27 C
Phnom Penh

តួលេខ​​​បង្ហាញ​​​ថា នៅ​​​មាន​​​ការ​​​លាក់​​​បាំ​​​ង​​​អំពើ​​​​​​ចាប់​​​រំលោភ​​​កុមារ​​​

ដោយ ឌឹ ខេមបូឌា ដេលី

បទវិភាគ

យោង​តាម​អង្គការ​សិទ្ធិមនុស្ស​អាដ​ហុក​បានឲ្យ​ដឹង​ថា​ មាន​សេចក្តី​រាយ​ការ​ណ៍​អំពី​ករណី​រំលោភ​កុមារ​ចំនួន​១៤០​ករណី​នៅក្នុង​រយៈពេល​ប្រាំបួន​ខែ​ដំបូង​នៃ​ឆ្នាំនេះ និង​មាន​ករណី​រំលោភ​ ហើយ​សម្លាប់​១៤ករណី អំឡុង​ពេល​ដូច​គ្នា​នេះ​។

លោកស្រី ជួន​ ចំរ៉ុង​ ប្រធាន​កម្ម​វិធី​ស្ត្រី​​​នៅ​​​​​​​អង្គការ​អាដ​ហុក​បាន​មាន​ប្រសាសន៍ថា ការ​រំលោភ​កុមារ​មាន​ចំនួន​ជាង​២​ភាគ៣ នៃ​ករណី​រំលោភ​ទាំង​អស់​ដែល​អង្គការ​អាដ​ហុក​​​​​​​​​​ទទួលបាន ហើយ​ស្ថា​ន​ការ​ណ៍នេះ​បង្ហាញ​​​​​​​ថា មាន​ការ​អត់​ឱន​​ច្រើន​​ចំពោះ​បទ​ឧក្រិដ្ឋ​រំលោភ​​​​​​​​​​កុមារ​នៅក្នុង​សង្គម​ខ្មែរ។ លោកស្រី ចំរ៉ុង បាន​មាន​ប្រសាសន៍​ថា “ មាន​​វប្បធម៌ហិង្សាពី​បុរស​ទៅ​លើ​ស្ត្រី ប៉ុន្តែ​វាមិន​មែន​ជា​អាទិភាព​ទេ​នៅ​កម្ពុជា”។
លោក​​​​​​​​​​​​ស្រី​បាន​បន្ថែម​ថា ​មហាបាតុកម្ម​ដែលបាន​ផ្ទុះ​ឡើង​ក្រោយ​ពី​ករណី​រំលោភ​ ហើយ​សម្លាប់​នាពេល​ថ្មី​ៗ​នេះ​ក្នុង​ប្រទេស​​​​​​​ឥណ្ឌា និង​ការ​រំលោភ​កុមារ​នៅអាហ្រិ្វក​ខាង​ត្បូង​​ នឹង​មិន​កើត​មាន​នៅកម្ពុជា​ទេ។ លោកស្រី​ ចំរ៉ុង​ បាន​មាន​ប្រសា​សន៍​ថា “ បញ្ហា​ផ្លូវ​ភេទ​មិន​មែន​ជា​អាទិភាពដែល​គេ​ត្រូវ​ការ​ពារ​នោះ​ទេ​។ការ​រំលោភ​ត្រូវ​បាន​ចាត់​​​​​​​​​​ទុក​ថា ជា​បញ្ហាបុគ្គល បញ្ហាផ្ទាល់​​​ខ្លួន ដូច្នេះ​មាន​កំហឹង​ចំពោះ​តែ​មនុស្ស​ដែលប្រព្រឹត្ត​បទ​​​​​​​ឧក្រិដ្ឋ​នោះ​ប៉ុណ្ណោះ”។

អង្គការ​សិទ្ធិមនុស្ស​លីកាដូ មាន​តួលេខ​ខ្ពស់​ជាង​នេះ​សម្រាប់​រយៈពេល​ដូច​គ្នា​ពី​ខែ​មករា​ដល់​ខែ​កញ្ញា ដោយ​ទទួលបាន​ករណី​រំលោភ​កុមារ​១៧០ករណី​ក្នុង​រយៈពេល​ប្រាំបួ​នខែ​នេះ ​ដែល​​ក្នុង​នោះ​មាន​បី​ករណី​គឺ​ជា​ករណី​រំលោភ​ ហើយ​សម្លាប់។

