ក្រុមមន្ត្រីបានឲ្យដឹងកាលពីម្សិលមិញថា នគរបាលប្រឆាំងការជួញដូរមនុស្សរាជធានី និងខេត្ត បានចាប់ខ្លួនមនុស្សចំនួនប្រាំនាក់ក្នុងករណីពីរដោយឡែកពីគ្នា ពីបទប៉ុនប៉ងបញ្ជូនស្រ្តីវ័យក្មេងប្រាំមួយនាក់ទៅកាន់ប្រទេសចិនធ្វើជាកូនក្រមុំ។
លោក កែវ ធា នាយនគរបាលប្រឆាំងការជួញដូរមនុស្សបានឲ្យដឹងថា កាលពីយប់ថ្ងៃអាទិត្យ នគរបាលប្រឆាំងការជួញដូរមនុស្សរាជធានីភ្នំពេញបានចាប់ខ្លួនបុរសម្នាក់ និងស្ត្រីពីរនាក់នៅឯអាកាសយានដ្ឋានអន្តរជាតិភ្នំពេញ និងបានចោទប្រកាន់ពួកគេពីបទជួញដូរមនុស្ស។
លោកបានមានប្រសាសន៍ថា “យើងបានចាប់ខ្លួនជនសង្ស័យបីនាក់នៅឯអាកាសយានដ្ឋានកាលពីយប់ថ្ងៃអាទិត្យ”។ លោកបានមានប្រសាសន៍បន្ថែមទៀតថា នគរបាលដែលធ្វើការនៅឯអាកាសយានដ្ឋានមានការសង្ស័យចំពោះឥរិយាបថរបស់ឈ្មោះ តាំង សារឿន អាយុ៤៦ឆ្នាំ ឈ្មោះ ម៉ក់ ហៀងប្ញទ្ធី អាយុ៣១ឆ្នាំ និងឈ្មោះ យី ឡាវ អាយុ៦០ឆ្នាំ។
លោក កែវ ធា បានមានប្រសាសន៍ថា“នគរបាលបានឃើញពួកគេចែកលិខិតឆ្លងដែនឲ្យជនរងគ្រោះចំនួនបួននាក់ មុនពេលពួកគេចេញដំណើរទៅប្រទេសចិន” ។លោកបានឲ្យដឹងបន្ថែមថា ជនសង្ស័យទាំងបួននាក់នេះទំនងជាមិនមានទំនាក់ទំនងជិតស្និទ្ធជាមួយនឹងអនាគតកូនក្រមុំ ដែលមានអាយុរវាង១៧ឆ្នាំ ទៅ២៦ឆ្នាំទាំងនេះទេ។
លោក កែវ ធា បានឲ្យដឹងថា នគរបាលកំពុងតែសាកសួរស្ត្រីបួននាក់នេះ កាលពីយប់មិញនៅឡើយ។ លោកបានបន្ថែមថា ជនសង្ស័យទាំងបីនាក់នឹងត្រូវបញ្ជូនទៅតុលាការនៅថ្ងៃនេះ។ ក្នុងករណីដាច់ដោយឡែកមួយ នគរបាលប្រឆាំងការជួញដូរខេត្តសៀមរាប បានចាប់ខ្លួនជនសង្ស័យបួននាក់ បន្ទាប់ពីសម្គាល់ឥរិ យាបថប្រហាក់ប្រហែលគ្នានេះនៅអាកាសយានដ្ឋានអន្តរជាតិសៀមរាប កាលពីយប់ថ្ងៃសុក្រ ហើយឃើញថា ស្ត្រីទាំងពីរនាក់នេះមានការពាក់ព័ន្ធនឹងអនាគតកូនក្រមុំពីរនាក់ ម្នាក់អាយុ២៥ឆ្នាំ និងម្នាក់ទៀតអាយុ៣០ឆ្នាំ។
លោកស្រី ដួង ថាវរី នាយនគរបាលប្រឆាំងការជួញដូរមនុស្សខេត្តបានឲ្យដឹងកាលពីម្សិលមិញថា “ យើងបានសហការជាមួយនគរបាលអាកាសយានដ្ឋាន ដើម្បីចាប់ខ្លួនពួកគេនៅពេលពួកគេត្រៀមបញ្ជូនជនរងគ្រោះរបស់ខ្លួនទៅទីក្រុងម៉ាកាវ”។ លោកស្រី ថាវរី បានមានប្រសាសន៍ថា មេខ្យល់បានចំណាយប្រាក់ឲ្យគ្រួសារស្ត្រីពីរនាក់នេះចំនួន៤០០ដុល្លារក្នុងមួយនាក់ ហើយបានសន្យាថា កូនស្រីរបស់ពួកគេនឹងរៀបការជាមួយបុរសជនជាតិចិនមានទ្រព្យសម្បត្តិច្រើន។
លោកស្រី ថាវរី បានឲ្យដឹងបន្ថែមទៀតថា “មេខ្យល់បានព្យាយាមបោកប្រាស់ពួកគេ ពីព្រោះពួកគេគ្មានប្រាក់ជាប់ខ្លួនទេ គ្មានលិខិតឆ្លងដែន និងទូរស័ព្ទទេ ដូច្នេះពួកគេត្រូវបានជួញដូរ”។ លោកស្រីបានមានប្រសាសន៍ថា “យើងព្រួយបារម្ភថា ពួកគេអាចត្រូវបញ្ជូនទៅបនស្រីពេស្យាណាមួយ មិនមែនរៀបការនោះទេ”។ លោកស្រីបន្ថែមទៀតថា ការធ្វើជាឈ្មួញកណ្តាលអាពាហ៍ពិពាហ៍ គឺជាអំពើខុសច្បាប់កម្ពុជា។
ជនសង្ស័យទាំងនេះត្រូវបានសាកសួរនៅឯតុលាការកាលពីម្សិលមិញ ហើយជនរងគ្រោះត្រូវបានអង្គការក្រៅរដ្ឋាភិបាលក្នុងស្រុកមួយធ្វើការអប់រំ និងបញ្ជូនពួកគេត្រឡប់ទៅជួបក្រុមគ្រួសាររបស់ខ្លួនវិញកាលពីថ្ងៃសៅរ៍។
លោក ហួយ ពេជ្រសុវណ្ណ មន្ត្រីកម្មវិធីនៅមជ្ឈមណ្ឌលច្បាប់សម្រាប់សហគមន៍បានលើកឡើងថា បើទោះជាគ្មានតួលេខទូទាំងប្រទេសក៏ដោយ ករណីពីរថ្មីៗនេះ គឺជាគំរូមួយនៃកំណើនសកម្មភាពឈ្មួញកណ្តាលបញ្ជូនស្ត្រីឲ្យទៅរៀបអាពាហ៍ពិពាហ៍នៅប្រទេសចិន ដោយខុសច្បាប់។ណលោក ពេជ្រសុវណ្ណ បានមានប្រសាសន៍ថា “ ពេលនេះមានករណីកាន់តែច្រើន ហើយគ្រោះថ្នាក់ណាស់”។
លោក ពេជ្រ សុវណ្ណ បានឲ្យដឹងថា “ ភាគច្រើន [ស្ត្រី] ត្រូវបានចាត់ទុកដូចជា ទាសករពីសំណាក់បុរសជនជាតិចិន ហើយបុរសខ្លះគ្រាន់តែចង់ឲ្យស្ត្រីម្នាក់បម្រើផ្លូវភេទសម្រាប់ ពួកគេ”។ លោកបន្ថែមថា តម្រូវការភរិយាមានកម្រិតខ្ពស់នៅក្នុងប្រទេសចិនដោយសារតែគោលនយោបាយកូនមួយរបស់ប្រទេសនេះ។ តាមគោលនយោបាយនោះ ទារកទទួលបានការពេញចិត្តជាង។
នៅពេលដែលស្ត្រីខ្មែរទៅដល់ប្រទេសចិន ជាធម្មតានៅតាមតំបន់ជនបទ ពួកគេជាប់នៅទីនោះ ហើយជារឿយៗខ្លាចមិនហ៊ានរាយការណ៍ប្រាប់នគរបាលអំពីអំពើរំលោភឡើយ ពីព្រោះឈ្មួញកណ្តាលរបស់ពួកគេនិយាយប្រាប់ពួកគេថា ពួកគេនឹងត្រូវបានចាប់ខ្លួន។ បើទោះជាមជ្ឈមណ្ឌលអប់រំច្បាប់សម្រាប់សហគមន៍ បានជួយជនរងគ្រោះជិត២០នាក់ក៏ដោយ ក៏ស្ត្រីប្រាំមួយនាក់ ដែលត្រូវបានធ្វើមាតុភូមិនិវត្តន៍ក្នុងឆ្នាំនេះបានឲ្យដឹងថា ស្ត្រីកាន់តែច្រើនត្រូវបានជួញដូរនិងបញ្ជូនទៅប្រទេសចិន។
លោក ពេជ្រសុវណ្ណ បានថ្លែងថា “ឆ្នាំនេះយើងបានធ្វើមាតុភូមិនិវត្តន៍ជនរងគ្រោះប្រាំមួយនាក់ពីចិនដីគោកហើយ។យោងតាមជនរងគ្រោះ ពួកគេបានជួបស្ត្រីខ្មែរជាច្រើន ដែលជាប់នៅក្នុងប្រទេសចិន ក៏ប៉ុន្តែ ពួកគេមិនដឹងថា ត្រូវត្រឡប់មកកាន់មាតុភូមិវិញដោយរបៀបណាទេ”៕ប៊ុននី