលរបៀបស្លៀកពាក់តាមប្រពៃណីខ្មែរទេ។
កញ្ញា ម៉ៃ បានលើកឡើងថា “ខ្ញុំប្រាថ្នាឲ្យខ្ញុំអាចធ្វើបាន ក៏ប៉ុន្តែ ខ្ញុំមិនអាចធ្វើបានទេ។ កម្មវិធីប្រឡងនេះគ្រាន់តែអនុញ្ញាតឲ្យមាន [ការបង្ហាញ] សម្លៀកបំពាក់សម្រាប់ពេលល្ងាច ឈុតហែលទឹក និងសម្លៀកបំពាក់ប្រពៃណីវៀតណាមតែប៉ុណ្ណោះ”។ កញ្ញា ម៉ៃ បាននិយាយបន្ថែមទៀតថា “នាង ខ្ញុំគិតថា នាងខ្ញុំមានសំណាងល្អ ហើយនាងខ្ញុំមានមោទនភាពខ្លាំងណាស់ ដែលកើតជាកូនខ្មែរកាត់វៀតណាម”។ កញ្ញាបាននិយាយបន្តថា កញ្ញាមិនយល់អំពីចិត្តស្អប់ ដែលប្រជាជនខ្មែរនៅប្រទេសកម្ពុជាមានទៅលើប្រជាជនវៀតណាមទេ។
កញ្ញា ម៉ៃ បាននិយាយថា “តាមគំនិតរបស់ ខ្ញុំ កើតមកជាមនុស្សមានន័យថា យើងទាំងអស់គ្នាមានសំណាង និងវាសនាហើយ ដូច្នេះ យើងត្រូវមានទំនាក់ទំនងជាមួយគ្នាដោយក្តីស្រឡាញ់ និងភាពរាក់ទាក់”។ កញ្ញាបានបន្តក្នុងន័យណែនំាថា “ផ្តល់ក្តីស្រឡាញ់ វាប្រសើរជាងផ្តល់ក្តីស្អប់។ សូមគិតវិជ្ជមានចំពោះអ្នកគ្រប់គ្នា”។
កញ្ញា ម៉ៃ ដែលកាលពីពេលថ្មីៗនេះត្រូវបានផ្តល់រហស្សនាមថា ជាស្ត្រីម្នាក់នៅក្នុងចំណោម ស្ត្រីអាស៊ីមានសាច់សិចស៊ីបំផុតទាំងបីរូបប្រចាំឆ្នាំ២០១៣ ដោយអង្គការសិទ្ធិមនុស្ស ប៉េតា អាស៊ីប៉ាស៊ីហ្វិក (PETA Asia-Pacific) នោះ កាលពីមុន បានជាប់ចំណាត់ថ្នាក់លេខ២នៅក្នុងកម្មវិធីបវរកញ្ញាជនជាតិភាគតិចវៀតណាមឆ្នាំ២០០៧ ដែលជាកម្មវិធីប្រឡងបវរកញ្ញាមួយបើកចំហសម្រាប់ស្ត្រីគ្រប់រូប ដែលស្ថិតក្នុងចំណោមជនជាតិភាគតិចវៀតណាមទាំង៥៤ជនជាតិ។
នៅពេលអ្នកសារព័ត៌មានសួរថាតើកញ្ញានឹងប្រើប្រាស់ភាពលេចធ្លោថ្មីរបស់កញ្ញា នៅលើឆាកប្រឡងបវរកញ្ញាចក្រវាល សម្រាប់ផ្តល់សំឡេងដល់ជនជាតិភាគតិចខ្មែរនៅក្នុងប្រទេសវៀតណាមដែរឬយ៉ាងណានោះ កញ្ញា ម៉ៃ បាននិយាយថា គណបក្សកុម្មុយនីស្តនៅប្រទេសវៀតណាម ក៏បានកំពុងធ្វើការងារសមស្របមួយផងដែរ។