លោក​ស្រី លី វីជុតា ប្រធាន​អង្គការ​ជំនួយ​​​​​​​​ផ្លូវ​ច្បាប់​ដល់​កុមារ​និង​ស្ត្រី​​មាន​ប្រសាសន៍ថា បញ្ហា​រំលោភ​កុមារ​នៅ​កម្ពុជា និង​ការ​ទទួល​យក​របស់​សាធារណជន​ចំពោះ​បញ្ហា​នេះ ​កើត​ចេញ​​ពីបទដ្ឋាន​យេនឌ័រ​ហួស​សម័យ ខ្វះ​ការ​អប់​រំ​ ភាព​ក្រី​ក្រ និង​ប្រហែល​ជា​​មក​ពី​​ការ​សេព​សុរាដោយ​ផ្ទាល់​តែ​ម្តង។ លោកស្រី វីជុតា បាន​មាន​ប្រសាសន៍ថា “នៅពេល​យើង​សួរ​ជន​ល្មើស​ពី​មូលហេតុ​ដែល​ពួកគេ​ចាប​់​រំលោភ​ស្ត្រី​ ពួកគេ​និយាយ​​​ថា ខ្ញុំ​ស្រវឹង​ស្រា បាន​ជា​ខ្ញុំ​រំលោភ”។ លោក​​​ស្រី​​​​បាន​ប​ន្ថែមថា យោង​តាម​ទិន្នន័យ​របស់​អង្គការ​ជំនួយ​ផ្លូវ​ច្បាប់​ដល់​កុមារ​និង​ស្ត្រី​ ជន​រងគ្រោះ​ពី​ការ​រំលោភ​ប្រហែល​៦០ភាគ​​​រយ​​​គឺ​ជា​អនីតិជន​។

លោកស្រី​បាន​មាន​ប្រសាសន៍បន្ថែម​​​ទៀត​​​​​​ថា ខណៈ​ដែល​ករណីរំលោភ​បន្ត​កើន​ឡើង​ជា​រៀង​រាល់​ឆ្នាំ​នោះ គេ​មិន​អាច​ប្រាប់​ថា តើ​​​​បញ្ហា​នេះ​ គឺ​ដោយ​សារតែ​មាន​ការ​រាយ​​​​​​​​​ការ​ណ៍ ឬ​ដោយសារការ​កើនឡើង​​​​​​បទ​ល្មើស​នេះ​​​ទេ។ លោកស្រី វីជុតា​ ក៏បាន​បញ្ជាក់ដែរថា ករណី​រំលោភ​កុមារ​ជាច្រើន​មិនត្រូវ​បាន​គេ​រាយ​ការ​ណ៍ទេ ពីព្រោះជារឿយៗ​ជន​ល្មើស​ និ​ង​ជន​រគ្រោះគឺ​ជា​សមាជិក​គ្រួសារតែ​មួយ​ ហើយ​ដោយសារ​បញ្ហា​នេះ​ហើយ​បាន​ជា​ជួន​កាល​មិន​មាន​ការ​ដាក់​ពាក្យ​ប​ណ្តឹងទៅ​អាជ្ញាធរ។

លោក​ស្រី​បានមាន​ប្រសាសន៍ថា​ “គ្រួសារ​​​​មួយ​ចំនួន​នៅតាម​តំបន់​ដាច់​ស្រយាល ប្រសិន​​​​​​​​​​​​​បើលោក​អ្នក​និយាយ​អំពី​ការ​រំលោភ​កុមារ​ វា​​​ធ្វើឲ្យ​បាត់បង់​កេរ្តិ៍ឈ្មោះ​របស់​គ្រួសារ​នោះ”។ ករណី​រំលោភ​កុមារដែល​​ត្រូវ​បាន​រាយ​ការណ៍​នា​ពេល​ថ្មីៗ​នេះ​​បង្ហាញឲ្យ​​​ឃើញ​​​អំពី​ភាព​ត្រឹម​ត្រូវ​​នៃ​ការ​លើក​ឡើង​របស់​លោក​​​ស្រី វីជុតា។

លោក ស៊ាង ម៉ាលី អធិការ​នគរ​បាល​ស្រុក​​​​​​​ទ្រាំង​ បាន​មាន​ប្រសាសន៍​ថា ចេង សឿន អាយុ​​​​៤១​ឆ្នាំ ជា​កសិករ​រស់​នៅ​ក្នុង​ស្រុក​ទ្រាំង​ ខេត្ត​តាកែវ ត្រូវ​បាន​ចាប់​ខ្លួន​កាលពី​ថ្ងៃ​សៅរ៍ ពី​បទ​​​​​​​វាយ​ប្រពន្ធ​ និង​កូន​ស្រី​របស់​ខ្លួន ហើយ​បន្ទាប់​មក​បាន​រំលោភ​កូន​ស្រី​ចុង​អាយុ​១៥​ឆ្នាំ​របស់​ខ្លួន​ទៀត។ លោក​បាន​មាន​ប្រសាសន៍​កាលពី​ម្សិល​​​មិញ​ថា “បន្ទាប់ពី​ជន​នេះ​ត្រូវ​បាន​ចាប់​ខ្លួន​រួច​ហើយ ជន​សង្ស័យ​រូប​នេះ​បាន​សារភាព​ថា ខ្លួន​បាន​រំលោភ​កូនស្រី​ចុង​របស់​ខ្លួន​ជាច្រើន​ដង​ចាប់តាំង​ពី​នាង​មាន​អាយុ​១០​ឆ្នាំ”។

