លោក ឈាង វុន សមាជិកសភាគណបក្សប្រជាជនកម្ពុជាកាលពីម្សិលមិញ បានលើកសរសើរអំពីផលប្រយោជន៍សេដ្ឋកិច្ច និងសង្គមនៃការរានព្រៃនៅក្នុងប្រទេសកម្ពុជាសម្រាប់គម្រោងអភិវឌ្ឍន៍។
លោក ឈាង វុន ដែលជាអ្នកនាំពាក្យរបស់រដ្ឋសភាផងដែរបានមានប្រសាសន៍ប្រាប់ក្រុមអ្នកយកព័ត៌មាននៅឯរដ្ឋសភា បន្ទាប់ពីជំនួបមួយជាមួយលោក ងូអាញ់ ហ្ស៊ុង (Ngo Anh Dzung) ឯកអគ្គរដ្ឋទូតវៀតណាមថា ការការពារដីព្រៃឈើ គឺសំខាន់ ក៏ប៉ុន្តែ មិនសំខាន់ជាងការអភិវឌ្ឍសេដ្ឋកិច្ចទេ។
លោក ឈាង វុន បានឲ្យដឹងថា “យើងត្រូវការថ្លឹងថ្លែងពីផលវិបាកនៃការកាប់ព្រៃឈើ នោះជាអ្វី ដែលយើងអាចទទួលបានពីការកាប់ព្រៃឈើសម្រាប់បម្រើផលប្រយោជន៍ប្រជាពលរដ្ឋ”។ លោកបន្ថែមថា ទំនប់សេសានក្រោម២ នៅក្នុងខេត្តស្ទឹងត្រែង គឺជាគំរូចម្បងមួយនៃការអភិវឌ្ឍសេដ្ឋកិច្ចកើនឡើងពីការកាប់ព្រៃឈើ។ លោក ឈាង វុន បានថ្លែងថា “ទំនប់វារីអគ្គិសនីគឺសំខាន់ណាស់សម្រាប់ការអភិវឌ្ឍឧស្សាហកម្ម” ។ លោកបន្ថែមថា ពន្ធប្រមូលពីឧស្សាហកម្មថ្មីនេះ នឹងនាំ “ មកនូវប្រាក់ចំណូលបន្ថែមទៀតសម្រាប់រដ្ឋ និងសម្រាប់គ្រួសារប្រជាពលរដ្ឋ”។
លោកបានថ្លែងបន្តទៀតថា រដ្ឋាភិបាលមិនអាចអនុញ្ញាតឲ្យជនណាម្នាក់បញ្ឈប់ការវិវឌ្ឍនេះបានឡើយ។ លោកបានមានប្រសាសន៍ថា “ ប្រសិនបើពួកគេមិនចង់ឲ្យយើងកាប់ព្រៃឈើ ហើយបញ្ឈប់ការអភិវឌ្ឍសេដ្ឋកិច្ច យើងមិនអាចទទួលបានឡើយ”។
កាលពីខែមុន ទីស្តីការគណៈរដ្ឋមន្ត្រីបានបញ្ជាឲ្យឈប់កាប់ឈើក្នុងការត្រៀមរៀបចំសម្រាប់ការសាងសង់ទំនប់សេសានក្រោម២ នៅក្នុងស្រុកសេសាន បន្ទាប់ពីមានការចោទប្រកាន់ពីមេឃុំម្នាក់ថា ក្រុមហ៊ុននេះទទួលបានកិច្ចសន្យាឲ្យរានព្រៃឈើ គឺជាឈើកាប់ដោយខុសច្បាប់នៅខាងក្រៅព្រំប្រទល់ដីសម្បទានទំនប់នេះ។ លោក ឈាង វុន បានសន្យាថា ទីបញ្ចប់ទំនប់សេសាននឹងវិវឌ្ឍទៅមុខ បើទោះជាមានការអំពាវនាវឲ្យលុបចោលគម្រោងនេះក៏ដោយ។
លោក ធន សារ៉ាត់ អ្នកនាំពាក្យរបស់រដ្ឋបាលព្រៃឈើបានឲ្យដឹងថា ការបង្កើតគណៈកម្មាធិការមួយ ដើម្បីស៊ើបអង្កេតការកាប់ឈើខុសច្បាប់ក្នុងស្រុកសេសាន និងការបោះព្រំសីមា តំបន់សម្បទាននេះ កំពុងតែបន្ត។ លោក សារ៉ាត់ បានឲ្យដឹងទៀតថា “ យើងនឹងសហការជាមួយសហគមន៍អំពីអ្វីដែលនឹងកើតឡើង និងអំពីរបៀបទប់ស្កាត់ការកាប់ឈើខុសច្បាប់”។
ទំនប់សេសានក្រោម២ ត្រូវបានទទួលរងការរិះគន់ពីសហគមន៍មូលដ្ឋាន អង្គការក្រៅរដ្ឋាភិបាល និងអ្នកជំនាញបរិស្ថានផងដែរ។ ដោយត្រៀមបណ្តេញប្រជាជនជាង៥.០០០នាក់នៅក្នុងស្រុកសេសាន ក្រុមអ្នកជំនាញផ្នែកបរិស្ថានបានលើកឡើងថា ផលប៉ះពាល់របស់ទំនប់នេះចំពោះការនេសាទនៅមូលដ្ឋាន អាចប៉ះពាល់ដល់ប្រជាពលរដ្ឋជាង១០មឺុននាក់ ដែលរស់នៅខាងលើ និងខាងក្រោមទន្លេដោយសារតែទំនប់នេះ។
លោក ឈិត សំអាត នាយកវេទិកាអង្គការក្រៅរដ្ឋាភិបាលបានលើកឡើងថា រដ្ឋាភិបាលបារម្ភតែពីការអភិវឌ្ឍសេដ្ឋកិច្ចប៉ុណ្ណោះ ក៏ប៉ុន្តែ មិនបារម្ភអំពីការអភិវឌ្ឍសង្គមនោះទេ។ លោក សំអាត បានសួរថា “ប្រសិនបើយើងនិយាយអំពីការអភិវឌ្ឍ តើការអភិវឌ្ឍនេះសម្រាប់នរណា? ប្រសិនបើប្រជាពលរដ្ឋនិយាយថា ពួកគេមិនចង់បានការអភិវឌ្ឍដែលធ្វើឲ្យប៉ះពាល់ដល់ជីវភាពរបស់ខ្លួន និងព្រៃឈើ ព្រមទាំងផលប៉ះពាល់ទៅលើការប្រែប្រួលអាកាសធាតុ ហើយភាគច្រើនក្នុងចំណោមពួកគេនិយាយថា ពួកគេមិនត្រូវការការអភិវឌ្ឍបែបនេះនោះ ខ្ញុំគិតថា យើងត្រូវតែស្តាប់ពួកគេឲ្យបានប្រុងប្រយ័ត្ន”៕ប៊ុននី