កាលពីម្សិលមិញ លោកនាយករដ្ឋមន្ត្រី ហ៊ុន សែន បានធ្វើជាអធិបតីភាពនៅក្នុងកិច្ចប្រជុំថ្នាក់កំពូលមួយជាមួយឧបនាយករដ្ឋមន្ត្រីចំនួនប្រាំបួនរូបដោយសម្ងាត់ នៅឯការិយាល័យក្នុងវិមានសន្តិភាពរបស់លោកក្នុងរាជធានីភ្នំពេញ។
គ្មានព័ត៌មានលម្អិតណាត្រូវបានបង្ហាញឡើយពាក់ព័ន្ធនឹងកិច្ចប្រជុំថ្នាក់កំពូលនេះ ដែលបានចាប់ផ្ដើមនៅម៉ោងប្រហែល៨ព្រឹក ហើយបានបញ្ចប់នៅវេលាថ្ងៃត្រង់ ប៉ុន្តែប្រភពមួយដែលប្រហែលជាដឹងអំពីរបៀបវារៈនេះបានឲ្យដឹងថា វាទាក់ទិនទៅនឹងសេចក្ដីព្រាងថវិកាសម្រាប់ឆ្នាំ២០១៤ ដែលគណៈកម្មាធិការអចិន្ត្រៃយ៍ដែលមានសមាជិកចំនួន១២រូបនៅរដ្ឋសភាបានបង្ហាញជាលើកដំបូងកាលពីម្សិលមិញ។
ភាពសម្ងាត់នៃកិច្ចប្រជុំនេះ ត្រូវបានប្រព័ន្ធផ្សព្វផ្សាយជាភាសាខ្មែរដែលតែងតែចុះផ្សាយព័ត៌មានស្ដីអំពីតួនាទី និងកិច្ចការផ្លូវការរបស់លោកនាយករដ្ឋមន្ត្រី ហ៊ុន សែន ចាត់ទុកថា ខុសពីធម្មតា ប៉ុន្តែប្រព័ន្ធផ្សព្វផ្សាយនេះមិនត្រូវបានអនុញ្ញាតឲ្យចូលរួមក្នុងកិច្ចប្រជុំកាលពីម្សិលមិញនេះឡើយ។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីបានឲ្យដឹងថា លោកមិនបានដឹងអំពីកិច្ចប្រជុំនេះឡើយ ពីព្រោះលោកមិនត្រូវបានអញ្ជើញឲ្យទៅចូលរួមក្នុងកិច្ចប្រជុំនេះទេ។ ជំនួយការម្នាក់របស់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានលើកឡើងថា លោក ស ខេង បានទៅចូលរួមក្នុងកិច្ចប្រជុំនេះ ប៉ុន្តែជំនួយការរូបនេះមិនបានរៀបរាប់អ្វីច្រើនលើសពីនេះនោះទេ៕ ស៊ុយឈាង