ក្រុមមន្ត្រីបានឲ្យដឹងថា កងរាជអាវុធហត្ថបានចាប់ខ្លួនបុរសម្នាក់នៅក្រុងស្ទឹងត្រែងកាលពីម្សិលមិញ ដោយសាររត់ពន្ធក្បាល និងជើងសត្វរមាំង ជាសត្វព្រៃមួយប្រភេទមើលទៅដូចជាពពែ និងឈ្លូស។
លោកឧត្តមសេនីយ៍ត្រី ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសបានឲ្យដឹងកាលពីម្សិលមិញថា “ នេះជាលើកទី ១ហើយ ដែលកងរាជអាវុធហត្ថរបស់យើងរឹបអូសបានក្បាលសត្វព្រៃកម្រចំនួនប្រាំនេះរាប់ទាំងជើងចំនួន២០ទៀតផង”។
ជនសង្ស័យឈ្មោះ អ៊ូ វ៉ាន់ឌី អាយុ៤០ឆ្នាំបានរត់ពន្ធក្បាល និងជើងសត្វនេះចូលក្នុងប្រទេសកម្ពុជា ពីប្រទេសឡាវដាក់ក្នុងឃ្លុបខាងក្រោយនៃរថយន្ត តូយ៉ូតា ទុនដ្រា (Toyota Tundra) ឲ្យអ្នកទិញម្នាក់នៅរាជធានីភ្នំពេញដែលគេមិនទាន់ស្គាល់ឈ្មោះនៅឡើយ។ លោកឧត្តមសេនីយ៍ត្រី ខេង ទីតូ បានមានប្រសាសន៍ថា “ ក្បាល និងជើងសត្វរមាំងអាច ត្រូវគេប្រើដើម្បីធ្វើឱសថបុរាណ”។
នគរបាលព្រំដែននៅឯប៉ុស្តិ៍ត្រួតពិនិត្យត្រពាំងគ្រៀល ក្នុងខេត្តស្ទឹងត្រែងបានឲ្យដឹងថា បើទោះជាពួកគេបានរកឃើញជើង និងក្បាលរបស់សត្វរមាំងចំនួនប្រាំក្បាលក៏ដោយ ក៏ពួកគេមិនបានចាប់ខ្លួនជនសង្ស័យឈ្មោះ វ៉ាន់ឌី ទេ ពីព្រោះពួកគេមិនបានគិតថា ជននេះរត់ពន្ធសត្វនោះទេ។ លោកវរសេនីយ៍ទោ រស់ ដាត ដែលទទួលបន្ទុកប៉ុស្តិ៍ត្រួតពិនិត្យព្រំដែនបានលើកឡើងថា “យើងបានរកឃើញសត្វទាំងនោះដែរ ប៉ុន្តែ វាមិនមែនជាការរត់ពន្ធនោះទេ ពីព្រោះក្បាលសត្វ និងជើងរមាំងវាតូចតាចប៉ុណ្ណោះ ហើយវាសម្រាប់ធ្វើជាឱសថបុរាណ ហើយអ្នកដែលមកពីភ្នំពេញបានសួររកឱសថនេះ នេះបើតាមអ្នកបើកបរបានប្រាប់យើង”។ កងរាជអាវុធហត្ថខេត្តស្ទឹងត្រែងក្រោយមកបានធ្វើការចាប់ខ្លួន៕ប៊ុននី