ទោះបីជានៅតែមិនមានវត្តមានចូលរួមពីសំណាក់គណបក្សសង្គ្រោះជាតិក៏ដោយ ក៏សេចក្តីព្រាងថវិកាចំនួន៣,៥៤លានដុល្លារសម្រាប់ឆ្នាំ២០១៤ បានឆ្លងផុតដំណាក់កាលថ្មីមួយទៀតក្នុងដំណើរក្លាយជាច្បាប់ កាលពីម្សិលមិញ នៅពេលតំណាងរាស្ត្រមកពីគណបក្សប្រជាជនកម្ពុជា បានបញ្ជូនសេចក្តីព្រាងថវិកាចំណាយ ទៅគណៈកម្មាធិការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា សម្រាប់ដំណើរការអនុម័ត។
លោក ជាម យៀប តំណាងរាស្ត្រនិងជាអ្នកនាំពាក្យគណបក្សប្រជាជនកម្ពុជា និងជាប្រធានគណៈកម្មាធិការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា បានឲ្យដឹងថា ដំណាក់កាលអនុម័តគឺជាដំណាក់កាលចុងក្រោយ មុនពេលសេចក្តីព្រាងនេះត្រូវបានលើកទៅដាក់ក្នុងកិច្ចពិភាក្សាដេញដោលពេញលេញ និងបោះឆ្នោតដោយរដ្ឋសភា។ ក៏ប៉ុន្តែ គណបក្សសង្គ្រោះជាតិ នៅតែបដិសេធមិនទទួលយកអាសនៈទាំង៥៥របស់ខ្លួន ដោយសារបច្ចុប្បន្នមានវិវាទជាមួយគណបក្សប្រជាជនកម្ពុជាជុំវិញសុពលភាពនៃការបោះឆ្នោតជាតិកាលពីខែកក្កដា។
លោក ជាម យៀប បានលើកឡើងថា សេចក្តីព្រាងថវិកានេះត្រូវបានបញ្ជូនទៅគណៈកម្មាធិការរបស់លោកហើយ ដោយមិនមានការផ្លាស់ប្តូរទេ បន្ទាប់ពីគណៈកម្មាធិការអចិន្ត្រៃយ៍នេះបានបញ្ចប់កិច្ចប្រជុំរបស់ខ្លួនកាលពីម្សិលមិញ ដោយមានវត្តមានចូលរួមរបស់ប្រធានគណៈកម្មាធិការអចិន្ត្រៃយ៍ទាំងប្រាំបួននៃរដ្ឋសភា លោក ហេង សំរិន ប្រធានរដ្ឋសភា និងអនុប្រធានរដ្ឋសភាទាំងពីររូប ដែលសុទ្ធតែជាសមាជិកគណបក្សប្រជាជនកម្ពុជា។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នឹងឆ្លើយសំណួររបស់គណៈកម្មាធិការសេដ្ឋកិច្ច ហិរញ្ញវត្ថុ ធនាគារ និងសវនកម្ម ទាក់ទងនឹងសេចក្តីព្រាងថវិកានេះនៅថ្ងៃស្អែក។ លោក ជាម យៀប បានមានប្រសាសន៍ថា “ ខ្ញុំបានទូរស័ព្ទទៅឯកឧត្តម អូន ព័ន្ធមុនីរ័ត្ន ដើម្បីសាកសួរគាត់ថា តើឯកឧត្តមអាចឡើងការពារសេចក្តីព្រាងថវិកានេះ នៅខានស្អែក [ថ្ងៃពុធ] បានដែរឬអត់។ ឯកឧត្តមអាចឡើងការពារនៅពេលនោះបាន”។ លោក អូន ព័ន្ធមុនីរ័ត្ន មិនអាចទំនាក់ទំនងធ្វើសេចក្តីអត្ថាធិប្បាយបានទេ។
ទាំងក្រសួងសេដ្ឋកិច្ច និងហិរញ្ញវត្ថុ រដ្ឋសភា ទាំងខុទ្ទកាល័យលោកនាយករដ្ឋមន្ត្រី ហ៊ុន សែន ដែលបានអនុម័តសេចក្តីព្រាងថវិកានេះកាលពីខែមុននោះ មិនបានផ្តល់ព័ត៌មានលម្អិត ទាក់ទងនឹងរបៀបរបបចំណាយថវិកានេះទេ។ គួរកត់សម្គាល់ថា ថវិកានេះមានចំនួនច្រើនជាងថវិកាសម្រាប់ឆ្នាំ២០១៣ ចំនួនប្រមាណជា៤០០លានដុល្លារសហរដ្ឋអាមេរិក។
នៅពេលអ្នកសារព័ត៌មានសួរថា តើហេតុ អ្វីបានជាព័ត៌មានលម្អិតទាក់ទងទៅនឹងថវិកានេះមិនត្រូវបានផ្សព្វផ្សាយជាសាធារណៈក្នុងដំណាក់កាលថ្មីនេះ លោក ជាម យៀប បានបង្វែរសំណួរនេះទៅលោក ហេង សំរិន។ ក៏ប៉ុន្តែ លោក ហេង សំរិន បានបដិសេធមិនឆ្លើយសំណួរ នៅពេលលោកកំពុងចាកចេញពីកិច្ចប្រជុំកាលពីម្សិលមិញ ហើយលោក កែវ ពិសិដ្ឋ ប្រធានខុទ្ទកាល័យរបស់លោក បានឲ្យដឹងថា លោកមិនដឹងថា តើមូលហេតុអ្វី បានជាសេចក្តីព្រាងថវិកានេះមិនកំពុងត្រូវបានផ្សព្វផ្សាយជាសាធារណៈ។
ទាំងលោក ជាម យៀប ទាំងលោក ពិសិដ្ឋ មិនបានលើកឡើងថា តើនៅពេលណាទើបសេចក្តីព្រាងថវិកានេះឈានទៅដល់កិច្ចប្រជុំ រដ្ឋសភាទេ។ ច្បាប់ស្តីពីហិរញ្ញវត្ថុសាធារណៈចែងថា សេចក្តីព្រាងថវិកានឹងទៅដល់ព្រឹទ្ធសភា យ៉ាងយូរក្នុងសប្តាហ៍ដំបូងនៃខែធ្នូ បន្ទាប់ ពីសេចក្តីព្រាងថវិកានេះឆ្លងផុតរដ្ឋសភា។
តំណាងរាស្ត្រជាប់ឆ្នោតទាំង៥៥រូបរបស់គណបក្សប្រឆាំង ពោលគឺមានចំនួនជិតពាក់កណ្តាលនៃចំនួនតំណាងរាស្ត្រសរុបក្នុងរដ្ឋសភា កំពុងបដិសេធមិនទទួលយកអាសនៈរបស់ខ្លួនទេ លុះត្រាតែគណបក្សប្រជាជនកម្ពុជា ឯកភាពលើកម្មវិធីកែទម្រង់ប្រព័ន្ធបោះឆ្នោត និងប្រតិបត្តិការស៊ើបអង្កេតឯករាជ្យមួយ ចំពោះការបោះឆ្នោតកាលពីខែកក្កដា។ គណបក្សសង្គ្រោះជាតិ បានឲ្យដឹងថា រដ្ឋសភាគឺជារដ្ឋសភាមិនស្របច្បាប់ ដោយសារតែមិនមានការចូលរួមរបស់ខ្លួន ហើយមិនអាចអនុម័តច្បាប់នានាដោយស្របច្បាប់បានទេ រួមទាំងសេចក្តីព្រាងថវិកានេះ លុះត្រាតែខ្លួនចូលរួម។
គណបក្សប្រជាជនកម្ពុជា បានលើកឡើងថា ខ្លួនមានសំឡេងភាគច្រើនដាច់ខាតនៅក្នុងរដ្ឋសភា ដែលផ្តល់ភាពស្របច្បាប់ដល់ខ្លួន ក្នុងការអនុម័តសេចក្តីព្រាងថវិកានេះ និងជំរុញដំណើរការអនុម័តនេះ ទោះជាមាន ឬក៏គ្មានគណបក្សប្រឆាំងក៏ដោយ៕សុធា