កញ្ញា ម៉ៃ ក៏បានដឹងផងដែរថា មតិចោទប្រកាន់ថា ប្រទេសវៀតណាមធ្វើទុក្ខបុកម្នេញលើជនជាតិភាគតិចកម្ពុជាក្រោមរបស់ខ្លួននោះមិនឆ្លុះបញ្ចាំងឲ្យឃើញបទពិសោធផ្ទាល់របស់កញ្ញា ដែលធំដឹងក្តីនៅក្នុងប្រទេសនេះទេ។ កញ្ញាបានពន្យល់ថា “តាមការពិត ប្រជាជនជាច្រើនមានជីវភាពក្រីក្រ។ គ្រួសាររបស់ខ្ញុំ ក៏ក្រដែរ។ក៏ប៉ុន្តែ រដ្ឋាភិបាលវៀតណាមបានជួយប្រជាជនក្រីក្រយ៉ាងច្រើន។ វាជារឿង មិនពិតទេ ដែលថា រដ្ឋាភិបាលវៀតណាមមិនជួយយើងនោះ”។
នៅក្នុងការស្ទង់មតិសម្រាប់ផ្នែក “ជម្រើស របស់ប្រជាជន” នៃកម្មវិធីប្រឡង បវរកញ្ញាចក្រវាល ដែលរៀបចំដោយគេហទំព័រវិភាគព្រឹត្តិការណ៍បង្ហាញសម្រស់ មីសសូសូឡូជី (Missosoloy) ដែលមានមូលដ្ឋាននៅទីក្រុងម៉ានីល ប្រទេសហ្វីលីពីន បវរកញ្ញាវៀតណាម រូបនេះ កាលពីយប់មិញបានឈរនៅចំណាត់ថ្នាក់លេខ៤ ដោយសំឡេងគាំទ្រ១៩.៥០០សំឡេង សម្រាប់ទទួលបានមកុដបវរកញ្ញាចក្រវាលនេះ។ ក៏ប៉ុន្តែ ទោះបីជាមិនបានទទួល មកុដបវរកញ្ញាចក្រវាល កាលពីយប់ថ្ងៃសៅរ៍ ក៏ដោយ ក៏កញ្ញា ម៉ៃ សង្ឃឹមថា ក្នុងពេលអនាគតកញ្ញាអាចជួយផ្សព្វផ្សាយគុណតម្លៃរបស់ប្រទេសកម្ពុជា និងវៀតណាម ព្រមទាំងស្មារតី យោគយល់គ្នាទៅវិញទៅមក រវាងវប្បធម៌ទាំងពីរ។
កញ្ញាបាននិយាយថា “ខ្ញុំនឹងផ្សព្វផ្សាយវប្បធម៌ល្អ និងខិតខំឲ្យអស់ពីសមត្ថភាព ក្នុងការជំរុញឲ្យមនុស្សគ្រប់រូបផ្តល់នូវក្តីស្រឡាញ់ឲ្យកាន់តែច្រើនដល់គ្នាទៅវិញ ទៅមក”។ កញ្ញា ម៉ៃ បាននិយាយបន្តថា “ខ្ញុំសង្ឃឹមថា ខ្ញុំអាចជំរុញឲ្យអ្នកផ្សេងទៀតស្រឡាញ់ និងជួយគ្នា និងជាពិសេសជួយប្រជាជនក្រីក្រ”។
កាលពីឆ្នាំ២០០៦ លោកនាយករដ្ឋមន្ត្រី ហ៊ុន សែន បានប្រកាសថា នឹងមិនមានបវរកញ្ញាខ្មែរទេ លុះត្រាតែប្រជាជនតិចជាង១៥ភាគរយរស់នៅក្រោមបន្ទាត់ភាពក្រីក្រ ហើយប្រាក់ចំណូលមធ្យមប្រចាំឆ្នាំកើនឡើងដល់១.៥០០ដុល្លារ។ បច្ចុប្បន្ន ប្រាក់ចំណូលមធ្យមនៅក្នុងប្រទេសកម្ពុជាមានប្រហែល៧៥០ដុល្លារសហរដ្ឋអាមេរិក៕ សុធា