លោក​ សាន សាក់ នាយ​ប៉ុស្តិ៍​នគរ​បាល​សង្កាត់​ពន្ធសាំង បាន​មាន​ប្រសាសន៍​កាល​ពី​ម្សិលមិញ​ថា នៅ​ក្នុង​ករណី​ដោយ​ឡែក​មួយ​ទៀត​​ ឈ្មោះ ជុច សុខា អាយុ​៣២​ឆ្នាំ​ ដែល​ធ្វើការ​ងារ​តូច​តាច​នៅ​ក្នុង​ខណ្ឌ​ពោធិ៍​សែន​ជ័យ ក្រុង​ភ្នំពេញ ត្រូវ​បាន​ចោទ​ប្រកាន់​កាល​​​ពី​ម្សិល​មិញ​ពីបទ​ចាប់​រំលោភ​កូនស្រី​ចុង​អាយុ​​​​​​​១៣​ឆ្នាំ​របស់​ខ្លួន​ចំនួន​បួន​ដង​ ហើយ​ការ​រំលោភ​នាពេល​ថ្មីនេះ​គឺ​នៅ​ថ្ងៃ​ទី​២៨ ខែ​តុលា។

លោក​បាន​មាន​ប្រសាសន៍​ថា “ជន​នេះ​បាន​រំលោភ​កូនស្រី​ចុង​របស់​ខ្លួន​ចំនួន​បួន​ដង​ ពេល​ជន​រង​គ្រោះ​នៅ​​​ផ្ទះ​​តែ​ពីរ​នាក់​ជន​ល្មើស។ ជន​សង្ស័យ​រូប​នេះ​តែង​តែ​ស្រវឹង​ស្រា​​ [នៅ​ពេល​រំលោភ​ម្ដង​ៗ]”។​

កាល​ពីថ្ងៃអង្គារ តុលា​ការ​ខេត្ត​ក្រចេះ បាន​ចោទ​ប្រកាន់​ជាង​ជួស​ជុល​ម៉ូតូ​អាយុ​២១​ឆ្នាំ​ម្នាក់​ពីបទ​រំលោភ​ក្មេង​ស្រី​អាយុ​២ឆ្នាំ​ម្នាក់​នៅ​ក្នុង​ផ្ទះ​របស់ខ្លួន។
លោកស្រី វីជុតា បាន​ចូល​រួម​នៅ​ក្នុង​ការ​អំពាវ​នាវ​ឲ្យ​មាន​យុទ្ធនាការ​ទូទាំង​ប្រទេស​ដើម្បី​អប់​រំ​ប្រជា​ពល​រដ្ឋ​អំពី​ភាព​ធ្ងន់​ធ្ងរ​នៃ​​​ការ​រំលោភ​កុមារ ប៉ុន្តែ​បាន​មាន​ប្រសាសន៍​ថា កង្វះ​មូលនិធិ​គឺ​ជា​ឧបសគ្គ​ចំពោះ​ការ​ខិត​ខំ​​​ប្រឹង​ប្រែង​បែប​នេះ។

លោកស្រី​បាន​មាន​ប្រសាសន៍​ថា “យើង​មិន​អាច​ធ្វើ​យុទ្ធនាការ​ទូទាំង​ប្រទេស​បាន​ទេ ពីព្រោះ​យុទ្ធនាការ​ត្រូវ​ចំណាយ​លុយ​ច្រើន និង​ត្រូវ​ការ​ធនធាន​មនុស្ស​ផង​ដែរ​”។ លោក​​​ស្រី​បាន​បន្ថែម​ថា កម្ពុជា​ក៏​​​ខ្វះ​ជំនាញ​​ប្រមូល​តួលេខ​ពាក់​ព័ន្ធ​នឹង​ការ​រំលោភ​ ករណី​រំលោភ​កុមារ​ និង​ករណី​រំលោភ​ហើយ​សម្លាប់​​ដែរ​។លោកស្រី​បាន​មាន​​ប្រសាសន៍​ថា “នគរ​បាល​ តុលាការ អង្គការ​ក្រៅ​រដ្ឋាភិបាល​​សុទ្ធ​តែ​មាន​តួលេខ​ខុស​ៗ​គ្នា”។

លោកស្រី ខៀវ សេរីសុធា អគ្គនាយិកា​​ក្រសួង​កិច្ច​ការ​នារី​​​បាន​ទទួល​ស្គាល់​កាលពី​ម្សិលមិញ​ថា ក្រសួង​មិន​បាន​ប្រមូល​ទិន្នន័យ​បែប​នេះ​ទេ​។
លោកស្រី​​មាន​ប្រសាសន៍​ថា “យើង​មាន​ភារកិច្ច​ប្រមូល​ទិន្នន័យ​​  ប៉ុន្តែ​យើង​កំពុង​ដំណើរ​​​​ការ​បង្កើត​ប្រព័ន្ធនៅ​ឡើយ”៕ គឹមហឿន​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស