កាលពីម្សិលមិញ មន្ត្រីរដ្ឋាភិបាលម្នាក់បានព្យាយាមបញ្ជាក់អំពីសេចក្តីរាយការណ៍របស់ទីភ្នាក់ងារព័ត៌មានរដ្ឋ អាកាប៉េ ដែលបានរាយការណ៍ថា លោកនាយករដ្ឋមន្ត្រី ហ៊ុន សែន ត្រូវបានអញ្ជើញឲ្យថ្លែងសុន្ទរកថានៅឯកិច្ច ប្រជុំកំពូលដ៏សំខាន់មួយក្នុងទីក្រុងតូក្យូនៅចុងខែនេះ ដោយលើកឡើងថា តាមពិត អតីតប្រធានាធិបតីអាមេរិក លោកប៊ីល គ្លីនតុន ត្រូវបានអញ្ជើញរួចហើយឲ្យធ្វើជាវាគ្មិននៅក្នុងពិធីនេះ។
ទីភ្នាក់ងារព័ត៌មានអាកាប៉េ បានរាយការណ៍កាលពីថ្ងៃសុក្រថា លោក ហ៊ុន សែន ត្រូវបានអញ្ជើញឲ្យថ្លែងសុន្ទរកថានៅឯកិច្ចប្រជុំកំពូលសម្រាប់មេដឹកនាំពិភពលោកបញ្ចេញយោបល់នេះនៅថ្ងៃទី១៦ ខែវិច្ឆិកា ក្នុងទីក្រុងតូក្យូ ដោយអ្នករៀបចំពិធីនេះ គឺ លោក ហារូហ៊ីសា ហាន់ដា ជាសប្បុរសជនជប៉ុន ដែលគ្រប់គ្រងអង្គការឧបត្ថម្ភពិភពលោកសម្រាប់ការអភិវឌ្ឍន៍ (Wordwide Support for Development)។
កិច្ចប្រជុំកំពូលសម្រាប់មេដឹកនាំពិភពលោកបញ្ចេញយោបល់លើកមុនប្រារព្ធធ្វើក្នុងទីក្រុងតូក្យូកាលពីខែកញ្ញា និងមានអតីតនាយករដ្ឋមន្ត្រីអង់គ្លេស លោក តូនី ប៊្លែរ ជាវាគ្មិន ដែលបានលើកឡើងអំពីប្រធានបទដូចជា ការពិចារណាពីសន្តិភាព ការបង្ហាញពីបទពិសោធក្នុងដំណើរការសន្តិភាពរបស់អៀរឡង់ និងការអភិវឌ្ឍនៅមជ្ឈិមបូព៌ា។
យោងតាមទីភ្នាក់ងារ អាកាប៉េ បានរាយការណ៍ថា សុន្ទរកថារបស់លោក ហ៊ុន សែន គឺផ្តោតលើ “បទពិសោធពីអតីតកាលរបស់កម្ពុជា ជាពិសេសអំពីគោលនយោបាយឈ្នះ ឈ្នះ របស់ប្រទេសនេះ”។
លោក កៅ គឹមហួន រដ្ឋលេខាធិការក្រសួងការបរទេសបានមានប្រសាសន៍កាលពីម្សិលមិញថា សេចក្តីរាយការណ៍ព័ត៌មានរបស់ទីភ្នាក់ងារព័ត៌មានអាកាប៉េ គួរតែរាយការណ៍ថា លោក ហ៊ុន សែន គ្រាន់តែត្រូវបានជូនដំណឹងថា លោក ប៊ីល គ្លីនតុន គឺជាវាគ្មិននៅក្នុងពិធីនេះ។ លោក កៅ គឹមហួន ដែលជាប្រធានសាកលវិទ្យាល័យកម្ពុជា ដែលមានលោក ហារូហ៊ីសា ហាន់ដា ជាស្ថាបនិក និងជាអធិការបតីបច្ចុប្បន្នបានមានប្រសាសន៍ថា “អំឡុងពេលជំនួប លោកបណ្ឌិត ហាន់ដា គ្រាន់តែបង្ហាញព័ត៌មានដល់លោក ហ៊ុន សែន អំពីកិច្ចប្រជុំក្នុងទីក្រុងតូក្យូ នៅថ្ងៃទី១៦ ខែវិច្ឆិកា ប៉ុណ្ណោះ ដែលនៅក្នុងនោះ គេបានអញ្ជើញលោក ប៊ីល គ្លីនតុន ជាអតីតប្រធានាធិបតីអាមេរិកឲ្យធ្វើជាវាគ្មិនរួចហើយ”។
លោក កៅ គឹម ហួន បានមានប្រសាសន៍ថា “ទោះជាយ៉ាងណា លោកបណ្ឌិត ហាន់ដា ក៏បានលើកឡើងក្នុងពេលជំនួបនោះដែរថា លោកមានគម្រោងអញ្ជើញនាយករដ្ឋមន្ត្រីឲ្យធ្វើជាវាគ្មិននៅក្នុងកិច្ចប្រជុំកំពូលនៅពេលអនាគត”។ រូបថតនៅលើវិបសាយរបស់ទីភ្នាក់ងារព័ត៌មានអាកាប៉េ ដែលបានថតអំឡុងពេលជំនួបកាលពីថ្ងៃសុក្រ នៅវិមានសន្តិភាពបង្ហាញពីលោក ហ៊ុន សែន និងលោក ហាន់ដា ឱបគ្នា។
យោងតាមព័ត៌មានតាមគេហទំព័ររបស់មូលនិធិ ហាន់ដា បង្ហាញថា លោក ហាន់ដា ធ្លាប់បានអញ្ជើញលោក ហ៊ុន សែន ឲ្យថ្លែងសុន្ទរកថាកាលពីខែកក្កដា ឆ្នាំ២០១២ទៅកាន់និស្សិតបញ្ចប់ការសិក្សានៅសាកលវិទ្យាល័យកម្ពុជា ក្នុងរាជធានីភ្នំពេញ ហើយលោកនាយករដ្ឋមន្ត្រីបានផ្តល់គ្រឿងឥស្សរិយយសជាសហមេត្រី ដល់លោក ហាន់ដា។
មូលនិធិរបស់លោក ហាន់ដា បានកសាងមន្ទីរពេទ្យជាច្រើននៅកម្ពុជា។ ដោយប្រើឈ្មោះ តូស៊ូ ហ្វូកាមី លោកក៏ជាអ្នកនិពន្ធសៀវភៅសម្រាប់ជួយខ្លួនឯងជាច្រើនផងដែរ ដើម្បីផ្តល់យោបល់អំពីរបៀបទទួលបានជោគជ័យ៕ គឹមហឿន